लूका 24:44 - जिरेल

⁴⁴ थेमे थेकी थेबाला “मोशेकी टिबाते नियमला थेमे परमेश्‍वर बात खित्‍कान्‍ते मिओनगी टिबाते किताबला ङे विषयला टिबा ओत। थोकराङ खाईन भजन किताबलाङ ङे विषयला टिबा ओत। ङाला चुक चुक ओङगीते सिन टिबाते बात गाङे साबा च्‍योकराङ ओङा फाप्‍क्‍यो सिन ङे गोमा ख्‍योकोनताङ ङ्योम्‍बु ओत्‍जीनराङ साबा ओतान,” सिन सिदुक।

लूका 24:44 Iomraidhean Croise

मत्ती 1:22

मरियमगी दोक खाला फुज्‍यीमा खुरला फिजा केच्‍येते बात प्रभु परमेश्‍वरगी थे खोरोङ बात खित्‍कान्‍ते मिला थाङबोका दोक सिन सिर च्‍युता ओतान। थेकी साबाते बात साबा च्‍योकराङ ओङसुङ।

मत्ती 16:21

थेमे दि तिरीमेकीचेन येशूकी चेलातेबाला “था ङा यरूशलेमपा ड्वा फाप्‍क्‍यो। थेपा गाल्‍नामेकी यहूदी छ्ये छ्ये मि, छ्ये छ्ये पूजारीताङ धर्मे गुरूओनगी ङाला आउदी दुक्‍पा तेरग्‍यो। थेमे सेदोङ ज्‍युत्‍क्‍यो। तर सेताते ङीमा सुमगी छोमु परमेश्‍वरगी ङाला सोम्‍बो लोइओ,” सिन थे खोरोङला च्‍यि ओङगीते, चुक ओङगीते सिन लाःपाला स्‍यूसुङ।

मत्ती 26:54

ङे थोक खासीन च्‍यि ङाला दोक दोकराङ ओङा फाप्‍क्‍यो सिन परमेश्‍वर बातला टिबाते बात साबा च्‍योकराङ ओङगोतरो?” सिन सिदुक।

मत्ती 26:56

परमेश्‍वर बात खित्‍कान्‍तेबेकी टिबाते बात साबाच्‍योक ओङालाराङ दि गाङे दोक दोकराङ ओङाते ईन,” सिन सिदुक। थेकी दि बात साकीन सिन्‍नामेई चेलातेबाचेन गाङे थेला ताङगीन छ्य्‌वासुङ।

मर्कूस 9:31

च्‍यिला सासीन थेकी चेलातेबाला थोरूमोङ बात लोपा फाप्‍च्‍या ओतान। दोक खाला डुइन डुइन थेकी चेलातेबाला “था परमेश्‍वर ओत्‍सादुई वाबाते मि ङाला मिज्‍यीगी धोका बिन्‍ला ज्‍येन मि लाःक्‍तु सोम्‍पे खिओ। थेमे थेबेकी ङाला सेत्‍क्‍यो। तर ङीमा सुम तिरी ङा सोम्‍बो लोइओ,” सिन सिदुक।

लूका 21:22

दिचेन परमेश्‍वरगी यहूदीओनला सजाय तेरच्‍येते समय ईन। थोक खाला परमेश्‍वर बातला गोमाका टिबाते सजाय तेरच्‍येते बात साबा च्‍योकराङ ओङगो।

लूका 22:37

च्‍यिला सासीन परमेश्‍वर बातला गोमाका चुक सिन टिबा ओते सासीन ‘थेलाचेन मिओनगी डाँकाओनला च्‍योकराङ खिओ,’ सिन टिबा ओत। दि बात ङेन। च्‍यि सासीन ङाला चुक खिते सिन ङे विषयला परमेश्‍वर बातला टिबाते बात गाङे साबा च्‍योकराङ ओङा फाप्‍क्‍यो,” सिन सिदुक।

लूका 24:46

दोक खाला लाप्‍ला तेरजीन थेकी थेबाला “परमेश्‍वर बातला परमेश्‍वरगी तोङगो साबाते ख्रीष्‍टकी आउदी दुक्‍पा भोगे खाला स्‍या फाप्‍क्‍यो। तर स्‍याप्‍ते ङीमा सुमगी छोमु सोम्‍बो लोइओ सिन टिबा ओत।

लूका 9:22

थोरूमोङ बात खिन येशूकी थेबाला “परमेश्‍वर ओत्‍सादुई वाबाते मि ङे आउदी दुक्‍पा भोगे खिता फाप्‍क्‍यो। यहूदी छ्ये छ्ये मि, छ्ये छ्ये पूजारी थेमे धर्मे गुरूओनगी ङाला परमेश्‍वरगी ताङाते ईनराङ मेन सिन सिओ। थेमे सेदोङ ज्‍युत्‍क्‍यो। तर सेताते ङीमा सुमगी छोमु परमेश्‍वरगी ङाला सोम्‍बो लोइओ,” सिन सिदुक।

लूका 9:44

“ङा ख्‍योकोनला दि बातज्‍यीक सिओ। दि बात लेमु खाला नामज्‍योक सेत्‍ला ङेन। च्‍यि सासीन था परमेश्‍वर ओत्‍सादुई वाबाते मि ङाला मिज्‍यीगी धोका बिन्‍ला ज्‍येन मि लाःक्‍तु सोम्‍पे खित्‍च्‍येते बेला लेपा खाबा ओत,” सिन सिदुक।

यूहन्‍ना 3:14

थाङबो मोशेकी ठाःकताङ बालुवा बाई छ्याःङ मेत्‍साला ओत्‍जीन पित्तल रूल जोकीन ज्‍वाला काला च्‍योकराङ खाला परमेश्‍वर ओत्‍सादुई वाबाते मि ङाला था स्‍यिङगी थामला टाँए खिओ।

यूहन्‍ना 5:39

परमेश्‍वर बातला साबाच्‍योक खासीन नोमुङ मिसिन्‍च्‍येते जुनी ङेत्‍क्‍यो सिन ख्‍योकोन थे बाततेबा आउदी लेमु खाला पढे खिदुक। थे बातला ङा सु ईन्‍दे सिन लेमु खाईन टिबा ओत।

यूहन्‍ना 5:46

मोशेकी बिन्‍दाते नियम ङेन्‍कान ईन्‍दा ईन्‍सीन ख्‍योकोनगी ङे बादोङ ङेन्‍च्‍या ओतान। च्‍यिला सासीन थेकी ङे विषयला लेमु खाईन टिबा ओतान।

शक्ति काम 13:40

बात चुक चुक ईन्‍दाका सिन ख्‍योकोन गाङेकी दाक थोसुङ। थोगी था ङ्योकोनगी साबाते बातओन लेमु खाला ङेन। मेन सासीन गोमा परमेश्‍वर बात खित्‍कान्‍ते मिओनगी साबाते दि बाततेबा ख्‍योकोन गोःनामा फाबोङ।

शक्ति काम 2:27

च्‍यिला सासीन प्रभु खोरोङगी छाने खाबातेला खुई सबी चावादु मोज्‍योओ। ङे सेमला पाप सिराते छ्याःङ मेतेकी खुई ङाला से चावादु रूल मुज्‍युदो।

शक्ति काम 3:18

ईन्‍दानी थे खोरोङगी तोङगो साबाते ख्रीष्‍टकी दुक्‍पा ङेत्‍क्‍यो सिन परमेश्‍वरगी थोङलाकाराङ थे खोरोङ बात खित्‍कान्‍ते मिबरीला सिर च्‍युता ओतान। ख्‍योकोनगी येशूला सेत्‍जीन परमेश्‍वरगी थे खोरोङगी सिर च्‍युताते बात साबा च्‍योकराङ ओङ च्‍युत्‍सुङ।

शक्ति काम 7:37

थेमे थेकीराङ इस्राएलीओनला ‘था तिरी प्रभु परमेश्‍वरगी ङा च्‍योकराङ परमेश्‍वर बात खित्‍कान्‍ते मिज्‍यीक तोङगो। थेलाचेन ख्‍योकोन नाङदुईराङ छाने खिओ,’ सिन साबा ओतान।

हिब्रू 10:1

परमेश्‍वरगी मि नाङ थे खोरोङ नियम छ्य्‌वापेई खिता चालाते कामताङ तिरी थेबाला लेमु खिओ साबाते काम दोक्‍पोईराङ मेतान। थे नियमचेन तिरी थेकी लेमु खिओ साबाते कामगी नक्‍कलकामा ओतान। थोगीराङ थे नियमला साबाच्‍योक खाईन पूजारीओनगी लोई ठाङमा परमेश्‍वरला याङ याङ पशुतेबा भोग तेरगीन देत्‍सीनोङ थेला माने खिताला थे दोन्‍दु डोकान सुङगीङ नोमुङ था ईन्‍सीन ङे पाप गाङे माफ ओङसुङ सिन सिरा थुपा मेतान।

हिब्रू 3:5

ईन्‍दानी ईन। च्‍यि सासीन मोशेकी थे खोरोङ काम लेमु खाईन खाबा ओतान। ईन्‍सीनोङ थेचेन सुइँदे खाम्‍बादु काम खित्‍कान्‍ते मि च्‍योक ओतान। थे कामचेन परमेश्‍वरगी तिरी चुक चुक खिते सिन ज्‍येनला लाःप्‍च्‍येते ओतान।

हिब्रू 7:1

मल्‍कीसेदेकचेन शालेम सारगी गेल्‍बो थेमे गाङे भन्‍दा छ्येते परमेश्‍वर पूजारी ओतान। बाजिई अब्राहाम गेल्‍बो स्‍यीला ग्‍याल्‍ला लडाइँलेई ग्‍युरला ओङजीन थेला ठेत्‍कीन थेकी अब्राहामला आशी बिन्‍दा ओतान।

हिब्रू 9:8

दि बातकी छ्य्‌वापेई परमेश्‍वर आत्‍मेकी मिओनला लेमु खाईन दि बात छ्या स्‍ये ज्‍युता चाला ओतान। च्‍यि सासीन थे पालगी नाङ गोमे कोठा ओत ओतसाक थे कोठा भन्‍दाङ आउदी चङगेते परमेश्‍वरराङ देत्‍च्‍येते ठाउँ सासादु डोच्‍येते लाम थोरूमसाक खुले खाबा मेत सिरच्‍येते बात थेकी छ्या स्‍ये ज्‍युता चाला ओतान।

१ पत्रुस 1:11

थेबे सेमगी नाङ ओताते ख्रीष्‍टकी आत्‍मेकी ख्रीष्‍टकी देमा वाला दुक्‍पा भोगे खाला स्‍या फाप्‍च्‍येते थेमे थे दुक्‍पा भोगे खाईन सिन्‍नामेई परमेश्‍वरगी थेला छ्येज्‍यीक मान तेरच्‍येते बात थेबाला छ्या स्‍ये च्‍युत्‍नामेई था च्‍यि बेलाला चुक चुक ओङजीन परमेश्‍वरगी थोक खिताका सिन थेबेकी छ्या स्‍येबा चाला ओतान।

छ्या स्‍ये च्‍युताते बात 19:10

थेकी थोक सानामेई से खिताप सिन ङा थे दूतकी काम्‍बादु गुर्बु खिता खाबा ओतान। तर थेकी ङाला “खुई ङाला दोक खाला परमेश्‍वरला च्‍योक खाला से माकेत। येशू सु ईन्‍दे, थेकी च्‍यि खिते सिन लोप्‍कान्‍ते खोत्ताङ खुई आज्‍यो न्‍वाओन च्‍योकराङ ङाङ परमेश्‍वर काम खित्‍कान्‍तेकामा ईन। थोगी परमेश्‍वरलाकामा छ्ये जो। येशू सु ईन्‍दे, थेकी च्‍यि खिते सिन लोप्‍च्‍येतेचेन परमेश्‍वर आत्‍मे छ्य्‌वापेई खित्‍च्‍येते ईन,” सिन सिदुक।