रोमी 12:12 - जिरेल

¹² थेमे परमेश्‍वरगी ख्‍योकोनगी आश खाईन देता च्‍योकराङ खित्‍च्‍येते ईन्‍देकी ख्‍योकोन गा खिन गुला देत। ज्‍येनगी दुक्‍पा तेरजीन थेमे आपत् विपत् आइ परे खित्‍जीन सेम मेसेता खाला देत। परमेश्‍वरताङ प्रार्थना खिन देता नोमुङ मातोङ।

रोमी 12:12 Iomraidhean Croise

मत्ती 5:12

थेबेकी थोक खित्‍जीन ख्‍योकोन आउदी खाला गा खि। च्‍यिला सासीन स्‍वर्गने ख्‍योकोनगी छ्येज्‍यीक इनाम ङेत्‍क्‍यो। थाङबोबा परमेश्‍वर बात खित्‍कान्‍ते मिओनलाङ थे बेले मिओनगी खेदापानीराङ खाबा ओतान।

लूका 10:20

ल्‍हन्‍डीकओनगी ख्‍योकोनगी कोताते ङेन्‍दा थोङजीन गा लासुङ मेन? गा खित्‍च्‍येते बातचेन दिराङ मेन। परमेश्‍वरगी तिरी थे खोरोङताङ देता ङेत्‍कान्‍ते मिओन नाङ स्‍वर्गने ख्‍योकोन मिनोङ टिबा ओत। गा खिता फाप्‍च्‍येते बातनी दिका ईन,” सिन सिदुक।

लूका 21:19

थोक थोक दुक्‍पा ओङजीनोङ सेम मेसेता खाईन ङाला विश्‍वास खिन देत्‍सीन ख्‍योकोनगी नोमुङ मिसिन्‍च्‍येते जुनी ङेत्‍क्‍यो।

लूका 8:15

कोई कोईकीचेन परमेश्‍वर बात थोनामेई आउदी लेमु खाला ङेन्‍ग्‍यो। थेबेकी खोपरोङला जे ओङसीनोङ थे बात ङेन्‍दा मोतोङा खाला लेमु काम खिन देत्‍क्‍यो। सबी लेमु ओत्‍साला फापाते सोन साबातेचेन होथोक्‍ते मिओनला साबाते ईन।

शक्ति काम 1:14

थेबाताङ थेरू गोमा येशूताङ ख्‍याम्‍कान्‍ते फेम्‍मे मिओन, येशू आमा मरियम थेमे येशू न्‍वातेबाङ ओतान। थेबाबरी गाङेराङ ङ्योम्‍बुराङ परमेश्‍वरला प्रार्थना खिन देत्‍कीन ओतान।

शक्ति काम 12:5

थोक खाईन थेला जेलदु लुक्‍नामेई येशू ख्रीष्‍ट मिओनचेन गाङेराङ रूला थे लाईदु परमेश्‍वरला आउदी खाला प्रार्थना खिन ओतान।

शक्ति काम 2:42

येशूला विश्‍वास खित्‍कान्‍तेबेकी येशू ख्रीष्‍टकी खटे खाबाते मिओनगी लापाते बातओन लेमु खाला ङेन्‍गीन ओतान। थेबा ङ्योम्‍बुराङ डिक्‍ला देत्‍च्‍येते, प्रभु भोज साच्‍येते थेमे परमेश्‍वरला प्रार्थना खित्‍च्‍येते खिन ओतान।

शक्ति काम 6:4

ङ्योकोन ङेराङचेन खालि प्रार्थना खित्‍च्‍येते थेमे परमेश्‍वर बात लोप्‍च्‍येते कामकामा खिओ,” सिन बात खासुङ।

रोमी 15:13

थे खोरोङगी साबाच्‍योक खिओ सिन आश खाला देत ज्‍युत्‍कान्‍ते परमेश्‍वरराङ ईन। थेला विश्‍वास खित्‍कान ईन्‍देकी थेकी ख्‍योकोन गाङेला आउदी खाला गा खिन थेमे डिक्‍ला थुन्‍ला देत ज्‍युत्‍स्‍यीत सिन ङा प्रार्थना खिओ। थेकी थोक खानामेईचेन परमेश्‍वर आत्‍मे शक्ति छ्य्‌वापेकी ख्‍योकोन था परमेश्‍वरगी ङुरूङला खिओ साबाच्‍योक खिओतराङ सिन छ्याःङ शंका मिक्‍किता खाला झन आश खाला गुला देता थुप्‍क्‍यो।

रोमी 15:4

परमेश्‍वर बातला गोमाबा टिबा ओताते गाङे बात ङुरूङगी खइँदा लोप्‍स्‍यीत सिन टिबाते ईन। थे बात ताजीन ङुरूङगी ज्‍येनतेबे ख्‍याल ज्‍य्‌वाजीन दुक्‍पा ओङसीनोङ चुक खाला सेम मेसेता खाला काम खिन देता फाप्‍च्‍या ईन्‍दाका सिन छ्या स्‍येक्‍यो। थेमे परमेश्‍वरगी खिओ साबाच्‍योक पक्‍काराङ खिओ सिन आश खाला गुलाराङ देता थुप्‍क्‍यो।

रोमी 2:7

था तिरी परमेश्‍वरगी खोपरोङला थेकी ज्‍वा चाला च्‍योकराङ लेमु जोइओ थेमे मान बिन्‍ला नोमुङ मिस्‍यिच्‍येते जुनी तेरग्‍यो सिन थेकी साबाते ङेन्‍ला लेमु कामकामा खिन देत्‍कान्‍ते मिओनलाचेन थेकी नोमुङ मिसिन्‍च्‍येते जुनी तेरग्‍यो।

रोमी 8:25

थोगी परमेश्‍वरगी ङुरूङ लाईदु खिओ साबाते थेकी ङीमाई गाङे साबा च्‍योकराङ खिओ सिन ङुरूङ सेम मेसेता खाईन गुकीनराङ देता ओत।

१ कोरिन्‍थी 13:13

ज्‍येनतोक गाङे ङीमा लेनज्‍यीक छ्याःङ काम लै मिक्‍किच्‍या गाल्‍सीनोङ परमेश्‍वरला विश्‍वास खित्‍च्‍येते, थेकी ङुरूङला तेरग्‍यो साबाते ङेत्‍क्‍यो सिन खित्‍च्‍येते आश थेमे ज्‍येनला ङिङज्‍ये खित्‍च्‍येते दि बात सुमचेन नोमुङ छ्याःङ काम लै मिक्‍किच्‍या मोन्‍डोओ। दि बात सुमगी नाङदुङ छ्येते बातचेन ज्‍येनला ङिङज्‍ये खित्‍च्‍येतेराङ ईन।

२ कोरिन्‍थी 12:8

दि सुक ठाक्‍पा खाला नाङ सिन ङे बाजि सुमसाक प्रभु येशूला प्रार्थना खाबाप।

फिलिप्‍पी 3:1

थेमे ज्‍येन बात च्‍यि सासीन आज्‍यो न्‍वावे, ख्‍योकोन प्रभु ख्रीष्‍टताङ जीउज्‍यीकराङ ओङा ओताते मि ईन्‍देकी गा खि। ङा ख्‍योकोनला ङे गोमामेई याङ याङ सिन वाबाते बातराङ टिगीन ओत। बातज्‍यीकराङ याङ याङ टिक्‍पा फाप्‍सीनोङ ङाला छ्याःङ दिक्‍क लाबा मेत। ङे टिबाते बात पढे खाला ख्‍योकोनगी चुक खिता फाप्‍च्‍या ईन्‍दाका सिन लेमु खाला छ्या स्‍येक्‍यो।

फिलिप्‍पी 4:4

थेमे प्रभु येशूताङ जीउज्‍यीकराङ ओङाते मि ईन्‍देकी दुक्‍पा किम्‍मु जस्‍तो ओङजीनोङ ख्‍योकोन जहिलेङ गा खि। ख्‍योकोन गा खि सिन ङा याङराङ सिओ।

कलस्‍सी 1:11

दोस्‍यिककामा मेन, जस्‍तो ओङसीनोङ सेम मेसेता खाला गा खिन जस्‍तो दुक्‍पाङ खपे खिन देताला परमेश्‍वरगी ख्‍योकोनला थे खोरोङ छ्येज्‍यीक शक्ति तेरस्‍यीत

कलस्‍सी 1:27

ज्‍येन ज्‍येन जातकी मिला चुक अचम्‍ब खाला आशी बिन्‍ला लेमु खिते सिरच्‍येते बात थे खोरोङ सन्‍तानओनगी छ्या स्‍येबा फाप्‍क्‍यो सिन परमेश्‍वरगी थेबाला छ्या स्‍ये च्‍युत्‍कीन बिन्‍सुङ। परमेश्‍वरगी गोमा छ्या स्‍ये च्‍युता मेताते होथे बात च्‍यि ईन्‍दे सासीन ख्रीष्‍टचेन ख्‍योकोन ज्‍येन ज्‍येन जातकी मि सेमगी नाङ देत्‍क्‍यो। थे थोक खाईन ख्‍योकोन सेमगी नाङ देत्‍नामेई परमेश्‍वरगी तिरी ख्‍योकोनला मान बिन्‍ला थे खोरोङगी ज्‍वा चाला च्‍योकराङ लेमु जोइओ सिरच्‍येते बात पक्‍काराङ दुका सिन आश खाला गुला देता थुप्‍क्‍यो।

कलस्‍सी 4:12

थोकराङ खाला खेराङ युलगी मि इपाफ्रासतेङ ख्‍योकोनला नमस्‍ते ओत्‍लो। थेङ येशू ख्रीष्‍ट काम खित्‍कान्‍ते मिराङ ईन सिन ख्‍योकोनला छ्याराङ ओत। ख्‍योकोन काम बात जे कुरोलाङ पाको गालाते मि ओङस्‍यीत थेमे परमेश्‍वरगी खेराङला च्‍यि खि सिका सिन लेमु खाला छ्या स्‍येला खि साबा च्‍योकराङ खित्‍स्‍यीत सिन दिकी ख्‍योकोन लाईदु परमेश्‍वरताङ आउदी खाला प्रार्थना खिदुक।

कलस्‍सी 4:2

थेमे ख्‍योकोन गाङेकी परमेश्‍वरला प्रार्थना खिन देता नोमुङ मातोङ। प्रार्थना खित्‍जीन खेराङ परमेश्‍वरताङ बात खिन ओत सिन छ्या स्‍येबा खि, थेला धन्‍यवादोङ बिन।

१ थिस्‍सलोनिकी 1:3

धन्‍यवाद सिरजीनराङ ख्‍योकोनगी येशू ख्रीष्‍टला विश्‍वास खाईन लेमु काम खिताला स्‍यूबाते थेमे ज्‍येनला ङिङज्‍ये खिन झन झन लेमु खाबाते बातकी लाईदु ङुरूङ आबा परमेश्‍वरला धन्‍यवाद सिओ। थे लाईदुकामा मेन, था ङीमाई ङुरूङ प्रभु येशू ख्रीष्‍ट ग्‍युरला ओङगो सिन आश खाईन गुकीन देता ओतेकी जस्‍तो दुक्‍पा ओङसीनोङ ख्‍योकोन सेम मेसेता खाईन देता ओताते बातकी लाईदुङ ङ्योकोन थेला धन्‍यवाद सिओ।

१ थिस्‍सलोनिकी 5:8

ङुरूङचेन परमेश्‍वर नाम्‍दाकला देत्‍कान्‍ते मि ईन्‍देकी होस तोराते मि च्‍योक ओङा मेङगो। बरू च्‍याङबो खाला देत्‍ला प्रभु येशूला विश्‍वास खिन थेमे ज्‍येनला ङिङज्‍ये खिन देता फाप्‍क्‍यो। दोक खिन देत्‍च्‍येतेचेन लडाइँ बेलाला मिल्‍टेरीओनगी ठाङला खोन्‍च्‍येते च्‍याकी पाता खोन्‍दा च्‍योकराङ ईन। थेमे ङुरूङगी आश खाईन देता च्‍योकराङ था तिरी पापकी सजाय भोगे खिता माफाबो सिनोङ टोक ज्‍येता मेङगो। थोक खित्‍च्‍येतेचेन मिल्‍टेरीओनगी गोःला च्‍याकी टोप खोन्‍दा च्‍योकराङ ईन।

२ थिस्‍सलोनिकी 1:4

थेमे ज्‍येनगी खेराङला खेदा खाईन जति दुक्‍पा बिन्‍सीनोङ थेमे जति दुक्‍पा भोगे खिता फाप्‍सीनोङ ख्‍योकोनगी सेम मेसेता खाईन प्रभु येशूला विश्‍वास खिनराङ देताते बात ठाउँ ठाउँला जम्‍मा ओङकान्‍ते परमेश्‍वर मिओनला ङ्योकोन गा खिनकामा लाःप्‍कीन ख्‍याम्‍ग्‍यो।

२ थिस्‍सलोनिकी 3:5

थेमे परमेश्‍वरगी खेराङला थोई ङिङज्‍ये खित्‍च्‍या ईन्‍दाका सिन ख्‍योकोनगी झन लेमु खाला छ्या स्‍येस्‍यीत थेमे जतिराङ दुक्‍पा ओङसीनोङ ख्रीष्‍टकी च्‍योकराङ सेम मेसेता खाला दुक्‍पा खपे खिन देता थुप्‍स्‍यीत सिन ङ्योकोन प्रभु येशू ख्रीष्‍टताङ प्रार्थना खिओ।

१ तिमोथी 6:11

तर खोचेन परमेश्‍वरगी खि साबाते काम खित्‍कान्‍ते मि ईन। थोगी खुई थोक्‍ते मेलेबा काम छ्याःङ माकेत। खुईचेन परमेश्‍वरगी खि साबा च्‍योकराङ खिन देत, थेला चुक खाला माने खिता फाप्‍च्‍येते ईन्‍दे थोकराङ खाला माने खि, येशू ख्रीष्‍टला विश्‍वास खिन देत। दोस्‍यिककामा मेन, ज्‍येनला ङिङज्‍ये खि, दुक्‍पा ओङसीनोङ खपे खिन देत थेमे गाङेताङ खा छ्येत लेमु खि। खुई होदोक दोक खित्‍च्‍ये छ्य्‌वापाकामा सेम लै खि।

२ तिमोथी 3:10

बात दोक दोक ईन्‍सीनोङ ङे बातचेन गाङे खोल्‍ला लेमुराङ खाला छ्या ओत। च्‍यि सासीन सत्‍यते बात लोप्‍जीन ङे च्‍यि बात चुक खाईन लापा ओताने, ङे चुक चुक खाबा ओताने थेमे ङे ङाराङ जुनी खाङ च्‍यि खिता चाला ओताने सिन खोल्‍ला छ्याराङ ओत। दोस्‍यिककामा मेन, ङे येशूला चुक खाला विश्‍वास खिन ओताने, ङा चुक खाला ज्‍येनताङ स्‍येदाङ मिक्‍किता खाला देत्‍कीन ओताने, ज्‍येनला चुक खाला ङिङज्‍ये खिन ओताने थेमे जस्‍तो दुक्‍पा ओङसीनोङ ङे चुक खाला खपे खिन ओताने सिन गाङे बात खुई छ्या स्‍येबाराङ ओत।

तीतस 2:13

थेमे ङुरूङला पापदुकी डेल्‍कान्‍ते छ्येज्‍यीक शक्ति ओताते परमेश्‍वर येशू ख्रीष्‍ट था तिरी स्‍वर्गनेकी मिगी तापराङ मुथुप्‍च्‍या झिलिमिली नाम्‍दाकला देत्‍ला देमा ग्‍युरला ओङगो सिन ङुरूङ आश खाला गुला देत्‍क्‍यो। दिराङ ङुरूङ लाईदु आउदी गा लाङच्‍येते बात ईन।

तीतस 3:7

दोक खाईन थेकी ङुरूङला दया खाईन दोषी मेन सिन साबा ओतेकी ङुरूङगी आश खाईन गुकीन देताते थेकी तेरग्‍यो साबाते नोमुङ मिसिन्‍च्‍येते जुनी ङेत्‍च्‍या ओङा ओत।

हिब्रू 10:32

थेमे गा लाङच्‍येते बात ङेन्‍दाला स्‍यूनामेई खेराङगी चुक चुक्‍तेन्‍दे दुक्‍पा भोगे खिता फापा ओताने होथे गोमे बाततेबा ठेम्‍बा खि। थे बात ङेन्‍नामेई ङेतासम्‍म दुक्‍पा ङेत्‍जीनोङ ख्‍योकोनगी थे बात ङेन्‍दा बान्‍दा ताङा मेतान।

हिब्रू 10:36

परमेश्‍वरगी खित ज्‍युता चाला च्‍योकराङ खिता थुप्‍स्‍यीत सिन जस्‍तो दुक्‍पा ओङसीनोङ ख्‍योकोन सेम मेसेता खाला देता फाप्‍क्‍यो। दोक खिन देत्‍सीनकामा थेकी तेरग्‍यो सिन साबाते जति ख्‍योकोनगी ङेत्‍क्‍यो।

हिब्रू 12:1

परमेश्‍वरला सु सुकी चुक खाईन विश्‍वास खासुङा सिन ङोला ङ्वा मुथुप्‍च्‍या मि बात छ्या स्‍येनामेकी था ङुरूङगी परमेश्‍वरगी दाक्‍पोनला लेपा फाप्‍क्‍यो सासासाक लेपाला जस्‍तो ओङसीनोङ सेम मेसेता खाला जुनी खाङ थेला विश्‍वास खिन देता फाप्‍क्‍यो। दाक्‍पोनला दोक खिताला रोके खित्‍च्‍येते कामताङ बात खिता ङुरूङगी गाङे तोङा फाप्‍क्‍यो। पाप खिता तोङा दुक्‍पा ओत्‍सीनोङ पाप खिताङ ङुरूङगी पूरो खाला तोङा फाप्‍क्‍यो।

हिब्रू 3:6

ख्रीष्‍टकीङ थे खोरोङ काम लेमु खाईन खाबा ओतान। तर थेचेन मोशा च्‍योक्‍ते मेन। मोशा सुइँदे खाम्‍बादु काम खित्‍कान्‍ते मि च्‍योक ओतान सासीन ख्रीष्‍टचेन होथे खाम्‍बे धनी फुज्‍युङ च्‍योकराङ ईन। थेमे ङुरूङचेन थे खाम्‍बे मि ईन। थोक ईन्‍सीनोङ जस्‍तो ओङजीनोङ ज्‍यीबा मिक्‍किता खाईन थेमे सेम मेसेता खाईन परमेश्‍वरगी था तिरी दाक्‍पोनला तेरग्‍यो साबाते गाङे ङेत्‍क्‍यो सिन थेला विश्‍वास खिन देत्‍सीनकामा ङुरूङ थे खाम्‍बे मि ईन।

हिब्रू 5:7

दुरू ओत ओतसाक येशूकी कालगी लाःक्‍तुकी थे खोरोङला जोए खिता थुप्‍कान्‍ते परमेश्‍वरला ङुइन थेमे ङोरोराङ तेन्‍गीन प्रार्थना खासुङ। थेकी थे खोरोङ लाईदु परमेश्‍वरला बिन्‍तीङ खासुङ। थे परमेश्‍वरगी जस्‍तो खिता चाल्‍ला दुक थोकराङ ओङस्‍यीत सिरकान्‍ते ईन्‍देकी परमेश्‍वरगी थे प्रार्थना ङेन्‍सुङ।

हिब्रू 6:12

थोगी ख्‍योकोनगीङ अल्‍छी मिक्‍किता खाला चुक खिसे सासीन परमेश्‍वरला विश्‍वास खिन जस्‍तो ओङसीनोङ सेम मेसेता खाला देत्‍कान्‍ते मिओनला ताला होथेबेकी खाबा च्‍योकराङ खि। होथोक खित्‍कान्‍ते मिओनगीचेन परमेश्‍वरगी तेरग्‍यो सिन जमान खाबाते गाङे ङेत्‍क्‍यो।

हिब्रू 6:15

थेमे अब्राहामगी परमेश्‍वरगी थे खोरोङताङ जमान खाबा च्‍योकराङ खिओ सिन लो काल्‍बेईसाक सेम मेसेता खाईन गुकीनराङ देतेकी परमेश्‍वरगी थेला तेरग्‍यो सिन साबाते गाङे बिन्‍सुङ।

याकूब 5:7

थेमे आज्‍यो न्‍वावे, प्रभु येशू ग्‍युरला ओङ ओङसाक ख्‍योकोन सेम मेसेता खाला गुलाराङ देत। खेती खित्‍कान्‍ते मिङनी बाली लेस्‍यीत सिन समय समयला देक्‍च्‍येते छ्यार्बा देक देकसाक गुलाराङ देत्‍क्‍यो।

१ पत्रुस 4:13

दोक्‍ते दुक्‍पा भोगे खिता फाप्‍जीन ख्‍योकोन गाका खि। च्‍यिला सासीन दोक ओङजीन ख्‍योकोनगी ख्रीष्‍टकी चुक दुक्‍पा भोगे खाबा ओता ईन्‍दाका सिन टिक्‍पी टिक्‍पी छ्या स्‍येक्‍यो। थेमे ख्रीष्‍ट था छ्येज्‍यीक शक्ति ङेत्‍ला दुरू ग्‍युरला ओङे छोमु ख्‍योकोनोङ आउदी खाला गा खिता ङेत्‍क्‍यो।

१ पत्रुस 4:7

थेमे था दि जुग सिन्‍च्‍ये बेला लेपा खाबा ओत। दाक्‍पोन सेम काबूला ज्‍याक्‍ला ख्‍योकोन च्‍याङबो खाला देत। दोक खासीन ख्‍योकोन परमेश्‍वरताङ प्रार्थना खिन देता थुप्‍क्‍यो।

२ पत्रुस 1:6

दिकामा मेन, दाक्‍पोन सेम काबूला स्‍योक, दुक्‍पा किम्‍मु जस्‍तो ओङजीनोङ सेम मेसेता खाला देत। दि लाक्‍तुङ ख्‍योकोनगी परमेश्‍वरला माने खिताला खिता फाप्‍च्‍येते कामताङ बात खि।

छ्या स्‍ये च्‍युताते बात 13:10

चुक सासीन परमेश्‍वर सन्‍तान नाङ सुइँदा जेलला ड्वा फाप्‍च्‍या ओत्‍सीन थे पक्‍काराङ जेलला डुइओ। थेमे तरवारगी तुप्‍ला सेत्‍च्‍या दुक सासीन थेला तरवारगीराङ तुप्‍ला सेत्‍क्‍यो। दोक ओङसीनोङ परमेश्‍वर सन्‍तानओनगी सेम मेसेता खाला दुक्‍पा खपे खिन देता फाप्‍क्‍यो, येशूला विश्‍वास खिन देता तोङा मेङगो।