मर्कूस 2:12 - जिरेल

¹² थेकी थोक सानामेकी गाङेकी थोङच्‍या खाईन थे कुज्‍ये खोक लासुङ। थेमे थे खोरोङ खोन्‍च्‍या दिङच्‍या खुरगीन खाम्‍बापा गाल्‍सुङ। थोक ओङा थोङनामेई मि गाङेराङ छक्‍क परे खिन “आबिई, दोक्‍ते अचम्‍बते कामनी थातासाक ङुरूङगी नोमुङ थोङा मेतान,” सिन परमेश्‍वरते जय जय खासुङ।

मर्कूस 2:12 Iomraidhean Croise

मत्ती 12:23

थोक अचम्‍ब ओङा थोङगीन थेरू ओताते मि गाङे छक्‍क परे खिनकामा “आबिई, ना दिराङ परमेश्‍वरगी तोङगो साबाते दाऊद गेल्‍बो सन्‍तान ईन्‍ताका?” सिन सिराला स्‍यूसुङ।

मत्ती 15:31

थोक खानामेई लाटातेबेकी बात खाबाते, कुज्‍येतेबा ठाक्‍पाते, ख्‍याम्‍बा मुथुप्‍कान्‍तेबा लेमु खाईन ख्‍याम्‍बाते थेमे अन्‍धतेबा थोङा थुप्‍च्‍या गालाते थोङगीन थेरू जम्‍मा ओङाते मि गाङे छक्‍क परे खासुङ। थेमे इस्राएलीओन परमेश्‍वर चुक अचम्‍बतेन्‍दे काम खित ज्‍युत्‍कान्‍ते ईन्‍दे सिन थेबेकी थेते जय जय खासुङ।

मत्ती 9:33

येशूकी थे ल्‍हन्‍डीक तेन्‍गीन ताङनामेकी थे मिकी बात खिताला स्‍यूसुङ। थोक थोङगीन थेरू ओताते मिओन छक्‍क परे खिन “ओहो, दोक्‍ते अचम्‍बते कामनी थातासाक ङुरूङ इस्राएल लुङबादु सुङगीङ खिता थोङा मेत,” सिन सिराला स्‍यूसुङ।

मत्ती 9:8

थेरू थोक ओङा थोङगीन मि गाङेराङ आउदी खाईन आते खासुङ। थेमे थेबेकी परमेश्‍वरगी मिलाङ दोक छ्येज्‍यीक शक्ति बिन्‍दा ओताक्‍वा सिन परमेश्‍वरते जय जय खासुङ।

मर्कूस 1:27

थेकी कोताते ल्‍हन्‍डीककीङ थोक खाईन ङेन्‍दा थोङगीन मि गाङेराङ छक्‍क परे खिन “आबिई, दि च्‍यि अचम्‍बज्‍यीक मि ईन्‍दाका। दिकी चुक अचम्‍ब खाला बात खिका। दित्ताङ ल्‍हन्‍डीक स्‍यिन्‍डीपला ग्‍याल्‍च्‍येते शक्ति ओतेकी थेबाला थेन्‍ला ग्‍युक सिराईताङ थेबा होत थेन्‍ला डुइदुक,” सिन खोपरोङ नाङ बात खिताला स्‍यूसुङ।

मर्कूस 2:11

“लो खोक ल्‍वा थेमे खोरोङ खोन्‍च्‍या दिङच्‍या खुरला खाँपा ग्‍युक,” सिन सिदुक।

लूका 13:13

लाक्‍पा ङिकाराङ थे लाक ज्‍याक्‍सुङ। थोक खिताईताङ थे फेम्‍मे मि दाक ठाइन सोझो खाईन लाङा थुप्‍सुङ। थेमे थेकी परमेश्‍वरगी ङाला चुक लेमु खासुङा सिन परमेश्‍वरते जय जय खासुङ।

लूका 17:15

थे खोरोङ थोक खाईन ठाक्‍पा थोङगीन थेबे नाङ मेराज्‍यीकचेन परमेश्‍वरगी थे खोरोङला चुक लेमु खाईन ठाक्‍पा खासुङा सिन कस्‍स्‍ये खाला परमेश्‍वरते जय जय खिन येशू ओत्‍सापाराङ ग्‍युरगीन लेप्‍सुङ।

लूका 5:26

थोक ओङा थोङनामेई थेकी चुक अचम्‍बज्‍यीक काम खासुङा सिन छक्‍क परे खिन मि गाङेकी परमेश्‍वरते जय जय खासुङ। थेमे थेबा आते खिनकामा “आबिई ङुरूङगी थरिङ चुक अचम्‍बज्‍यीक काम थोङसुङा,” सिन सिराला स्‍यूसुङ।

लूका 7:16

थेकी थोक अचम्‍बते काम खाबा थोङगीन थेरू ओताते मि गाङेराङ आउदी ज्‍यीबा खिन छकदाङ परे खासुङ। थेमे थेबेकी “ओहो, ङुरूङ ओत्‍सादु परमेश्‍वर बात खित्‍कान्‍ते चुक छ्येज्‍यीक मि वाका। थे खोरोङगी छाने खाबाते मि ङुरूङला लेमु खिताला साँच्‍चीराङ परमेश्‍वर वादुक,” सिन परमेश्‍वरते जय जय खिताला स्‍यूसुङ।

यूहन्‍ना 7:31

कोईकी थोक खासीनोङ थेरू ओताते मि काल्‍बेईकी येशूला विश्‍वास खासुङ। थेबेकी “च्‍यि था ख्रीष्‍ट वानामेई थेकी दि मिकी खाबाते भन्‍दा छ्ये छ्ये अचम्‍बते काम खाओङरो?” सिन बात खासुङ।

यूहन्‍ना 9:32

सा नाम जोबा छुरला केजीनमेईराङ अन्‍ध ओताते मिला दोक खाईन थोङच्‍या जोदुक्‍लो सिरच्‍येते बात समेदोङ थोरूमसाक सुङगीङ थोबा मेत।

शक्ति काम 4:21

थेबेकी थोक सानामेई थे छ्ये छ्ये मि गाङेकी थेबा ङिबोला सजाय तेराला छ्याःङ निउँ माङेत्‍कीन “ङ्योकोन बात माङेन्‍सीन ख्‍योकोनला मेलेबा ओङगो याङ, ख्‍योकोन होस खि,” सिन लोईन ज्‍यीबा तेन्‍गीन थोकराङ ताङसुङ। च्‍यिला सासीन थोक अचम्‍बते काम ओङा थोङगीन मि गाङेराङ थे बातकामा खिन परमेश्‍वरते जय जय खिन ओतान।