लूका 6:21 - जिरेल

²¹ ख्‍योकोन थरिङोला दाङच्‍या खाला साप थुङा मेङेत्‍कान्‍ते मिओन भाग्‍यमानी ईन। च्‍यिला सासीन ख्‍योकोनला गोबाते जति गाङे परमेश्‍वरगी तेरग्‍यो। ख्‍योकोन थरिङोला पीरगी ङ्वा फाप्‍कान्‍ते मिओन भाग्‍यमानी ईन। च्‍यिला सासीन तिरी ख्‍योकोन गाकी गोता ङेत्‍क्‍यो।

लूका 6:21 Iomraidhean Croise

मत्ती 5:4

पापताङ दुक्‍पेकी खित्‍सादु पीर खित्‍कान्‍ते मिओन भाग्‍यमानी ईन। च्‍यिला सासीन परमेश्‍वरगी थेबाला पापताङ दुक्‍पादुकी टाल्‍ला तेरग्‍यो।

मत्ती 5:6

परमेश्‍वरगी खि साबा साबाच्‍योक खिता आउदी सेम खित्‍कान्‍ते मिओन भाग्‍यमानी ईन। च्‍यिला सासीन परमेश्‍वरगी थेबेकी सेम खाबा च्‍योकराङ ओङ ज्‍युत्‍क्‍यो।

लूका 1:53

त्‍वाबेई स्‍याप खाबाते मिओनला थेकी वालछ्येल ओङच्‍या खाईन साप थुङा बिन्‍सुङ। थेमे छ्युक्‍पुतेबालाचेन लाक्‍पा तोङबाराङ जोकीन ताङसुङ।

लूका 6:20

थेरूई येशूकी थेरू ओताते गाङे चेलातेबा ओत्‍सापाला ताकीन दोक सिन बात खिताला स्‍यूसुङ। थेकी थेबाला “ख्‍योकोन दुक्‍पा ङेताते मिओन भाग्‍यमानी ईन। च्‍यिला सासीन ख्‍योकोन परमेश्‍वर राज्‍यदु स्‍यूला थेरू देता ङेत्‍क्‍यो।

लूका 6:22

थेमे परमेश्‍वर ओत्‍सादुई वाबाते मि ङाला विश्‍वास खाबेकी खित्‍सादु ज्‍येनगी ख्‍योकोनला मिगी थोङसार्मु खिओ। ख्‍योकोनला खाम्‍बाताङ युलदुकी देन्‍ग्‍यो। थेबेकी ख्‍योकोनला नाना-भाँती दोष लै खिओ, मेलेबा मि ईन सिन सिओ। दोक्‍ते दुक्‍पा ङेत्‍कान्‍तेबा ख्‍योकोन भाग्‍यमानी ईन।

लूका 6:25

थेमे ख्‍योकोन थरिङोला सुबा दुला दुला सा ङेत्‍कान्‍ते मिओनला तिरी मेलेबा ओङगो। च्‍यिला सासीन था तिरी ख्‍योकोन तुक्‍पाराङ देता फाप्‍क्‍यो। थोकराङ खाला ख्‍योकोन थरिङोला किम्‍मु ङेत्‍कीन गाकी गोत्‍कीन देत्‍कान्‍ते मिओनला तिरी मेलेबा ओङगो। च्‍यिला सासीन पीरताङ दुक्‍पेकी खित्‍सादु था तिरी ख्‍योकोन ङुइन देता फाप्‍क्‍यो।

यूहन्‍ना 11:35

थेमे येशू ङुसुङ।

यूहन्‍ना 4:10

थे फेम्‍मे मिकी थोक सानामेई थेकी “परमेश्‍वरगी च्‍यि तेरगीते सिन खुई छ्या स्‍येबा ईन्‍सीन थेमे थाल्‍ला खोल्‍ला छ्यु नाङ सिरकान्‍ते सु ईन्‍दे सिन छ्या स्‍येबा ईन्‍सीन खुईका ङाला छ्यु थुङा नाङ सिरच्‍या ओतान। थेमे ङा खोल्‍ला जुनी ङेत्‍च्‍येते छ्यु थुङा तेरच्‍या ओतान,” सिन सिदुक।

यूहन्‍ना 6:35

थेबेकी थोक सानामेकी येशूकी “नोमुङ मिसिन्‍च्‍येते जुनी ङेत्‍च्‍येते सापचेन ङाराङ ईन। सुइँदा ङे छ्य्‌वापा लै खिदुक सासीन थेला नोमुङ त्‍वाबा मालाङो। थेमे ङाला विश्‍वास खित्‍कान्‍ते मिलाचेन नोमुङ कोम्‍बा मालाङो।

१ कोरिन्‍थी 4:11

थोरूमसाकोङ ङ्योकोन साप थुङा माङेत्‍ला पालोताङ पालो त्‍वाबा तुक्‍पाराङ ख्‍याम्‍गीन ओत। खोलाक डाकस्‍याक डिकस्‍यिकराङ काल्‍ला ख्‍याम्‍ग्‍यो। थेमे मिओनगी ङ्योकोनला छ्याःङ दया मोज्‍योबा खाला दुङगीदुक। ङेराङते सिराते खाम्‍बा जग्‍गा छ्याःङ मेताच्‍योक खाला ङ्योकोन युगीन देत्‍क्‍यो।

२ कोरिन्‍थी 11:27

ङे स्‍याप स्‍याप खाईन काम खाबाप। पालोताङ पालो ङे मिक छुम मिक्‍किता खाईन नुप स्‍येन्‍दान, पालोताङ पालो ङा त्‍वाबा कोम्‍बा लासीनोङ थोकराङ देतान, पालोताङ पालो ङा सुबाला अन्‍ने तारानराङ मुलुबा खाईन देतान थेमे खोन्‍च्‍या दिङच्‍या मेतेकी पालोताङ पालो ङा खेबे नाङला ख्‍वाकीनराङ देतान।

२ कोरिन्‍थी 12:10

थोगी ङाराङगी छ्याःङ खिता मुथुप्‍जीन ईन्‍स्‍यीत, ज्‍येनगी ङाराङला इज्‍जत बेइज्‍जत खित्‍जीन ईन्‍स्‍यीत, दुक्‍पा ङेत्‍जीन ईन्‍स्‍यीत, मिओनगी ङाराङला खेदापानी खित्‍जीन ईन्‍स्‍यीत थेमे आपत् विपत्‌ला फाप्‍जीन ईन्‍स्‍यीत ख्रीष्‍टकी मि ईन्‍देकी ङानी सधैँ गा खिन देता थुप्‍क्‍यो। दोक खाला ङाराङगी छ्याःङ खिता मुथुपे बेलालाराङ ख्रीष्‍टकी शक्ति ङेता ओतेकी ङे जेङ खिता थुप्‍कीदुक।

२ कोरिन्‍थी 6:10

दोक दोक ओङला पीरताङ तापकी नाङ देता फाप्‍सीनोङ ङ्योकोन सधैँ छ्याःङ पीर मेताते मि च्‍योक खाला गा खिन देत्‍क्‍यो। थेमे ङेराङ लाला साकान्‍ते च्‍योक्‍तेन्‍दे ओत्‍सीनोङ ङ्योकोनगी खाबाते कामगी खित्‍सादु मिओनगी परमेश्‍वरगी तेरच्‍येते जति गाङे ङेत्‍क्‍यो। लोक्‍ला ङ्योकोन ङेराङते सिराते छ्याःङ मेताते कङ्गाली च्‍योकराङ ईन्‍सीनोङ परमेश्‍वरगी खित्‍सादु ङेत्ताङ जेसुकै ओत।

याकूब 1:12

थेमे दुक्‍पा ओङजीन खपे खिन देत्‍कान्‍ते मि भाग्‍यमानी ईन। च्‍यिला सासीन थोक्‍ते दुक्‍पा खपे खाईन सिन्‍नामेकी थोक्‍ते मिला परमेश्‍वरगी थे खोरोङला ङिङज्‍ये खित्‍कान्‍ते मिओनला तेरग्‍यो साबाते इनाम तेरग्‍यो। थे इनामचेन नोमुङ मिसिन्‍च्‍येते जुनी ईन।

छ्या स्‍ये च्‍युताते बात 21:3

थेमे सिंहासनदुकी आउदी कस्‍स्‍ये खाईन “थानामेईचेन सधैँ लाईदु परमेश्‍वर थे खोरोङ मिओनताङ देत्‍क्‍यो। थेमे थेबा परमेश्‍वर मि ओङगो। परमेश्‍वर थेबाताङ ङ्योम्‍बु देत्‍ला थेचेन थेबे परमेश्‍वर ओङगो।

छ्या स्‍ये च्‍युताते बात 7:16

त्‍वाबा कोम्‍बा सिराते था थेबाला नोमुङ मालाङो। ङीमे रापकी थेबाला मिछिगो। खपेराङ खिता मुथुप्‍च्‍येते गर्मीकीङ थेबाला छ्याःङ खिता मुथुबो।