गलाती 3:13 - जिरेल

¹³ तर ख्रीष्‍टकीचेन परमेश्‍वर नियमला तोके खाबाते परमेश्‍वरगी ङुरूङला सराप बिन्‍ला तेरच्‍येते सजाय थे खोरोङगीराङ भोगे खाईन स्‍यिइन ङुरूङला थे सजायदुकी टाल्‍सुङ। दोक खाईन ङुरूङ साटोला परमेश्‍वरगी थेला सराप बिन्‍गीन सजाय बिन्‍दाते ईन सिन परमेश्‍वर बातला “स्‍यिङगी थामला टाँए खाबाते मिचेन परमेश्‍वर सराप लै खाईन सजाय ङेत्‍कीन स्‍याप्‍ते ईन,” सिन टिबा ओत।

गलाती 3:13 Iomraidhean Croise

मत्ती 26:28

दिचेन ङे ठाक ईन। काल्‍बेई मिओनगी खाबाते पाप माफ ओङस्‍यीत सिन थेबे लाईदु स्‍यिजीन ङे जीउदुकी थेन्‍दाते ङे ठागी खित्‍सादु परमेश्‍वरगी मिओनताङ तिरी खिओ साबाते जमान पूरो खित्‍च्‍येते ईन।

मत्ती 27:5

थेमे यहूदाचेन थे चाँदी डबलतेबा थेरू परमेश्‍वर मन्‍दिरदुराङ ग्‍याङ क्‍युरगीन गाल्‍गीन च्‍याकीन झुण्‍डे खाईन स्‍यिसुङ।

शक्ति काम 5:30

ख्‍योकोनगी येशूला स्‍यिङगी थामला टाँए खाईन सेत च्‍युता ओतान। ईन्‍सीनोङ ङुरूङ ज्‍युज्‍यु पुर्खेकी माने खाबाते परमेश्‍वरगी थेला स्‍यिसादुकी सोम्‍बो लोक्‍पा ओत।

रोमी 4:25

ङुरूङगी पाप खाबेकी खित्‍सादु ङुरूङला पापदुकी डेलाला परमेश्‍वरगी थेला ङुरूङ लाईदु स्‍याप्‍ला ताङसुङ। थेमे ङुरूङला दोषी मेन सिराला थेकी थेला स्‍यिसादुकी सोम्‍बो लोक्‍सुङ।

२ कोरिन्‍थी 5:21

ख्रीष्‍टकी खाबाते कामगी खित्‍सादु ङुरूङला दोषी मेन सिन सिरा थुप्‍स्‍यीत सिन ङुरूङ पापकी सजाय जति परमेश्‍वरगी गाङे पाप सिराते नोमुङ छ्याःङ खाबा मेताते ख्रीष्‍टला भोगे खित च्‍युत्‍सुङ।

गलाती 3:10

परमेश्‍वर नियम ङेन्‍सीन परमेश्‍वरगी खोपरोङला दोषी मेन सिओ सिन विचार खित्‍कान्‍ते मिलाचेन गाङेला थेकी सराप बिन्‍ला सजाय तेरग्‍यो। च्‍यिला सासीन परमेश्‍वर नियमला चुक साबा ओते सासीन “नियमला खि साबाते दोक्‍पोईओङ मोतोङा खाला गाङे साबा साबा च्‍योकराङ खिन मादेत्‍सीन थोक्‍ते मिला परमेश्‍वरगी सराप बिन्‍ला सजाय तेरग्‍यो,” सिन टिबा ओत।

गलाती 4:5

परमेश्‍वर नियम अधीनला देत्‍कान्‍ते तर थेरू खि साबा साबाच्‍योक खिता मुथुप्‍कान्‍ते मिओन था थे नियम अधीनला देता माफाप्‍स्‍यीत सिन परमेश्‍वरगी थे खोरोङ फुज्‍युङला देमा ताङा ओतान। दोक खाईन थेकी ङुरूङला थे खोरोङ धर्म-पुत्र जोकीन थे फुज्‍युङ फुमुकी ङेत्‍च्‍येते जति गाङे ङेत्‍च्‍येते अधिकार बिन्‍सुङ।

एफिसी 5:2

थेमे ख्रीष्‍टकी ङुरूङला चुक ङिङज्‍ये खाईन थे खोरोङ ज्‍यानराङ बिन्‍गीन स्‍या ओताने सिन सम्‍झे खाला काम बात जे खासीनोङ ख्‍योकोनगीङ ज्‍येनला ङिङज्‍ये खाला खि। परमेश्‍वरला भोग बिन्‍दाते स्‍येक्‍जीन खाच्‍येते ठीमा थेला मन परे खिन ओतान। ख्रीष्‍टकी ङुरूङ लाईदु ज्‍यान बिन्‍गीन स्‍याप्‍तेचेन परमेश्‍वरला मन परे खित्‍च्‍येते होथे ठीमा च्‍योक्‍ते ईन।

तीतस 2:14

ङुरूङ पापकी सजाय थे खोरोङगीराङ भोगे खाईन थे ङुरूङ लाईदु ज्‍यान बिन्‍गीन स्‍यिसुङ। ङुरूङला पाप खित्‍च्‍येते बानीदुकी पूरो खाला टाल्‍ला सेम लेमु जोला काम बात लेमुकामा खिता छोल्‍कान्‍ते थे खोरोङ मि सिरा थुप्‍स्‍यीत सिन थे थोक खाईन स्‍या ओतान।

हिब्रू 9:12

थे ठाउँदु स्‍यूक्‍जीन थेचेन ज्‍येन पूजारी च्‍योक रोबोताङ फौकी ठाक खुरगीन स्‍यूबाते मेन। था नोमुङ थोक खिता माफाप्‍च्‍या खाईन थेनी थे खोरोङ स्‍यिजीन थे खोरोङ जीउदुकी थेन्‍दाते ठागी खित्‍सादु मि पूरो खाला पापदुकी ठाल्‍च्‍येते लाम जोकीन परमेश्‍वर देत्‍सादु स्‍यूबा ओत।

हिब्रू 9:15

थोक खाईन स्‍यिइन ख्रीष्‍टचेन परमेश्‍वरगी तिरी खाबाते जमान पूरो खाला तेरकान्‍ते ओङा ओत। थे थोक खित्‍कान्‍ते ओङेकी खित्‍सादु परमेश्‍वरगी थे खोरोङ दोन्‍दु स्‍योक सिन काताङाते मिओनला नोमुङ मोतोरच्‍या खाला तेरग्‍यो सिन साबाते जति था थेबेकी गाङे ङेत्‍च्‍या ओङा ओत। परमेश्‍वरगी गोमे जमान खानामेई तिरी जमान खित खितसाक मिओनगी खाबाते गाङे पाप माफ तेराला थेबे पापकी सजाय ख्रीष्‍टकी भोगे खाईन स्‍याप्‍की खित्‍सादु थेबेकी ङेत्‍च्‍येते जति ङेत्‍च्‍या ओङाते ईन।

हिब्रू 9:26

दुरू पूजारीकी खिता च्‍योकराङ खिता फाप्‍च्‍या ईन्‍दा ईन्‍सीन दि सा नाम जोबा छुरला बाजि थोई थोई ख्रीष्‍टकी थे खोरोङ ज्‍यान तेरा फाप्‍च्‍या ओतान। तर मिकी खाबाते गाङे पापदुकी थेबाला डेलाला थे दि जुग सिन्‍दे खाला दुरू वाकीन बाजिईकामा थे खोरोङ ज्‍यान बिन्‍गीन स्‍याप्‍ते ईन।

हिब्रू 9:28

थोक ईन्‍देकी मि काल्‍बेईला थेबेकी खाबाते गाङे पापदुकी डेलाला ख्रीष्‍टोङ बाजिईकामा थे खोरोङ ज्‍यान बिन्‍गीन स्‍याप्‍ते ईन। था थे लोक्‍ला देमा ग्‍युरला ओङगो। थोक खाला ओङच्‍येते लोक्‍ला गोमा च्‍योकराङ मि पापकी सजाय भोगे खाला स्‍याप्‍ला मेन। थानी ङीमाई थे ग्‍युरला ओङगो सिन गुकीन देताते मिओनला पूरो खाला पापदुकी टाल्‍ला स्‍वर्गने देत खेराला लिन्‍दालाका ओङच्‍येते ईन।

१ पत्रुस 2:24

ङुरूङ पापदुकी ठाल्‍ला परमेश्‍वरगी खि साबा साबाच्‍योक खित्‍कान ओङस्‍यीत सिन थे ङुरूङ पापकी सजाय भोगे खाईन स्‍यिङगी थामला टाँए खाईन स्‍यिसुङ। थेकी थोक खाईन दुक्‍पा भोगे खाबेकी खित्‍सादु था ख्‍योकोनगी पापकी सजाय भोगे खिता माफाबो।

१ पत्रुस 3:18

मिओनला पापदुकी डेलाला ख्रीष्‍ट पापकी सजाय भोगे खाईन थे खोरोङ ज्‍यान बिन्‍गीन स्‍या ओतान। दोक खाईन छ्याःङ गल्‍ती मेताते ख्रीष्‍ट परमेश्‍वरगी माकेत साबा साबा खित्‍कान्‍ते मिओन लाईदु स्‍या ओतान। थे थोक खाईन बाजिई मि गाङे लाईदु स्‍यिइन सिन्‍दा ओतेकी था लोक्‍ला नोमुङ दोक खिता माफाबो। थे थोक खाईन स्‍याप्‍की खित्‍सादु ख्‍योकोन परमेश्‍वर दोन्‍दु ड्वा थुपा ओत। मिओनगी थेला सेता ओतान। ईन्‍सीनोङ परमेश्‍वरगी थेला थे खोरोङ आत्‍मे छ्य्‌वापेकी सोम्‍बो लोक्‍पा ओत।

१ यूहन्‍ना 4:10

परमेश्‍वरगी ङुरूङला ङिङज्‍ये खाबाते सिराते च्‍यि ईन्‍दे सासीन ङुरूङगी थेला ङिङज्‍ये खाबाते मेन, थेकीका ङुरूङला ङिङज्‍ये खासुङ। चुक सासीन ङुरूङ पाप माफ तेरा थुप्‍स्‍यीत सिन ङुरूङगी खाबाते पापकी सजाय भोगे खाला स्‍याप्‍ला थेकी थे खोरोङ फुज्‍युङला देमा ताङाते ईन।

छ्या स्‍ये च्‍युताते बात 13:8

थेमे दि सा लुङबे मि गाङेकी थे जन्‍तुला मान खाला छ्ये जोइओ। खालि दि सा नाम ज्‍वा भन्‍दा गोमाराङ नोमुङ मिसिन्‍च्‍येते जुनी ङेत्‍कान्‍ते मिओन मिन टिबाते किताब नाङ खोपरोङ मिन ओताते मिओनगीकामा थे जन्‍तुला मान खाला छ्ये मोजोओ। थे मिन टिबाते किताबचेन लुई रीउते ईन।

छ्या स्‍ये च्‍युताते बात 5:9

थेमे थेबेकी “दि किताब लाला थे छापओन लोक्‍पा थुप्‍कान्‍ते खोकामा ईन। खोल्‍ला सेता ओतान। खोल्‍ला सेत्‍जीन खोरोङ जीउदुकी थेन्‍दाते ठागी खुई थर थरगीते, खुदुक खुदुक भाषेते, जात जातकीते थेमे लुङबा लुङबे मि नाङदुकी मिओनला परमेश्‍वर मि ओङाला ङ्योसुङ,