छ्या स्‍ये च्‍युताते बात 12:4 - जिरेल

⁴ थे डुगी ङामा योम्‍गीन खण्‍ड सुमला खण्‍डज्‍यीक नामगी कार्मा नामनेकी ठुत्‍कीन पृथ्‍वीमा ङिम्‍गीन ताङसुङ। थे फेम्‍मे मिकी फिजा क्‍यापज्‍यीकताङ खामज्‍यीकला साप सिन थेचेन थे फेम्‍मे मि दोन्‍दुराङ गुकीन देता ओतान।

छ्या स्‍ये च्‍युताते बात 12:4 Iomraidhean Croise

यूहन्‍ना 8:44

ख्‍योकोनचेन खेराङ आबा शैतानताङ डिक्‍कान्‍ते मि ईन। थेमे ख्‍योकोन खेराङ आबेकी खित्‍च्‍येते कामकामा खिता सेम खिदुक। थेकीनी च्‍याक दि जुग शुरू ओङजीनमेईराङ मि सेत्‍च्‍येतेकामा खिन ओत। ईन्‍दाते बातला थेकी बान्‍दा गा मिक्‍किओ। साँचोते बात सिरातेचेन थेकी नोमुङ मिक्‍किओ। ढाँर खित्‍च्‍येतेनी थेते बानीराङ ईन्‍देकी थेचेन ढाँर खित्‍कान्‍ते ईन। ढाँर खित्‍च्‍येते सिराते गाङे थे छ्य्‌वापेईराङ ओङच्‍येते ईन।

१ पत्रुस 5:8

थेमे दाक्‍पोन सेम काबूला स्‍योक। खेराङला मेलेबा खिता छोल्‍कान्‍ते शैतानगी छ्याःङ मेलेबा खिता मुथुप्‍स्‍यीत सिन च्‍याङबो खाला देत। थेचेन जहिलेङ ख्‍योकोन सुला थेप्‍ला ङ्ये ज्‍युता ङेदोङा सिन जे थेप्‍कीदुक खाप खाप्‍ला साप सिन ङारगीन ख्‍याम्‍बाते सिंह च्‍योक खाला युगीनराङ देत्‍क्‍यो।

छ्या स्‍ये च्‍युताते बात 12:7

थोक थोक ओङनामेई स्‍वर्गने लडाइँ शुरू ओङसुङ। परमेश्‍वर दूत मिखाएलताङ थे दूतओनगी थे डुकताङ लडाइँ खासुङ। डुकताङ थे दूतओनगीङ थे परमेश्‍वर दूतओनताङ लडाइँ खासुङ।

छ्या स्‍ये च्‍युताते बात 12:9

दोक खाईन थे जोदाते डुकला स्‍वर्गनेकी पृथ्‍वीमा ङिल्‍गीन ताङसुङ। थेचेन गोमामेई ओताते रूल ईन। थे मिन शैतान दैंता ईन। खालि मेलेबा कामकामा खाला सा लुङबा खाङगी मिला छक्‍के खित्‍कान्‍ते थेराङ ईन। थेत्ताङ थे दूत गाङेला स्‍वर्गनेकी पृथ्‍वीमा युकीन क्‍युरसुङ।

छ्या स्‍ये च्‍युताते बात 13:2

थे जन्‍तु दोक ताजीन चितुवा च्‍योकस्‍यिक ओतान। थेते ठेक्‍पा थोमगीते च्‍योक्‍तेन्‍दे थेमे खाचेन सिंहेते च्‍योक खाबाई ओतान। थे डुगी थे खोरोङ अधिकार जति थे जन्‍तुला बिन्‍गीन थे खोरोङ सिंहासन लाक्‍तु देत च्‍युत्‍सुङ। दोक खाईन थे डुगी थे जन्‍तुला राज्‍य खित च्‍युत्‍सुङ।

छ्या स्‍ये च्‍युताते बात 13:4

थे डुगी थे खोरोङ अधिकार जति गाङे थे जन्‍तुला बिन्‍गीन राज्‍य खित च्‍युतेकी खित्‍सादु मिओनगी थे डुकला मान खिन छ्ये जोसुङ। थे मिओनगी “दि छेत छ्येते सु ओते? थेमे सुई दिला जीला ग्‍याला थुप्‍कीते?” सिन थे जन्‍तुलाङ मान खाईन छ्ये जोसुङ।

छ्या स्‍ये च्‍युताते बात 16:13

थेमे ङे बाल्‍बाक च्‍योक्‍तेन्‍दे ल्‍हन्‍डीक सुम फुत्त फुत्त थेन्‍दाते थोङसुङ। थेबाचेन थे डुक थेमे थे जन्‍तु थेमे थे डुगी सिर च्‍युताते बात खित्‍कान्‍ते सादुकी थेन्‍दाते जन्‍तु खानामेकी थेन्‍दा ओतान।

छ्या स्‍ये च्‍युताते बात 17:18

थेमे खुई थोङाते थे फेम्‍मे मिचेन चाङबो काल्‍बेई छेउदु जोबाते छ्येते सार ईन। लुङबा लुङबे गेल्‍बो गाङे थे अधीनला ओत,” सिनोङ सिदुक।

छ्या स्‍ये च्‍युताते बात 20:2

थेमे थेकी थे डुकला जुम्‍गीन च्‍याकीन लो हजारज्‍यीकसाक छ्याःङ खिता मुथुप्‍स्‍यीत सिन साङलोकी ठासुङ। थे डुकचेन गोमामेई मिओनला छक्‍के खित्‍कान्‍ते रूल ईन। थे शैतान दैंता ईन।

छ्या स्‍ये च्‍युताते बात 8:10

थे तिरी पालो सुमगी बाजि दूतकी थे खोरोङ बिकुल फुसुङ। दि बाजिलाचेन नामनेकी मे राँको च्‍योकराङ बाराज्‍यीक आउदी जोदाज्‍यीक कार्मा ल्‍हुम्‍सुङ। दिचेन चाङबोते खण्‍ड सुमगी नाङ खण्‍डज्‍यीक नाङ थेमे छ्युई मोनगी नाङला ल्‍हुम्‍सुङ।

छ्या स्‍ये च्‍युताते बात 8:11

दि कार्मे मिनचेन ऐरेलु सिन ओतान। ऐरेलु साबाते खक्‍तीते साबाते ईन। दि कार्मा ल्‍हुम्‍गीन छ्युईते खण्‍ड सुमला खण्‍डज्‍यीक छ्यु गाङे खक्‍ती जोबेकी थे छ्यु थुकीन मि काल्‍बेई स्‍यिसुङ।

छ्या स्‍ये च्‍युताते बात 8:12

दि तिरी पालो स्‍यी बाजि दूतकी बिकुल फुत्‍जीनचेन दागार, ङीमाताङ कार्मेते खण्‍ड सुम नाङ खण्‍डज्‍यीक नाक्‍पो गाल्‍सुङ। दोक ओङगीन दागार, ङीमाताङ कार्मेते खण्‍ड सुम नाङ खण्‍डज्‍यीक नाम्‍दाकराङ तोरगीन खण्‍ड सुम ङीनला खण्‍डज्‍यीक ङीन मुन्‍दाक जिङी गाल्‍सुङ। थोकराङ खाईन खण्‍ड सुम नुपला खण्‍डज्‍यीक नुप मुन्‍दाक जिङी गाल्‍सुङ।

छ्या स्‍ये च्‍युताते बात 8:7

थेमे गाङे भन्‍दा गोमे दूतकी थे खोरोङ बिकुल फुसुङ। थोक खानामेई ठाक स्‍येबाते सरेताङ मे ज्‍वाला पृथ्‍वीमा ङीम्‍बाला स्‍यूसुङ। दोक ओङेकी खित्‍सादु पृथ्‍वीदु खण्‍ड सुमला खण्‍डज्‍यीक सा थेमे स्‍यिङ दोङबोताङ ङोम्‍मुते सोतेबा गाङे छिगीन खतम गाल्‍सुङ।

छ्या स्‍ये च्‍युताते बात 8:8

थेमे ज्‍येनते दूतकीङ थे खोरोङ बिकुल फुसुङ। थेकी बिकुल फुनामेई मे ज्‍वाला बाराई आउदी जोदाई बोम च्‍योकस्‍यिक समुन्‍द्रे नाङमा क्‍युरसुङ। थेमे खण्‍ड सुमला खण्‍डज्‍यीक समुन्‍द्रे छ्यु ठाक गाल्‍सुङ।

छ्या स्‍ये च्‍युताते बात 8:9

थेमे थे समुन्‍द्र ठाक गाल्‍सादु ओताते जति समुन्‍द्रे ङ्याताङ बुतेबा गाङे स्‍यिसुङ। समुन्‍द्रदु ओताते खण्‍ड सुम नाङ खण्‍डज्‍यीक पानीजहाजतेबाङ गाङे ङ्येसुङ।

छ्या स्‍ये च्‍युताते बात 9:10

थेबे पिको बिच्‍छी ङामा च्‍योकराङ ओतान। थेबेते दुङोङ बिच्‍छीते च्‍योकराङ ओतान। होथे बिच्‍छी ङामा च्‍योक्‍तेकीराङ आउदी सुक लाङच्‍या खाला दुङ ग्‍याप्‍ला थे छ्युच्‍युपेओनगी मिओनला दावा ङासाक दुक्‍पा तेरा थुप्‍च्‍या ओतान।

छ्या स्‍ये च्‍युताते बात 9:19

थे घोडाओनगी खेकी थेमे ङामेकी मि सेता थुप्‍कीन ओतान। थेबे ङामाचेन रूल च्‍योकराङ ओतान। थेमे होथे रूल च्‍योक्‍तेकीराङ मिओनला मा तोत्‍ला सेत्‍कीन ओतान।