हिब्रू 4:12 - जिरेल

¹² च्‍यिला सासीन परमेश्‍वर बातकी छ्य्‌वापेई मिओनगी जुनी ङेत्‍क्‍यो। दि बातकी छ्य्‌वापेकी परमेश्‍वरगी मि नाङ काम खिओ। ठाउँ ङिकारपा धार खाबाते आउदी नोम्‍बोते तरवारगी मिला रोपे खासीन दोन्‍नापेई ल्‍हाकनापासाकराङ फोत तोला थुप्‍क्‍यो थेमे रूबाताङ जोर्नीतेबा टाल्‍ला नाङदु ओताते काङ समेत देन्‍दा थुप्‍क्‍यो। होदोक्‍ते तरवार भन्‍दाङ परमेश्‍वर बातकी छ्य्‌वापेई परमेश्‍वरगी खित्‍च्‍येते काम खापान खापान छ्ये ईन। दि बातकी छ्य्‌वापेईराङ सुइँदेकी खाबाते कामताङ बात मिकी दाक्‍पोनगी खाबाते ईन्‍दाना परमेश्‍वर आत्‍मेकी खित च्‍युताते ईन्‍दे सिन डेला थुप्‍क्‍यो थेमे सुई च्‍यि विचार खिन दुका, मि सेमगी नाङ लेमु मेलेबा चुक दुका सिनोङ गाङे लेमु खाला डेला थुप्‍क्‍यो।

हिब्रू 4:12 Iomraidhean Croise

लूका 8:11

था ङे ख्‍योकोनला थे कथे अर्थ च्‍यि ईन्‍दे सिन लाःप्‍ला बिनगी। सोन साबातेचेन परमेश्‍वर बात ईन।

यूहन्‍ना 12:48

सुइँदेकी ङाला परमेश्‍वरगी ताङाते मेन सिन खिदुक सासीन थेमे ङे साबाते बात मेङेन्‍दुक सासीन थेला न्‍याय खित्‍कान्‍ते ओत्‍कीन ओत। थोक्‍ते मिला था न्‍याय खिते छोमु थरिङोला ङे लापाते बात ताला थोक्‍ते मि दोषी ईन सिन सजाय तेरग्‍यो।

यूहन्‍ना 6:51

स्‍वर्गनेकी वाबाते नोमुङ मिसिन्‍च्‍येते जुनी ङेत्‍च्‍येते सापचेन ङाराङ ईन। दि साप साकान्‍ते मिकीचेन नोमुङ मिसिन्‍च्‍येते जुनी ङेत्‍क्‍यो। दि सापचेन ङे जीउराङ ईन। दि सा लुङबे मिओनगी नोमुङ मिसिन्‍च्‍येते जुनी ङेत्‍स्‍यीत सिन ङा ङाराङ ज्‍यान बिन्‍ला स्‍यिइओ” सिन सिदुक।

शक्ति काम 2:37

थेरू जम्‍मा ओङाते मिओनगी पत्रुसकी खाबाते दि बात थोकीन खोपरोङगी चुक छ्येज्‍यीक गल्‍ती खाबा ओता ईन्‍दाका सिन छ्या स्‍येकीन पत्रुस थेमे येशू ख्रीष्‍टकी खटे खाबाते ज्‍येनतेबा गाङेला “आज्‍यो न्‍वावे, थोक ईन्‍सीन था ङ्योकोनगी च्‍यि खिसे ओना?” सिन ठिसुङ।

शक्ति काम 4:31

थोक खाईन प्रार्थना खाईन सिन्‍नामेकी थेबा देताते खाम्‍बाराङ लीक्‍सुङ। थेमे थेबा गाङेराङ परमेश्‍वर आत्‍मेकी खाङाते मि ओङसुङ। थेमे थेबेकी छ्याःङ ज्‍यीबा मिक्‍किता खाईन मिओनला परमेश्‍वर बात लाप्‍सुङ।

शक्ति काम 5:33

थेबेकी दोक सिरजीन थेरू ओताते छ्ये छ्ये मि गाङेला स्‍येदाङगी मे बारसुङ। थोगी थेबेकी थेबाला सेत्‍च्‍ये ठो खासुङ।

शक्ति काम 7:38

थेमे ङुरूङ पुर्खाओन थोक खाला ठाःकताङ बालुवा बाई छ्याःङ मेत्‍सादु सीनै बोमगी चावादु जम्‍मा ओङला देते बेलाला मोशाङ थेरू ओतान। थेमे मोशा सीनै बोमने गाल्‍नामेकी परमेश्‍वर दूतज्‍यीगी थेत्ताङ ठेत्‍कीन बात खाबा ओतान। थेजीनराङ परमेश्‍वर दूतकी थेला नोमुङ फरक परे मिक्‍किच्‍येते बात ओताते नियम बिन्‍दा ओतान। थे नियम ङुरूङ पुर्खाओन लाईदुकामा मेन्‍देकी ङुरूङ लाईदुङ बिन्‍दा ओतान।

रोमी 1:16

गा लाङच्‍येते बात लोपाला ङाला सुङताङ छ्याःङ ङोचा मालाङदुक। च्‍यिला सासीन दि बातला परमेश्‍वरताङ चुक छ्येज्‍यीक शक्ति ओते सिरच्‍येते बात ओत। दि बात ङेन्‍ला येशूला विश्‍वास खित्‍कान्‍ते मिबरी गाङेला परमेश्‍वरगी पापदुकी डेल्‍ग्‍यो। दि पापदुकी डेल्‍च्‍येते काम परमेश्‍वरगी गोमा यहूदीओनला खासीनोङ ज्‍येन ज्‍येन जातकी मिलाङ खिओ।

१ कोरिन्‍थी 1:24

जे ईन्‍सीनोङ परमेश्‍वरगी थे खोरोङ दोन्‍दु स्‍योक सिन काताङाते मिओनगीचेन यहूदी ईन्‍स्‍यीत, ग्रीक ईन्‍स्‍यीत गाङेकी ख्रीष्‍टला ताला परमेश्‍वरताङ चुक छ्येज्‍यीक शक्ति ओते थेमे थे चुक बुद्धि पुरे खाला काम खित्‍कान्‍ते ईन्‍दे सिन छ्या स्‍येक्‍यो।

२ कोरिन्‍थी 2:17

ईन्‍सीनोङ मि काल्‍बेईकी खोपरोङ फाइदे लाईदु खाबाच्‍योक खाला ङ्योकोननी ङेराङ फाइदे लाईदु परमेश्‍वर बात मोलोबो। बरू ख्रीष्‍टताङ जीउज्‍यीकराङ ओङा ओतेकी परमेश्‍वर दोन्‍दुराङ दि काम खिन ओत सिराच्‍योक खाला सेमदु छ्याःङ पापताङ लोभ मोज्‍योबा खाला ङ्योकोनचेन परमेश्‍वरगी ङेराङला जिम्‍मा बिन्‍दाते काम खिओ।

२ कोरिन्‍थी 4:2

ङ्योकोन ईप्‍ला छ्याक्‍ला ज्‍येनला ठगे खित्‍च्‍येते च्‍योक्‍ते ङोचा लाङच्‍येते काम मिक्‍किओ, मिला छक्‍के खिताला ईनराङ मेन्‍दे बात मोलोबो, ङ्योकोननी परमेश्‍वर बात खुदुक जोला लोप्‍च्‍येतेङ मिक्‍किओ। परमेश्‍वर दोन्‍दुराङ काम खाबाच्‍योक खाला ङ्योकोननी सत्‍यते बातला जे साला दुक थेकामा लोप्‍क्‍यो। थोक ईन्‍देकी ङ्योकोनगी सत्‍यते बातकामा लापा ओत सिन मि गाङेकी सिरा थुप्‍क्‍यो।

एफिसी 5:13

नाम्‍दाक फोक्‍नामेई मुन्‍दाक तोरला नाम्‍दाक ड्वा च्‍योकराङ थेबेकी खित्‍च्‍येते थोक्‍ते काम लेमु मेन सिन लाप्‍कीन बिन्‍नामेई थोक खिता मेङच्‍याक्‍वा सिन थेबेकी छ्या स्‍येक्‍यो।

एफिसी 5:26

थेकी थोक खाबातेचेन थेबा परमेश्‍वरला मन परे खित्‍च्‍येते मि ओङस्‍यीत सिनराङ ईन। दोक ओङाला छ्युला लुक्‍ला बप्‍तिस्‍मा तेरजीन थेमे थेजीन लापाते परमेश्‍वर बातकी छ्य्‌वापेई थेकी थेबाला पापदुकी टाल्‍गीन बिन्‍सुङ।

एफिसी 6:17

थेमे परमेश्‍वरगी खेराङला पापकी सजायदुकी टाल्‍गीन सिन्‍दा ओत सिन टोक माज्‍येत। परमेश्‍वरगी दोक खाबा ओत सिन सम्‍झे खित्‍च्‍येतेचेन गोःला च्‍याकी टोप खोन्‍दाते ईन। थेमे परमेश्‍वर आत्‍मेकी तेरच्‍येते तरवार खुर। दि तरवारचेन परमेश्‍वर बातराङ ईन।

१ थिस्‍सलोनिकी 2:13

थेमे ङ्योकोन जहिलेङ दि बातकी लाईदुङ परमेश्‍वरला धन्‍यवाद सिओ। च्‍यि सासीन ङ्योकोनगी परमेश्‍वर बात लोप्‍जीन थे बात मिकी जोबाते मेन्‍दाक्‍वा, परमेश्‍वर बातराङ दुका सिन ख्‍योकोनगी ङेन्‍सुङ। ईन्‍दाबोङ थे बातचेन परमेश्‍वर बातराङ ईन। येशूला विश्‍वास खित्‍कान ख्‍योकोन नाङ परमेश्‍वरगी होथे बातकी छ्य्‌वापेईराङ काम खिन ओत।

१ थिस्‍सलोनिकी 5:23

थेमे सेमला ढुक्‍क लोङकान्‍ते परमेश्‍वरगी ख्‍योकोनगी मेलेबाते कामताङ बात सिराते छ्याःङ मिक्‍किस्‍यीत सिन ख्‍योकोन सेम खुदुक जोइन देत्‍स्‍यीत थेमे ख्‍योकोन आत्‍मा, सेम थेमे जीउ जेसुकैला लेमु खाला तेइनराङ देत्‍स्‍यीत। दोक खाला था ङुरूङ प्रभु येशू ख्रीष्‍ट ग्‍युरला ओङे छोमु ख्‍योकोन छ्याःङ दोष मेताते मि ओङस्‍यीत सिन ङ्योकोन प्रार्थना खिओ।

हिब्रू 13:7

खेराङला ताकान्‍ते छ्ये छ्ये मि बात ठेम्‍बा खि। थेबेकी ख्‍योकोनला परमेश्‍वर बात लापा ओतान। दुक्‍पा किम्‍मु जस्‍तो ओङजीनोङ स्‍यि स्‍यिसाकराङ थेबेकी चुक खाईन परमेश्‍वरला विश्‍वास खाबा ओताने थे ताला ख्‍योकोनगीङ थेबेकी खाबा च्‍योकराङ खि।

हिब्रू 6:5

परमेश्‍वर बात सत्‍यते ईन सिन खोबा ओताते थेमे था ओङच्‍येते सत्‍य जुग चुक लेमु ओङगीते सिन छ्या ओताते मिओन

याकूब 1:18

परमेश्‍वरगीराङ ङुरूङला सत्‍यते बात छ्या स्‍ये च्‍युत्‍कीन थे खोरोङ फुज्‍युङ फुमु जोसुङ। दोक खाईन थेकी थे खोरोङगी जोबाते गाङे नाङ ङुरूङलाचेन थेला चढे खाबाते साम्‍बाते बाली च्‍योक जोसुङ।

१ पत्रुस 1:23

परमेश्‍वरगी ख्‍योकोनला लोक्‍ला केर ज्‍युताच्‍योक खाईन साम्‍बाते जुनी बिन्‍दा ओत। दि काम थेकी थे खोरोङ बातकी छ्य्‌वापेई खाबाते ईन। पालोई स्‍यिला डोच्‍येते मि छ्य्‌वापेई फिजा केबाच्‍योक मेन्‍देकी नोमुङ फरक परे मिक्‍किच्‍येते थे खोरोङ बातकी छ्य्‌वापेई परमेश्‍वरगी ख्‍योकोनला दि साम्‍बाते जुनी बिन्‍दाते ईन। थे खोरोङ बातकी छ्य्‌वापेई परमेश्‍वरगी मि नाङ काम खिओ, परमेश्‍वर बातला जे साला दुक थे पक्‍काराङ ओङगो।

छ्या स्‍ये च्‍युताते बात 1:16

थेमे थेते सामे लाक्‍पे नाङ कार्मा दुईन ओतान। थे खानामेकी आउदी नोम्‍बोई धार ङि खाबाई तरवार थेन्‍दा ओतान। थेते छ्येतचेन ता मुथुप्‍च्‍या ङीमा च्‍योकराङ चम्‍के खित्‍च्‍याज्‍यीक ओतान।

छ्या स्‍ये च्‍युताते बात 19:15

थे गोमे घोडा कार्मुते लाक जेबा ओताते खानामेकीचेन लुङबा लुङबे मिला थुपाला आउदी नोम्‍बोई तरवार थेन्‍दा ओतान। लुङबा लुङबे मिला आउदी कडा खाला राज्‍य खित्‍कान्‍ते थेराङ ईन। रस छिराला कोलदु लुक्‍पाते अंगूरला काम्‍बेकी फाच्‍यार फुच्‍युर ङेन्‍दा च्‍योकराङ खाला गाङे भन्‍दा छ्येज्‍यीक शक्ति ओताते परमेश्‍वरगी स्‍येदाङगी चूर गाल्‍ला तेरच्‍येते सजाय तेरकान्‍ते थेराङ ईन।

छ्या स्‍ये च्‍युताते बात 19:21

थेमे थेरू बाँकी देताते जति ज्‍येन गाङेलाचेन थे घोडा कार्मुते लाक जेबाते खानामेकी थेन्‍दाते तरवारगी तुप्‍कीन सेत्‍सुङ। दोक ओङगीन सिन्‍नामेई छ्योज्‍युङमा गाङेकी डाडासाक थेबे स्‍या सोसुङ।

छ्या स्‍ये च्‍युताते बात 2:16

बालाम बात थेमे निकोलाइटन सिराते पाटी मिओनगी लोप्‍च्‍येते बात ङेन्‍ला थेबेकी खि साबा च्‍योकराङ खित्‍कान्‍तेबा ख्‍योकोनगी थोक खिता थोङ। थोक माक्‍यासुङ तोबो सासीन ङा थेपा वाला ङे खानामेकी थेन्‍दा ओताते तरवार खुरला थे मिओनताङ जीङगो।

छ्या स्‍ये च्‍युताते बात 2:23

थोकराङ खाला थे फिजा च्‍योकराङ ओङला थे बात ङेन्‍कान्‍ते मिओनलाङ ङा आउदी मेलेबाते रोग लै खित च्‍युत्‍ला स्‍यिर ज्‍युत्‍क्‍यो। दोक ओङा थोङनामेकी मि सेमगी बात गाङे छ्या स्‍येकान्‍ते ङाराङ दुका सिन ठाउँ ठाउँला जम्‍मा ओङकान्‍ते येशू ख्रीष्‍ट मि गाङेकी छ्या स्‍येक्‍यो। ङा ख्‍योकोन काम ताला लेमु खाबा ओत्‍सीन लेमु, मेलेबा खाबा ओत्‍सीन मेलेबाराङ खिओ।

छ्या स्‍ये च्‍युताते बात 20:4

थेमे दि तिरी ङे सिंहासनतेबा थेमे थे लाक्‍तु देत्‍कान्‍तेबाला थोङसुङ। थेबालाचेन न्‍याय खित्‍च्‍येते अधिकार बिन्‍दा ओतान। लोक्‍ला ङे येशू सु ईन्‍दे, थेकी च्‍यि खिते सिन ज्‍येनला लापेकी थेमे ज्‍येनला परमेश्‍वर बात लापेकी खित्‍सादु गोः तुप्‍कीन सेताते मिओन आत्‍मा थोङसुङ। थेबेकी थे जन्‍तु थेमे थे मूर्तिला माने खाबा मेतान। थेमे खोपरोङ टालाला कि सामे लाक्‍पाला थे जन्‍तु मिनगी छाप देक च्‍युता मेतान। थेबा गाङेराङ दाक सोम्‍बो लोक्‍सुङ। थेमे लो हजारज्‍यीकसाक ख्रीष्‍टताङ ङ्योम्‍बुराङ राज्‍य खासुङ।