शक्ति काम 21:11 - जिरेल

¹¹ ङ्योकोनताङ ठेत्‍नामेकी थेकी पावलगी च्‍यिबाते काराककी थे खोरोङ लाक्‍पा काम्‍बा ठाकीन “थाल्‍ला ङे लाक्‍पा काम्‍बा ठाबाते काराक जसकीते ईन थेला यरूशलेमदु यहूदीओनगी दोकराङ खाला जुम्‍ला ठाला ज्‍येन ज्‍येन जातकी मि लाःक्‍तु सोम्‍पे खिओ, दि परमेश्‍वर आत्‍मेकी साबाते बात ईन,” सिन सिदुक।

शक्ति काम 21:11 Iomraidhean Croise

यूहन्‍ना 18:1

दोक खाईन दि प्रार्थना खाईन सिन्‍नामेकी येशू चेलातेबाताङ फिनामा थेन्‍गीन किद्रोन ठाङके फारकेनपा गाल्‍सुङ। थेपा बगैंचाज्‍यीक ओतान। थेमे थेबा गाङेराङ थे नाङ स्‍यूसुङ।

शक्ति काम 13:2

थेमे बाजिई थेबाबरी बर्त देत्‍ला प्रभु परमेश्‍वरते जय जय खिन प्रार्थना खिन ओतान। थोक खिते बेलाला परमेश्‍वर आत्‍मेकी थेबाला “ङे बारनाबासताङ शावलला कामज्‍यीक खिताला छाने खाबा ओत। थोगी था ख्‍योकोनगी दिबा ङिबोला थे कामराङ खिताला थोङ,” सिन छ्या स्‍ये च्‍युत्‍सुङ।

शक्ति काम 16:6

थोक खाला युगीन डोजीन पावलबा एशिये अञ्‍चल नाङपा गा लाङच्‍येते बात लोप ड्वा चाल्‍सुङ। तर परमेश्‍वर आत्‍मेकी थेबाला थेङपा डोर माच्‍युत्‍सुङ। थोगी थेबा फ्रिगियाताङ गलातिये अञ्‍चल नाङपा खाईन गाल्‍सुङ।

शक्ति काम 20:23

ईन्‍सीनोङ ङा यरूशलेमपा लेप्‍नामेकी ङे थेरू जेलदु देता फाप्‍क्‍यो थेमे ङेतासम्‍म दुक्‍पा ङेत्‍क्‍यो सिन परमेश्‍वर आत्‍मेकी ङाला सार सारला याङ याङ छ्या स्‍येबा खाईन बिन्‍दा ओत।

शक्ति काम 21:33

थेमे थे छ्येते मिकी “दि मिला जुम्‍ला लाक्‍पा ङिकारला नेल कोन,” सिन पावलला जिन च्‍युत्‍कीन थेरू मिओनला “दि मि सु ईन्‍दे? दिकी च्‍यि खासुङा?” सिन ठिसुङ।

शक्ति काम 21:4

ङ्योकोनोङ थेरूराङ फाप्‍कीन थेरू येशू चेलाओनला ठेताला गालाप। थेमे हप्‍ताईसाक थेबाताङराङ देताप। थेजीन थेबेकी परमेश्‍वर आत्‍मे छ्य्‌वापेकी पावलला यरूशलेमपा मान्‍डो सिन बिन्‍ती खासुङ।

शक्ति काम 22:25

थेमे मिल्‍टेरीओनगी पावलला नाङने खेरगीन ठाकीन कोर्रा लै खिताला ठिक्‍क खित्‍जीन थेकी थेबे क्‍याप्‍टेनला “च्‍यि रोमी नागरिकला कोर्रा लै खिता ङेत्‍क्‍यो? थोरूम बयानराङ मालाबाला ङाला चुक खाला दोक खिता ङेत्‍कीते?” सिन सिरजीन

शक्ति काम 24:27

थोक खिन खिनला लो ङि तिरी थे साटोला पोर्सिअस फेस्‍तस हाकिम ओङसुङ। यहूदीओनला खुशी ज्‍वाप्‍ला थे खोरोङ ड्वा बेलालाङ फेलिक्‍सकी पावलला जेलदुकी माताङसुङ।

शक्ति काम 26:29

थेमे पावलगी “बात जस्‍तो ईन्‍सीनोङ होत्ता ईन्‍स्‍यीत तिरीकामा ईन्‍स्‍यीत थरिङ दुरू दि बातओन थोकान्‍तेबा सरकार खो थेमे ज्‍येन दुरू ओतातेबरी गाङेराङ ङा च्‍योकराङ येशूला विश्‍वास खित्‍कान ओङस्‍यीत सिन ङा परमेश्‍वरला प्रार्थना खिओ। तर ङे च्‍योक खाला ख्‍योकोनगीचेन नेल खोन्‍दा माफाप्‍स्‍यीत,” सिन सिदुक।

शक्ति काम 28:17

थेरू लेपाते ङीमा सुम तिरी पावलगी थेरू ओताते यहूदीओन छ्ये छ्ये मिला थे खोरोङ ओत्‍सादु काताङसुङ। थेमे थेबा जम्‍मा ओङनामेकी थेकी थेबाला “आज्‍यो न्‍वावे, बात च्‍यि सासीन ङे दाक्‍पोन जातकी मि सुङलाङ छ्याःङ मेलेबा खाबा मेतान। थेमे ज्‍युज्‍यु पुर्खे पालोमेकी चले खिन वाबाते रीतिथितिङ ङ्ये च्‍युता मेतान। दोक खाला ङेते छ्याःङ गल्‍ती मेत्‍सीनोङ दाक्‍पोन यहूदीओनगीराङ ङाला यरूशलेमदु जुम्‍गीन थेरू रोमी गेल्‍बो मिओन लाःक्‍तु सोम्‍पे खासुङ।

शक्ति काम 28:20

दि बातओन खिताप सिनराङ ङे ख्‍योकोनला काताङाते ईन। था तिरी परमेश्‍वरगी स्‍याप्‍ते मिओनला सोम्‍बो लोइओ सिन साबाते ङुरूङ इस्राएली गाङेकी आश खाईन गुकीन देताते बात पक्‍काराङ ईन सिन लोप्‍कीन ख्‍याम्‍बेकीराङ ङे दि नेल खोन्‍दा फापाते ईन,” सिन बात खासुङ।

शक्ति काम 28:25

थोक ओङगीन थेबे नाङ बात माडिक्‍सुङ। थेमे थेरूई थेबा लाकीन ड्वाप्‍ला स्‍यूसुङ। थेबा गाल मागाल्‍लाराङ थोरूमोङ बात खिन पावलगी थेबाला “थाङबो ख्‍योकोन ज्‍युज्‍यु पुर्खाला परमेश्‍वर आत्‍मेकी परमेश्‍वर बात खित्‍कान्‍ते यशैयाला सिर च्‍युताते बात ख्‍योकोनलाङ डिगीदुक। परमेश्‍वरगी साबाते बात थेला दोक सिन सिर च्‍युता ओतान।

शक्ति काम 8:29

थेमे परमेश्‍वर आत्‍मेकी फिलिपला “लो खो थे बग्‍गी खादु गाल्‍ला थेत्ताङराङ ख्‍योम,” सिन कोत्‍सुङ।

शक्ति काम 9:16

ङा सु ईन्‍दे सिन लोप्‍जीन थेकी आउदी दुक्‍पा खपे खिता फाप्‍क्‍यो सिरच्‍येते बादोङ ङा थेला सिओ,” सिन सिदुक।

एफिसी 3:1

परमेश्‍वरगी ख्‍योकोनला होदोक लेमु खाबा ओतेकी ङा पावल ख्‍योकोन लाईदु परमेश्‍वरला प्रार्थना खिओ। येशू ख्रीष्‍टकी खि साबाते काम खाबेकी ङाला जेलदु ज्‍याक्‍पा ओत। ख्‍योकोन ज्‍येन ज्‍येन जातकी मिला लेमु ओङस्‍यीत सिन ङा दोक खाला दुक्‍पा भोगे खिओ।

एफिसी 4:1

बात दोक दोक ईन्‍देकी ङा ख्‍योकोनला दोक खि सिन सिओ। प्रभु येशू ख्रीष्‍टकी खि साबाते काम खाबेकी ङाला जेलदु ज्‍याक्‍पा ओत। ङा ख्‍योकोनला चुक खि सिते सासीन ओर्च्‍ये, परमेश्‍वरगी खेराङला थे खोरोङ दोन्‍दु स्‍योक सिन कातोङजीन ख्‍योकोनगी चुक चुक खिता फाप्‍क्‍यो सिन साबा ओताने थोक थोकराङ खि।

एफिसी 6:20

ङा दि गा लाङच्‍येते बात लोपाला येशू ख्रीष्‍टकी ताङाते मि ईन्‍सीनोङ दुरू जेलदु देता फापा ओत। जे ईन्‍सीनोङ ङे दि बात छ्याःङ ज्‍यीबा मिक्‍किता खाला जस्‍तो खाला लोपा फाप्‍च्‍येते ईन थोकराङ खाला लोप्‍कीन देता थुप्‍स्‍यीत सिन प्रार्थना खिनराङ देत।

१ तिमोथी 4:1

थेमे था तिरी कोई कोई मिकी मिला छक्‍के खिताला ल्‍हन्‍डीक स्‍यिन्‍डीपकी जोबाते मेन्‍दा मेन्‍दे बात ङेन्‍ला खोपरोङगी येशू ख्रीष्‍टला विश्‍वास खित्‍जीन ङेन्‍दाते बात ङेन्‍दा तोङगो। दोक खिओ सिन परमेश्‍वर आत्‍मेकी लेमु खाईन साबा ओत।

२ तिमोथी 2:9

दि बात लापेकीराङ ङा दुक्‍पा भोगे खिन ओत। ङाला डाँकाला च्‍योक खाईन नेल कोन्‍गीन जेलदु समेत लुक्‍पा ओत। तर ङाला नेल कोन्‍ला जेलदु किल्‍ला ज्‍य्‌वाबाच्‍योक खाला परमेश्‍वर बात फैले मिक्‍किस्‍यीत सिनचेन जति खासीनोङ सुङगीङ छ्याःङ खिता मुथुबो।

हिब्रू 10:34

जेलला लुक्‍पाते मिओनला थुप थुपला ठेत्‍च्‍येते थेमे थेबे दुक्‍पाला ताच्‍येतेङ ख्‍योकोनगी खिनराङ ओतान। खेराङगी नोमुङ सिन्‍ला तोरला मोन्‍डोच्‍येते स्‍वर्गे सम्‍पत्ति ङेता ओत सिन छ्या ओतेकी खेराङ सम्‍पत्ति ठ्वाला खेरजीनोङ ख्‍योकोन सेम मेसेता खाईन देता ओतान।

हिब्रू 3:7

थोक ईन्‍देकी परमेश्‍वर आत्‍मेकी दोक दोक सिन साबाते बात ङुरूङगी ङेन्‍दा फाप्‍क्‍यो। थेकी चुक साला दुका सासीन “थरिङ परमेश्‍वरगी खेराङला च्‍यि सिका थे थोनामेई

१ पत्रुस 1:12

परमेश्‍वरगी खोपरोङला सिर च्‍युताते होदि बातओन थेबा खोपरोङ लाईदु मेन्‍देकी ख्‍योकोन लाईदु ईन सिन परमेश्‍वरगी थेबाला छ्या स्‍ये च्‍युता ओतान। थेबेकी साबाते होथे बाततेबा थरिङोला गा लाङच्‍येते बात लोप्‍कान्‍ते मिओनगी ख्‍योकोनला लाप्‍कीन बिन्‍दा ओत। दि गा लाङच्‍येते बात परमेश्‍वरगी स्‍वर्गनेकी ताङाते परमेश्‍वर आत्‍मे छ्य्‌वापेई थेबेकी ख्‍योकोनला लाप्‍कीन बिन्‍दा ओत। होदि बातओन परमेश्‍वर दूतओनगीङ आउदी खाला छ्या स्‍येबा सेम खिओ।