कलस्‍सी 1:10 - जिरेल

¹⁰ प्रभु येशू मिकी चुक खिता फाप्‍कीते सिन छ्या स्‍येला ख्‍योकोनगी थोकराङ खित्‍स्‍यीत, काम बात जे खासीनोङ थेला मन परे मिक्‍किच्‍येते सिराते छ्याःङ मिक्‍किस्‍यीत बरू झन झन लेमुते कामकामा खित्‍स्‍यीत थेमे परमेश्‍वर सु ईन्‍दे, चुक्‍ते ईन्‍दे सिन झन लेमु खाला छ्या स्‍येस्‍यीत सिन ङ्योकोन दोक खाला प्रार्थना खिओ।

कलस्‍सी 1:10 Iomraidhean Croise

यूहन्‍ना 15:16

ख्‍योकोनगी ङाला छाने खाबाते मेन। ख्‍योकोनगी लेमु लेमु काम खिता थुप्‍स्‍यीत थेमे ख्‍योकोनगी खाबाते दोक्‍ते काम नोमुङ खेरो मोन्‍डोस्‍यीत सिन ङेका ख्‍योकोनला छाने खाबाते ईन। ख्‍योकोनगी ङे खित ज्‍युता चाला च्‍योकराङ खानामेई ङे मिन लाकीन आबाताङ जे नाङ खासीनोङ थेकी ख्‍योकोनला तेरग्‍यो।

यूहन्‍ना 15:8

अंगूर काल्‍बेई गोन्‍दाच्‍योक खाला ख्‍योकोनगी लेमु लेमु कामकामा खानामेई ङे आबाताङ चुक छ्येज्‍यीक शक्ति ओता ईन्‍दाका सिन मिओनगी छ्या स्‍येक्‍यो। दोस्‍यिककामा मेन, ख्‍योकोनगी थोक लेमु खाबा थोङजीन ख्‍योकोन ङे चेला दुका सिन गाङेकी छ्या स्‍येक्‍यो।

यूहन्‍ना 17:3

आबा खोकामा सत्‍यते परमेश्‍वर ईन थेमे खुई दुरू ताङाते येशू ख्रीष्‍टला सु ईन्‍दे, चुक्‍ते ईन्‍दे सिन छ्या स्‍येच्‍येतेराङ नोमुङ मिसिन्‍च्‍येते जुनी ङेत्‍च्‍येते ईन।

रोमी 1:13

आज्‍यो न्‍वावे, पालोताङ पालो ङा ख्‍योकोन ओत्‍सापा ओङा चालाप। ङे ढाँर खाबाते मेन। तर जति खासीनोङ थोरूमसाक ङा थेपा ओङा माथुप्‍सुङ। ज्‍येन ठाउँकी ज्‍येन ज्‍येन जातकी मि नाङ च्‍योकराङ खाला थेपाङ गा लाङच्‍येते बात लोपा ङेत्‍सीन मिओनगी येशूला विश्‍वास खित्‍च्‍या ओतान सिन ङा ख्‍योकोन ओत्‍सापा ओङा चालाते ईन।

रोमी 4:12

अब्राहामचेन खतकी चिनु जोकान्‍ते यहूदीओनतेङ ज्‍युज्‍युराङ ईन। ईन्‍सीनोङ खतकी चिनु जोकान्‍तेबा गाङेराङ अब्राहाम सन्‍तानचेन मेन। ङुरूङ यहूदीओन ज्‍युज्‍यु अब्राहामगी खतकी चिनु माजोबालाराङ विश्‍वास खाबाच्‍योक खाला परमेश्‍वरला विश्‍वास खित्‍कान्‍ते मिओनकामा अब्राहाम सन्‍तान ईन।

रोमी 6:4

थोक खाला बप्‍तिस्‍मा तेरजीन ङुरूङ थेत्ताङराङ स्‍यिइन दिबाते ईन। आबा परमेश्‍वरगी थे खोरोङ छ्येज्‍यीक शक्तिकी ख्रीष्‍टला स्‍यिसादुकी सोम्‍बो लोक्‍पा ओत। था ङुरूङगी गोमाबा खाबाच्‍योक पाप मिक्‍किता खाला थे खोरोङगी खि साबा च्‍योकराङ खिता थुप्‍स्‍यीत सिन परमेश्‍वरगी ख्रीष्‍टला बिन्‍दा च्‍योक्‍ते साम्‍बाते जुनी ङुरूङलाङ बिन्‍दा ओत।

२ कोरिन्‍थी 2:14

थेमे परमेश्‍वरला ङ्योकोन धन्‍यवाद तेरग्‍यो। ख्रीष्‍टताङ जीउज्‍यीकराङ ओङा ओतेकी ङेराङ जहाँदु गाल्‍सीनोङ परमेश्‍वरगी सधैँ ङ्योकोनला ख्रीष्‍ट च्‍योकराङ शत्रुला ग्‍याल्‍कान्‍ते ईन सिन तेन्‍ला तेरगीदुक। थेमे धूप पारनामेकी थे बास्‍ना फैले खाबा च्‍योकराङ खाला ङ्योकोन छ्य्‌वापेकी ख्रीष्‍ट सु ईन्‍दे, थेकी च्‍यि खिते सिरच्‍येते बात गाङेपा फैले खित ज्‍युत्‍कीदुक।

२ कोरिन्‍थी 4:6

परमेश्‍वरगी सा नाम जोजीन “मुन्‍दाकते ठाउँदु नाम्‍दाक ओङस्‍यीत,” सिन साबा ओतान। होथोक सिरकान्‍ते परमेश्‍वरगीराङ मुन्‍दाकते ठाउँदु नाम्‍दाक ओङ च्‍युताच्‍योक खाईन थे खोरोङ सु ईन्‍दे थेमे थेत्ताङ चुक छ्येज्‍यीक शक्ति ओते सिन ङुरूङला छ्या स्‍ये च्‍युत्‍सुङ। दि बात ङुरूङगी ख्रीष्‍टला ताकीन छ्या स्‍येबाते ईन।

२ कोरिन्‍थी 5:9

बात दोक ईन्‍देकी दि जुनीला ईन्‍स्‍यीत, स्‍यिइन थेत्ताङ देता ङेत्‍नामेई ईन्‍स्‍यीत ङ्योकोन जहिलेङ प्रभु येशूला मन परे खित्‍च्‍येते काम खित्‍च्‍ये छ्य्‌वापाकामा स्‍येत खिओ।

२ कोरिन्‍थी 9:8

परमेश्‍वरगी ख्‍योकोनला जहिलेङ जे कुरोङ खेराङला गोबा भन्‍दाङ ल्‍हाक्‍पा तेरा थुप्‍क्‍यो। दोक खाला ख्‍योकोनला मादाङच्‍या मोख्‍योप्‍च्‍या सिराते छ्याःङ मायाङला ख्‍योकोनगी झन झन ज्‍येनला लेमु खाला ता थुप्‍क्‍यो।

एफिसी 1:17

ङुरूङ प्रभु येशू ख्रीष्‍टते परमेश्‍वरगी थे खोरोङ चुक्‍ते ईन्‍दे थेमे चुक अचम्‍ब खाला काम खिन ओते सिन खोबाला ख्‍योकोनला बुद्धि तेरस्‍यीत सिन ङा प्रार्थना खिओ। परमेश्‍वरचेन छ्येज्‍यीक शक्ति ओताते आबा ईन।

एफिसी 2:10

येशू ख्रीष्‍टकी खाबाते कामगी खित्‍सादु परमेश्‍वरगीराङ ङुरूङला लेमुते काम खिता थुप्‍स्‍यीत सिन साम्‍बाते जुनी बिन्‍गीन खुदुक जोबाते ईन। ङुरूङगी खिता फाप्‍च्‍येते लेमुते कामतेबा थेकी गोमाकाराङ ठीक खाईन ज्‍याक्‍पा ओतान।

एफिसी 4:1

बात दोक दोक ईन्‍देकी ङा ख्‍योकोनला दोक खि सिन सिओ। प्रभु येशू ख्रीष्‍टकी खि साबाते काम खाबेकी ङाला जेलदु ज्‍याक्‍पा ओत। ङा ख्‍योकोनला चुक खि सिते सासीन ओर्च्‍ये, परमेश्‍वरगी खेराङला थे खोरोङ दोन्‍दु स्‍योक सिन कातोङजीन ख्‍योकोनगी चुक चुक खिता फाप्‍क्‍यो सिन साबा ओताने थोक थोकराङ खि।

एफिसी 4:13

ङुरूङ गाङेकी थोक खिन डोजीन थेला विश्‍वास खाईन ङेन्‍दाते बातला ङुरूङ झन डिगीन डुइओ थेमे परमेश्‍वर फुज्‍युङ चुक्‍ते ईन्‍दे, च्‍यि खिते सिन झन लेमु खाला छ्या स्‍येला ङुरूङ गाङेराङ सेमज्‍यीकराङ खाला काम खित्‍कान ओङगो। दोक खाला ख्रीष्‍टकी ङुरूङ नाङ खिता चालाते काम पूरो ओङला ङुरूङ थेकी ज्‍वा चाला च्‍योकराङ पाको ओङगो।

एफिसी 5:10

थेमे जहिलेङ ख्‍योकोनगी खित्‍च्‍येते कामताङ बात प्रभु ख्रीष्‍टला मन परे खित्‍च्‍येते ईन्‍दाना मेन्‍दे सिन छ्या स्‍येलाकामा खि।

एफिसी 5:15

थोगी ख्‍योकोनगी छ्याःङ छ्या मेस्‍येकान्‍ते मि च्‍योक मिक्‍किता खाला खेराङगी चुक खिता फाप्‍कीते सिन विचार खाला खिता फापा च्‍योकराङ खि।

एफिसी 5:2

थेमे ख्रीष्‍टकी ङुरूङला चुक ङिङज्‍ये खाईन थे खोरोङ ज्‍यानराङ बिन्‍गीन स्‍या ओताने सिन सम्‍झे खाला काम बात जे खासीनोङ ख्‍योकोनगीङ ज्‍येनला ङिङज्‍ये खाला खि। परमेश्‍वरला भोग बिन्‍दाते स्‍येक्‍जीन खाच्‍येते ठीमा थेला मन परे खिन ओतान। ख्रीष्‍टकी ङुरूङ लाईदु ज्‍यान बिन्‍गीन स्‍याप्‍तेचेन परमेश्‍वरला मन परे खित्‍च्‍येते होथे ठीमा च्‍योक्‍ते ईन।

फिलिप्‍पी 1:11

थेमे परमेश्‍वरगी खि साबाच्‍योक खाला लेमुते कामकामा खित्‍कान्‍ते मि ओङगो। परमेश्‍वरगी मान ङेत्‍स्‍यीत थेमे थेते जय जय ओङस्‍यीत सिनराङ येशू ख्रीष्‍टकी खित्‍सादु ख्‍योकोन थोक्‍ते मि ओङच्‍येते ईन।

फिलिप्‍पी 1:27

था जे ओङसीनोङ ख्रीष्‍टते गा लाङच्‍येते बात ङेन्‍कान्‍ते मिओनगी चुक चुक खिता फाप्‍च्‍येते ईन्‍दे ख्‍योकोनगी होथोकराङ खि। च्‍यि सासीन ख्‍योकोन गाङेराङ सेमज्‍यीकराङ खाला डिक्‍ला देत। ज्‍येनगी जे सासीनोङ जति दुक्‍पा बिन्‍सीनोङ ख्‍योकोन गाङेराङ डिक्‍ला खेराङगी ङेन्‍दाते गा लाङच्‍येते बात ङेन्‍गीनराङ देत। ङा थेपा वासीन ख्‍योकोनगी थोक खिन ओताते ङाराङगीराङ थोङगो, मासुङ सासीनोङ ख्‍योकोनगी थोक खिन दुक्‍लो सिन ङे थोबा ङेत्‍स्‍यीत।

फिलिप्‍पी 4:18

ख्‍योकोनगी इपाफ्रोडिटस लाःक्‍तु ताङाते पैसा ङे गाङे ङेत्‍सुङ। था ङे लाःक्‍तु ङाराङला गोबा भन्‍दाङ ल्‍हाक्‍पा पैसा ओत। परमेश्‍वरला भोग बिन्‍दाते स्‍येक्‍जीन खाच्‍येते ठीमा थेला मन परे खिन ओतान। ख्‍योकोनगी ङाला ताङाते पैसाङ परमेश्‍वरला स्‍यीम्‍बु लाङच्‍येते होथे ठीमा च्‍योक्‍तेराङ ईन।

कलस्‍सी 2:19

थोक्‍ते मिचेन ख्रीष्‍टताङ ठाल्‍गीन सिन्‍दाते मि ईन। मि जीउकी गोः च्‍योकराङ थे खोरोङ मिओनते छ्येते ख्रीष्‍टराङ ईन। मि जीउचेन चाताङ छिकी जोरे खाबा ओङगो। थेमे गोः ओत्‍सीनकामा मि जीउ छारग्‍यो। थोकराङ खाला ख्रीष्‍टकीकामा थे खोरोङ मि गाङेला डिक च्‍युत्‍ला परमेश्‍वरगी चुक ओङा फाप्‍क्‍यो सिन साबाते ईन्‍दे पूरो खाला थोकराङ ओङ ज्‍युत्‍क्‍यो।

कलस्‍सी 2:6

येशू ख्रीष्‍टराङ खेराङ मालिक ईन सिन ख्‍योकोनगी थेला विश्‍वास खिताला स्‍यूबा ओत। थोगी थेत्ताङ जीउज्‍यीकराङ ओङाते मिकी काम बात चुक खिता फाप्‍च्‍येते ईन्‍दे ख्‍योकोनगी थोकराङ खिन देत।

कलस्‍सी 3:20

थोकराङ खाला फिजावे, जहिलेङ आबा आमेकी लाःपा कोताते ङेन। ख्‍योकोनगी दोक खासीन प्रभु येशूला गा लाङगो।

कलस्‍सी 4:5

येशू ख्रीष्‍ट मि मेन्‍दाते मिओनताङ चुक खाला बात खिता फाप्‍कीते, थेबे दोन्‍दु च्‍यि काम खिता लेमु ईन्‍दे सिन लेमु खाला विचार खाला खि। दोक्‍ते काम खिता ङेत्‍च्‍येते समय था काल्‍बा मेत सिन छ्या स्‍येला टोले मिक्‍किता खाला दोक खिन देत।

१ थिस्‍सलोनिकी 2:12

थेमे परमेश्‍वर मिओनगी चुक चुक खिता फाप्‍कीते सिन लाप्‍कीन थोक खिन देत सिन लोप्‍कीन देताप। ख्‍योकोन थे खोरोङ राज्‍यदु देता ङेत्‍स्‍यीत थेमे थे खोरोङ चुक छ्ये ईन्‍दाका सिन लेमु खाला छ्या स्‍येस्‍यीत सिन थे खोरोङ दोन्‍दु स्‍योक सिन कातोङकान्‍ते परमेश्‍वरराङ ईन।

१ थिस्‍सलोनिकी 4:1

आज्‍यो न्‍वावे, था ज्‍येन बात च्‍यि सासीन परमेश्‍वरला चुक्‍ते काम मन परे खिते, ख्‍योकोनगी चुक खाला देता फाप्‍कीते सिन ङ्योकोनगी ख्‍योकोनला लाप्‍कीन बिन्‍दा ओत। ङ्योकोनगी लापाच्‍योक खाला ख्‍योकोन कामोङ खिनराङ दुक। प्रभु येशूताङ जीउज्‍यीकराङ ओङाते मि ईन्‍देकी ङ्योकोन ख्‍योकोनला थोरूमसाक खिन ओताच्‍योक खिन देता मातोङ, झन लेमु खाला दोक खिनराङ देत सिन सिओ।

२ तिमोथी 2:4

खोपरोङ छ्येते मिकी साबा साबा ङेन्‍दा छोल्‍कान्‍ते मिल्‍टेरी सुङ लडाइँ खिन खिन ताङला खोपरोङ काम खिताला मोन्‍डोओ।

तीतस 3:1

थेमे ज्‍येनोङ बात थेरू येशू ख्रीष्‍ट मिओनला च्‍यि सिन लोबे सासीन लुङबादु राज्‍य खित्‍कानताङ ज्‍येन छ्ये छ्ये मि अधीनला देत्‍ला नियम कानून ङेन्‍दा फाप्‍क्‍यो थेमे लेमु काम खित्‍च्‍ये छ्य्‌वापाकामा सेम खिता फाप्‍क्‍यो सिरच्‍येते बात टोक माज्‍येत सिन सि।

तीतस 3:14

दोक खाला सुङगीङ दाक्‍पोनला छ्याःङ काम लै मिक्‍किच्‍येते मि मिसिरस्‍यीत सिन येशू ख्रीष्‍ट मिओनगीचेन सुइँदाला खाँचो परे खाबे बेलाला खइँदा तेरा फाप्‍सीन थोक खिता फाप्‍च्‍याक्‍वा सिन गाङेकी लोप्‍स्‍यीत।

हिब्रू 11:5

थे खोरोङला विश्‍वास खित्‍कान्‍ते ईन्‍देकी परमेश्‍वरगी हनोकला मास्‍यिबालाराङ स्‍वर्गने खेरा ओतान। परमेश्‍वरगी स्‍वर्गने खेराते ईन्‍देकी थे खापा गाल्‍ताका सिन गाङेपा चाल्‍सीनोङ मिओनगी थेला थेपा मेतान। थेला थोक खाला स्‍वर्गने खेरा भन्‍दा गोमा परमेश्‍वरगी हनोकचेन थे खोरोङला मन परे खित्‍च्‍येते काम खित्‍कान्‍ते मि ईन सिन साबा ओतान।

हिब्रू 13:16

थेमे दोक्‍पोईकी ज्‍येनज्‍यीकला लेमु खित्‍च्‍येतेताङ ज्‍येनताङ गोला साच्‍येते खिन देत। थेला मन परे खित्‍च्‍येते भोग बिन्‍दा च्‍योक्‍तेचेन होदोक दोक खित्‍च्‍येते ईन।

हिब्रू 13:21

होदोक खित्‍कान्‍ते परमेश्‍वरगी ख्‍योकोनगी थेकी खिता चालाच्‍योक खिताला ख्‍योकोनला गोच्‍येते स्‍येतताङ बुद्धि तेरस्‍यीत। दोक खाला थेकी ख्‍योकोनला येशू ख्रीष्‍ट छ्य्‌वापेई थे खोरोङला मन परे खित्‍च्‍येते काम खित्‍च्‍येते सेम तेरस्‍यीत। थेते सधैँभरि जय जय ओङस्‍यीत। आमेन।

२ पत्रुस 1:8

होदोक दोककामा खिन गाल्‍सीन ङुरूङ प्रभु येशू ख्रीष्‍ट सु ईन्‍दे, चुक्‍ते ईन्‍दे सिन छ्या स्‍येबाते बात ख्‍योकोनगी कामगीराङ खाला तेन्‍दा थुप्‍क्‍यो।

२ पत्रुस 3:18

ङुरूङला पापदुकी डेल्‍कान्‍ते प्रभु येशू ख्रीष्‍टकी थोई दया खासुङा थेमे थे चुक लेमु खित्‍कान्‍ते ईन्‍दे सिन झन झन लेमु खाला छ्या स्‍येबा थुप्‍स्‍यीत सिन ख्‍योकोनगी सत्‍यते बात ङेन्‍गीन देत। थरिङोला ईन्‍स्‍यीत, था तिरी ईन्‍स्‍यीत सधैँभरि प्रभु येशू ख्रीष्‍टते जय जय ओङस्‍यीत सिन सिइ। आमेन।

१ यूहन्‍ना 3:22

थेमे ङुरूङगी जे नाङ सासीनोङ परमेश्‍वरगी दाक तेरग्‍यो। च्‍यिला सासीन ङुरूङ थेकी खि सिन कोताते ङेन्‍ग्‍यो थेमे थेला मन परे खित्‍च्‍येते काम खिओ।

१ यूहन्‍ना 5:20

ङुरूङला ज्‍येनोङ बात च्‍यि छ्या ओते सासीन परमेश्‍वर फुज्‍युङगी दुरू वाकीन परमेश्‍वर सु ईन्‍दे, चुक्‍ते ईन्‍दे सिन ङुरूङला छ्या स्‍ये च्‍युत्‍सुङ। थेकी दोक खानामेई ङुरूङ सत्‍यते परमेश्‍वरताङ डिक्‍पा थुप्‍सुङ थेमे परमेश्‍वर फुज्‍युङ येशू ख्रीष्‍टताङ डिक्‍पा थुप्‍सुङ। येशू ख्रीष्‍टचेन सत्‍यते परमेश्‍वर ईन, नोमुङ मिसिन्‍च्‍येते जुनी तेरकान्‍तेङ थेराङ ईन।

३ यूहन्‍ना 1:6

होथे आज्‍यो न्‍वाओनगी दुरू वाकीन खुई थेबाला थोई लेमु खासुङा सिन येशू ख्रीष्‍ट मिओन दोन्‍दु गाङे लाःप्‍सुङ। था थेबा ज्‍येन ठाउँला डोजीनोङ खुई थेबाला गोच्‍येते बिन्‍ला होथोकराङ लेमु खाईन ताङसीन लेमु ओङगो। थोक खाबाते परमेश्‍वर दोन्‍दु खिता डिक्‍च्‍येते काम ईन।