गलाती 2:8 - जिरेल

⁸ च्‍यिला सासीन पत्रुस यहूदी नाङ काम खिताला येशू ख्रीष्‍टकी खटे खाबाते मि ईन्‍देकी परमेश्‍वरगी पत्रुस छ्य्‌वापेकी यहूदीओन नाङ काम खाबा च्‍योकराङ ङाचेन ज्‍येन ज्‍येन नाङ काम खिताला येशू ख्रीष्‍टकी खटे खाबाते मि ईन्‍देकी परमेश्‍वरगी ङे छ्य्‌वापेकी ज्‍येन ज्‍येन जातकी मि नाङ काम खासुङ।

गलाती 2:8 Iomraidhean Croise

शक्ति काम 1:8

दि बातचेन ङेन। च्‍यि सासीन था ख्‍योकोनगी परमेश्‍वर आत्‍मा ङेत्‍क्‍यो। थे ङेत्‍नामेकी ख्‍योकोनगी शक्ति ङेत्‍क्‍यो। थेमे थरिङसाक खेराङ मिगी थोङातेताङ नामज्‍योककी थोबाते ङे बाततेबा गाङे ख्‍योकोनगी यरूशलेमदु, यहूदियाताङ सामरिये अञ्‍चल खाङ थेमे सा लुङबा खाङगी मि नाङ लोपाला डुइओ,” सिन सिदुक।

शक्ति काम 15:12

थेकी थोक सानामेकी थेरू मि गाङेराङ खाराक्‍पा देत्‍सुङ। थेमे पावलताङ बारनाबासकी ज्‍येन ज्‍येन जातकी मिला गा लाङच्‍येते बात लोप्‍जीन परमेश्‍वरगी खोपरोङ ङिबोला चुक छ्ये छ्येताङ अचम्‍बतेन्‍दे काम खित च्‍युत्‍सुङा सिन लाःप्‍जीन थेरू थेबाबरी गाङेकी लेमु खाईन ङेन्‍सुङ।

शक्ति काम 19:26

तर दि पावल सिरातेकीनी मिकी जोबाते ल्‍हे मूर्ति ल्‍हा ईनराङ मेन साकीन दि सारदु थेमे एशिये अञ्‍चल खाङराङ मि काल्‍बा च्‍योक गाङेला थे खोरोङ छ्य्‌वापा लै खित च्‍युत्‍कीन सिन्‍सुङ। दोक दोक ओङगीन दुक सिन ख्‍योकोनगी छ्या मास्‍येबाते मेन।

शक्ति काम 21:19

थेबा गाङेला ठेत्‍नामेई पावलगी थे खोरोङगी येशू बात लोप्‍जीन थे छ्य्‌वापेई परमेश्‍वरगी ज्‍येन ज्‍येन जातकी मिला चुक लेमु खासुङा सिन बातज्‍यीगोङ बाँकी मोज्‍योबा खाईन लाःप्‍सुङ।

शक्ति काम 22:21

थोक सिरजीनोङ प्रभु येशूकी ङाला ‘खो दुरू देता मेङगो। ङा खोल्‍ला थारी थारीला ज्‍येन ज्‍येन जातकी मिला परमेश्‍वर बात लोपाला तोङगो,’ सिन सिदुक,” सिन थे खोरोङला गोमा ओङाते बाततेबा लाःप्‍सुङ।

शक्ति काम 4:4

थेबाला थोक खासीनोङ थेबा ङिबोकी खाबाते बात थोकान्‍ते काल्‍बा च्‍योक मिकी थेबे बात ङेन्‍गीन येशूला विश्‍वास खिताला स्‍यूसुङ। थे छोमुसाकला येशूला विश्‍वास खित्‍कान्‍ते मि हजार ङाजो ख्‍योल्‍गीन सिन्‍दा ओतान।

शक्ति काम 8:17

थोक खाईन थेबा ङिबोकी थेबे लाक्‍तु लाक्‍पा ज्‍यागीन प्रार्थना खानामेई थेबेकी परमेश्‍वर आत्‍मा ङेत्‍सुङ।

शक्ति काम 9:15

थोक सिरजीन प्रभु येशूकी “खो ज्‍यीबा मिक्‍किता खाला थेपा ग्‍युक। च्‍यिला सासीन ङे थेला ङा सु ईन्‍दे सिन लोपाला छाने खाबा ओत। था थेकी गाल्‍ला ज्‍येन ज्‍येन जातकी मि, थेबे गेल्‍बोओन थेमे इस्राएलीओनलाङ ङे बाततेबा लोप्‍क्‍यो।

१ कोरिन्‍थी 15:10

ङे थोक मेलेबा खाबा ईन्‍सीनोङ परमेश्‍वरगी ङाला दया खाईन ज्‍येनला येशू ख्रीष्‍ट बात लोप्‍कान्‍ते मि जोसुङ। परमेश्‍वरगी ङाला दया खाबाते थाराङ खेरो मागाल्‍सुङ। ङेचेन ङाराङ च्‍योकराङ येशू ख्रीष्‍टकी खटे खाबाते मि गाङेकी भन्‍दा दुक्‍पा खाईन खाईन ल्‍हाक्‍पा काम खाबा ओत। ईन्‍सीनोङ ङे खाबाते काम ङाराङ स्‍येतताङ बुद्धिकी खाबाते मेन। दि गाङे परमेश्‍वर दयेकी खित्‍सादु खिता थुपाते ईन।

१ कोरिन्‍थी 9:2

ज्‍येनगी ङाला येशू ख्रीष्‍टकी खटे खाबाते मि मेन खिदुक्‍लो। ख्‍योकोनगीनी थोक मिसिरो सिन ङाला छ्या ओत। च्‍यिला सासीन ङे ख्‍योकोन नाङ गा लाङच्‍येते बात लाप्‍नामेई ख्‍योकोनगी प्रभु येशूला विश्‍वास खाबेकी ङा येशू ख्रीष्‍टकी खटे खाबाते मि ईन सिरच्‍येते बात लेमु खाला छ्या स्‍येक्‍यो।

गलाती 3:5

थेमे परमेश्‍वरगी ख्‍योकोनला थे खोरोङ आत्‍मा तेरगीन देत्‍च्‍येते थेमे ख्‍योकोन नाङ अचम्‍ब अचम्‍बते काम खित्‍च्‍येते ख्‍योकोनगी परमेश्‍वर नियमला खि साबाते ङेन्‍देकी खित्‍सादु ईन्‍दाना खेराङला लापाते बात ङेन्‍गीन येशू ख्रीष्‍टला विश्‍वास खिन ओतेकी ईन्‍दे?

कलस्‍सी 1:29

मिओन थोक खाला देता थुप्‍स्‍यीत सिनराङ ङा दुक्‍पा खाला खाला दि बाततेबा ज्‍येनला लोप्‍क्‍यो। ङाराङगी थुपासम्‍म स्‍याप स्‍याप खाईन काम खासीनोङ ङाला थोक खिताला छ्येज्‍यीक शक्ति तेरकान्‍तेचेन ख्रीष्‍टराङ ईन।

१ थिस्‍सलोनिकी 2:13

थेमे ङ्योकोन जहिलेङ दि बातकी लाईदुङ परमेश्‍वरला धन्‍यवाद सिओ। च्‍यि सासीन ङ्योकोनगी परमेश्‍वर बात लोप्‍जीन थे बात मिकी जोबाते मेन्‍दाक्‍वा, परमेश्‍वर बातराङ दुका सिन ख्‍योकोनगी ङेन्‍सुङ। ईन्‍दाबोङ थे बातचेन परमेश्‍वर बातराङ ईन। येशूला विश्‍वास खित्‍कान ख्‍योकोन नाङ परमेश्‍वरगी होथे बातकी छ्य्‌वापेईराङ काम खिन ओत।