एफिसी 2:2 - जिरेल

² थेजीन ख्‍योकोन चालचलनताङ बानी बिवारा दि सा लुङबे मि ज्‍येनतेबेते च्‍योकराङ ओतान। ख्‍योकोनचेन दागार, ङीमा, कार्मा नामने ओताते जति गाङे थेमे ल्‍हा लुई गेल्‍बो शैतान अधीनला देत्‍ला थेकी खि साबा साबाच्‍योक खिन ओतान। परमेश्‍वरगी माकेत साबा साबा खित्‍कान्‍ते मिओनलाचेन थोरूमोङ शैतानगीराङ राज्‍य खिन ओत।

एफिसी 2:2 Iomraidhean Croise

मत्ती 11:19

थेरूई परमेश्‍वर ओत्‍सादुई वाबाते मि ङाचेन दुरू वाकीन जेसुकै सोबान, थुबान। तर ङात्ताङोङ ख्‍योकोन ‘तोते थे चुकस्‍यिक ईन्‍दाका। थेनी आउदी सोलुन्‍दाईताङ छ्याङ रक्‍सी थुङकानज्‍यीकका ओताक्‍वा। थेमे थेनी कर लिन्‍कान्‍तेबा थेमे ज्‍येनोङ पापीओनताङका र्‍वा खिदुक,’ सिन स्‍येदाङ खिदुक। जे ईन्‍सीनोङ परमेश्‍वरगी खाबाते काम थोङकान्‍ते मिओनगीचेन दि काम थेकी आउदी बुद्धि पुरे खाईन खाबाते ईन सिन लेमु खाला छ्या स्‍येक्‍यो,” सिन सिदुक।

मत्ती 13:22

लोक्‍ला चाङगी बुटे नाङला फाप्‍कीन केकीनोङ चाङगी बुटेकीराङ सोबाते सोन साबातेचेन थोरूमोङ ज्‍येन थरीज्‍यीक मिला साबाते ईन। थोक्‍ते मिओनगी स्‍वर्गे राज्‍य बातनी ङेन्‍ग्‍यो। ईन्‍सीनोङ साच्‍या थुङच्‍याताङ खोन्‍च्‍ये पीर थेमे सम्‍पत्ति लोभकी खित्‍सादु थेबेकी थोबाते बात दाक टोक ज्‍येत्‍ला छ्याःङ काम लै मिक्‍किओ।

मत्ती 13:38

स्‍यीङ साबातेचेन दि सा लुङबा ईन। ठे सोन साबाते स्‍वर्गे राज्‍य बात ङेन्‍गीन परमेश्‍वर छ्य्‌वापा लै खाईन सिन्‍दाते मिओन ईन। थेमे ह्रीमा साबातेचेन मिला मेलेबा खित्‍कान्‍ते शैतानताङ डिक्‍कान्‍ते मिओन ईन।

मर्कूस 4:19

ईन्‍सीनोङ साच्‍या थुङच्‍याताङ खोन्‍च्‍ये पीर, सम्‍पत्ति लोभ थेमे दाक्‍पोन खुशी खिता चालेकी खित्‍सादु थेबेकी थोबाते बात दाक टोक ज्‍येत्‍ला छ्याःङ काम लै मिक्‍किओ।

लूका 16:8

थेकी चुक चुक खाका सिरच्‍येते दि बात गाङे थाहा छ्येत्‍नामेकी धनीतेकी थेला ‘बिई, खुई चुक च्‍याङबो खाका। ङा ओत्‍सादुई थेन्‍नामेई खोल्‍ला था थे मिओनगीराङ सोइओ,’ सिन सादुक्‍लो। दि जुनी विचारकामा खित्‍कान्‍ते मिओनगी खोपरोङ काम आउदी च्‍याङबो खाला खिओ। बरू परमेश्‍वर बात ङेन्‍कान्‍ते मिओनगीङ दोक च्‍याङबो खाला काम खिता मेस्‍येओ।

लूका 22:31

थेमे येशूकी शिमोन पत्रुसला “शिमोन, खो च्‍याङबो खाला देत। ङे छ्य्‌वापेई डेलाला शैतानगी ख्‍योकोन गाङेला ल्‍वा छोल्‍ग्‍यो। थेकी दोक खित्‍च्‍येतेनी टाप्‍ला ठाताङ फुङमा डेल्‍च्‍येते च्‍योक ईन। ख्‍योकोनगी ङाला खित्‍च्‍येते विश्‍वास खजो पक्‍का दुका सिन ताप्‍ला परमेश्‍वरगी शैतानला थोक खासीन ओङगो सिन सिदुक।

यूहन्‍ना 12:31

था परमेश्‍वरगी दि सा लुङबे मि न्‍याय खित्‍च्‍ये बेला लेप्‍सुङ। था थेकी दि सा लुङबे गेल्‍बो शैतान शक्ति ठ्वाला दुरूकी तेन्‍ला तोङगो।

यूहन्‍ना 13:2

थे छोमु ग्‍वासे येशू थे खोरोङ चेलातेबाताङ साप साप्‍ला स्‍यूबा ओतान। थेमे शैतानगीचेन येशूला चुक खाला धोका तेरा फाप्‍कीते सिन शिमोन फुज्‍युङ यहूदा इस्‍करियोत सेमगी नाङ लाप्‍कीन बिन्‍गीन सिन्‍दा ओतान।

यूहन्‍ना 13:27

यहूदा इस्‍करियोतकी थे स्‍योबेन टुक्रा लिन्‍दाज्‍यीकताङ शैतान थे सेमगी नाङ स्‍यूसुङ। थेमे येशूकी थेला “खोरोङगी च्‍यि खिता फाप्‍च्‍या ओते थे होत्ता खि,” सिन सासुङ।

यूहन्‍ना 14:30

था ङा काल्‍बासाक ख्‍योकोनताङ बात खिन देता मेङेदो। था दि सा लुङबे गेल्‍बो शैतान होत्ता ओङगीन ओत। थे ङा भन्‍दा छ्ये मेन। थेमे थेकी ङाला छ्याःङ खिता मुथुबो।

यूहन्‍ना 15:19

ख्‍योकोनोङ दि सा लुङबे मिराङ ईन्‍दा ईन्‍सीन थेबेकी ख्‍योकोनला खोपरोङ मिला च्‍योकराङ खाला ङिङज्‍ये खित्‍च्‍या ओतान। ख्‍योकोनला ङे थेबे नाङदुई छाने खाबाते ईन्‍देकी ख्‍योकोनचेन दि सा लुङबे मि मेन। थोगीराङ थेबेकी ख्‍योकोनला मिगी थोङसार्मु खिओ।

यूहन्‍ना 16:11

थोकराङ खाला थेकी परमेश्‍वरगी ङीमाई गाङेते न्‍याय खिओ सिनोङ छ्या स्‍ये ज्‍युत्‍क्‍यो। च्‍यिला सासीन दि सा लुङबे गेल्‍बो शैतानला सजाय तेराला फैसला ओङगीन सिन्‍दा ओत।

यूहन्‍ना 7:7

दि सा लुङबे मिओनगी ख्‍योकोनला छ्याःङ मिक्‍किओ। तर ङे थेबाला ख्‍योकोनगी दि दि मेलेबा काम खिन दुक सिन साबेकी खित्‍सादु थेबेकी ङालाचेन मिगी थोङसार्मु खिओ।

यूहन्‍ना 8:23

थोरूमोङ बात खिन येशूकी “ख्‍योकोन दि सा लुङबादु ठुङाते ईन, ङाचेन स्‍वर्गनेकी वाबाते ईन। ख्‍योकोन दि सा लुङबे मि ईन, ङा दि सा लुङबे मि मेन।

यूहन्‍ना 8:44

ख्‍योकोनचेन खेराङ आबा शैतानताङ डिक्‍कान्‍ते मि ईन। थेमे ख्‍योकोन खेराङ आबेकी खित्‍च्‍येते कामकामा खिता सेम खिदुक। थेकीनी च्‍याक दि जुग शुरू ओङजीनमेईराङ मि सेत्‍च्‍येतेकामा खिन ओत। ईन्‍दाते बातला थेकी बान्‍दा गा मिक्‍किओ। साँचोते बात सिरातेचेन थेकी नोमुङ मिक्‍किओ। ढाँर खित्‍च्‍येतेनी थेते बानीराङ ईन्‍देकी थेचेन ढाँर खित्‍कान्‍ते ईन। ढाँर खित्‍च्‍येते सिराते गाङे थे छ्य्‌वापेईराङ ओङच्‍येते ईन।

शक्ति काम 19:35

थेबा थोक खाला छेरा खित्‍जीन थे सारगी छ्येते मिकी थेबाला हल्‍ला माकेत सिन खाराक्‍पा देत च्‍युत्‍सुङ। थेबा खाराक्‍पा देत्‍नामेकी थेकी “एफिसी आज्‍यो न्‍वावे, दुरू छ्येते आर्तेमिस देवी मन्‍दिर ओत, दि देवी मूर्ति स्‍वर्गनेकी ल्‍हुम्‍बाते ईन सिन गाङेपा गाङेला छ्याराङ ओत।

शक्ति काम 5:3

थे पैसा खुलानामेई पत्रुसकी थेला “हननिया, खो च्‍यिला खाम्‍बादु पैसा ज्‍याक्‍ला स्‍यीङ च्‍वाबाते पैसा दोस्‍यिकराङ ईन सिते? दोक खाला च्‍यिला खो ल्‍हन्‍डीक गेल्‍बो शैतानताङ डिक्‍ला परमेश्‍वर आत्‍माला ढाँर खिता छोल्‍गीते? खुई च्‍यिला दोक खाबे?

रोमी 12:2

था ख्‍योकोनगी परमेश्‍वरला माने मिक्‍किकान्‍ते दि सा लुङबे मिओनते च्‍योक्‍ते चालचलनताङ बानी बिवारा गाङे थोङ। खेराङ सेम परमेश्‍वरला खुदुक जोला नाङ साला ख्‍योकोन सेम लेमु ओताते मि ओङा फाप्‍क्‍यो। दोक ओङनामेई परमेश्‍वरगी खेराङला च्‍यि च्‍यि खि सिरच्‍या ईन्‍दाका सिन ख्‍योकोनगी लेमु खाला छ्या स्‍येबा थुप्‍क्‍यो। दोक खाला ख्‍योकोनगी परमेश्‍वरला मन परे खित्‍च्‍येतेताङ लेमुते काम च्‍यि ईन्‍दाका सिन डेला थुप्‍क्‍यो।

१ कोरिन्‍थी 5:10

ङे थोक साबातेचेन रन्‍डीबाजी थेमे होदि च्‍योक्‍ते खिता मेङच्‍येते काम खित्‍कान्‍ते, लोभ खित्‍कान्‍ते, डाँकाओन थेमे ल्‍हा लु माने खित्‍कान्‍ते दि सा लुङबे मिओनताङ साङ खिताराङ मेङगो सिन साबाते मेन। ङे थोक साबाते ईन्‍दा ईन्‍सीन ख्‍योकोननी दि सा लुङबादु देताराङ थुप्‍च्‍या मेतान।

१ कोरिन्‍थी 6:11

ख्‍योकोनोङ कोई कोई गोमाबा होथोक्‍ते मिराङ ओतान। तर प्रभु येशू ख्रीष्‍टताङ परमेश्‍वर आत्‍मेकी ख्‍योकोनला ठु खाईन चोके खाबाच्‍योक खाईन पापदुकी टाल्‍गीन बिन्‍दा ओत, ख्‍योकोन सेम खुदुक जोबा ओत थेमे परमेश्‍वर दोन्‍दु दोषी मेन साबा ओत।

२ कोरिन्‍थी 4:4

येशूला विश्‍वास खाबा मेताते होदि मिओनगी ख्रीष्‍टताङ चुक छ्येज्‍यीक शक्ति ओते सिन छ्या स्‍येच्‍येते गा लाङच्‍येते बात छ्याःङ मोखोस्‍यीत सिन दि कलि जुगी गेल्‍बो शैतानगी थेबाला लेम्‍बा जोबा ओत। परमेश्‍वरताङ ख्रीष्‍टला छ्याःङ फरक मेत, परमेश्‍वर जस्‍तो ईन ख्रीष्‍टोङ थोजोराङ ईन।

गलाती 1:4

दि कलि जुग मिओनगी च्‍योक मेलेबा कामताङ बात खित्‍च्‍ये छ्य्‌वापेई ङुरूङ ठाल्‍स्‍यीत सिन प्रभु येशू ख्रीष्‍टचेन ङुरूङला पापदुकी डेलाला थे खोरोङ ज्‍यान बिन्‍गीन स्‍या ओतान। दि गाङे बात ङुरूङ आबा परमेश्‍वरगी खिता चाला च्‍योकराङ खाईन ओङा ओतान।

एफिसी 1:21

थेकी सा नाम खाङ ओताते परमेश्‍वर दूतओन ईन्‍स्‍यीत, ल्‍हा ल्‍हन्‍डीक ईन्‍स्‍यीत, छ्ये टेक्‍टे जो ईन्‍सीनोङ जे ईन्‍सीनोङ होदिबा गाङेला राज्‍य खित्‍च्‍येते अधिकार ख्रीष्‍टला बिन्‍दा ओत। थेमे थेकीराङ ख्रीष्‍ट छेत छ्ये होदिबा सुङ मेन, दि जुगला ईन्‍स्‍यीत, था ओङच्‍येते सत्‍यते जुगला ईन्‍स्‍यीत ख्रीष्‍टराङ गाङे भन्‍दा छ्येते ईन सिन साबा ओत।

एफिसी 2:11

बात दोक दोक ईन्‍देकी ख्‍योकोन ज्‍येन ज्‍येन जातकी मिकी खेराङ गोमा चुक ओताने सिन टोक माज्‍येत। खोपरोङचेन परमेश्‍वरगी छाने खाबाते मि ईन सिन जीउला खतकी चिनु जोकान्‍ते इस्राएलीओनगी ख्‍योकोनला खोपरोङ च्‍योक खतकी चिनु मोजोकान्‍ते मि ईन सिन सिओ। ईन्‍दानी जीउला जोच्‍येते थे खतकी चिनु मि खोपरोङगीराङ जोच्‍येते ईन।

एफिसी 2:13

गोमा थोक ओता ईन्‍सीनोङ येशू ख्रीष्‍ट स्‍यिङगी थामला टाँए खाला स्‍यिजीन थे जीउदुकी थेन्‍दाते ठागी खित्‍सादु थाचेन ख्‍योकोनोङ थेत्ताङ जीउज्‍यीकराङ ओङगीन परमेश्‍वर दोन्‍दु ओङा थुपा ओत।

एफिसी 2:3

ईन्‍दाका गोमाबा ङुरूङ गाङेराङ ज्‍येन च्‍योकराङ दाक्‍पोन खुशीला ख्‍याम्‍गीन दाक्‍पोनला च्‍यि च्‍यि खिता सेम लाङगीका थोकराङ खिन खिता मेङच्‍येते कामताङ बात खिन ओतान। थोक खाबेकी ङुरूङगीङ होथेबा ज्‍येनगी च्‍योकराङ खाला परमेश्‍वरगी स्‍येदाङगी चूर गाल्‍ला तेरच्‍येते सजाय ङेता फाप्‍च्‍या ओतान।

एफिसी 4:17

थेमे प्रभु ख्रीष्‍टकी ङाला दोक सिरच्‍येते अधिकार बिन्‍दा ओतेकी ङा ख्‍योकोनला दि बाततेबा सिन ओत। च्‍यि सासीन ख्‍योकोनगीचेन परमेश्‍वरला छ्या मेस्‍येकान्‍ते मिओनगी च्‍योकराङ खिन देता मेङगो। परमेश्‍वरला छ्या मेस्‍येकान्‍ते मिओनचेन तिरी बात छ्याःङ विचार मिक्‍किकान्‍ते बुद्धि मेताते मि ईन।

एफिसी 4:22

था खेराङला लापा च्‍योकराङ खि। च्‍यि सासीन गोमा खिन ओताच्‍योक खिन मेदेता खाला मेलेबाते कामताङ बात खित्‍च्‍येते बानी थोङ। गोमाबा ख्‍योकोन दाक्‍पोन सेमला लाबा लाबाच्‍योक खासीन लेमु ओङगो सिन थोकराङ खिन ओतान। होथोक खाबेकी ख्‍योकोन ङ्येला डुइन ओतान।

एफिसी 5:6

सुइँदेकी होदोक्‍ते कामताङ बात खिता छ्याःङ मेलेबा मेन सासीनोङ ख्‍योकोनगी थेबे बात ङेनराङ माङेन। परमेश्‍वरगी खि साबाते माङेन्‍ला होदोक दोक्‍ते काम खित्‍कान्‍ते मिओनला था थेकी स्‍येदाङगी चूर गाल्‍ला सजाय तेरग्‍यो।

एफिसी 5:8

मुन्‍दाकला देत्‍कीन ख्‍योकोन गोमा मेलेबा कामताङ बात खिन ओतान। प्रभु ख्रीष्‍टताङ जीउज्‍यीकराङ ओङेकी थाचेन ख्‍योकोन नाम्‍दाकला देत्‍कान्‍ते मि ईन। थोगी नाम्‍दाकला देत्‍कान्‍ते मिकी चुक चुक खिता फाप्‍च्‍येते ईन्‍दे ख्‍योकोनगी थोकराङ खि।

एफिसी 6:12

च्‍यि सासीन ङुरूङ जीङा फाप्‍च्‍येते मित्ताङ मेन। ङुरूङनी दि सा नाम खाङ ओताते ल्‍हा लु, ल्‍हन्‍डीक स्‍यिन्‍डीप थेमे होदिबा च्‍योकराङ शैतानताङ डिक्‍ला दि कलि जुगला राज्‍य खित्‍कान गाङेताङ जीङच्‍येते ईन।

कलस्‍सी 1:21

गोमाबा ख्‍योकोन मेलेबाते कामताङ बातकामा खिन ओतान। दोक खाईन ख्‍योकोन परमेश्‍वरताङ डिक्‍पा मेतान, थेत्ताङ डिक्‍च्‍येते सेमोङ खिन मेतान।

२ तिमोथी 4:10

डेमासकीचेन दि जुनी बातकामा विचार खाईन ङाला ताङगीन थिस्‍सलोनिकापा गाल्‍सुङ। ज्‍येन ङात्ताङ ओतातेबे नाङ क्रेसेन्‍सचेन गलातिये अञ्‍चलपा थेमे तीतसचेन दलमातियापा गाला ओत।

याकूब 1:27

आबा परमेश्‍वरगी खि साबाच्‍योक खित्‍च्‍या सिरातेनी सुङ मेत्‍कीन दुक्‍पा ङेता ओताते ट्वारा टिङग्रेताङ ख्‍योबो स्‍याप्‍ते फेम्‍मे मिओन दुक्‍पा थोङला थेबाला लेमु खित्‍च्‍येते थेमे परमेश्‍वरला छ्या मेस्‍येकान्‍ते दि सा लुङबे मिओनगी खिताच्‍योक मेलेबा काम मिक्‍किच्‍येते ईन।

याकूब 1:7

थोक्‍ते मिकीचेन प्रभु परमेश्‍वरगी थे खोरोङला खइँदा बिनोङ सिन छ्याःङ आश खिता माफाबो।

याकूब 4:4

ख्‍योकोनचेन परमेश्‍वरला माने खिता ताङाते मि ईन। दि सा लुङबे मि च्‍योकराङ सम्‍पत्ति छ्य्‌वापा सेम लै खित्‍कानताङ दाक्‍पोन विचारकामा खित्‍कान्‍ते मि परमेश्‍वरताङ डिक्‍पा मुथुबो सिन च्‍यि ख्‍योकोनला छ्या मेत? सम्‍पत्ति छ्य्‌वापा सेम लै खित्‍कानताङ दाक्‍पोन विचारकामा खित्‍कान्‍ते मिनी परमेश्‍वरताङ डिक्‍पाराङ मुथुबो।

१ पत्रुस 1:14

लाःपा कोताते ङेन्‍कान्‍ते फिजा च्‍योकराङ ओङला परमेश्‍वरगी कोताते ङेन। गोमाबा ख्‍योकोन छ्याःङ छ्या मेस्‍येकान्‍ते मि च्‍योक दाक्‍पोन सेमला लाबा लाबा खिन ओतान, था थोक माकेत।

१ पत्रुस 4:3

ईन्‍दालाचेन गोमाबा ख्‍योकोनगीङ परमेश्‍वरला ङो मेस्‍येकान्‍ते मिओनगी च्‍योकराङ खिन तोङासम्‍म समय ताङा ओतान। च्‍यि सासीन थेजीन ख्‍योकोनगी ङोचा लाङच्‍येते कामओन खिन ओतान, दाक्‍पोन खुशी खिन जे खिता सेम लासुङ थेराङ खिन ओतान, जहिलेङ छ्याङ रक्‍सीकी जिलाकामा देत्‍कीन ओतान, ज्‍येनताङ रूला भक्‍कुचूर सोला थुला मोज मज्‍जा खिन ओतान थेमे ल्‍हा लु माने खिन खिता ओङराङ मेङच्‍येते काम खिन ओतान।

२ पत्रुस 2:14

थेबाचेन थोङाते जति फेम्‍मे मित्ताङ ङ्यालाकामा छोल्‍ग्‍यो। थोक्‍ते काम खाला थेबा नोमुङ माडाओ। सेम ङि ओताते मिओनला खोपरोङ छ्य्‌वापा लै खित ज्‍युताला थेबा च्‍योक सिपालु ज्‍येन सुङ मेङगो। जहिलेङ सम्‍पत्ति लोभकामा खिन खापेकी चुक खाला सम्‍पत्ति ज्‍वा थुप्‍कीते सिन थेबेकी लेमु खाईन छ्या स्‍येबा ओङगो। थेबाला परमेश्‍वर सराप फाप्‍क्‍यो।

१ यूहन्‍ना 3:10

सु सु परमेश्‍वर फुज्‍युङ फुमु ईन्‍दाका सु सु शैतान सन्‍तान ईन्‍दाका सिन ङुरूङगी लेमु खाला डेला थुप्‍क्‍यो। चुक खाला सासीन लेमु काम मिक्‍किकान्‍ते मिङ दाक्‍पोन आज्‍यो न्‍वाला ङिङज्‍ये मिक्‍किकान्‍ते मिङ परमेश्‍वर फुज्‍युङ फुमु ईनराङ मेन।

१ यूहन्‍ना 3:8

पाप खिनराङ देत्‍कान्‍ते मिचेन शैतानताङ डिक्‍कान्‍ते ईन। शैतानगीनी च्‍याक दि जुग शुरू ओङजीनमेईराङ पापकामा खिन ओत। शैतानगी खित्‍च्‍येते काम गाङे ङ्ये च्‍युत्‍ला खतम ज्‍वाप्‍लाराङ परमेश्‍वर फुज्‍युङ दुरू वाबाते ईन।

१ यूहन्‍ना 4:4

फिजावे, ख्‍योकोन परमेश्‍वर मि ईन। थे ईनराङ मेन्‍दे बात लोप्‍कान्‍ते मिओन बात सत्‍यते मेन सिन छ्या स्‍येकीन ख्‍योकोनगी थेबाला ग्‍याला ओत। च्‍यिला सासीन दि सा लुङबे मि नाङ काम खित्‍कान्‍ते भन्‍दाचेन ख्‍योकोन सेमदु देत्‍कान्‍ते परमेश्‍वर आत्‍मा छ्ये ईन।

१ यूहन्‍ना 5:19

दि सा लुङबा गाङे मिला मेलेबा खित्‍कान्‍ते शैतान अधीनला ओत। ईन्‍सीनोङ ङुरूङचेन परमेश्‍वर फुज्‍युङ फुमु ईन सिन ङुरूङला लेमु खाला छ्या ओत।

१ यूहन्‍ना 5:4

च्‍यिला सासीन परमेश्‍वर फुज्‍युङ फुमु ओङाते मिओनगीचेन दि सा लुङबे मिओनगी खित्‍च्‍येते च्‍योक्‍ते मेलेबा काम छ्याःङ मिक्‍किता खाला देता थुप्‍क्‍यो। येशू ख्रीष्‍ट परमेश्‍वर फुज्‍युङ ईन सिन थेला विश्‍वास खालाराङ ङुरूङ थोक खाला देता थुप्‍क्‍यो।

छ्या स्‍ये च्‍युताते बात 12:9

दोक खाईन थे जोदाते डुकला स्‍वर्गनेकी पृथ्‍वीमा ङिल्‍गीन ताङसुङ। थेचेन गोमामेई ओताते रूल ईन। थे मिन शैतान दैंता ईन। खालि मेलेबा कामकामा खाला सा लुङबा खाङगी मिला छक्‍के खित्‍कान्‍ते थेराङ ईन। थेत्ताङ थे दूत गाङेला स्‍वर्गनेकी पृथ्‍वीमा युकीन क्‍युरसुङ।

छ्या स्‍ये च्‍युताते बात 13:14

थे गोमे जन्‍तुला छ्ये ज्‍वाप्‍ला दोक्‍ते अचम्‍बते काम खाला तेन्‍च्‍येते शक्ति बिन्‍दा ओतेकी दि सादुकी थेन्‍दाते जन्‍तुकी होथोक्‍ते काम खाईन सा लुङबे मि गाङेला छक्‍के खासुङ। थेकी मि गाङेला होथे गोमे जन्‍तुला मान खिता फाप्‍क्‍यो सिन थे जन्‍तु मूर्ति जोर च्‍युत्‍सुङ। थे जन्‍तुचेन स्‍यिच्‍या खाईन तरवारगी तुप्‍कीन मा थोता ओत्‍सीनोङ सोन्‍दा ओतान।

छ्या स्‍ये च्‍युताते बात 13:8

थेमे दि सा लुङबे मि गाङेकी थे जन्‍तुला मान खाला छ्ये जोइओ। खालि दि सा नाम ज्‍वा भन्‍दा गोमाराङ नोमुङ मिसिन्‍च्‍येते जुनी ङेत्‍कान्‍ते मिओन मिन टिबाते किताब नाङ खोपरोङ मिन ओताते मिओनगीकामा थे जन्‍तुला मान खाला छ्ये मोजोओ। थे मिन टिबाते किताबचेन लुई रीउते ईन।

छ्या स्‍ये च्‍युताते बात 16:17

पालो दुईनगी बाजि दूतकीचेन थे खोरोङगी खुराते कचौरा नामदुराङ पुसुङ। थोक खिताईताङ परमेश्‍वर मन्‍दिर सिंहासनदुकी आउदी कस्‍स्‍ये खाईन “जे ओङा फाप्‍च्‍या ओतान था थे ओङगीन सिन्‍सुङ,” सिन सिरा ङे थोसुङ।

छ्या स्‍ये च्‍युताते बात 20:2

थेमे थेकी थे डुकला जुम्‍गीन च्‍याकीन लो हजारज्‍यीकसाक छ्याःङ खिता मुथुप्‍स्‍यीत सिन साङलोकी ठासुङ। थे डुकचेन गोमामेई मिओनला छक्‍के खित्‍कान्‍ते रूल ईन। थे शैतान दैंता ईन।