मर्कूस 13:11 - जिरेल

¹¹ खेराङला मुद्धा कोन्‍गीन छ्ये छ्ये मि थेमे गेल्‍बोओन दोन्‍दु क्‍याल्‍नामेकी बात ठिजीन च्‍यि सिरच्‍ये, चुक सिरच्‍ये सिन ज्‍यीबा माकेत। थे बेलाला च्‍यि सिरा फाप्‍कीते सिन थेजीनराङ परमेश्‍वरगी ख्‍योकोनला छ्या स्‍ये ज्‍युत्‍क्‍यो। च्‍यिला सासीन खेराङगी मेन्‍दाला थेजीन परमेश्‍वर आत्‍मा थे खोरोङगीराङ ख्‍योकोन खानापेई बात खिओ।

मर्कूस 13:11 Iomraidhean Croise

मत्ती 10:17

मिओनताङ ख्‍योकोन च्‍याङबो खाला देत। थेबेकी ख्‍योकोनला जुम्‍ला मिटिङ खित्‍च्‍येते अड्डे छ्ये छ्ये मि दोन्‍दु केल्‍ग्‍यो। थेरू क्‍याल्‍ला ख्‍योकोनला दुङगो।

मर्कूस 13:12

थेमे मिओनगी दिङ येशूला विश्‍वास खित्‍कान्‍ते ईन सिन छ्ये छ्ये मिला लाःप्‍ला दाक्‍पोन आज्‍यो न्‍वालाराङ सेत ज्‍युत्‍क्‍यो। आज्‍यो न्‍वाकी नाङदुकामा मेन, आबातेकी फुज्‍युङ फुमुला सेत ज्‍युत्‍क्‍यो। थोकराङ खाला फुज्‍युङ फुमुतेबेकीङ आबा आमातेबाला विरोध खाला सेत ज्‍युत्‍क्‍यो।

मर्कूस 13:9

दि बातओन छ्या स्‍येला ख्‍योकोन च्‍याङबो खाला देत। थेजीन ज्‍येनगी ख्‍योकोनला जुम्‍ला मिटिङ खित्‍च्‍येते खाम्‍बादु ओताते अड्डे छ्ये छ्ये मि दोन्‍दु केल्‍ग्‍यो। थेरू क्‍याल्‍ला ख्‍योकोनला दुङगो। दोस्‍यिककामा मेन, ख्‍योकोनला रोमी गेल्‍बो हाकिमओन थेमे गेल्‍बोओन दोन्‍दुङ केल्‍ग्‍यो। ङे मि ईन्‍देकीराङ ख्‍योकोनला दोक दोक खिओ। थेजीन ख्‍योकोनगी थेबाला खेराङ च्‍यिला ङाला विश्‍वास खिते सिन लाःपा ङेत्‍क्‍यो।

लूका 21:12

थोक थोक ओङा भन्‍दा गोमा मिओनगी ख्‍योकोनला जुम्‍ला आउदी दुक्‍पा तेरग्‍यो। थेबेकी ख्‍योकोनला मिटिङ खित्‍च्‍येते खाम्‍बादु ओताते अड्डे मि दोन्‍दु केल्‍ग्‍यो। थेमे जेलदुङ लु ज्‍युत्‍क्‍यो। दोस्‍यिककामा मेन, ख्‍योकोनला गेल्‍बोओनताङ रोमी गेल्‍बो हाकिमओन दोन्‍दुङ केल्‍ग्‍यो। ङे मि ईन्‍देकीराङ ख्‍योकोनला दोक दोक खिओ।

यूहन्‍ना 3:27

थोक सिरजीन थेकी “परमेश्‍वरगी खो दोक खि सिन मासाबाला सुङगीङ छ्याःङ खिता मुथुबो।

शक्ति काम 2:4

थोक खाईन थेबा गाङेकी परमेश्‍वर आत्‍मा ङेत्‍कीन थेबा गाङेराङ परमेश्‍वर आत्‍मेकी खाङाते मि ओङसुङ। थेमे थेबेकी परमेश्‍वर आत्‍मेकी खोपरोङला खित ज्‍युताच्‍योक च्‍योकराङ खाईन खोपरोङगी छ्या मास्‍येबाते खुदुक खुदुकते भाषाला बात खिताला स्‍यूसुङ।

शक्ति काम 3:13

बात चुक ईन्‍दे सासीन थरिङ दि अचम्‍बते काम खित च्‍युत्‍कीन ङुरूङ ज्‍युज्‍यु पुर्खा अब्राहाम, इसहाकताङ याकूबकी माने खाबाते परमेश्‍वरगी थे खोरोङ काम खित्‍कान्‍ते येशूताङ चुक छ्येज्‍यीक शक्ति ओते सिन छ्या स्‍ये च्‍युत्‍कीन बिन्‍दाते ईन। येशूला सेता फाप्‍क्‍यो सिन ख्‍योकोनगीचेन ज्‍येन जातकी मिओन लाःक्‍तु सोम्‍पे खासुङ। थेमे रोमी गेल्‍बो हाकिम पिलातसकी थेते छ्याःङ गल्‍ती मिन्‍दुक सिन तोङा छोल्‍जीनोङ ख्‍योकोनगी थेला मातोङ, थेलाचेन सेताराङ फाप्‍क्‍यो सिन साकीन

शक्ति काम 4:31

थोक खाईन प्रार्थना खाईन सिन्‍नामेकी थेबा देताते खाम्‍बाराङ लीक्‍सुङ। थेमे थेबा गाङेराङ परमेश्‍वर आत्‍मेकी खाङाते मि ओङसुङ। थेमे थेबेकी छ्याःङ ज्‍यीबा मिक्‍किता खाईन मिओनला परमेश्‍वर बात लाप्‍सुङ।

शक्ति काम 6:10

तर परमेश्‍वर आत्‍मेकी स्‍तिफनसला आउदी बुद्धि बिन्‍दा ओतेकी थेबेकी जतिराङ टेकाटेउरी खासीनोङ थेकी खाबाते बातला मेन सिन नोमुङ थेला ग्‍याला माथुप्‍सुङ।

शक्ति काम 6:15

थेबेकी थोक थोक सानामेई थेरू जम्‍मा ओङाते छ्ये छ्ये मि गाङेकी स्‍तिफनसला तासुङ। ताजीन थेबेकी थे छ्येत परमेश्‍वर दूतकीते च्‍योकराङ खाला टल्‍के खिन ओता थोङसुङ।

शक्ति काम 7:55

स्‍तिफनसचेन परमेश्‍वर आत्‍मेकी खाङा ओतेकी नामने ताजीन थेकी स्‍वर्गने परमेश्‍वर फेरोला मिगी ताराङ मुथुप्‍च्‍या झिलिमिली नाम्‍दाक थोङसुङ। येशूङ परमेश्‍वर सामे छ्य्‌वापा लाकीन देता ओता थोङसुङ।

१ कोरिन्‍थी 2:13

थोगी ङ्योकोनगी लोप्‍च्‍येते बातचेन सुइँदा मिकी ङ्योकोनला लाप्‍कीन बिन्‍दाते बात मेन, परमेश्‍वर आत्‍मेकी लाप्‍कीन बिन्‍दाते बात ईन। दोक खाला ङ्योकोन परमेश्‍वर आत्‍मा ङेता ओताते मिओनला परमेश्‍वर आत्‍मेकी लोप साबाते सत्‍यते बात लोप्‍क्‍यो।

एफिसी 3:5

थे बात च्‍यि ईन्‍दे सिन परमेश्‍वरगी गोमे मि सुङलाङ छ्या स्‍ये च्‍युता मेतान। थाचेन थेकी येशू ख्रीष्‍टकी खटे खाबाते मिओन थेमे थे खोरोङ बात खित्‍कान्‍ते मिओनला थे बात च्‍यि ईन्‍दे सिन थे खोरोङ आत्‍मे छ्य्‌वापेई छ्या स्‍ये च्‍युत्‍कीन बिन्‍दा ओत।

याकूब 1:5

थेमे ख्‍योकोन सुइँदाला च्‍यि खित्‍च्‍ये, चुक खित्‍च्‍ये सिन छ्या मेते बेलाला चुक खित्‍च्‍ये सिन बुद्धि नाङ सिन परमेश्‍वरताङ प्रार्थना खि। दोक खानामेई मिओनला लेमु खित्‍कान्‍ते ईन्‍देकी थेकी छ्याःङ दुक्‍स्‍यी मिक्‍किता खाला खेराङला गोबाते बुद्धि तेरग्‍यो।

१ पत्रुस 1:12

परमेश्‍वरगी खोपरोङला सिर च्‍युताते होदि बातओन थेबा खोपरोङ लाईदु मेन्‍देकी ख्‍योकोन लाईदु ईन सिन परमेश्‍वरगी थेबाला छ्या स्‍ये च्‍युता ओतान। थेबेकी साबाते होथे बाततेबा थरिङोला गा लाङच्‍येते बात लोप्‍कान्‍ते मिओनगी ख्‍योकोनला लाप्‍कीन बिन्‍दा ओत। दि गा लाङच्‍येते बात परमेश्‍वरगी स्‍वर्गनेकी ताङाते परमेश्‍वर आत्‍मे छ्य्‌वापेई थेबेकी ख्‍योकोनला लाप्‍कीन बिन्‍दा ओत। होदि बातओन परमेश्‍वर दूतओनगीङ आउदी खाला छ्या स्‍येबा सेम खिओ।