फिलिप्‍पी 3:3 - जिरेल

³ ङुरूङका परमेश्‍वरगी छाने खाबाते जीउला खतकी चिनु जोबा ओताते मि च्‍योक्‍ते ईन। च्‍यिला सासीन परमेश्‍वरला चुक खाला माने खिता फाप्‍च्‍येते ईन्‍दे परमेश्‍वर आत्‍मे छ्य्‌वापेकी ङुरूङ थेला थोकराङ खाला माने खिओ। परमेश्‍वरला माने खिताला ङुरूङचेन दाक्‍पोन जीउला खतकी चिनु जोबा ओत थेमे ज्‍येन ज्‍येनोङ धर्म कर्म खाबा ओत सिन छ्ये मिक्‍किओ। बरू येशू ख्रीष्‍टताङ जीउज्‍यीकराङ ओङा ओतेकी गा खिओ।

फिलिप्‍पी 3:3 Iomraidhean Croise

रोमी 1:9

ङे ख्‍योकोनला थोई सम्‍झे खाला जहिलेङ ख्‍योकोन लाईदु प्रार्थना खिका सिरच्‍येते बात परमेश्‍वरलाराङ छ्या ओत। थे फुज्‍युङते गा लाङच्‍येते बात ङाराङ स्‍येतकी थुपासम्‍म ज्‍येनला लाप्‍ला ङा परमेश्‍वरला माने खिओ।

रोमी 15:17

ङे येशू ख्रीष्‍टताङ जीउज्‍यीकराङ ओङगीन परमेश्‍वरगी ङाराङला खि साबाते काम खाबेकी खित्‍सादु ङा गा खिता ङेत्‍क्‍यो।

रोमी 7:6

तर थाचेन दोक खि, थोक माकेत, दोक माक्‍यासीन सजाय ङेत्‍ला स्‍यिइओ सिरच्‍येते परमेश्‍वर नियम लाईदु ङुरूङ स्‍याप छेतराङ ओङा ओतेकी था ङुरूङ थे नियम अधीनला मेत। परमेश्‍वरला माने खित्‍च्‍या सिन गोमाबा ङुरूङगी थे नियमला खि सिन टिबा च्‍योकराङ खिता चालाप। परमेश्‍वर आत्‍मा ङेता ओतेकी थानी ङुरूङगी परमेश्‍वरला चुक खाला माने खिता फाप्‍कीते होथोकराङ खाला माने खिता थुप्‍क्‍यो।

रोमी 8:15

योक्‍पो योङमुकी मालिकतेकी दुङगीता सिन ज्‍यीबा खुराच्‍योक खाला था लोक्‍ला ख्‍योकोनगीचेन परमेश्‍वरगी सजाय तेरगीता सिन थेत्ताङ छ्याःङ ज्‍यीबा खिता माफाबो। च्‍यिला सासीन परमेश्‍वरगी थे खोरोङ आत्‍मा बिन्‍गीन ख्‍योकोनला थे खोरोङ धर्म-पुत्र जोबा ओत। थेमे परमेश्‍वर आत्‍मे छ्य्‌वापेकीराङ परमेश्‍वरला ङुरूङ दाक आबा सिन सिओ।

रोमी 9:6

तर इस्राएलीओन बात विचार खाला ताजीन परमेश्‍वरगी थेबाताङ खिओ साबाच्‍योक माक्‍याबा च्‍योकका थोङगीदुक मेन? बात दोक मेन, थेकी साबाते बात नोमुङ फरक परे मिक्‍किओ। बरू बात चुक ईन्‍दे सासीन इस्राएली गाङेराङ परमेश्‍वरगी छाने खाबाते मि मेन।

२ कोरिन्‍थी 11:18

मि काल्‍बेईकी ङा दोक्‍ते ईन, ङे दोक खिता थुप्‍क्‍यो सिन छ्ये खिन बात खाबा च्‍योकराङ ङाङ खितामीन।

गलाती 5:25

परमेश्‍वर आत्‍मेकी ङुरूङला लेमु खिता थुप्‍कान जोबा ओतेकी ङुरूङगी काम बात जेङ थेकी खित ज्‍युता चाला च्‍योकराङ खिता फाप्‍क्‍यो।

गलाती 6:16

होदि बातकामा ङेन्‍कान मि गाङेला थेकी ढुक्‍क खाला देत ज्‍युत्‍स्‍यीत, ङिङज्‍ये खिनराङ देत्‍स्‍यीत। होदि बातकामा ङेन्‍कान्‍ते मिओनराङ परमेश्‍वरगी थे खोरोङ मि ईन सिन छाने खाबाते पक्‍काते इस्राएली ईन।

एफिसी 6:18

दोक दोक खित्‍जीन परमेश्‍वरताङ प्रार्थना खिनराङ देत। परमेश्‍वर आत्‍मे छ्य्‌वापेकी जहिलेङ थेत्ताङ प्रार्थना खिन देत्‍ला खेराङला च्‍यि च्‍यि गोकीका नाङ सि। थोक खाला प्रार्थना खित्‍जीन खेराङ परमेश्‍वरताङ बात खिन ओत सिन छ्या स्‍येबा खि। प्रार्थना खित्‍जीन परमेश्‍वर सन्‍तान गाङे लाईदु प्रार्थना खिताङ नोमुङ मातोङ।

फिलिप्‍पी 1:1

दि चिट्ठी टिक्‍कान्‍ते ङा पावल थेमे तिमोथी ईन। ङ्योकोन येशू ख्रीष्‍ट काम खित्‍कान्‍ते मि ईन। ङ्योकोन दि चिट्ठी फिलिप्‍पी सारदु ओताते परमेश्‍वर सन्‍तानओनला ताकान्‍तेबे नाङ छ्येते मिओन थेमे थेबाला थोक खिताला मद्धत तेरकान्‍ते मिओनला टिगीन ओत। थेबालाकामा मेन्‍देकी दि चिट्ठी येशू ख्रीष्‍टताङ जीउज्‍यीकराङ ओङाते परमेश्‍वर सन्‍तान ख्‍योकोन गाङेला टिगीन ओत।

फिलिप्‍पी 3:12

ङे छ्या स्‍येबा चालाते होथे बातबरी गाङे छ्या स्‍येकीन सिन्‍दा ओत थेमे ङाराङगी ङेत्‍च्‍येते गाङे ङेत्‍कीन सिन्‍दा ओत सिन ङा मिसिरो। थेमे परमेश्‍वरगी ज्‍वा चाला च्‍योकराङ ङाराङ लेमु ओङगीन सिन्‍दा ओत सिनोङ मिसिरो। येशू ख्रीष्‍टकी ङाला थे खोरोङ मि जोबा ओतेकी परमेश्‍वरगी तेरग्‍यो साबाते इनाम ङेत्‍च्‍ये छ्य्‌वापा ङा थुपासम्‍म स्‍येत खिन ओत।

फिलिप्‍पी 3:14

दोक खाला ङा खालि ङाराङगी नाम इनाम ङेदोङा सिरच्‍ये छ्य्‌वापाकामा स्‍येत खिन देत्‍क्‍यो। ङे ङेत्‍च्‍येते इनामचेन स्‍वर्गने देता ङेत्‍च्‍येते ईन। येशू ख्रीष्‍टकी खाबाते कामगी खित्‍सादु परमेश्‍वरगी ङाला थेने देताला काताङाते ईन।

कलस्‍सी 2:11

ख्रीष्‍टताङ जीउज्‍यीकराङ ओङगीन ख्‍योकोन खतकी चिनु जोबाते मि ओङा ओत। दोक साबाते ख्‍योकोनला सुइँदेकी जीउला खतकी चिनु जोकीन बिन्‍दाते मेन, बरू ख्रीष्‍टकी खेराङ मेलेबा सेम खुदुक जोबा ओतेकी था ख्‍योकोन खुदुक मि ओङा ओत साबाते ईन।

यहूदा 1:20

ङिङज्‍येते आज्‍यो न्‍वावे, ख्‍योकोनगीचेन येशू ख्रीष्‍टला विश्‍वास खाईन खेराङगी ङेन्‍दाते बातला खि साबा च्‍योकराङ खिन झन झन लेमु खाला थे बात ङेन। थेमे परमेश्‍वर आत्‍मे शक्ति छ्य्‌वापेई प्रार्थना खिनराङ देत।