एफिसी 2:10 - जिरेल

¹⁰ येशू ख्रीष्‍टकी खाबाते कामगी खित्‍सादु परमेश्‍वरगीराङ ङुरूङला लेमुते काम खिता थुप्‍स्‍यीत सिन साम्‍बाते जुनी बिन्‍गीन खुदुक जोबाते ईन। ङुरूङगी खिता फाप्‍च्‍येते लेमुते कामतेबा थेकी गोमाकाराङ ठीक खाईन ज्‍याक्‍पा ओतान।

एफिसी 2:10 Iomraidhean Croise

मत्ती 5:16

बात दोक ईन्‍देकी ख्‍योकोनगी लेमु काम खि। ख्‍योकोनगी खाबाते लेमुते काम थोङला परमेश्‍वरगी खित्‍सादुराङ ख्‍योकोनगी थोक खाबाते ईन सिन छ्या स्‍येला मिओनगी स्‍वर्गने देत्‍कान्‍ते ख्‍योकोन आबा परमेश्‍वरला मान खिओ।

यूहन्‍ना 3:21

थोक ईन्‍सीनोङ सत्‍यते बात ङेन्‍ला लेमु काम खित्‍कान्‍ते मिचेन नाम्‍दाकला थेन्‍दाला छ्याःङ ज्‍यीबा मिक्‍किओ। नाम्‍दाकला थेन्‍गीन थेकी खाबाते काम थोङला थे मिकीचेन परमेश्‍वरगी खि साबाते काम खाबाते ईन सिन ज्‍येनगी लेमु खाला छ्या स्‍येक्‍यो,” सिन सासुङ।

शक्ति काम 9:31

थे तिरी यहूदिया, गालील थेमे सामरिये अञ्‍चल नाङला ठाउँ ठाउँला जम्‍मा ओङकान्‍ते येशू ख्रीष्‍ट मि गाङेला लेमु ओङसुङ। था थेबाला सुङगीङ दुक्‍पा तेरगीन मेतान। प्रभु येशूला मन परे मिक्‍किच्‍येते छ्याःङ खिता मेङगो सिन ज्‍यीबा खिन थेबेकी झन झन लेमु खाईन थेला विश्‍वास खिताला स्‍यूसुङ। परमेश्‍वर आत्‍मेकी थेबाला आँट बिन्‍सुङ। दोक खाईन थेबा झन झन फेल्‍गीन ड्वाप्‍ला स्‍यूसुङ।

शक्ति काम 9:36

योप्‍पादु तबीता सिराज्‍यीक फेम्‍मे मि ओतान। थेङ येशू चेला ओतान। तबीता साबाते खास्‍याक साबाते ईन। थेकी मि काल्‍बेईला लेमु खिन ओतान। थेमे दुक्‍पा ङेताते मिओनलाङ दुक्‍पाला आउदी खाला तेइन ओतान।

रोमी 8:1

जो जो येशू ख्रीष्‍टताङ जीउज्‍यीकराङ ओङला दुक था थेबेकी परमेश्‍वर सजाय ङेतराङ मेङेदो।

रोमी 8:29

च्‍यि सासीन थेकी थेबाला थे खोरोङ फुज्‍युङ च्‍योकराङ लेमु ज्‍वाप सिन गोमामेई छाने खाबा ओतान। थे खोरोङ फुज्‍युङचेन छ्येते फुज्‍युङ च्‍योकराङ ओङला थेते न्‍वातेबा काल्‍बेई ओङस्‍यीत सिन परमेश्‍वरगी होथेबाला थोक खाईन छाने खाबा ओतान।

१ कोरिन्‍थी 3:9

ङ्योकोनचेन परमेश्‍वरताङ डिक्‍ला काम खित्‍कान्‍ते ईन। थेमे ख्‍योकोनचेन परमेश्‍वर स्‍यीङ च्‍योक्‍ते ईन। दोस्‍यिककामा मेन, ख्‍योकोननी परमेश्‍वरगी जोइन ओताते खाम्‍बाराङ ईन।

२ कोरिन्‍थी 5:17

च्‍यिला सासीन ख्रीष्‍टताङ जीउज्‍यीकराङ ओङाते मिचेन साम्‍बाते जुनी ङेताते मि ईन। थोगी गोमे बात तोरगीन था थे मिकी गोमा च्‍योक दाक्‍पोन खुशी मिक्‍किता खाला परमेश्‍वरगी खि साबा साबाच्‍योक खिओ।

२ कोरिन्‍थी 5:5

ङुरूङला दोक खाला थे नोमुङ स्‍यिला रूल्‍ला मोन्‍डोच्‍येते जीउ तेरकान्‍ते परमेश्‍वरराङ ईन। थोक्‍ते जीउ तेरग्‍यो सिन पक्‍का खिताला थेकी ङुरूङला थे खोरोङ आत्‍मा बिन्‍दा ओत।

२ कोरिन्‍थी 9:8

परमेश्‍वरगी ख्‍योकोनला जहिलेङ जे कुरोङ खेराङला गोबा भन्‍दाङ ल्‍हाक्‍पा तेरा थुप्‍क्‍यो। दोक खाला ख्‍योकोनला मादाङच्‍या मोख्‍योप्‍च्‍या सिराते छ्याःङ मायाङला ख्‍योकोनगी झन झन ज्‍येनला लेमु खाला ता थुप्‍क्‍यो।

गलाती 6:15

च्‍यिला सासीन खतकी चिनु जोला फाइदा ओङच्‍येतेताङ थे चिनु माजोला घटी ओङच्‍येते बात छ्याःङ मेत। साम्‍बाते जुनी ङेत्‍कीन थोक्‍ते मिकी खित्‍च्‍येते च्‍योक्‍ते काम खिकाना मिक्‍किका सिरच्‍येते बातकामा छ्येते बात ईन।

एफिसी 1:1

दि चिट्ठी टिक्‍कान्‍ते ङा पावल ईन। ङा येशू ख्रीष्‍टकी खटे खाबाते मि ईन। ङा थोक्‍ते मि ईन सिन परमेश्‍वरगी ङाला छाने खाबा ओत। ङा दि चिट्ठी एफिसस सारदु ओताते परमेश्‍वर सन्‍तान ख्‍योकोनला टिगीन ओत। ख्‍योकोन येशू ख्रीष्‍टला विश्‍वास खित्‍कान्‍ते थेमे थेत्ताङ जीउज्‍यीकराङ ओङाते मि ईन।

एफिसी 1:4

च्‍यि सासीन थे खोरोङ दोन्‍दु सेम खुदुक गालाते थेमे छ्याःङ गल्‍ती मेताते मि ओङस्‍यीत सिन ख्रीष्‍टकी खित्‍सादु थेकी ङुरूङला दि सा नाम ज्‍वा भन्‍दा गोमाराङ छाने खाबा ओतान। ङुरूङला ङिङज्‍ये खाईन

एफिसी 2:13

गोमा थोक ओता ईन्‍सीनोङ येशू ख्रीष्‍ट स्‍यिङगी थामला टाँए खाला स्‍यिजीन थे जीउदुकी थेन्‍दाते ठागी खित्‍सादु थाचेन ख्‍योकोनोङ थेत्ताङ जीउज्‍यीकराङ ओङगीन परमेश्‍वर दोन्‍दु ओङा थुपा ओत।

एफिसी 2:15

चुक खाईन सासीन ख्रीष्‍टकी थे खोरोङ ज्‍यान बिन्‍गीन स्‍यिइन ङ्योकोन इस्राएलीला दोक खि, थोक माकेत सिन बिन्‍दाते परमेश्‍वर नियम काम लै मिक्‍किच्‍या जोसुङ। थे नियमचेन ङुरूङ फारदु मिडिक्‍च्‍येते बात ओतान। दोक खाईन थेकी गोमा खुदुक खुदुक जात ओताते मि ङुरूङला थे खोरोङताङराङ डिक्‍पा खाईन जातज्‍यीगी मिराङ जोसुङ।

एफिसी 2:2

थेजीन ख्‍योकोन चालचलनताङ बानी बिवारा दि सा लुङबे मि ज्‍येनतेबेते च्‍योकराङ ओतान। ख्‍योकोनचेन दागार, ङीमा, कार्मा नामने ओताते जति गाङे थेमे ल्‍हा लुई गेल्‍बो शैतान अधीनला देत्‍ला थेकी खि साबा साबाच्‍योक खिन ओतान। परमेश्‍वरगी माकेत साबा साबा खित्‍कान्‍ते मिओनलाचेन थोरूमोङ शैतानगीराङ राज्‍य खिन ओत।

एफिसी 2:6

थेमे येशू ख्रीष्‍टला स्‍यिसादुकी सोम्‍बो लोक्‍जीन परमेश्‍वरगी ङुरूङलाङ थेत्ताङराङ सोम्‍बो लोगीन स्‍वर्गने थेत्ताङ ङ्योम्‍बुराङ देताला ज्‍याक्‍पा ओत।

एफिसी 4:1

बात दोक दोक ईन्‍देकी ङा ख्‍योकोनला दोक खि सिन सिओ। प्रभु येशू ख्रीष्‍टकी खि साबाते काम खाबेकी ङाला जेलदु ज्‍याक्‍पा ओत। ङा ख्‍योकोनला चुक खि सिते सासीन ओर्च्‍ये, परमेश्‍वरगी खेराङला थे खोरोङ दोन्‍दु स्‍योक सिन कातोङजीन ख्‍योकोनगी चुक चुक खिता फाप्‍क्‍यो सिन साबा ओताने थोक थोकराङ खि।

एफिसी 4:24

थेमे गोमे मेलेबा बानीतेबा ताङला लेमु कामताङ बात खि। ख्‍योकोन बानी थे खोरोङते च्‍योकराङ ओङस्‍यीत सिन ख्‍योकोन बानी लेमु जोकान्‍ते परमेश्‍वरराङ ईन। थेकी थोक खिन ओतेकी ख्‍योकोनगी थेकी खि साबा साबाच्‍योक खिता थुप्‍क्‍यो थेमे थेला मन परे खित्‍च्‍येते कामताङ बात खिता थुप्‍क्‍यो।

फिलिप्‍पी 1:6

ख्‍योकोन थेकी ज्‍वा चाला च्‍योकराङ लेमु ओङस्‍यीत सिन परमेश्‍वरगी ख्‍योकोन नाङ खिताला स्‍यूबाते लेमुते काम खिनराङ देत्‍क्‍यो सिन ङाला लेमु खाला छ्या ओत। येशू ख्रीष्‍ट ग्‍युरला ओङे छोमुसाकला थेकी दि काम पूरो खिओ।

फिलिप्‍पी 2:13

परमेश्‍वरगीराङ खेराङ नाङ काम खित्‍च्‍येते ईन्‍देकी ख्‍योकोनला थेला मन परे खित्‍च्‍येते काम खिता सेम लाङगो। थेमे थेकीराङ ख्‍योकोनला थोक्‍ते काम खिताला शक्तिङ तेरग्‍यो। ख्‍योकोन थे खोरोङगी ज्‍वा चालाच्‍योक लेमु मि ओङस्‍यीत सिन थेकी होदोक खाला ख्‍योकोन नाङ काम खिओ।

कलस्‍सी 1:10

प्रभु येशू मिकी चुक खिता फाप्‍कीते सिन छ्या स्‍येला ख्‍योकोनगी थोकराङ खित्‍स्‍यीत, काम बात जे खासीनोङ थेला मन परे मिक्‍किच्‍येते सिराते छ्याःङ मिक्‍किस्‍यीत बरू झन झन लेमुते कामकामा खित्‍स्‍यीत थेमे परमेश्‍वर सु ईन्‍दे, चुक्‍ते ईन्‍दे सिन झन लेमु खाला छ्या स्‍येस्‍यीत सिन ङ्योकोन दोक खाला प्रार्थना खिओ।

कलस्‍सी 3:10

खेराङ बानी खुदुक गाल्‍गीन लेमु कामताङ बात खिताला स्‍यूबा ओत। परमेश्‍वरगीराङ ख्‍योकोन बानी दोक लेमु जोबाते ईन। थे खोरोङ चुक्‍ते ईन्‍दाका सिन झन लेमु खाला छ्या स्‍येस्‍यीत थेमे थे खोरोङ च्‍योकराङ लेमु डुइन डोरस्‍यीत सिन परमेश्‍वरगी ख्‍योकोन बानी झन झन लेमु जोइन ओत।

१ तिमोथी 2:10

बरू परमेश्‍वरला माने खित्‍कान्‍ते फेम्‍मे मिओनगी खिता फापाच्‍योक खाला थेबेकी लेमु काम खिता फाप्‍क्‍यो।

१ तिमोथी 5:10

दोस्‍यिककामा मेन, थेबाचेन लेमु कामगी लाईदु मिन चले खाबाते मि ओङा फाप्‍क्‍यो। थोक साबाते च्‍यि सासीन फुज्‍युङ फुमुला लेमु खाईन हुर्के खाबाते, खाम्‍बादु वाबाते मिला लेमु खित्‍कान्‍ते, परमेश्‍वर सन्‍तानओन खाम्‍बादु ओङजीन काम्‍बा टुला तेरकान्‍ते, दुक्‍पा ओताते मिओनला ताकान्‍ते थेमे ज्‍येनोङ होदोक्‍ते लेमुते काम खित्‍च्‍ये छ्य्‌वापा स्‍येत खिन देताते फेम्‍मे मि ओङा फाप्‍क्‍यो।

१ तिमोथी 5:25

थोकराङ खाला कोई कोई मिकी खाबाते लेमुते कामोङ दाक थोङगो। कोईकीतेचेन होत्ता माथोङसीनोङ ङीमा लेनज्‍यीक दाक थोङगो।

१ तिमोथी 6:18

थेबाला सम्‍पत्ति सोक्‍पा साटोला ज्‍येनलाङ ता फाप्‍क्‍यो सिन खोपरोङ सम्‍पत्ति ज्‍येनताङ गोला सो सि। दोक खिन लेमुते कामकामा खि सि।

२ तिमोथी 2:21

थोगी धनीतेकी लेमुते कामलाकामा चले खित्‍च्‍येते सेरताङ चाँदी स्‍यी च्‍योकराङ ओङाला मिकी मेलेबा कामताङ बातकी छ्य्‌वापेई ठाला फाप्‍क्‍यो। दोक खासीन थोक्‍ते मिचेन थे खोरोङ मालिक ख्रीष्‍टकी लाईदु काम लै खित्‍च्‍येते थेमे थेकी खि साबा च्‍योककामा खित्‍कान्‍ते मि ओङगो। थेमे थोक्‍ते मिकी लेमुते कामताङ बात खिता थुप्‍क्‍यो।

२ तिमोथी 3:17

दोक खाला परमेश्‍वरला माने खित्‍कान्‍ते मिकीचेन लेमुते काम सिराते जेङ लेमु खाला खिता थुप्‍क्‍यो।

तीतस 2:14

ङुरूङ पापकी सजाय थे खोरोङगीराङ भोगे खाईन थे ङुरूङ लाईदु ज्‍यान बिन्‍गीन स्‍यिसुङ। ङुरूङला पाप खित्‍च्‍येते बानीदुकी पूरो खाला टाल्‍ला सेम लेमु जोला काम बात लेमुकामा खिता छोल्‍कान्‍ते थे खोरोङ मि सिरा थुप्‍स्‍यीत सिन थे थोक खाईन स्‍या ओतान।

तीतस 2:7

खोल्‍ला ताला खोपरोङगी चुक चुक खिता फाप्‍च्‍या ईन्‍दाका सिन थेबेकी लोप्‍स्‍यीत सिन जे खित्‍जीनोङ खुई लेमु खाला खि। ज्‍येनतेबाला लोप्‍जीन खुई दाक्‍पोन फाइदा छ्याःङ माताबा खाला थेमे ङा परमेश्‍वर बात लोप्‍कीन ओत सिराच्‍योक खाला होस ज्‍याक्‍ला लोप।

तीतस 3:1

थेमे ज्‍येनोङ बात थेरू येशू ख्रीष्‍ट मिओनला च्‍यि सिन लोबे सासीन लुङबादु राज्‍य खित्‍कानताङ ज्‍येन छ्ये छ्ये मि अधीनला देत्‍ला नियम कानून ङेन्‍दा फाप्‍क्‍यो थेमे लेमु काम खित्‍च्‍ये छ्य्‌वापाकामा सेम खिता फाप्‍क्‍यो सिरच्‍येते बात टोक माज्‍येत सिन सि।

तीतस 3:14

दोक खाला सुङगीङ दाक्‍पोनला छ्याःङ काम लै मिक्‍किच्‍येते मि मिसिरस्‍यीत सिन येशू ख्रीष्‍ट मिओनगीचेन सुइँदाला खाँचो परे खाबे बेलाला खइँदा तेरा फाप्‍सीन थोक खिता फाप्‍च्‍याक्‍वा सिन गाङेकी लोप्‍स्‍यीत।

तीतस 3:8

दि बात साँच्‍चीराङ ईन्‍दाते बात ईन। थोगी ङा खोल्‍ला च्‍यि सिते सासीन परमेश्‍वरला विश्‍वास खित्‍कान्‍ते थेरू मिओनगी लेमुते काम खित्‍च्‍ये छ्य्‌वापाकामा सेम लै खाला थोकराङ खित्‍स्‍यीत सिन थेबाला दि बात दोरे खाला खाला लाप्‍ला बिन। दि बात लेमु ईन्‍देकी मिओनगी ङेन्‍सुङ सासीन गाङेला लेमु ओङगो।

हिब्रू 10:24

थोकराङ खाला ङिङज्‍ये खिताला थेमे लेमु काम खिताला ङुरूङगी चुक खाला दोक्‍पोईकी ज्‍येनज्‍यीकला लोपा थुप्‍कीका सिरच्‍ये छ्य्‌वापा विचार खिता फाप्‍क्‍यो।

हिब्रू 13:21

होदोक खित्‍कान्‍ते परमेश्‍वरगी ख्‍योकोनगी थेकी खिता चालाच्‍योक खिताला ख्‍योकोनला गोच्‍येते स्‍येतताङ बुद्धि तेरस्‍यीत। दोक खाला थेकी ख्‍योकोनला येशू ख्रीष्‍ट छ्य्‌वापेई थे खोरोङला मन परे खित्‍च्‍येते काम खित्‍च्‍येते सेम तेरस्‍यीत। थेते सधैँभरि जय जय ओङस्‍यीत। आमेन।

१ पत्रुस 2:12

परमेश्‍वरला छ्या मेस्‍येकान्‍ते खेराङला मेलेबा मि ईन सिरकान्‍ते मिओन नाङराङ देता ओत्‍सीनोङ काम बात जे खित्‍जीनोङ ख्‍योकोनगी लेमुतेकामा खि। दोक खाईन ख्‍योकोनगी लेमुकामा खानामेई था परमेश्‍वरगी वाला मि गाङे न्‍याय खिते छोमु ख्‍योकोनला मेलेबा मि सिन सिरकान्‍ते होथे मिओनगी ख्‍योकोन थोक्‍ते मि मेन्‍दाक्‍वा सिन छ्या स्‍येला परमेश्‍वरते जय जय खिओ।

१ यूहन्‍ना 1:7

परमेश्‍वर नाम्‍दाकला देता ओता च्‍योकराङ खाला ङुरूङोङ थे नाम्‍दाकला देत्‍कीन लेमु काम खासीन ङुरूङ दाक्‍पोन नाङ ङ्योम्‍बुराङ डिक्‍ला देता थुप्‍क्‍यो। थेमे परमेश्‍वर फुज्‍युङ येशू थे खोरोङ ज्‍यान बिन्‍ला स्‍यिजीन थे जीउदुकी थेन्‍दाते ठागी खित्‍सादु ङुरूङ पाप गाङे माफ ओङगो।

१ यूहन्‍ना 2:6

परमेश्‍वरताङ डिक्‍ला देत्‍कान्‍ते ईन सिन सिरकान्‍ते मिकीचेन काम बात जे खित्‍जीनोङ येशूकी खाबा च्‍योकराङ खिता फाप्‍क्‍यो।