हिब्रू 10:1 - जिरेल

¹ परमेश्‍वरगी मि नाङ थे खोरोङ नियम छ्य्‌वापेई खिता चालाते कामताङ तिरी थेबाला लेमु खिओ साबाते काम दोक्‍पोईराङ मेतान। थे नियमचेन तिरी थेकी लेमु खिओ साबाते कामगी नक्‍कलकामा ओतान। थोगीराङ थे नियमला साबाच्‍योक खाईन पूजारीओनगी लोई ठाङमा परमेश्‍वरला याङ याङ पशुतेबा भोग तेरगीन देत्‍सीनोङ थेला माने खिताला थे दोन्‍दु डोकान सुङगीङ नोमुङ था ईन्‍सीन ङे पाप गाङे माफ ओङसुङ सिन सिरा थुपा मेतान।

हिब्रू 10:1 Iomraidhean Croise

रोमी 8:3

ङुरूङ परमेश्‍वरगी खि साबाच्‍योक खिता मुथुप्‍कान्‍ते मि ईन्‍देकी ङुरूङला पापदुकी डेल्‍च्‍येते थेमे स्‍यिसादुकी जोए खित्‍च्‍येते काम परमेश्‍वर नियम छ्य्‌वापेकी ओङा थुपा मेतान। थोगी दि काम खिताला मि जुनीराङ लाला केला च्‍याला स्‍याप्‍ला परमेश्‍वरगी थे खोरोङ फुज्‍युङराङ देमा ताङसुङ। मि जुनी लासीनोङ थेकी नोमुङ छ्याङ पाप खाबा मेतान। थेमे पापकी सजाय जति परमेश्‍वरगी थेलाराङ भोगे खित च्‍युत्‍सुङ। थे थोक खाईन स्‍याप्‍की खित्‍सादु परमेश्‍वरगी मिओनला पाप खित्‍च्‍येते बानीदुकी टाल्‍गीन बिन्‍सुङ।

कलस्‍सी 2:17

दोक्‍ते साच्‍या थुङच्‍याताङ चाड माने खित्‍च्‍येते बाततेबा गाङे परमेश्‍वरला माने खिताला ख्रीष्‍ट मावाथुप ङेन्‍दा फाप्‍च्‍येते बातकामा ओतान। थोगी दि बाततेबा खालि ख्रीष्‍ट वानामेई चुक चुक खिते सिन थेकी खित्‍च्‍येते कामगी नक्‍कलकामा ओतान। ख्रीष्‍ट वानामेई परमेश्‍वरला चुक खाला माने खिता फाप्‍कीते सिरच्‍येते गाङे बात पूरो ओङा ओत।

हिब्रू 10:22

बात दोक दोक ईन्‍देकी छ्याःङ शंका मिक्‍किता खाला परमेश्‍वरला विश्‍वास खिन सेमदु पाप सिराते छ्याःङ मोज्‍योबा खाला ङुरूङ थे दोन्‍दु ड्वा फाप्‍क्‍यो। च्‍यिला सासीन येशू ख्रीष्‍टकी खाबाते कामगी खित्‍सादु ङुरूङ पाप गाङे माफ ओङेकी था ईन्‍सीन ङे पाप पूरो खाईन माफ ओङसुङ सिन ङुरूङ ढुक्‍क खाला देता थुप्‍च्‍या ओङा ओत। थेमे चङगेते छ्युईकी ठु खाईन चोके खाबाते मि ओङा ओत।

हिब्रू 7:11

लेवी थरगी पूजारीओनगी ङेन्‍ला काम खिता फाप्‍च्‍येते नियम विचार खाईन परमेश्‍वरगी इस्राएलीओनला थे खोरोङ नियम बिन्‍दा ओतान। पूजारीओनगी थे नियमला साबाच्‍योक खाईन काम खासीनोङ थेबेकी थोक खाबेकी मिओन पूरो खाला पापदुकी ठाला थुप्‍च्‍या ईन्‍सीन पूजारी हारून च्‍योकराङ मेन्‍देकी मल्‍कीसेदेक च्‍योकराङ ओङला लोक्‍ला ज्‍येनज्‍यीक पूजारी ओङा फाप्‍च्‍येते छ्याःङ खाँचो मेतान।

हिब्रू 8:5

दुरू पूजारीओनगी काम खित्‍च्‍येते ठाउँनी स्‍वर्गने ओताते ठाउँकी नक्‍कलकामा ईन। थोगीराङ मोशेकी परमेश्‍वरला देताला सिन पाल जोजीन परमेश्‍वरगी थेला “खुई ङा देत्‍च्‍येते पाल जोजीन गाङे ङे खोल्‍ला सीनै बोमदु तेन्‍गीन बिन्‍दा ओता च्‍योकराङ खाला जो,” सिन साबा ओतान।

हिब्रू 9:11

तर ख्रीष्‍टचेन मिला पूरो खाला पापदुकी टाल्‍ला लेमु खिताला वाबा ओतान। दि काम खित्‍कान्‍ते थे गाङे भन्‍दा छ्येते पूजारी ईन्‍देकी था थे गाल्‍गीन मि लाईदु पूजारी काम खित्‍च्‍येते ठाउँचेन मिकी जोबाते ठाउँ मेन। थोगी थे ठाउँ दि सा लुङबादु मेत। थे ठाउँनी थाङबो मिओनगी जोबाते पाल भन्‍दा खापान खापान लेमुते ठाउँ ईन।

हिब्रू 9:23

थोगीराङ परमेश्‍वरला देताला सिन जोबाते पालचेन स्‍वर्गने ओतातेते नक्‍कलकामा ईन्‍देकी होथोक खाला ठाक थोरला चोके खिता फाप्‍कीन ओतान। तर स्‍वर्गने बात दोक मेन। दुरू पाल चोके खाबाच्‍योक मेन्‍देकी थेने चोके खितालाचेन दुरू जोबाते पालदु तेरच्‍येते भन्‍दा खुदुकराङ छ्येज्‍यीक भोग तेरा फाप्‍च्‍या ओतान।

हिब्रू 9:25

मिओनगी पालगी नाङ जोबाते गाङे भन्‍दा चङगेते परमेश्‍वरराङ देत्‍च्‍येते कोठादु लोई ठाङमा स्‍यूक्‍जीन गाङे भन्‍दा छ्येते पूजारीचेन भोग बिन्‍दाते ठाक खुरला स्‍यूइओ। दुरू गाङे भन्‍दा छ्येते पूजारी लोई ठाङमा भोग बिन्‍दाते ठाक खुरगीन थे कोठे नाङ स्‍यूबाच्‍योक मेन्‍देकी ख्रीष्‍टचेन बाजिईकामा थे खोरोङ ज्‍यान बिन्‍गीन स्‍यिइन स्‍वर्गने परमेश्‍वर दोन्‍दुराङ गाला ओत।