गलाती 2:19 - जिरेल

¹⁹ परमेश्‍वर नियम मेङेन्‍कान्‍ते मि सजाय ङेत्‍ला स्‍यिइओ साबा ओतेकी थेरू तोके खाबाते सजाय ङेत्‍ला ङा स्‍या फाप्‍च्‍या ओङा ओतान। थोक खाईन ङा थे नियम लाईदु स्‍याप छेतराङ ओङा ओतान। थोगी थाचेन ङा परमेश्‍वरगी खि साबा साबाच्‍योक खिता थुप्‍क्‍यो।

गलाती 2:19 Iomraidhean Croise

रोमी 4:15

च्‍यिला सासीन मिओन परमेश्‍वर नियम मेङेन्‍कान्‍ते ईन्‍देकी परमेश्‍वरगीनी थेबाला थे नियमला साबा च्‍योकराङ खाला स्‍येदाङगी चूर गाल्‍ला सजायका तेरग्‍यो। दोक खि, थोक माकेत सिरच्‍येते परमेश्‍वर नियम मेता ईन्‍सीनचेन गल्‍ती खासुङ सिन सुङलाङ सिरा ङेत्‍च्‍या मेतान।

रोमी 5:20

थोक ईन्‍सीन परमेश्‍वरगी मिओनला च्‍यिला थे खोरोङ नियम बिन्‍सुङा सिनोङ बात थेन्‍ग्‍यो मेन? नियम ओत्‍सीनोङ थेरू खिता मेङगो साबा साबाराङ खाला झन झन पाप खित्‍च्‍याक्‍वा सिन मिओनगी छ्या स्‍येस्‍यीत सिनराङ परमेश्‍वरगी थे नियम बिन्‍दा ओतान। दोक खाईन मिओन झन पाप खित्‍कान गाल्‍सीनोङ थेबे पाप माफ तेराला परमेश्‍वरगी थेबाला झन आउदी दया खाबाते ईन।

रोमी 6:11

होदि बातओन सम्‍झे खाला था ख्‍योकोनगी पापकी लाईदु खेराङ स्‍याप छेतराङ ईन्‍देकी गोमाबा च्‍योक पाप खिन देता माफाबो। बरू येशू ख्रीष्‍टताङ जीउज्‍यीकराङ ओङगीन था ख्‍योकोन परमेश्‍वरगी खि साबा साबा च्‍योकराङ खिता थुप्‍क्‍यो सिरच्‍येते बात छ्या स्‍येबा खि।

रोमी 6:14

ख्‍योकोनगी था पाप खिन देता माफाबो। च्‍यिला सासीन था ख्‍योकोन परमेश्‍वर नियम अधीनला मेत। परमेश्‍वरगी दया खाबेकी थानी ख्‍योकोन थे अधीनलाका ओत।

रोमी 6:2

ङुरूङगी पाप खिन देता मेङगो। था पापकी लाईदु ङुरूङ स्‍याप छेतराङ गाल्‍गीन सिन्‍दा ओत। दोक ईन्‍देकी ङुरूङगी चुक खाला थोरूमोङ पाप खिनराङ देता थुप्‍कीते? दोकनी खिताराङ मुथुबो।

रोमी 7:14

परमेश्‍वर नियमचेन परमेश्‍वरगीराङ बिन्‍दाते ईन सिन ङुरूङला छ्या ओत। ङाचेन परमेश्‍वरगी खि साबाच्‍योक खिता मुथुप्‍कान्‍ते मिकामा ईन। थेमे पापकी योक्‍पो च्‍योकराङ ओङा ओतेकी ङे खालि मेलेबाते कामताङ बात खिता फाप्‍कीदुक।

रोमी 7:4

आज्‍यो न्‍वावे, ख्‍योकोन बादोङ होदोकराङ ईन। च्‍यि सासीन ख्रीष्‍ट स्‍यिजीन ख्‍योकोनोङ थेत्ताङराङ स्‍याप्‍ते ईन्‍देकी परमेश्‍वर नियम लाईदु ख्‍योकोन स्‍याप्‍ते छेतराङ ओङसुङ। थोक ओङनामेईचेन ख्‍योकोन स्‍यिसादुकी सोम्‍बो लोक्‍पाते ख्रीष्‍टकीतेराङ ओङा ओत। दोक ओङा ओतेकी ङुरूङ परमेश्‍वरगी खि साबाते लेमु काम खिता थुप्‍च्‍या गाला ओत।

रोमी 8:2

परमेश्‍वर आत्‍मेकी ङाला पाप खित्‍च्‍येते बानीदुकी टाल्‍गीन ङे पाप खाबेकी स्‍या फाप्‍च्‍येते सजायदुकीङ जोए खाईन बिन्‍सुङ। थेमे ङा येशू ख्रीष्‍टताङ जीउज्‍यीकराङ ओङा ओतेकी थेकी ङाला नोमुङ मिसिन्‍च्‍येते जुनीङ बिन्‍दा ओत।

१ कोरिन्‍थी 10:31

बात दोक दोक ईन्‍देकी ख्‍योकोनगी साजीन ईन्‍स्‍यीत, थुङजीन ईन्‍स्‍यीत जे खित्‍जीनोङ खालि परमेश्‍वरला छ्ये जोच्‍येते कामकामा खि।

१ कोरिन्‍थी 9:20

चुक सासीन ङाराङ यहूदीओन नाङ देत्‍जीन थेबेकी येशूला विश्‍वास खित्‍स्‍यीत सिन ङा थेबा च्‍योकराङ ओङगीन देतान। दोक खाईन परमेश्‍वरगी थे खोरोङ नियम बिन्‍दाते होथेबाताङ देत्‍जीन ङेङ थेबेकी च्‍योकराङ खाईन थे नियम ङेन्‍दान। ईन्‍दानी था ङा थे नियम अधीनला मेत।

२ कोरिन्‍थी 5:15

मि गाङे लाईदु थे स्‍याप्‍ते ईन्‍देकी नोमुङ मिसिन्‍च्‍येते जुनी ङेताते मिओनगी था दाक्‍पोन खुशी खिता मेङगो। बरू थे थोक खाईन खोपरोङ लाईदु स्‍या ओतान थेमे परमेश्‍वरगी थेला सोम्‍बो लोक्‍पा ओतान सिन टोक मेज्‍येता खाला थेला मन परे खित्‍च्‍येते काम खिता फाप्‍क्‍यो।

गलाती 2:20

चुक खाईन सासीन ख्रीष्‍टला स्‍यिङगी थामला टाँए खाला सेत्‍जीन ङाङ थेत्ताङराङ थे थामला टाँए खाईन स्‍याप्‍ते ईन। ङा थोक खाईन स्‍याप ईन्‍सीनोङ थोरूमसाक सोम्‍बोराङ ओत। ङाराङ सोम्‍बो ओत्‍सीनोङ थरिङोला ङे जे खिदुक थे ङे खित्‍च्‍येते मेन, ख्रीष्‍ट ङे सेमगी नाङ ओतेकी ङे च्‍यि च्‍यि खिका गाङे थेकीराङ खित ज्‍युत्‍च्‍येते ईन। मास्‍यिथुप था ङा परमेश्‍वर फुज्‍युङला विश्‍वास खिन देत्‍ला थेकी खित ज्‍युता चाला च्‍योककामा खिन देत्‍क्‍यो। थेकी ङाला ङिङज्‍ये खाईन ङे लाईदु थे खोरोङ ज्‍यानराङ बिन्‍गीन स्‍या ओतान।

गलाती 3:10

परमेश्‍वर नियम ङेन्‍सीन परमेश्‍वरगी खोपरोङला दोषी मेन सिओ सिन विचार खित्‍कान्‍ते मिलाचेन गाङेला थेकी सराप बिन्‍ला सजाय तेरग्‍यो। च्‍यिला सासीन परमेश्‍वर नियमला चुक साबा ओते सासीन “नियमला खि साबाते दोक्‍पोईओङ मोतोङा खाला गाङे साबा साबा च्‍योकराङ खिन मादेत्‍सीन थोक्‍ते मिला परमेश्‍वरगी सराप बिन्‍ला सजाय तेरग्‍यो,” सिन टिबा ओत।

गलाती 3:24

ख्रीष्‍ट मावाथुप परमेश्‍वर नियमचेन ङुरूङ लाईदु दोक खि, थोक माकेत सिन फिजाओनला कोत्‍कान्‍ते मि च्‍योककामा ओतान। तर ख्रीष्‍ट वाकीन थेला विश्‍वास खानामेईचेन परमेश्‍वरगी ङुरूङला दोषी मेन सिन साबा ओत।

गलाती 6:14

ङे नोमुङ होथेबेकी च्‍योक खाला दाक्‍पोनगी खाबाते खइँदा कामगी छ्य्‌वापेई छ्ये खिता माफाप्‍स्‍यीत। ङेनी स्‍यिङगी थामला टाँए खाईन सेताते ङुरूङ प्रभु येशू ख्रीष्‍टलाकामा छ्ये जोइओ सिन टुङ्गो खाईन सिन्‍दा ओत। प्रभु येशू ख्रीष्‍ट थोक खाईन स्‍याप्‍की खित्‍सादु ङाङ स्‍यिङगी थामला टाँए खाईन स्‍याप्‍ते च्‍योक ओङगीन दि सा लुङबे मिओनगी ङेन्‍दा फाप्‍क्‍यो सिरच्‍येते नियम थेमे थेबेकी माने खित्‍च्‍येते रीतिथितिओन ङे लाईदु छ्याःङ काम लै मिक्‍किच्‍या गाला ओत। थेमे ङाराङचेन होथोक्‍ते नियमताङ रीतिथिति लाईदु स्‍याप छेतराङ ओङा ओत।

कलस्‍सी 2:20

ख्‍योकोन ख्रीष्‍टताङ स्‍याप्‍ते मि ईन, मेनरो? थोक ईन्‍सीनोङ ख्‍योकोन च्‍यिला दि सा लुङबा खाङ मिओनगी खोपरोङ ज्‍युज्‍यु पुर्खे पालोमेई माने खिन वाबाते रीतिथिति माने खिता फाप्‍क्‍यो सिराच्‍योक खिते? दोक्‍ते रीतिथिति था छ्याःङ माने खिता माफाबो।

कलस्‍सी 3:3

च्‍यिला सासीन खेराङ ख्रीष्‍टताङ स्‍यिइन सिन्‍दाते मि ईन्‍देकी ख्‍योकोन गोमाबा खाबाच्‍योक खित्‍च्‍ये छ्य्‌वापेई ठाल्‍गीन सिन्‍दा ओत। ख्‍योकोनगी ख्रीष्‍टताङ ङेताते साम्‍बाते जुनी चुक्‍ते ईन्‍दे सिन परमेश्‍वरगी थरिङोला ज्‍येनला छ्या स्‍ये च्‍युता मेत। ख्रीष्‍ट परमेश्‍वरताङ स्‍वर्गने ङ्योम्‍बु ओतेकी मिओनगी मोथोङो।

१ थिस्‍सलोनिकी 5:10

था तिरी ङुरूङ थेत्ताङ नोमुङ माठाला खाला देता ङेत्‍स्‍यीत सिनराङ प्रभु येशू ख्रीष्‍ट ङुरूङगी ङेता फाप्‍च्‍येते पापकी सजाय थे खोरोङगीराङ भोगे खाईन स्‍याप्‍ते ईन। थोगी थे ग्‍युरला ओङकेसाकला ङुरूङ स्‍यिसीनोङ सोन्‍गीनराङ देता ओत्‍सीनोङ थेत्ताङराङ देता ङेत्‍क्‍यो।

तीतस 2:14

ङुरूङ पापकी सजाय थे खोरोङगीराङ भोगे खाईन थे ङुरूङ लाईदु ज्‍यान बिन्‍गीन स्‍यिसुङ। ङुरूङला पाप खित्‍च्‍येते बानीदुकी पूरो खाला टाल्‍ला सेम लेमु जोला काम बात लेमुकामा खिता छोल्‍कान्‍ते थे खोरोङ मि सिरा थुप्‍स्‍यीत सिन थे थोक खाईन स्‍या ओतान।

हिब्रू 9:14

थोक खानामेईनी बिटुले खाबाते मि चोके खिओ सासीन ख्रीष्‍ट स्‍यिजीन थे जीउदुकी थेन्‍दाते ठागी खित्‍सादु था ईन्‍सीन मेलेबाते कामगी सजाय ङेत्‍ला ङा नरककुण्‍डमा स्‍यूक्‍पा माफाबो सिन ख्‍योकोन ढुक्‍क खाला देता थुप्‍क्‍यो। दोक ओङला ख्‍योकोनगी सोम्‍बोते परमेश्‍वरगी खि साबा साबाते खिन थेला माने खिता थुप्‍क्‍यो। च्‍यिला सासीन छ्याःङ गल्‍ती खाबा मेताते ख्रीष्‍ट परमेश्‍वर आत्‍मे शक्ति ङेत्‍कीन परमेश्‍वरला थे खोरोङ ज्‍यानराङ बिन्‍गीन स्‍या ओत।

१ पत्रुस 2:24

ङुरूङ पापदुकी ठाल्‍ला परमेश्‍वरगी खि साबा साबाच्‍योक खित्‍कान ओङस्‍यीत सिन थे ङुरूङ पापकी सजाय भोगे खाईन स्‍यिङगी थामला टाँए खाईन स्‍यिसुङ। थेकी थोक खाईन दुक्‍पा भोगे खाबेकी खित्‍सादु था ख्‍योकोनगी पापकी सजाय भोगे खिता माफाबो।

१ पत्रुस 4:6

ङीमाई परमेश्‍वरगी दोक खाला न्‍याय खित्‍च्‍येते ईन्‍देकीराङ स्‍यिइन सिन्‍दाते मिओनलाङ गा लाङच्‍येते बात लापाते ईन। थोक खाबातेचेन थेबेकी सोन सोनसाक चुक खाला दुका थे ताला थेबे न्‍याय खिता थुप्‍स्‍यीत थेमे परमेश्‍वरगी तेरा चालाते नोमुङ मिसिन्‍च्‍येते जुनी ङेत्‍स्‍यीत सिन ईन।