याकूब 2:14 - जिरेल

¹⁴ आज्‍यो न्‍वावे, सुइँदा मिकी ङा येशू ख्रीष्‍टला विश्‍वास खित्‍कान्‍ते मि ईन खिदुक तर थेकी खि साबाते काम मिक्‍किदुक सासीन थे मिला च्‍यि लेमु ओङगीतेरो? च्‍यि थोक्‍ते मि पापकी सजायदुकी थारा थुप्‍क्‍योतरो?

याकूब 2:14 Iomraidhean Croise

मत्ती 5:20

बात दोक ईन्‍देकी ङा च्‍यि सिते सासीन धर्मे गुरूओनताङ फरिसी पाटी मिकी खिताच्‍योक खाला मेन्‍देकी लेमु खाईन परमेश्‍वर नियम ङेन्‍सीनकामा ख्‍योकोन स्‍वर्गे राज्‍यने स्‍यूक्‍पा ङेत्‍क्‍यो।

लूका 3:11

थेकी “ख्‍योकोनगी दोक खि। च्‍यि सासीन सुइँदाताङ फेङगाक ङि ओत्‍सीन दोक्‍पोई ज्‍येन मेत्‍कानला बिन। थोकराङ खाला ओत्‍कान्‍तेबेकी छ्याःङ मेतातेबाताङ गोला सो,” सिन सिदुक।

लूका 6:49

तर ङे बात थोलाङ खि साबा च्‍योकराङ मिक्‍किकान्‍ते मिचेन जग रोम्‍बो खाला मिदिङा खाला खाम्‍बा जोकान्‍ते मि च्‍योक्‍ते ईन। थोक खाईन जोबाते खाम्‍बानी भल ग्‍याला ओङजीन छ्याःङ मेदेता खाला बराङ बुरूङ राम्‍ग्‍यो,” सिन सिदुक।

शक्ति काम 15:9

थेबेकी येशूला विश्‍वास खाबेकी खित्‍सादु परमेश्‍वरगी थेबे पाप गाङे माफ बिन्‍गीन थेबे सेम लेमु जोसुङ। थोक खाईन थेकी ङुरूङ यहूदीताङ थेबाला दोक्‍पोईराङ सम्‍झे खाबा ओत।

शक्ति काम 8:13

थे शिमोन सिरातेकीङ फिलिपकी लोप्‍च्‍येते बातराङ ङेन्‍गीन बप्‍तिस्‍मा लासुङ। थेमे थेङ फिलिपताङराङ देताला स्‍यूसुङ। फिलिपकी खाबाते छ्ये छ्येताङ अचम्‍बतेन्‍दे काम थोङजीन थे छक्‍क परे खासुङ।

शक्ति काम 8:21

खोनी थोरूमोङ परमेश्‍वर छ्य्‌वापा लै खाबा मेताक्‍वा। खुई सेम लेमु मेताक्‍वा। खुईचेन परमेश्‍वर आत्‍मा तेरा थुप्‍च्‍येते शक्ति मेङेदो, ङ्योकोनगी खाबा च्‍योकराङ खित्‍च्‍येते खुईते छ्याःङ हकोङ मेत।

रोमी 2:25

थेमे जीउला खतकी चिनु जोच्‍येते बात लोक्‍ला चुक सासीन ख्‍योकोनगी परमेश्‍वर नियम ङेन्‍दा ईन्‍सीन परमेश्‍वरगी छाने खाबाते मि ईन सिन ख्‍योकोनगी थे चिनु जोबाते काम लै खित्‍च्‍या ओतान। परमेश्‍वर नियम माङेन्‍नामेकी परमेश्‍वर दोन्‍दु ख्‍योकोननी थे चिनु माजोबाते ज्‍येन ज्‍येन जातकी मि छेतराङ ईन।

१ कोरिन्‍थी 15:2

ङे ख्‍योकोनला लापाते थे गा लाङच्‍येते बातला खि साबा च्‍योकराङ खिन देत्‍सुङ सासीन ख्‍योकोनगी पापकी सजाय भोगे खिता माफाबो। थोक खिन मादेत्‍सीन थे बात ङेन्‍दाते ख्‍योकोनला छ्याःङ काम लै मिक्‍किओ।

१ कोरिन्‍थी 16:22

सुइँदेकी प्रभु येशूला ङिङज्‍ये मिक्‍किदुक सासीन थोक्‍ते मिला परमेश्‍वरगी सराप तेरस्‍यीत। स्‍योक स्‍योक प्रभु येशू, खो होत्ता स्‍योक।

गलाती 5:13

आज्‍यो न्‍वावे, ख्‍योकोन थे खोरोङ नियम अधीनला देता माफाप्‍स्‍यीत सिन परमेश्‍वरगी ख्‍योकोनला थे खोरोङ दोन्‍दु स्‍योक सिन काताङाते ईन। दोक सिरजीनमेईराङ थोक ईन्‍सीन थानी जे खासीनोङ ओङच्‍याक्‍वा सिन खेराङ सेमला लाबा लाबा माकेत। बरू ख्‍योकोनगी दाक्‍पोन नाङ ङिङज्‍ये खितरीङ खिन दोक्‍पोईकी ज्‍येनज्‍यीकला लेमु खि।

गलाती 5:6

च्‍यिला सासीन येशू ख्रीष्‍टताङ जीउज्‍यीकराङ ओङाते मिओनगी खतकी चिनु जोसीनोङ माजोसीनोङ छ्याःङ फरक परे मिक्‍किओ। छ्येते बातचेन थेबेकी येशू ख्रीष्‍टला विश्‍वास खाला ज्‍येनतेबालाङ ङिङज्‍ये खिकाना मिक्‍किका सिरच्‍येतेकामा ईन।

१ थिस्‍सलोनिकी 1:3

धन्‍यवाद सिरजीनराङ ख्‍योकोनगी येशू ख्रीष्‍टला विश्‍वास खाईन लेमु काम खिताला स्‍यूबाते थेमे ज्‍येनला ङिङज्‍ये खिन झन झन लेमु खाबाते बातकी लाईदु ङुरूङ आबा परमेश्‍वरला धन्‍यवाद सिओ। थे लाईदुकामा मेन, था ङीमाई ङुरूङ प्रभु येशू ख्रीष्‍ट ग्‍युरला ओङगो सिन आश खाईन गुकीन देता ओतेकी जस्‍तो दुक्‍पा ओङसीनोङ ख्‍योकोन सेम मेसेता खाईन देता ओताते बातकी लाईदुङ ङ्योकोन थेला धन्‍यवाद सिओ।

१ तिमोथी 1:5

ङे खोल्‍ला होथे मिओनला दोक खि, थोक माकेत सिन कोत साबातेचेन थेबेकी ज्‍येनतेबाला ङिङज्‍ये खित्‍स्‍यीत सिनराङ ईन। थोक खाला ङिङज्‍ये खिताला थेबे सेम लेमु ओङा फाप्‍क्‍यो, दाक्‍पोनला ङे दोक खिता ठीक मेन सिराच्‍योक लाबाते काम छ्याःङ खिता मेङगो, थेमे खेकीकामा मेन्‍देकी येशू ख्रीष्‍टला पक्‍काराङ खाला विश्‍वास खिता फाप्‍क्‍यो।

१ तिमोथी 4:8

मिओनगी दाक्‍पोन ङार्मा ओङस्‍यीत सिन खोपरोङ जीउला दुक्‍पा बिन्‍गीन तालिम खाबाते छ्याःङ काम लै मिक्‍किच्‍येतेचेन मेन। ईन्‍सीनोङ परमेश्‍वरला माने खित्‍जीन खाबाते कामचेन दि भन्‍दा खापान खापान खुदुक ईन। दोक्‍ते काम खित्‍कान्‍ते मिलाचेन परमेश्‍वरगी दि जुनीलाकामा मेन तिरी जुनीलाङ आशी तेरग्‍यो सिन साबा ओत।

तीतस 1:16

खोपरोङ होथोक्‍ते मि ईन्‍सीनोङ थेबेकीचेन परमेश्‍वर सु ईन्‍दे, चुक्‍ते ईन्‍दे सिन ङ्योकोनला लेमु खाला छ्या ओत सिन सिओ। थेबे काम ताला थेबा परमेश्‍वरला माने खित्‍कान्‍ते मि मेन सिन दाक छ्या स्‍येक्‍यो। थेबाला थोङजीन परमेश्‍वरला गा मालाङो, थेबेकी परमेश्‍वरगी साबाते ङेनराङ मेङेनो थेमे लेमु काम सिराते छ्याःङ खिताराङ मुथुबो।

तीतस 3:8

दि बात साँच्‍चीराङ ईन्‍दाते बात ईन। थोगी ङा खोल्‍ला च्‍यि सिते सासीन परमेश्‍वरला विश्‍वास खित्‍कान्‍ते थेरू मिओनगी लेमुते काम खित्‍च्‍ये छ्य्‌वापाकामा सेम लै खाला थोकराङ खित्‍स्‍यीत सिन थेबाला दि बात दोरे खाला खाला लाप्‍ला बिन। दि बात लेमु ईन्‍देकी मिओनगी ङेन्‍सुङ सासीन गाङेला लेमु ओङगो।

हिब्रू 11:17

परमेश्‍वरगी जे खासीनोङ लेमुराङ खिओ सिन थेला विश्‍वास खाबा ओतेकीराङ थेकी थे सेम ताप्‍ला इसहाकला भोग बिन सिरजीन अब्राहामगी थोक खिताला ठीक खासुङ। थेकी अब्राहामला थे सखा सन्‍तान काल्‍बेई फेल ज्‍युत्‍क्‍यो सिन जमान खाबा ओतान। थे खोरोङ सन्‍तान मिनला दोक्‍पोईराङ ओताते फुज्‍युङला अब्राहामगी भोग तेराला ठीक खाबा ओतान।

हिब्रू 13:9

बात दोक ईन्‍देकी परमेश्‍वर बात ईन सिन थे बातताङ डिकराङ मिडिक्‍च्‍येते खुदुक खुदुकते बात ङेन्‍ला छक्‍के माकेत। परमेश्‍वरगी दया खाबा ओतेकी खित्‍सादु होथोक्‍ते बातला नामज्‍योक मेसेता खाला छ्याःङ शंका मिक्‍किता खाला थेला विश्‍वास खिन देता लेमु ईन। दि सा ओङगो, थे सा मेङगो सिरच्‍येते नियम ङेन्‍ला सुङलाङ छ्याःङ फाइदा मेत।

याकूब 1:16

ङिङज्‍येते आज्‍यो न्‍वावे, ख्‍योकोन दाक्‍पोनगी ठुबाते डालुमला दाक्‍पोनराङ स्‍यूक्‍च्‍येते काम माकेत।

याकूब 2:16

थेला गोच्‍येते छ्याःङ मेतेरा खाईन ख्‍योकोन सुइँदेकी “लो लेमु खाला ग्‍युक थेमे खाँपा गाल्‍ला सुबा खाङ सोला ठोम्‍मु खाला ङ्योल,” सालाकामा च्‍यि होथे मिला खइँदा लेमु ओङगो?

याकूब 2:18

थेमे कोईकी चुक सिते सासीन ङा येशू ख्रीष्‍टला विश्‍वास खिओ, ज्‍येनगीचेन थेकी खि साबाच्‍योक खाला काम खिदुक सिन सिओ। दोक सिरकान्‍ते मिला ङा च्‍यि सिते सासीन छ्याःङ काम मिक्‍किता खाला येशू ख्रीष्‍टला विश्‍वास खिओ सिन लो खो ङाला तेन। थेला विश्‍वास खिओ सिन ङानी खोल्‍ला कामराङ खाला तेन्‍ग्‍यो सिन सिओ।

याकूब 2:26

बातचेन दिराङ ईन, ङेपाक छ्येताते मिकी छ्याःङ खिता माथुपा च्‍योकराङ सुइँदेकी येशू ख्रीष्‍टकी खि साबाच्‍योक खाला काम मिक्‍किता खाला खेकीकामा थेला विश्‍वास खिओ साला छ्याःङ काम लै मिक्‍किओ।

२ पत्रुस 1:5

बात दोक ईन्‍देकी ङुरूङ दि सा लुङबे मि ज्‍येन च्‍योकराङ मेन्‍देकी ङा ख्‍योकोनला च्‍यि सिते सासीन येशू ख्रीष्‍टला विश्‍वास खिन देत्‍ला ख्‍योकोनगी काम बात जे खित्‍जीनोङ लेमु खित्‍च्‍ये छ्य्‌वापाकामा स्‍येत खि। दोक खानामेई परमेश्‍वरगी च्‍यि खि सिका सिन लेमु खाला छ्या स्‍येबा खि।