गलाती 4:9 - जिरेल9 थाचेन ख्योकोनगी परमेश्वर सु ईन्दे, चुक्ते ईन्दे सिन लेमु खाईन छ्या स्येबा ओत। ख्योकोनगी थेला छ्या स्येबाते ईन सिरा भन्दाङ बरू परमेश्वर थे खोरोङगीराङका ख्योकोनला थे खोरोङ सु ईन्दे, चुक्ते ईन्दे सिन छ्या स्ये च्युत्कीन बिन्दाते ईन सिरा डिगीतासीन। बात दोक ईन्गीन ईन्गीनोङ परमेश्वरला माने खिता ताङगीन ख्योकोनगी चुक खाईन थाङबोमेई चले खिन वाबाते रीतिथिति लोक्ला माने खिताला स्यूबे? थोक खाला छ्याःङ फाइदा मेत्सीनोङ ख्योकोन च्यिला याङराङ स्याप स्याप खाला थे रीतिथिति माने खिता छोल्गीते? Faic an caibideil |
गलाती 4:9
30 Iomraidhean Croise
ङुरूङ परमेश्वरगी खि साबाच्योक खिता मुथुप्कान्ते मि ईन्देकी ङुरूङला पापदुकी डेल्च्येते थेमे स्यिसादुकी जोए खित्च्येते काम परमेश्वर नियम छ्य्वापेकी ओङा थुपा मेतान। थोगी दि काम खिताला मि जुनीराङ लाला केला च्याला स्याप्ला परमेश्वरगी थे खोरोङ फुज्युङराङ देमा ताङसुङ। मि जुनी लासीनोङ थेकी नोमुङ छ्याङ पाप खाबा मेतान। थेमे पापकी सजाय जति परमेश्वरगी थेलाराङ भोगे खित च्युत्सुङ। थे थोक खाईन स्याप्की खित्सादु परमेश्वरगी मिओनला पाप खित्च्येते बानीदुकी टाल्गीन बिन्सुङ।
परमेश्वर दोकस्यिकराङ दुक सिन थरिङोलाचेन ङुरूङगी टिक्पी टिक्पीकामा थोङच्येते ऐनाला थोङाच्योक खाला थोङगो। था तिरीचेन थे दोकस्यिक ओताक्वा सिन थेला ठामासोमुला मिगी दोन्दुराङ थोङगो। परमेश्वर सु ईन्दे, थेकी चुक खाला काम खिते सिरच्येते बात थरिङोला ङे टिक्पी टिक्पीकामा छ्या स्येबा ओत। थेकी ङाला दि मि दोक्ते ईन सिन छ्या स्येबाच्योक खाला था तिरीचेन परमेश्वर दोक्ते दुका, थेकी दोकराङ खाला काम खित्च्याक्वा सिन ङे गाङे लेमु खाला छ्या स्येक्यो।
च्यि सासीन खेराङला योक्पो योङमु जोबाते ख्योकोनला लेमु लाङच्याक्वा। खेराङते ओताते जति नाङ खाईन खाम्बा तोङबा जोसीनोङ, ईनराङ मेन्दे बात लाप्ला छक्के खासीनोङ थेमे खेराङला काम्बे पुज्या छेदोङ गने माक्याबाते ख्योकोनला गा लाङच्याक्वा। थेबेकी ख्योकोनला छ्येतकी नाङपाराङ ग्याप्सीनोङ ख्योकोनला छ्याःङ च्योक मालाङच्याक्वा।
परमेश्वरगी सा नाम जोजीन “मुन्दाकते ठाउँदु नाम्दाक ओङस्यीत,” सिन साबा ओतान। होथोक सिरकान्ते परमेश्वरगीराङ मुन्दाकते ठाउँदु नाम्दाक ओङ च्युताच्योक खाईन थे खोरोङ सु ईन्दे थेमे थेत्ताङ चुक छ्येज्यीक शक्ति ओते सिन ङुरूङला छ्या स्ये च्युत्सुङ। दि बात ङुरूङगी ख्रीष्टला ताकीन छ्या स्येबाते ईन।
तर परमेश्वर सत्यते बातचेन नोमुङ माराम्च्या खाईन तिङाते खाम्बे जग च्योकराङ ईन। थे बात नोमुङ खुदुक मोन्डोओ। खइँदा खाम्बा च्यि लाईदु जोबाते ईन्दे सिन खाम्बे दोज्यीकला कोरगीन टिबाते बात च्योक खाईन परमेश्वर सत्यते बातला दोक दोक सिन टिबा ओत। चुक सासीन “थे खोरोङ मि सु सु ईन्दे सिन प्रभु परमेश्वरगी लेमु खाला छ्या स्येक्यो,” थेमे “प्रभु परमेश्वर मि ईन सिन सिरकान गाङेकी मेलेबा काम खिता तोङा फाप्क्यो,” सिन टिबा ओत।
ङुरूङला पापदुकी डेल्कान्ते प्रभु येशू ख्रीष्ट सु ईन्दे, चुक्ते ईन्दे सिन छ्या स्येकीन दि सा लुङबे मिओनगी खित्च्येते जेसुकै मेलेबाते काम खिता ताङगीन सिन्दाते मिओनगी लोक्ला गोमा खाबा च्योक्ते कामराङ खिताला स्यूला थोक खित्च्ये छ्य्वापेई ठालाराङ मुथुप्तुक सासीन थेबा गोमा भन्दाङ झन ज्यीबा लाङच्या मेलेबा डुइओ।
ङुरूङला ज्येनोङ बात च्यि छ्या ओते सासीन परमेश्वर फुज्युङगी दुरू वाकीन परमेश्वर सु ईन्दे, चुक्ते ईन्दे सिन ङुरूङला छ्या स्ये च्युत्सुङ। थेकी दोक खानामेई ङुरूङ सत्यते परमेश्वरताङ डिक्पा थुप्सुङ थेमे परमेश्वर फुज्युङ येशू ख्रीष्टताङ डिक्पा थुप्सुङ। येशू ख्रीष्टचेन सत्यते परमेश्वर ईन, नोमुङ मिसिन्च्येते जुनी तेरकान्तेङ थेराङ ईन।
Sanasan