शक्ति काम 8:7 - जिरेल

⁷ फिलिपकी थेङला मिओनला खोबाते ल्‍हन्‍डीकओनला थेबे नाङदुकी थेन्‍ला ग्‍युक सिन तेन्‍गीन ताङसुङ। थोक खाला तेन्‍ला तोङजीन थे ल्‍हन्‍डीकओन छेरा खिनकामा मिदुकी थेन्‍गीन गाल्‍सुङ। थोकराङ खाईन थेकी लाक्‍पा काम्‍बा चले खिता मुथुप्‍कान्‍ते मि काल्‍बेईला लाक्‍पा काम्‍बा चले खिता थुप्‍च्‍या जोसुङ। थेमे कुज्‍येतेबालाङ काल्‍बेईला ख्‍याम्‍बा थुप्‍च्‍या जोसुङ।

शक्ति काम 8:7 Iomraidhean Croise

मत्ती 10:1

थेमे येशूकी थे खोरोङ चेला च्‍युन्‍ङीला दोन्‍दु काताङगीन च्‍याकीन ल्‍हन्‍डीक खोबाते मिओनदुकी ल्‍हन्‍डीक तेन्‍ला तोङच्‍येते अधिकार थेबाला बिन्‍सुङ। थरी थरीतेन्‍दे रोग लै खाबाते थेमे नाबाते मिओनला ठाक्‍पा खित्‍च्‍येते शक्तिङ बिन्‍सुङ।

मत्ती 11:5

चुक सासीन अन्‍धतेबा थोङा थुप्‍च्‍या गालाते, कुज्‍येतेबा ख्‍याम्‍बा थुप्‍च्‍या गालाते थेमे जे खोबाते मिओन ठाक्‍पाते बात थेला सि। थोकराङ खाला ओन्‍बातेबा थोबा थुप्‍च्‍या गालाते, स्‍याप्‍ते मिओन सोम्‍बो लोक्‍पाते थेमे छ्याःङ मेताते मिओनला गा लाङच्‍येते बात लाप्‍कीन बिन्‍दाते बाततेबाङ गाल्‍ला थेला सि।

मत्ती 4:24

थेकी खाबाते दि कामगी बाततेबा सिरिये लुङबा खाङोङ फैले खासुङ। थेमे मिओनगी थरी थरी रोग लै खाईन नाबाते मिओन, ल्‍हन्‍डीक खोबातेबा, जा लाङकान्‍तेबा, कुज्‍येतेबा गाङेला ठाक्‍पा खाला तेरस्‍यीत सिन थे ओत्‍सादु क्‍याल्‍सुङ। थेमे थेकी थे मि गाङेला ठाक्‍पा खाईन बिन्‍सुङ।

मर्कूस 9:26

थेकी थोक सानामेई थे ल्‍हन्‍डीक कस्‍स्‍ये खाईन छेरा खासुङ। थेमे थे फिजाला आउदी मेलेबा खाईन जा लाङगीन कक्रक कुक्रुक जोकीन थेन्‍गीन गाल्‍सुङ। थेमे थे फिजा स्‍याप च्‍योकराङ गाल्‍सुङ। थोक थोङगीन गाङेकी “ला, थे स्‍यिदुक,” सिदुक।

लूका 10:17

थेमे ठाउँ ठाउँला परमेश्‍वर बात लोपाला ताङाते थे मेरा खाल सुमताङ च्‍युताम्‍बा येशू ओत्‍सादु ग्‍युरगीन लिच्‍युङ। थेमे गा खिन थेबेकी “प्रभु, मिओनला खोबाते ल्‍हन्‍डीकओनला ङ्योकोनगी खुई मिन लाकीन थेन्‍ला ग्‍युक सिन कोत्‍नामेई थेबा गाङे थेन्‍गीन गाल्‍सुङ,” सिन लाःप्‍सुङ।

यूहन्‍ना 14:12

दि बात ङेन। ङाला विश्‍वास खित्‍कान्‍ते मिकीचेन ङे खाबा च्‍योक्‍ते कामराङ खिओ। थेकी दिबा भन्‍दाङ छ्ये छ्ये काम खिओ। दोक खिता थुप्‍च्‍येते च्‍यिला ईन्‍दे सासीन था ङा आबा ओत्‍साने ग्‍युरला डुइओ।

शक्ति काम 5:16

थोकराङ खाला यरूशलेम सारगी फेरोला ओताते ज्‍येन ज्‍येन सारगी नाङपेकीङ मि काल्‍बेई येशू ख्रीष्‍टकी खटे खाबाते मिओन ओत्‍सादु ओङगीन ओतान। दोक खाला ओङजीन थेबेकी नाबातेताङ ल्‍हन्‍डीक स्‍यिन्‍डीपकी दुक्‍पा बिन्‍दाते मिओनलाङ थेरू खुलाङगीन ओतान। थेमे थेबा गाङेराङ लेमु खाला ठाक्‍ला ग्‍युरगीन ओतान।

शक्ति काम 8:6

थेकी साबाते बातताङ खाबाते अचम्‍बते कामओन थोङगीन मि गाङेकी थेकी लोप्‍कीन ओताते बाततेबा आउदी लेमु खाईन ङेन्‍दाला स्‍यूसुङ।

हिब्रू 2:4

थेबेकी लापाते बात सत्‍यतेराङ ईन सिन तेन्‍दाला परमेश्‍वरगीङ दि बात लोप्‍कान्‍तेबाला खुदुक खुदुकतेन्‍दे छ्ये छ्येताङ अचम्‍बतेन्‍दे काम खित च्‍युत्‍सुङ। थेमे थे खोरोङगी सेम खाबा च्‍योकराङ खाईन परमेश्‍वर आत्‍मा बिन्‍गीन खुदुक खुदुक काम खित्‍च्‍येते सीपताङ शक्तिङ बिन्‍सुङ।