फिलिप्‍पी 4:8 - जिरेल

⁸ थोगी बात चुक सासीन आज्‍यो न्‍वावे, ख्‍योकोनगी लेमुते थेमे खिता ओङच्‍येते कामताङ बातकीतेकामा विचार खि। चुक सासीन ख्‍योकोनगी साँचोते बातकामा खित्‍च्‍येते, लेमुते कामताङ बातकामा खित्‍च्‍येते, अन्‍याय मिक्‍किच्‍येते, मेलेबाते कामताङ बात छ्याःङ मिक्‍किच्‍येते, लेमु लाङच्‍येते थेमे मि सेमला डोच्‍येते कामताङ बातकीतेकामा विचार खि।

फिलिप्‍पी 4:8 Iomraidhean Croise

मत्ती 22:16

ठो खाईन थेबेकी खोपरोङ मिओनताङ कोई कोई हेरोद गेल्‍बो पाटी मिओनला येशूताङ बात खित ताङसुङ। थेमे थे मिओनगी येशू ओत्‍सादु लेप्‍कीन “गुरू, मिओनला खुई साँचोते बातकामा खिओ सिन ङ्योकोनला छ्या ओत। परमेश्‍वर बात लोप्‍जीन खो छ्ये छ्ये मि सुङताङ ज्‍यीबा मिक्‍किओ। परमेश्‍वरगी च्‍यि च्‍यि खि साबा ओते सिन छ्ये टेक्‍टे मेडेला खाला खुई गाङेला लेमु खाला लोप्‍क्‍यो।

मर्कूस 6:20

च्‍यिला सासीन यूहन्‍ना परमेश्‍वरगी खि साबा साबा च्‍योकराङ खित्‍कान्‍ते लेमु मि ईन सिन हेरोदला छ्या ओतान। थोगी थेला मेलेबा खिता मेङगो सिन ज्‍यीबेकी यूहन्‍नाला सुङगीङ छ्याःङ मेलेबा खिता मुथुप्‍स्‍यीत सिन लेमु खाईन ज्‍याक्‍पा ओतान। बेला बेलाला यूहन्‍ने बात ङेन्‍जीन हेरोदला लेमु लाबा ओतान। थे खोरोङगी खाबाते मेलेबाते काम सम्‍झे खित्‍जीन यूहन्‍ने बात ङेन्‍नामेकी जहिलेङ थेला सेमला चुक ईन चुक ईन लाङगीन ओतान।

लूका 16:15

थेबे बात थोकीन येशूकी थेबाला “ख्‍योकोननी परमेश्‍वरला छ्ये ज्‍वाप्‍ला मेन्‍देकी मि मिकला छारो देक्‍पालाका काम खित्‍च्‍येते खिदुक। ख्‍योकोनगी खिन ओताते काम ताला मिओनगी ख्‍योकोनला लेमु मि ईन सिन मान खिदुक। तर ख्‍योकोनगी च्‍यि सेमगी काम खाबाते ईन्‍दे सिन परमेश्‍वरला गाङे छ्या ओत। मिओनगी लेमु सासीनोङ ख्‍योकोनगी खाबाते कामनी परमेश्‍वरला बान्‍दा मन परे मिक्‍किओ।

लूका 2:25

यरूशलेमदु शिमियोन सिराज्‍यीक मि ओतान। थे परमेश्‍वरगी खि साबा साबा च्‍योकराङ खाला थेला आउदी खाला माने खित्‍कान्‍ते मि ओतान। इस्राएलीओनला पापताङ दुक्‍पादुकी डेल्‍कान्‍ते नाम ओङगीताका सिन थे गुकीन देता ओतान। थेकी परमेश्‍वर आत्‍मा ङेता ओतान।

लूका 23:50

थेजीन यरूशलेमदु यूसुफ सिराज्‍यीक मि ओतान। थेचेन यहूदिये अञ्‍चलदु फाप्‍च्‍येते अरिमाथिया सिराते सारगी मि ओतान। यहूदीओन छ्ये छ्ये मि नाङ थेङ दोक्‍पोई ओतान। परमेश्‍वरगी खि साबाते ङेन्‍कानज्‍यीक थे लेमु मि ओतान। ज्‍येन छ्ये छ्ये मि गाङेकी येशूला सेता फाप्‍क्‍यो सिन पिलातस ओत्‍सापा खेरजीन थेचेन थेबाताङ बान्‍दा माडिक्‍सुङ। था परमेश्‍वर राज्‍य नाम ओङगीताका सिन थे गुकीनराङ देता ओतान।

यूहन्‍ना 7:18

दाक्‍पोनगी जोबाते बात लोप्‍कान्‍ते मिकीचेन ज्‍येनगी थे खोरोङला मान खित्‍स्‍यीत सिन लोप्‍क्‍यो। तर थे खोरोङला तोङकान्‍तेला मिओनगी मान खित्‍स्‍यीत सिन काम खित्‍कान्‍ते मिकीचेन ईन्‍दाते बातकामा खिओ, मेन्‍दाते बात सिराते थेकी दोक्‍पोईओङ मिक्‍किओ।

शक्ति काम 10:22

थेमे थेबा सुमबोकी “मिल्‍टेरी क्‍याप्‍टेन कर्नेलियसकी खोल्‍ला लाला खोरच्‍योक सिन ङ्योकोनला देपा ताङसुङ। थे परमेश्‍वरला आउदी खाला माने खित्‍कान्‍ते लेमु मि ईन। थेला यहूदीओनगीङ गाङेकी मन परे खाला दुक। खोल्‍ला थे खाम्‍बापा लाला खुलाला च्‍याला खुई साबाते बाततेबा ङेन सिन थेला परमेश्‍वर दूतज्‍यीगी सिदुक्‍लो। थोगी ङ्योकोन खोल्‍ला लिन्‍दाला देपा वाबाते ईन,” सिन सिदुक।

शक्ति काम 22:12

थेजीन दमस्‍कसदु परमेश्‍वर नियम गाङे लेमु खाला ङेन्‍कान्‍ते हननिया सिराज्‍यीक मि ओतान। थे सारदु ओताते यहूदी गाङेकी थेला आउदी मान खिन ओतान। थेकी ङा ओत्‍सादु वाकीन

शक्ति काम 6:3

थोगी आज्‍यो न्‍वावे, ङुरूङगी च्‍यि खिइसे सासीन ख्‍योकोनगी खेराङ नाङ गाङेकी लेमु मि ईन सिन मन परे खाबाते मेन्‍दा दुईन मि छाने खि। थेबाचेन परमेश्‍वर आत्‍मेकी खाङाते मि ओङा फाप्‍क्‍यो। थेबा आउदी बुद्धि ओतातेन्‍दे ओङा फाप्‍क्‍यो। थेमे दि साच्‍या थुङच्‍या ताच्‍येते काम ङ्योकोन थेबाला जिम्‍मा तेरग्‍यो।

रोमी 13:13

चुक सासीन ङुरूङगी गाङे ङोन्‍दु खिता ओङच्‍येते कामताङ बातकामा खिता फाप्‍क्‍यो। ज्‍येनताङ रूला भक्‍कुचूर सोला थुला मोज मज्‍जा खित्‍च्‍येते, छ्याङ रक्‍सीकी जिला ख्‍याम्‍च्‍येते थेमे रन्‍डीबाजीताङ होदि च्‍योक्‍ते खिता मेङच्‍येते ङोचा लाङच्‍येते काम खिता मेङगो। ज्‍येनताङ थोम्‍मु जीङगा खित्‍च्‍येते थेमे मिला डार खित्‍च्‍येतेङ खिता मेङगो।

रोमी 13:3

लुङबे नियम ङेन्‍ला लेमु काम खित्‍कान्‍ते मिओनगीचेन सजाय ङेत्‍कीता सिन छ्याःङ ज्‍यीबा खिता माफाबो। मेलेबा काम खित्‍कान्‍तेबेकीचेन ज्‍यीबा खिता फाप्‍क्‍यो। थोगी ख्‍योकोनला राज्‍य खित्‍कान्‍तेबाताङ ज्‍यीबा मिक्‍किता खाला देता सेम ओत्‍सीन लुङबे नियम ङेन्‍ला लेमु काम खि। दोक खासीन थेबा सुङगीङ ख्‍योकोनला मेलेबा काम खासुङ सिन मिसिरो।

रोमी 14:18

होदोक दोकराङ खिन ख्रीष्‍टला माने खित्‍कान्‍ते मिओनताङचेन परमेश्‍वर खुशी ओङगो। दोक्‍ते मिओनला ज्‍येनगीङ लेमु मि ईन सिन सिओ।

रोमी 2:29

परमेश्‍वरगी छाने खाबाते मि ओङालानी जीउला थे खतकी चिनु जोला मेन, दाक्‍पोन सेमका लेमु ओङा फाप्‍क्‍यो। परमेश्‍वर नियमला खतकी चिनु जो सिन टिबाते बात ङेन्‍ला मि सेम लेमु ओङच्‍येते मेन। परमेश्‍वर आत्‍मेकीकामा मि सेम लेमु जोइओ। होदोक्‍ते मिलाचेन ज्‍येनगी मान माक्‍यासीनोङ परमेश्‍वर थेबाताङ खुशी ओङला थेबाला मान तेरग्‍यो।

१ कोरिन्‍थी 4:5

थोगी ङा ख्‍योकोनला च्‍यि सिते सासीन प्रभु येशू ग्‍युरगीन मावाथुप ख्‍योकोन सुङगीङ दि दोक्‍तेताङ थे थोक खित्‍कान्‍ते सिन ज्‍येनगी गल्‍ती मातेन। था वाला च्‍याला प्रभु येशूकी मिकी ज्‍येनगी छ्या मेस्‍येबा खाईन खाबाते काम ईन्‍स्‍यीत, खोपरोङ सेमलाकामा विचार खाबाते बात ईन्‍स्‍यीत, लेमु मेलेबा चुक ईन्‍दे सिन डेल्‍ग्‍यो। थेमे लेमु काम खित्‍कानलाचेन गाङेला परमेश्‍वरगी खुई आउदी लेमु खासुङ सिन सिओ।

२ कोरिन्‍थी 13:7

ख्‍योकोनगी मेलेबा काम छ्याःङ मिक्‍किस्‍यीत सिन ङ्योकोन परमेश्‍वरला प्रार्थना खिओ। ख्‍योकोनगी लेमु काम खासीन मिओनगी ङेराङला येशू ख्रीष्‍टकी खटे खाबाते मि मेन सासीनोङ ङेल्‍ला छ्याःङ मेत। ङ्योकोन लाईदु छ्येते बात मिकी ङेराङला लेमु मि ईन सिरस्‍यीत सिरच्‍येते मेन, बरू ख्‍योकोनगी लेमु काम खित्‍स्‍यीत सिरच्‍येतेराङ ईन।

२ कोरिन्‍थी 6:8

थेमे कोईकी ङ्योकोनला मान खिदुक, कोईकीचेन दिबाङ सु ईन्‍देरो सिराच्‍योक खाला छ्याःङ च्‍योक गने मिक्‍किदुक। कोईकी फलानाबा लेमु काम खित्‍कान्‍ते मि ईन सिन बात खिदुक। ङ्योकोन सत्‍यते बात लोप्‍कान्‍ते ईन। ईन्‍सीनोङ मिओनगी ङ्योकोनला मेन्‍दे बात लोप्‍कान ईन खिदुक।

२ कोरिन्‍थी 8:18

थेमे ङ्योकोनगी न्‍वाज्‍यीकलाङ तीतसताङ ङ्योम्‍बु थेपा तोङगीन ओत। दिचेन गा लाङच्‍येते बात लोपाला मिन चले खाबाते मि ईन सिन ठाउँ ठाउँला जम्‍मा ओङकान्‍ते येशू ख्रीष्‍ट मि गाङेकी बात खिदुक।

२ कोरिन्‍थी 8:21

च्‍यिला सासीन प्रभु येशू ख्रीष्‍ट दोन्‍दुकामा मेन्‍देकी मि दोन्‍दुङ ङेराङ लेमु काम खित्‍कान दुका सिन ज्‍येनगी छ्या स्‍येस्‍यीत सिरच्‍येते ङ्योकोन सेम खिओ।

गलाती 5:22

परमेश्‍वर आत्‍मेकी खित ज्‍युता चालाच्‍योक खित्‍कान्‍ते मिलाचेन थेकी फलफूल गोन ज्‍युताच्‍योक खाला लेमु कामताङ बात खित ज्‍युत्‍क्‍यो। थोगी थोक्‍ते मिकीचेन ज्‍येनला ङिङज्‍ये खिओ, थे गा खिन देत्‍क्‍यो थेमे सेमदु ढुक्‍क खाला देत्‍क्‍यो। थोक्‍ते मि होत्ताराङ स्‍येदाङ मिक्‍किओ, थेकी ज्‍येनला दया खिओ थेमे लेमु खिओ, थेकी खिओ साबा च्‍योकराङ खिओ,

एफिसी 4:25

थोगी ख्‍योकोनगी ढाँर खिता ताङला दोक्‍पोईकी ज्‍येनज्‍यीकताङ साँचोते बातकामा खि। च्‍यिला सासीन ङुरूङ गाङेराङ जीउज्‍यीगी लाक्‍पा, काम्‍बा, मिक च्‍योक्‍ते ईन।

एफिसी 5:9

चुक सासीन नाम्‍दाकला देत्‍कान्‍ते मिकीचेन लेमुते कामताङ बात खिओ, परमेश्‍वरगी खि साबा साबाच्‍योक खिओ थेमे साँचोते बातकामा खिओ।

एफिसी 6:14

दोक खाला थेबाताङ जीङाला ठीक ओङला देताला ख्‍योकोनगी दोक दोक खि। च्‍यि सासीन ख्‍योकोनगी परमेश्‍वर सत्‍यते बात ङेन्‍गीनराङ देत। दोक खित्‍च्‍येतेचेन केतापा पेटी छ्यिङच्‍येते ईन। थेमे परमेश्‍वरगी खि साबा साबाच्‍योक खि। दोक खित्‍च्‍येतेचेन मा मोथोत्‍स्‍यीत सिन ठाङनापा च्‍याकी पाता खोन्‍दाते ईन।

फिलिप्‍पी 3:1

थेमे ज्‍येन बात च्‍यि सासीन आज्‍यो न्‍वावे, ख्‍योकोन प्रभु ख्रीष्‍टताङ जीउज्‍यीकराङ ओङा ओताते मि ईन्‍देकी गा खि। ङा ख्‍योकोनला ङे गोमामेई याङ याङ सिन वाबाते बातराङ टिगीन ओत। बातज्‍यीकराङ याङ याङ टिक्‍पा फाप्‍सीनोङ ङाला छ्याःङ दिक्‍क लाबा मेत। ङे टिबाते बात पढे खाला ख्‍योकोनगी चुक खिता फाप्‍च्‍या ईन्‍दाका सिन लेमु खाला छ्या स्‍येक्‍यो।

कलस्‍सी 4:5

येशू ख्रीष्‍ट मि मेन्‍दाते मिओनताङ चुक खाला बात खिता फाप्‍कीते, थेबे दोन्‍दु च्‍यि काम खिता लेमु ईन्‍दे सिन लेमु खाला विचार खाला खि। दोक्‍ते काम खिता ङेत्‍च्‍येते समय था काल्‍बा मेत सिन छ्या स्‍येला टोले मिक्‍किता खाला दोक खिन देत।

१ थिस्‍सलोनिकी 4:12

दोक खासीन सुङगीङ ख्‍योकोनला थाराङ स्‍वा माफाबो, येशू ख्रीष्‍ट मि मेन्‍दाते मिओनगीङ ख्‍योकोनला लेमु मि ईन सिओ।

१ तिमोथी 2:2

थेमे छ्याःङ गोलमाल मायाङला ङुरूङगी परमेश्‍वरला माने खिन थेमे थेला मन परे खित्‍च्‍येते काम खिन लेमु खाला देता ङेत्‍स्‍यीत सिन झन गेल्‍बोओनताङ लुङबे छ्ये छ्ये मि लाईदुङ प्रार्थना खिता फाप्‍क्‍यो।

१ तिमोथी 3:11

थोकराङ खाला थेबे फेम्‍मेतेबाङ लेमु बानी ओताते, मि मोत्‍कीन माख्‍याम्‍कान्‍ते, छ्याङ रक्‍सी काल्‍बा मुथुङकान्‍ते थेमे जस्‍तो कामोङ लेमु खित्‍कान्‍ते ओङा फाप्‍क्‍यो।

१ तिमोथी 3:4

थेचेन थे खोरोङ खाम्‍बादु जेसुकै बन्‍दाबस्‍ता लेमु खित्‍कान ओङा फाप्‍क्‍यो। फुज्‍युङ फुमुतेबेकी थेला मान खाला थेकी लाःपा कोता ङेन्‍स्‍यीत सिन थे फिजाओनला लेमु खाला ताला लुबा थुप्‍कानज्‍यीक ओङा फाप्‍क्‍यो।

१ तिमोथी 4:12

खो थोरूमोङ स्‍याराराङ ओत्‍सीनोङ थोक खाला लोप्‍जीन कोत्‍जीन दि भर्खरगी फिजेकी साबाते बादोङ च्‍यि ङेन्‍च्‍ये, दिलाङ च्‍यि छ्या ओते सिन सिरच्‍येते लाम थेबा सुङलाङ मातेर। खो स्‍याराराङ दुक सिन हेपे मिक्‍किस्‍यीत सिन खोरोङगी खाबाते ताला येशू ख्रीष्‍टला विश्‍वास खित्‍कान्‍ते मिओनगी चुक चुक खिता फाप्‍च्‍या ईन्‍दाका सिन लोप्‍स्‍यीत सिन खुई दोक दोक खि। चुक सासीन खुई काम बात जे खासीनोङ लेमु खाला खि, ज्‍येनला ङिङज्‍ये खि, जे ओङसीनोङ येशू ख्रीष्‍टला विश्‍वास खिन देत, सेमला छ्याःङ पाप मोज्‍योबा खाला काम खि,

१ तिमोथी 5:10

दोस्‍यिककामा मेन, थेबाचेन लेमु कामगी लाईदु मिन चले खाबाते मि ओङा फाप्‍क्‍यो। थोक साबाते च्‍यि सासीन फुज्‍युङ फुमुला लेमु खाईन हुर्के खाबाते, खाम्‍बादु वाबाते मिला लेमु खित्‍कान्‍ते, परमेश्‍वर सन्‍तानओन खाम्‍बादु ओङजीन काम्‍बा टुला तेरकान्‍ते, दुक्‍पा ओताते मिओनला ताकान्‍ते थेमे ज्‍येनोङ होदोक्‍ते लेमुते काम खित्‍च्‍ये छ्य्‌वापा स्‍येत खिन देताते फेम्‍मे मि ओङा फाप्‍क्‍यो।

१ तिमोथी 5:2

थोकराङ खाला गाम्‍माते मिओनला खइँदा बात मायाङसुङ सिरा फाप्‍सीन खोरोङ आमाला च्‍योकराङ मान खाला सम्‍झे खाला बिन। थेमे स्‍यार्मुतेबाला थोक खिता फाप्‍सीनचेन सेमदु छ्याःङ मेलेबा विचार मिक्‍किता खाला थेबाला खोरोङ आज्‍यी नुमु छेतराङ ठाने खाला लाःप्‍ला कोत्‍ला बिन।

तीतस 1:8

बरू थोक्‍ते मिचेन डोम्‍बोताङ फार छुर ख्‍याम्‍कान मिओनला लेमु खित्‍कानज्‍यीक, लेमु कामकामा खिता सेम खित्‍कानज्‍यीक, दाक्‍पोन सेम काबूला ज्‍य्‌वाबा थुप्‍कानज्‍यीक, खिता मेङच्‍येते काम सिराते छ्याःङ मिक्‍किकानज्‍यीक, परमेश्‍वरला मन परे खित्‍च्‍येते कामकामा खित्‍कानज्‍यीक थेमे दाक्‍पोन सेमला लाबा लाबा मिक्‍किकानज्‍यीक ओङा फाप्‍क्‍यो।

तीतस 2:14

ङुरूङ पापकी सजाय थे खोरोङगीराङ भोगे खाईन थे ङुरूङ लाईदु ज्‍यान बिन्‍गीन स्‍यिसुङ। ङुरूङला पाप खित्‍च्‍येते बानीदुकी पूरो खाला टाल्‍ला सेम लेमु जोला काम बात लेमुकामा खिता छोल्‍कान्‍ते थे खोरोङ मि सिरा थुप्‍स्‍यीत सिन थे थोक खाईन स्‍या ओतान।

तीतस 2:2

चुक सासीन गान्‍दातेबाला थेबा च्‍याङबो खाला देता फाप्‍क्‍यो सिन सि। थेबे बानी लेमु ओङा फाप्‍क्‍यो थेमे खोपरोङ सेम काबूला ज्‍य्‌वाबा फाप्‍क्‍यो सिन सि। दोस्‍यिककामा मेन, थेबेकी खोपरोङगी येशूला विश्‍वास खिन ङेन्‍दा ओताते बात मोतोङा खाला ङेन्‍गीन देता फाप्‍क्‍यो, ज्‍येनला ङिङज्‍ये खिन देता फाप्‍क्‍यो थेमे दुक्‍पा ओङसीनोङ खपे खिन देता फाप्‍क्‍यो सिन सि।

तीतस 2:7

खोल्‍ला ताला खोपरोङगी चुक चुक खिता फाप्‍च्‍या ईन्‍दाका सिन थेबेकी लोप्‍स्‍यीत सिन जे खित्‍जीनोङ खुई लेमु खाला खि। ज्‍येनतेबाला लोप्‍जीन खुई दाक्‍पोन फाइदा छ्याःङ माताबा खाला थेमे ङा परमेश्‍वर बात लोप्‍कीन ओत सिराच्‍योक खाला होस ज्‍याक्‍ला लोप।

तीतस 3:14

दोक खाला सुङगीङ दाक्‍पोनला छ्याःङ काम लै मिक्‍किच्‍येते मि मिसिरस्‍यीत सिन येशू ख्रीष्‍ट मिओनगीचेन सुइँदाला खाँचो परे खाबे बेलाला खइँदा तेरा फाप्‍सीन थोक खिता फाप्‍च्‍याक्‍वा सिन गाङेकी लोप्‍स्‍यीत।

हिब्रू 11:2

ङुरूङ ज्‍युज्‍यु पुर्खेकीङ थेला होदोकराङ खाईन विश्‍वास खाबा ओतान। थेबेकी थे खोरोङला थोक खाईन विश्‍वास खाबा थोङगीन परमेश्‍वरगी थेबेकी थोक खाबाते लेमु ईन सिन साबा ओतान।

हिब्रू 13:18

थेमे ङ्योकोन लाईदु परमेश्‍वरला प्रार्थना खिन देता मातोङ। जे खित्‍जीनोङ सेमदु पापताङ लोभ सिराते छ्याःङ मोज्‍योबा खाला खिता छोल्‍कान ईन्‍देकी ङे दोक खिता ठीक मेन सिराच्‍योक लाबाते काम ङेराङगी छ्याःङ खाबा मेत सिन ङ्योकोनला लेमु खाला छ्या ओत।

याकूब 1:27

आबा परमेश्‍वरगी खि साबाच्‍योक खित्‍च्‍या सिरातेनी सुङ मेत्‍कीन दुक्‍पा ङेता ओताते ट्वारा टिङग्रेताङ ख्‍योबो स्‍याप्‍ते फेम्‍मे मिओन दुक्‍पा थोङला थेबाला लेमु खित्‍च्‍येते थेमे परमेश्‍वरला छ्या मेस्‍येकान्‍ते दि सा लुङबे मिओनगी खिताच्‍योक मेलेबा काम मिक्‍किच्‍येते ईन।

याकूब 3:17

तर परमेश्‍वरगी बिन्‍दाते बुद्धि ङेता ओताते मिओनगीचेन काम बात जे खित्‍जीनोङ लेमुतेकामा खिओ, थेबा ज्‍येनताङ डिक्‍ला थुन्‍ला देता छोल्‍ग्‍यो, गाङेताङ खा छ्येत लेमु खिओ, दाक्‍पोन भन्‍दा छ्येकी साबाते ङेन्‍ग्‍यो, ज्‍येनला ङिङज्‍ये खाला लेमु लेमु काम खिओ, सुङलाङ काका पाका मिक्‍किओ थेमे सेमला मेलेबा विचार मोज्‍योओ।

१ पत्रुस 1:22

सत्‍यते बात ङेन्‍गीन ख्‍योकोन सेम खुदुक गालेकी ख्‍योकोनगी ज्‍येन आज्‍यो न्‍वाला खेकीकामा मेन्‍देकी पक्‍काराङ ङिङज्‍ये खित्‍च्‍येते ईन। थोगी ख्‍योकोनगी दोक्‍पोईकी ज्‍येनज्‍यीकला आउदी खाला ङिङज्‍ये खि।

१ पत्रुस 2:12

परमेश्‍वरला छ्या मेस्‍येकान्‍ते खेराङला मेलेबा मि ईन सिरकान्‍ते मिओन नाङराङ देता ओत्‍सीनोङ काम बात जे खित्‍जीनोङ ख्‍योकोनगी लेमुतेकामा खि। दोक खाईन ख्‍योकोनगी लेमुकामा खानामेई था परमेश्‍वरगी वाला मि गाङे न्‍याय खिते छोमु ख्‍योकोनला मेलेबा मि सिन सिरकान्‍ते होथे मिओनगी ख्‍योकोन थोक्‍ते मि मेन्‍दाक्‍वा सिन छ्या स्‍येला परमेश्‍वरते जय जय खिओ।

१ पत्रुस 4:8

थेमे ज्‍येनतोक भन्‍दाङ दोक्‍पोईकी ज्‍येनज्‍यीकला आउदी खाला ङिङज्‍ये खि। दोक खासीनराङ ज्‍येनगी जति मेलेबा खासीनोङ थोक्‍ते मिला माफ तेरा थुप्‍क्‍यो।

२ पत्रुस 3:1

ङिङज्‍येते आज्‍यो न्‍वावे, दित्ताङ ङे ख्‍योकोनला टिबाते चिट्ठी ङि छाङगो। गोमे चिट्ठी च्‍योकराङ ङे दि चिट्ठीङ खेराङगी छ्या स्‍येबाते बाततेबा टोक मेज्‍येता खाला देत सिराला टिबाते ईन।

१ यूहन्‍ना 3:18

बात दोक ईन्‍देकी फिजावे, ङुरूङगी ज्‍येनला ङिङज्‍ये खिओ सिन खेकीकामा मेन, सत्‍यते परमेश्‍वरगी खि साबाच्‍योक खाला कामगीराङ खाला तेन्‍दा फाप्‍क्‍यो।

१ यूहन्‍ना 3:3

तिरी पक्‍काराङ दोक ओङगो सिन आश खाला देत्‍कान्‍ते मिकीचेन ख्रीष्‍टकी च्‍योकराङ मेलेबा काम सिराते छ्याःङ मिक्‍किता खाला देत्‍क्‍यो।

१ यूहन्‍ना 4:1

ङिङज्‍येते फिजावे, सुइँदेकी ङाला दि बात परमेश्‍वर आत्‍मेकी सिर च्‍युताते ईन सिन सिरजीनमेईराङ थोक्‍ते मि गाङे बात पत्ते माकेत। बरू थेबेकी साबाते बात परमेश्‍वर आत्‍मेकी सिर च्‍युताते ईन्‍दाकाना मेन्‍दाका सिन लेमु खाला छ्या स्‍येबा खि। च्‍यिला सासीन परमेश्‍वर बात खित्‍कान्‍ते मि ईन सिन मेन्‍दे बात लोप्‍कान्‍ते मिओन सा लुङबा खाङ ठाम्‍गीन सिन्‍दा ओत।