हिब्रू 6:2 - जिरेल

² छ्युला लुक्‍ला बप्‍तिस्‍मा तेरच्‍येते, ज्‍येनगी लाक्‍तु लाक्‍पा ज्‍याक्‍ला प्रार्थना खित्‍च्‍येते, स्‍यिनामेकी सोम्‍बो लोक्‍च्‍येते थेमे परमेश्‍वरगी तिरी चुक खाला मि गाङेते न्‍याय खिते सिरच्‍येते बातकामा खिन देता मेङगो।

हिब्रू 6:2 Iomraidhean Croise

मत्ती 28:19

थोगी था गाङे लुङबा लुङबाला गाल्‍ला गाङेपे मिओनला ङे चेला जो। चुक सासीन आबा परमेश्‍वर, परमेश्‍वर फुज्‍युङ थेमे परमेश्‍वर आत्‍मे मिनगी छ्य्‌वापेई थेबाला बप्‍तिस्‍मा बिन।

मत्ती 3:14

थेकी थोक सिरजीन यूहन्‍नेकी “ङेनी हजूरला दोक खाला बप्‍तिस्‍मा तेरा सोईराङ मिक्‍किओ। बरू खुईका ङाला बप्‍तिस्‍मा तेरा डिक्‍च्‍येते ईन,” सिन बप्‍तिस्‍मा तेरा माङेन्‍सुङ।

मर्कूस 16:16

दि बात ङेन्‍ला ङाला विश्‍वास खाला बप्‍तिस्‍मा लिन्‍कान्‍ते मिला परमेश्‍वरगी पापकी सजायदुकी डेल्‍ग्‍यो। दि बात मेङेन्‍कानताङ ङाला विश्‍वास मिक्‍किकान्‍तेलाचेन परमेश्‍वरगी पापकी सजाय तेरग्‍यो।

मर्कूस 7:4

थेबा फार छुर हाट बजारला गाल्‍गीन वानामेकीङ खोपरोङ चोके माक्‍याबाला छ्याःङ सेइन मेतान। थेबेते दोक्‍ते रीतिथिति ज्‍येनोङ काल्‍बेई ओतान। कचौराओन, लोटाओन थेमे पित्तल स्‍यीओनोङ रीतिथितिला साबा च्‍योकराङ खाला ठुता फाप्‍कीन ओतान।

मर्कूस 7:8

यशैयेकी टिबा ओता च्‍योकराङ खाईन ख्‍योकोनगी परमेश्‍वर नियम ङेन्‍दा ताङगीन मिकी जोबाते रीतिथितिका माने खिदुक,” सिन सिदुक।

लूका 11:38

थेकी लाक्‍पा ठुत्‍जीन फरिसी पाटी मिओनगी खिता च्‍योकराङ खाईन चोके मिक्‍किता खाईन साप साप्‍ला देत्‍सुङ। थेकी थोक खाबा थोङजीन थे फरिसी पाटी मिला अचम्‍ब लासुङ।

लूका 12:50

दि काम खाला सिन्‍दा खिताला ङे आउदी खाला पीरताङ दुक्‍पा भोगे खिता फाप्‍क्‍यो। थातासाकला थे दुक्‍पा भोगे खाईन सिन्‍दा ओता ईन्‍सीन लेमु ओङच्‍या ओतान। च्‍यिला सासीन दोक मायाङ थुपथुप ङे सेमला ढुक्‍क मेङगो।

लूका 14:14

थोक खासीनराङ खुई आशी ङेत्‍क्‍यो। होथेबेकी खुई लै खाबाते भोज सेइओ। तर खोल्‍ला काताङला भोज तेरा मुथुबो। ईन्‍सीनोङ परमेश्‍वरगी थे खोरोङगी खि साबा साबा च्‍योकराङ खित्‍कान्‍ते मिओनला स्‍यिसादुई सोम्‍बो लोक्‍नामेई खुई थोक लेमु खाबे लाईदु खोल्‍ला मान तेरग्‍यो,” सिन सिदुक।

लूका 3:16

थे बात छ्या स्‍येकीन यूहन्‍नेकी “ङानी ख्रीष्‍ट मेन। थेनी थाका ओङगीन ओत। थेचेन ङा भन्‍दा खापान खापान छ्ये ईन। सिइराङ सासीन ङानी थे योक्‍पो ओङला काचाप टोल्‍ला तेरालाङ सोई मिक्‍किओ। ङा खालि ख्‍योकोनला छ्युलाकामा लुक्‍ला बप्‍तिस्‍मा तेरग्‍यो। थेकीचेन ख्‍योकोनला परमेश्‍वर आत्‍मा तेरच्‍येतेताङ मेला लुक्‍ला न्‍याय खित्‍च्‍येते काम ङिकाराङ खिओ।

यूहन्‍ना 1:33

मिओनला छ्युला लुक्‍ला बप्‍तिस्‍मा बिन सिरकान्‍ते परमेश्‍वरगी ङाला गोमाकाराङ ‘खुई ङे आत्‍मा वाला मिज्‍यीक लाक फाप्‍ला थेत्ताङ देता थोङगो। मिओनला परमेश्‍वर आत्‍मेकी बप्‍तिस्‍मा तेरकान्‍तेचेन थेराङ ईन सिन छ्या स्‍येबा खि,’ सिन साबा ओतेकीराङ ङे थेला छ्या स्‍येबाते ईन।

यूहन्‍ना 5:29

थेमे थुर्सादुकी थेन्‍ला ओङगो। थोक खाला सोम्‍बो लोक्‍कान्‍तेबे नाङ लेमु काम खाबा ओताते मिओनगी नोमुङ मिसिन्‍च्‍येते जुनी ङेत्‍क्‍यो। थेमे मेलेबा काम खाबा ओतातेबेकीचेन दोषी ईन सिन सजाय ङेत्‍क्‍यो।

शक्ति काम 10:47

“परमेश्‍वरगी दिबालाङ ङुरूङला च्‍योकराङ खाईन परमेश्‍वर आत्‍मा बिन्‍नामेकी था दिबाला छ्युई नाङ लुक्‍ला बप्‍तिस्‍मा तेरा मेङगो सिन सुई सिरा थुप्‍कीते?” सिन सिदुक।

शक्ति काम 13:3

परमेश्‍वर आत्‍मेकी थोक सानामेई थेबेकी थोरूमोङ बर्त देत्‍कीन परमेश्‍वरला प्रार्थना खासुङ। थोक खाईन सिन्‍नामेकी थेबेकी बारनाबासताङ शावल लाक्‍तु लाक्‍पा ज्‍यागीन प्रार्थना खासुङ। थेमे परमेश्‍वर आत्‍मेकी थेबाला खि साबाते काम खिताला थेरूकी ताङसुङ।

शक्ति काम 16:15

थेमे थे फेम्‍मे मित्ताङ थे खाम्‍बादु देत्‍कान्‍ते गाङेकी बप्‍तिस्‍मा लासुङ। थोक खानामेई थे फेम्‍मे मिकी “ङे पक्‍काराङ प्रभु येशूला विश्‍वास खिताला स्‍यूबाते ईन सिन ख्‍योकोन पत्ते खिओ सासीन ङे खाम्‍बापा देताला डुइ,” सिन ढिपी खाईन ङ्योकोनला थे मोरोङ खाँपा खेरसुङ।

शक्ति काम 16:33

थेमे थे हाकिमगी थेबा ङिबोला ग्‍वाकाराङ खेरगीन थेबाला दुङजीन थोताते मातेबा टुकीन बिन्‍सुङ। थेमे थेत्ताङ थे खाम्‍बे मिओनगी बप्‍तिस्‍मा लासुङ।

शक्ति काम 17:18

थे मि रूक्‍सादु इपिक्‍युरीताङ स्‍तोइकी सिरातेन्‍दे पाटी गुरूओनोङ ओतान। पावलगी लापाते येशू बात थेमे स्‍यिनामेकी याङराङ सोम्‍बो लोइओ सिरच्‍येते बात थोजीन थेत्ताङ छलफल खिन थेबे नाङ लालेकी “दि फतफते बादोङ च्‍यि ङेन्‍च्‍ये?” सिन सासुङ। लालेकीचेन “दिकी ज्‍येन लुङबे ल्‍हे बात खित्‍च्‍या ईन्‍दा च्‍यिन्‍दा,” सिन सासुङ।

शक्ति काम 2:38

ठिजीन पत्रुसकी “था ख्‍योकोन गाङेकी खेराङ पापी दुका सिन छ्या स्‍येला परमेश्‍वर छ्य्‌वापा लै खि। थेमे येशू ख्रीष्‍ट मिनगी छ्य्‌वापेई बप्‍तिस्‍मा लोङ। थेमे परमेश्‍वरगी ख्‍योकोन पापतेबा माफ तेरग्‍यो। थेमे ख्‍योकोनगी परमेश्‍वर आत्‍मा ङेत्‍क्‍यो।

शक्ति काम 2:41

पत्रुस बात ङेन्‍कान्‍तेबाला पत्रुसबेकी छ्युला लुगीन बप्‍तिस्‍मा बिन्‍सुङ। थेबा मेन्‍दा हजार सुमजो ओतान। थोक खाईन थे छोमु थेबाङ येशूला विश्‍वास खित्‍कान्‍ते मिओनताङ थपे खासुङ।

शक्ति काम 23:6

थेरू जम्‍मा ओङाते यहूदीओन छ्ये छ्ये मि नाङ कोई सदुकी पाटी मि, कोईचेन फरिसी पाटी मि ओतान। थेरू पाटी ङि मि ओताते बात छ्या स्‍येकीन पावलगी गाङेकी थोच्‍या खाईन “आज्‍यो न्‍वावे, ङाङ फरिसी पाटी मि ईन। ङे आबाबा गोप्‍पोबाङ फरिसी पाटी मिराङ ओतान। ङा परमेश्‍वरगी स्‍याप्‍ते मिला तिरी सोम्‍बो लोइओ सिन पत्ते खित्‍कान्‍ते मि ईन्‍देकीराङ ङाला मुद्धा चले खाईन दोक खाईन थरिङ ख्‍योकोन गाङे दोन्‍दु खुलाबाते ईन,” सिन सिदुक।

शक्ति काम 24:15

दोस्‍यिककामा मेन, लेमु खित्‍कान ईन्‍स्‍यीत, मेलेबा खित्‍कान ईन्‍स्‍यीत तिरी परमेश्‍वरगी स्‍याप्‍ते मि गाङेला सोम्‍बो लोइओ सिरच्‍येते बात पक्‍काराङ ईन सिन ङाङ दिबा च्‍योकराङ खाला पत्ते खिओ।

शक्ति काम 24:21

ङाचेन स्‍याप्‍ते मिओनला परमेश्‍वरगी था तिरी सोम्‍बो लोइओ सिन पत्ते खित्‍कान्‍ते ईन्‍देकी ङाला मुद्धा चले खाईन थरिङ दुरू खुलाबाते ईन सिरच्‍येते बातज्‍यीकचेन ङे थेजीन दिबा गाङे दोन्‍दु गाङेकी थोच्‍या खाईन साबाते ईन। ङेते खइँदा गल्‍तीराङ ओत सिन सासीन दिराङ ईन,” सिन सिदुक।

शक्ति काम 24:25

मिओनगी परमेश्‍वरगी साबा साबा च्‍योकराङ खिता फाप्‍च्‍येते, दाक्‍पोन सेम काबूला ज्‍य्‌वाबा फाप्‍च्‍येते थेमे परमेश्‍वरगी मि गाङे न्‍याय खित्‍च्‍येते दिन ओङगो सिनोङ लाप्‍कीन बिन्‍सुङ। थेकी दि बातओन खित्‍जीन ज्‍यीबा लाबेकी फेलिक्‍सकी थेला “लो थरिङ दोस्‍यिकराङ ओङसुङ। ज्‍येन बात खिताला फुर्सत ङेत्‍नामेई ङा ङारो ना लोक्‍ला खोल्‍ला कातोङामीन,” सिन थेला थेरूकी ताङसुङ।

शक्ति काम 26:8

परमेश्‍वरगी स्‍याप्‍ते मिला सोम्‍बो लोक्‍पा ओत सिरजीनचेन ख्‍योकोन यहूदीओन च्‍यिला सुङ पत्ते मिक्‍किते? ङालानी अचम्‍ब लाङगीदुक।

शक्ति काम 4:2

थेमे थेबाबरी थेबा ङिबोताङ आउदी स्‍येदाङ खासुङ। च्‍यिला सासीन थेबा ङिबो येशू स्‍यिनामेकी लोईन सोम्‍बो लोक्‍पा ओत, थोगी स्‍याप्‍ते मिओनोङ सोम्‍बो लोइओ सिन मिओनला लोप्‍कीन ओतान।

शक्ति काम 6:6

थेमे थेबेकी खोपरोङगी छाने खाबाते मेन्‍दा दुईनला येशू ख्रीष्‍टकी खटे खाबाते मिओन ओत्‍सादु खुला लिच्‍युङ। थेमे येशू ख्रीष्‍टकी खटे खाबाते मिओनगी थेबा मेन्‍दा दुईनबो लाक लाक्‍पा ज्‍यागीन प्रार्थना खाईन बिन्‍सुङ।

रोमी 2:16

ङे साबाते बातओन दोकराङ ईन सिन था तिरी न्‍याय खिते छोमु छ्या स्‍येक्‍यो। थे छोमु परमेश्‍वरगी मि गाङे सेमगी बात खाङ लेमु ईन्‍दे, खाङ मेलेबा ईन्‍दे सिन येशू ख्रीष्‍टला डेल च्‍युत्‍ला न्‍याय खित ज्‍युत्‍क्‍यो। था ङीमाई दोक ओङगो सिनचेन ङे लोप्‍कीन ओताते गा लाङच्‍येते बातला साबा ओत।

१ कोरिन्‍थी 10:2

थोक खाला थेबा मोशे तिरी ख्‍याम्‍जीन मुक्‍पाताङ समुन्‍द्रे नाङराङ गाङेकी छ्युला लुक्‍ला तेरच्‍येते बप्‍तिस्‍मा लाबा ओतान सिन ङुरूङ सिरा थुप्‍क्‍यो।

१ कोरिन्‍थी 12:13

यहूदी ईन्‍सीनोङ, ग्रीक ईन्‍सीनोङ, योक्‍पो योङमु ईन्‍सीनोङ, ज्‍येन ईन्‍सीनोङ बप्‍तिस्‍मा लानामेई ङुरूङ गाङेराङ जीउज्‍यीकराङ ओङा ओत। थेमे ङुरूङ गाङेकी परमेश्‍वर आत्‍माज्‍यीकराङ ङेता ओत।

२ कोरिन्‍थी 5:10

च्‍यिला सासीन ख्रीष्‍टकी न्‍याय खिते छोमु छ्ये टेक्‍टे जोराङ ईन्‍सीनोङ ङुरूङ गाङेराङ थे दोन्‍दु ड्वा फाप्‍क्‍यो। थेमे थे छोमु थेकी ङुरूङगी दि जुनीला लेमु मेलेबा चुक खाला दुका थे ताला सु सुला च्‍यि खिता फाप्‍च्‍या दुका थोकराङ खिओ।

फिलिप्‍पी 3:21

ङुरूङ जीउ प्रभु येशू ख्रीष्‍टकीते सोम्‍बो लोक्‍जीन ओताते जीउ च्‍योक मेत। थोगी ङुरूङ नेइओ, दुक्‍पा ओङगो थेमे ङुरूङ स्‍यिनामेई रूल्‍ला डुइओ। ईन्‍सीनोङ था प्रभु येशू ख्रीष्‍ट ग्‍युरगीन वानामेई थेकी ङुरूङ जीउ थे खोरोङते च्‍योकराङ लेमु जोइओ। जेसुकैला थे खोरोङ अधीनला ज्‍य्‌वाच्‍येते शक्तिकी थेकी दोक खिओ।

कलस्‍सी 2:12

चुक सासीन ख्‍योकोनला बप्‍तिस्‍मा तेरजीन ख्‍योकोन छ्युई नाङ नुप्‍जीन ख्रीष्‍टताङराङ स्‍यिइन थेत्ताङ दिबाते ईन। थेमे छ्युदुई थेन्‍जीन परमेश्‍वरगी ख्‍योकोनला ख्रीष्‍टताङराङ सोम्‍बो लोक्‍पाते ईन। ख्रीष्‍टला स्‍यिसादुकी सोम्‍बो लोक्‍कान्‍ते परमेश्‍वरताङ छ्येज्‍यीक शक्ति ओत सिन थेला विश्‍वास खाबेकी थेकी ख्‍योकोनला थोक खाबाते ईन।

२ तिमोथी 2:18

थेबा ङिबोकीचेन सत्‍यते बात ङेन्‍दा ताङगीन परमेश्‍वरगी थे खोरोङ मिओनला सोम्‍बो लोक्‍च्‍येते काम खाईन सिन्‍दा ओत सिन लोप्‍कीदुक। थेबेकी दोक्‍ते मेन्‍दाते बात लापेकी येशूला विश्‍वास खित्‍कान्‍तेबा कोई कोईकी सत्‍यते बात ङेन्‍दा तोङगीन दुक।

हिब्रू 11:35

थोकराङ खाईन कोई कोई फेम्‍मे मिकी स्‍याप्‍ते मिओनला परमेश्‍वरगी सोम्‍बो लोइओ सिन थेला विश्‍वास खाबेकी थेकी थेबे मिओनला सोम्‍बो लोक्‍पा ओतान। लोक्‍ला कोई कोईला जेलला लुक्‍नामेई परमेश्‍वरला विश्‍वास खिता ताङसीन तेन्‍ला तोङगो सिरजीन थेबेकी ङ्योकोन थोक मिक्‍किओ सिन साबा ओतान। थोगी थेबाला बिजोग तेन्‍गीन तेन्‍गीन सेता ओतान। परमेश्‍वरगी था तिरी सोम्‍बो लोक्‍ला थे खोरोङताङराङ ज्‍य्‌वाक्‍यो सिन थेबेकी थेला विश्‍वास खाबा ओतेकीराङ थेबेकी थेला विश्‍वास खिता तोङराङ मोतोङो सिन साबा ओतान।

हिब्रू 9:10

च्‍यिला सासीन थे नियमलाचेन खालि दि सो थे मासा, दि थुङ थे माथुङ सिरच्‍येते बातताङ ठु खाला चोके खित्‍च्‍येते बातओनकामा ओतान। थे खोरोङगी खिता चालाच्‍योक खित्‍च्‍येते समय मालेपथुपकामा परमेश्‍वरगी थे नियम चले खित्‍च्‍या खाबा ओतान।

२ पत्रुस 3:7

थेकी दोक ओङस्‍यीत, थोक ओङस्‍यीत सानामेई गोमा गाङे ओङाच्‍योक खाला थरिङोला ओताते दि साताङ नामोङ परमेश्‍वरगी दि छोमुसाक लेमु ओङस्‍यीत साबा छोमुसाककामा देत्‍क्‍यो। थेमे थे खोरोङगी साबाते माङेन्‍ला मेलेबा काम खित्‍कान्‍ते मिओनला सजाय बिन्‍ला न्‍याय खिते छोमु थेकी दि सा नाम मेकी थाला जोइओ।