हिब्रू 10:10 - जिरेल

¹⁰ दोक खाईन स्‍यिइन येशू ख्रीष्‍टकी परमेश्‍वरगी खिता चालाच्‍योक खाबा ओत। था लोक्‍ला नोमुङ दोक खिता माफाप्‍च्‍या खाईन थेकी थे खोरोङ ज्‍यानराङ बिन्‍गीन स्‍यिइन ङुरूङ सेम खुदुक जोबा ओत।

हिब्रू 10:10 Iomraidhean Croise

यूहन्‍ना 17:19

दिबेकीङ पूरो खाला ङे खाबाच्‍योक खिता थुप्‍स्‍यीत सिनराङ ङा खोल्‍ला मन परे खित्‍च्‍येते कामताङ बातकामा खिओ।

यूहन्‍ना 19:34

तर मिल्‍टेरीज्‍यीगी येशू कोखापा बार्सा रोपे खासुङ। थेरूकी ठाकताङ छ्यु थेन्‍सुङ।

यूहन्‍ना 6:51

स्‍वर्गनेकी वाबाते नोमुङ मिसिन्‍च्‍येते जुनी ङेत्‍च्‍येते सापचेन ङाराङ ईन। दि साप साकान्‍ते मिकीचेन नोमुङ मिसिन्‍च्‍येते जुनी ङेत्‍क्‍यो। दि सापचेन ङे जीउराङ ईन। दि सा लुङबे मिओनगी नोमुङ मिसिन्‍च्‍येते जुनी ङेत्‍स्‍यीत सिन ङा ङाराङ ज्‍यान बिन्‍ला स्‍यिइओ” सिन सिदुक।

१ कोरिन्‍थी 1:30

परमेश्‍वरगी खित्‍सादुकामा ख्‍योकोन येशू ख्रीष्‍टताङ जीउज्‍यीकराङ ओङाते ईन। येशू ख्रीष्‍टला ताला परमेश्‍वर चुक बुद्धि पुरे खाला काम खित्‍कान्‍ते ईन्‍दे सिन छ्या स्‍येक्‍यो। च्‍यि सासीन ख्रीष्‍टकी खित्‍सादु परमेश्‍वरगी ङुरूङला दोषी मेन सिओ, थेकी ङुरूङ सेम खुदुक जोबा ओत थेमे ङुरूङला पापकी सजायदुकी टाला ओत।

१ कोरिन्‍थी 6:11

ख्‍योकोनोङ कोई कोई गोमाबा होथोक्‍ते मिराङ ओतान। तर प्रभु येशू ख्रीष्‍टताङ परमेश्‍वर आत्‍मेकी ख्‍योकोनला ठु खाईन चोके खाबाच्‍योक खाईन पापदुकी टाल्‍गीन बिन्‍दा ओत, ख्‍योकोन सेम खुदुक जोबा ओत थेमे परमेश्‍वर दोन्‍दु दोषी मेन साबा ओत।

एफिसी 5:2

थेमे ख्रीष्‍टकी ङुरूङला चुक ङिङज्‍ये खाईन थे खोरोङ ज्‍यानराङ बिन्‍गीन स्‍या ओताने सिन सम्‍झे खाला काम बात जे खासीनोङ ख्‍योकोनगीङ ज्‍येनला ङिङज्‍ये खाला खि। परमेश्‍वरला भोग बिन्‍दाते स्‍येक्‍जीन खाच्‍येते ठीमा थेला मन परे खिन ओतान। ख्रीष्‍टकी ङुरूङ लाईदु ज्‍यान बिन्‍गीन स्‍याप्‍तेचेन परमेश्‍वरला मन परे खित्‍च्‍येते होथे ठीमा च्‍योक्‍ते ईन।

एफिसी 5:26

थेकी थोक खाबातेचेन थेबा परमेश्‍वरला मन परे खित्‍च्‍येते मि ओङस्‍यीत सिनराङ ईन। दोक ओङाला छ्युला लुक्‍ला बप्‍तिस्‍मा तेरजीन थेमे थेजीन लापाते परमेश्‍वर बातकी छ्य्‌वापेई थेकी थेबाला पापदुकी टाल्‍गीन बिन्‍सुङ।

हिब्रू 10:12

तर येशू ख्रीष्‍टकीचेन मि पाप गाङे पूरो खाला माफ तेराला बाजिईकामा थे खोरोङ ज्‍यान बिन्‍गीन स्‍यिसुङ। था थेकी लोक्‍ला दि काम नोमुङ खिता माफाबो। दोक खाईन स्‍यिइन थेचेन परमेश्‍वर सामे छ्य्‌वापा गाल्‍गीन देता ओत।

हिब्रू 10:14

थेकी थोक खाईन बाजिईकामा थे खोरोङ ज्‍यान बिन्‍गीन स्‍यिइन सेम खुदुक जोबाते मिओनला पूरो खाईन पापदुकी टाल्‍गीन सधैँभरि लाईदु परमेश्‍वर दोन्‍दु ड्वा ङेत्‍कान जोसुङ।

हिब्रू 10:20

थोङलाचेन थेरू डोच्‍येते लामदु पर्दा क्‍योरगीन ग्‍वारा खाबा च्‍योकराङ ओतान। तर थानी थे पर्दा रोलाच्‍योक खाईन येशूकी थे खोरोङ ज्‍यान बिन्‍गीन स्‍यिइन ङुरूङ नोमुङ मिसिन्‍च्‍येते जुनी ङेत्‍ला थेरू डोच्‍येते लाम जोबा ओत।

हिब्रू 10:29

होथोक्‍ते मिकीनी थोक ज्‍यीबा लाङच्‍याई सजाय ङेत्‍क्‍यो सासीन परमेश्‍वर फुज्‍युङला काम्‍बे पुज्‍या छेदोङ गने मिक्‍किकान्‍ते, दाक्‍पोन सेम खुदुक जोच्‍येते जमान पूरो खित्‍कान्‍ते परमेश्‍वर फुज्‍युङ ठाकला छ्याःङ काम लै मिक्‍किच्‍येते च्‍योक ठाने खित्‍कान्‍ते थेमे मिओनला दया खित्‍कान्‍ते परमेश्‍वर आत्‍मे विरोध खित्‍कान्‍ते मिकी झन चुक ज्‍यीबा लाङच्‍याई सजाय ङेदोङा सिन ख्‍योकोन खेराङराङ विचार खि।

हिब्रू 10:5

थोक ईन्‍देकीराङ देमा वाकीन ख्रीष्‍टकी परमेश्‍वरताङ बात खिन “मिओनगी भोग बिन्‍दातेताङ चढे खाबाते परमेश्‍वर खोल्‍ला छ्याःङ मोगोओ। खुई ङाला मि जुनी लाकीन दुरू केर च्‍युताते ईन।

हिब्रू 13:12

होदोकराङ खाईन थे खोरोङ स्‍यिजीन थेन्‍दाते ठागी खित्‍सादु मि सेम खुदुक डोरस्‍यीत सिन येशूकीङ सारदुकी फिलाराङ थे खोरोङ ज्‍यान बिन्‍गीन स्‍या फाप्‍सुङ।

हिब्रू 2:11

मि सेम खुदुक जोकान्‍ते येशूताङ थेकी सेम खुदुक जोबाते मि गाङेते आबाज्‍यीकराङ ईन। थोगीराङ थेबाला थे खोरोङ न्‍वा ईन सिराला येशू छ्याःङ ङोचा मिक्‍किओ।

हिब्रू 2:14

थे खोरोङगी परमेश्‍वर फुज्‍युङ फुमु साबाते मिओन च्‍योकराङ खाईन येशूङ मि स्‍या ठाक खुराते जुनी लाकीन केसुङ। मिला स्‍यिर ज्‍युत्‍कान्‍तेला ग्‍यालालाराङ थे दोक खाईन मि जुनी लाकीन केकीन स्‍या फापाते ईन। मिला स्‍यिर ज्‍युत्‍कान्‍तेचेन शैतान ईन।

हिब्रू 5:7

दुरू ओत ओतसाक येशूकी कालगी लाःक्‍तुकी थे खोरोङला जोए खिता थुप्‍कान्‍ते परमेश्‍वरला ङुइन थेमे ङोरोराङ तेन्‍गीन प्रार्थना खासुङ। थेकी थे खोरोङ लाईदु परमेश्‍वरला बिन्‍तीङ खासुङ। थे परमेश्‍वरगी जस्‍तो खिता चाल्‍ला दुक थोकराङ ओङस्‍यीत सिरकान्‍ते ईन्‍देकी परमेश्‍वरगी थे प्रार्थना ङेन्‍सुङ।

हिब्रू 7:27

गाङे भन्‍दा छ्येते पूजारीओन ज्‍येनगी ङीमे ठाङमा गोमा खोपरोङ पाप माफ नाङ सिराला थेमेकामा ज्‍येन मि पाप माफ नाङ सिराला भोग तेरा फापाच्‍योक खाला येशूकीचेन दोक खिता माफाबो। मि पाप माफ ओङाला भोग तेराच्‍योक खाईन थेचेन थे खोरोङ ज्‍यानराङ बिन्‍गीन स्‍यिसुङ। दोक खाईन मि पाप माफ ओङच्‍येते काम बाजिईला खाईन सिन्‍देकी था थेकी नोमुङ दोक खिता माफाबो।

हिब्रू 9:12

थे ठाउँदु स्‍यूक्‍जीन थेचेन ज्‍येन पूजारी च्‍योक रोबोताङ फौकी ठाक खुरगीन स्‍यूबाते मेन। था नोमुङ थोक खिता माफाप्‍च्‍या खाईन थेनी थे खोरोङ स्‍यिजीन थे खोरोङ जीउदुकी थेन्‍दाते ठागी खित्‍सादु मि पूरो खाला पापदुकी ठाल्‍च्‍येते लाम जोकीन परमेश्‍वर देत्‍सादु स्‍यूबा ओत।

हिब्रू 9:14

थोक खानामेईनी बिटुले खाबाते मि चोके खिओ सासीन ख्रीष्‍ट स्‍यिजीन थे जीउदुकी थेन्‍दाते ठागी खित्‍सादु था ईन्‍सीन मेलेबाते कामगी सजाय ङेत्‍ला ङा नरककुण्‍डमा स्‍यूक्‍पा माफाबो सिन ख्‍योकोन ढुक्‍क खाला देता थुप्‍क्‍यो। दोक ओङला ख्‍योकोनगी सोम्‍बोते परमेश्‍वरगी खि साबा साबाते खिन थेला माने खिता थुप्‍क्‍यो। च्‍यिला सासीन छ्याःङ गल्‍ती खाबा मेताते ख्रीष्‍ट परमेश्‍वर आत्‍मे शक्ति ङेत्‍कीन परमेश्‍वरला थे खोरोङ ज्‍यानराङ बिन्‍गीन स्‍या ओत।

हिब्रू 9:26

दुरू पूजारीकी खिता च्‍योकराङ खिता फाप्‍च्‍या ईन्‍दा ईन्‍सीन दि सा नाम जोबा छुरला बाजि थोई थोई ख्रीष्‍टकी थे खोरोङ ज्‍यान तेरा फाप्‍च्‍या ओतान। तर मिकी खाबाते गाङे पापदुकी थेबाला डेलाला थे दि जुग सिन्‍दे खाला दुरू वाकीन बाजिईकामा थे खोरोङ ज्‍यान बिन्‍गीन स्‍याप्‍ते ईन।

हिब्रू 9:28

थोक ईन्‍देकी मि काल्‍बेईला थेबेकी खाबाते गाङे पापदुकी डेलाला ख्रीष्‍टोङ बाजिईकामा थे खोरोङ ज्‍यान बिन्‍गीन स्‍याप्‍ते ईन। था थे लोक्‍ला देमा ग्‍युरला ओङगो। थोक खाला ओङच्‍येते लोक्‍ला गोमा च्‍योकराङ मि पापकी सजाय भोगे खाला स्‍याप्‍ला मेन। थानी ङीमाई थे ग्‍युरला ओङगो सिन गुकीन देताते मिओनला पूरो खाला पापदुकी टाल्‍ला स्‍वर्गने देत खेराला लिन्‍दालाका ओङच्‍येते ईन।

१ पत्रुस 2:24

ङुरूङ पापदुकी ठाल्‍ला परमेश्‍वरगी खि साबा साबाच्‍योक खित्‍कान ओङस्‍यीत सिन थे ङुरूङ पापकी सजाय भोगे खाईन स्‍यिङगी थामला टाँए खाईन स्‍यिसुङ। थेकी थोक खाईन दुक्‍पा भोगे खाबेकी खित्‍सादु था ख्‍योकोनगी पापकी सजाय भोगे खिता माफाबो।

१ पत्रुस 3:18

मिओनला पापदुकी डेलाला ख्रीष्‍ट पापकी सजाय भोगे खाईन थे खोरोङ ज्‍यान बिन्‍गीन स्‍या ओतान। दोक खाईन छ्याःङ गल्‍ती मेताते ख्रीष्‍ट परमेश्‍वरगी माकेत साबा साबा खित्‍कान्‍ते मिओन लाईदु स्‍या ओतान। थे थोक खाईन बाजिई मि गाङे लाईदु स्‍यिइन सिन्‍दा ओतेकी था लोक्‍ला नोमुङ दोक खिता माफाबो। थे थोक खाईन स्‍याप्‍की खित्‍सादु ख्‍योकोन परमेश्‍वर दोन्‍दु ड्वा थुपा ओत। मिओनगी थेला सेता ओतान। ईन्‍सीनोङ परमेश्‍वरगी थेला थे खोरोङ आत्‍मे छ्य्‌वापेकी सोम्‍बो लोक्‍पा ओत।

१ यूहन्‍ना 5:6

येशू ख्रीष्‍ट स्‍वर्गनेकी देमा वाकीन छ्युला स्‍यूला लिन्‍च्‍येते बप्‍तिस्‍मा लाबा ओतान। थेमे ङुरूङ लाईदु थे खोरोङ ज्‍यान बिन्‍गीन स्‍या ओतान। थेकी छ्युला स्‍यूकीन बप्‍तिस्‍मा लाबातेकामा मेन, थे खोरोङ ज्‍यानराङ बिन्‍गीन स्‍या ओतान। दि बाततेबा परमेश्‍वर आत्‍मेकी ईन सिन सिओ। परमेश्‍वर आत्‍माचेन साँचोते बात खित्‍कान्‍ते ईन।