शक्ति काम 16:5 - जिरेल

⁵ थे बाततेबा थोनामेकी थे सार सारला ओताते येशू ख्रीष्‍ट मिओनगी स्‍येत थेप्‍कीन झन लेमु खाईन येशूला विश्‍वास खिताला स्‍यूसुङ। थोक खाईन थेबा झन ङीमे ठाङमा फेल्‍गीन ड्वाप्‍ला स्‍यूसुङ।

शक्ति काम 16:5 Iomraidhean Croise

शक्ति काम 11:21

थोक खाला बात लोपाला प्रभु येशूकी थेबाला आउदी खाईन आशी बिन्‍सुङ। थेमे थेरू मि काल्‍बेईकी प्रभु येशूला विश्‍वास खाईन थे छ्य्‌वापा लै खासुङ।

शक्ति काम 12:24

थे बेले नाङपाराङ झन मि काल्‍बेईकी परमेश्‍वर बात थोकीन थे बात ङेन्‍दाला स्‍यूसुङ।

शक्ति काम 15:41

दोक खाईन पावलचेन सिरियाताङ सिलिसिये नाङपा गाल्‍सुङ। थेमे थेङला सार सारला जम्‍मा ओङकान्‍ते येशू ख्रीष्‍ट मिओनला जस्‍तोराङ ओङसीनोङ ख्‍योकोनगी येशूला विश्‍वास खिन देता मातोङ सिन आँट तेरगीन ख्‍याम्‍सुङ।

शक्ति काम 2:47

थोक खाला छ्वाला रूला थेबाचेन जहिलेङ परमेश्‍वरते जय जय खिन ओतान। ज्‍येन ज्‍येनगीङ थेबाला लेमु मि ईन सिन मान खिन ओतान। थेमे प्रभु येशूकी थे खोरोङ छ्य्‌वापा लै खित्‍कान्‍ते मिओनला पापदुकी टाल्‍ला थे खोरोङला विश्‍वास खित्‍कान्‍ते मिओन ङीमे ठाङमा फेल ज्‍युत्‍कीन ओतान।

शक्ति काम 4:4

थेबाला थोक खासीनोङ थेबा ङिबोकी खाबाते बात थोकान्‍ते काल्‍बा च्‍योक मिकी थेबे बात ङेन्‍गीन येशूला विश्‍वास खिताला स्‍यूसुङ। थे छोमुसाकला येशूला विश्‍वास खित्‍कान्‍ते मि हजार ङाजो ख्‍योल्‍गीन सिन्‍दा ओतान।

शक्ति काम 5:14

खोले खोले होथेबे नाङदुईराङ ख्‍योओ मि, फेम्‍मे मि काल्‍बेईकी प्रभु येशूला विश्‍वास खिताला स्‍यूसुङ। थेमे थेबाङ येशूला विश्‍वास खित्‍कान्‍ते मिओनताङराङ डिगीन ख्‍याम्‍बाला स्‍यूसुङ।

शक्ति काम 6:7

थोक खाईन गाङे बात मिले खानामेई परमेश्‍वर बात झन गाङेपा फैले खिन गाल्‍गीन येशू चेलाओन यरूशलेमदु झन फेल्‍गीन गाल्‍सुङ। थोक खाला परमेश्‍वर बात ङेन्‍ला येशूला विश्‍वास खित्‍कान्‍तेबे नाङ पूजारीओनोङ काल्‍बेई ओतान।

शक्ति काम 9:31

थे तिरी यहूदिया, गालील थेमे सामरिये अञ्‍चल नाङला ठाउँ ठाउँला जम्‍मा ओङकान्‍ते येशू ख्रीष्‍ट मि गाङेला लेमु ओङसुङ। था थेबाला सुङगीङ दुक्‍पा तेरगीन मेतान। प्रभु येशूला मन परे मिक्‍किच्‍येते छ्याःङ खिता मेङगो सिन ज्‍यीबा खिन थेबेकी झन झन लेमु खाईन थेला विश्‍वास खिताला स्‍यूसुङ। परमेश्‍वर आत्‍मेकी थेबाला आँट बिन्‍सुङ। दोक खाईन थेबा झन झन फेल्‍गीन ड्वाप्‍ला स्‍यूसुङ।

रोमी 16:25

थेमे परमेश्‍वरगीराङ ख्‍योकोनला शक्ति तेरच्‍येते ईन्‍देकी ख्‍योकोनगी येशू ख्रीष्‍टला विश्‍वास खिन देता थुप्‍क्‍यो। परमेश्‍वरगी खित्‍सादु दोक खिन देता थुप्‍क्‍यो सिन येशू ख्रीष्‍ट सु ईन्‍दे, चुक्‍ते ईन्‍दे सिन ङे लोप्‍कीन ओताते गा लाङच्‍येते बातला साबा ओत। दि जुग शुरू ओङा भन्‍दा गोमामेईराङ परमेश्‍वरगी सुङलाङ छ्या स्‍ये च्‍युता मेताते दि गा लाङच्‍येते बात

१ कोरिन्‍थी 15:58

थोगी ङिङज्‍येते आज्‍यो न्‍वावे, जस्‍तो ओङसीनोङ प्रभु येशूला विश्‍वास खिन देत, मि बात ङेन्‍ला शंका माकेत। प्रभु येशूकी खेराङला जिम्‍मा बिन्‍दाते काम थुपासम्‍म स्‍येत खाला खि। च्‍यिला सासीन थेकी खेराङला खि साबाच्‍योक खाबाते थाराङ खेरोला डोच्‍येते मेन सिन ख्‍योकोनला छ्याराङ ओत।

गलाती 5:1

ख्रीष्‍टकी खाबाते कामगी खित्‍सादु ङुरूङगी परमेश्‍वर नियम अधीनला देता माफाबो। ङुरूङगी गोमाबा खिन ओताच्‍योक नोमुङ खिता माफाबो। बात थोक ईन्‍देकी था ख्‍योकोनगी खुरा मुथुप्‍च्‍येते खुर्बु खुरा छोलाच्‍योक खाला परमेश्‍वरगी यहूदीओनला बिन्‍दाते नियम ङेन्‍ला थेरू खि साबा साबा खिता माछोल।

कलस्‍सी 2:6

येशू ख्रीष्‍टराङ खेराङ मालिक ईन सिन ख्‍योकोनगी थेला विश्‍वास खिताला स्‍यूबा ओत। थोगी थेत्ताङ जीउज्‍यीकराङ ओङाते मिकी काम बात चुक खिता फाप्‍च्‍येते ईन्‍दे ख्‍योकोनगी थोकराङ खिन देत।

१ थिस्‍सलोनिकी 3:13

दोस्‍यिककामा मेन, था ङुरूङ प्रभु येशू थे खोरोङ मि गाङेताङ ग्‍युरला ओङे छोमु ङुरूङ आबा परमेश्‍वर दोन्‍दु ख्‍योकोन छ्याःङ गल्‍ती मेताते थेमे मेलेबाते काम सिराते छ्याःङ माक्‍याबाते मि ओङस्‍यीत सिन थेकी ख्‍योकोनला थे खोरोङला विश्‍वास खिन देताला आँट तेरस्‍यीत सिनोङ ङ्योकोन प्रार्थना खिओ।

१ थिस्‍सलोनिकी 3:2

ङुरूङ न्‍वा तिमोथीला ख्‍योकोन ओत्‍सापा ताङा ओतान। तिमोथीङ ङ्योकोनताङराङ परमेश्‍वर काम खिन मिओनला ख्रीष्‍टते गा लाङच्‍येते बात लोप्‍कान्‍ते मिराङ ईन सिन ख्‍योकोनला सिरा माफाप्‍तासीन। ज्‍येनगी दुक्‍पा तेरजीन ख्‍योकोन सुङगीङ प्रभु येशूला विश्‍वास खिता तोङा मेङगो, बरू जति दुक्‍पा ओङसीनोङ सेम मेसेता खाला थेला विश्‍वास खिनराङ देता फाप्‍क्‍यो सिन आँट तेराला ङ्योकोनगी तिमोथीला थेपा ताङा ओतान। प्रभु येशूला विश्‍वास खाबेकी खित्‍सादु ङुरूङगी दुक्‍पा भोगे खिता फाप्‍क्‍यो सिन ख्‍योकोनला लेमु खाला छ्याराङ ओत।

२ थिस्‍सलोनिकी 2:16

ङुरूङ आबा परमेश्‍वरगी ङुरूङला ङिङज्‍ये खाईन थे खोरोङ दयेकी जहिलेङ आँट तेरगीन देत्‍ला तिरी तेरग्‍यो सिन साबातेबा गाङे पक्‍काराङ ङेत्‍क्‍यो सिन आश खाला देत ज्‍युत्‍क्‍यो। दोक खित्‍कान्‍ते परमेश्‍वरताङ ङुरूङ प्रभु येशू ख्रीष्‍ट थे खोरोङगीराङ ख्‍योकोनला आँट बिन्‍ला ख्‍योकोनगी खिन ओताते लेमुते कामताङ बात गाङे खिनराङ देत ज्‍युत्‍स्‍यीत सिन ङ्योकोन प्रार्थना खिओ।

हिब्रू 13:9

बात दोक ईन्‍देकी परमेश्‍वर बात ईन सिन थे बातताङ डिकराङ मिडिक्‍च्‍येते खुदुक खुदुकते बात ङेन्‍ला छक्‍के माकेत। परमेश्‍वरगी दया खाबा ओतेकी खित्‍सादु होथोक्‍ते बातला नामज्‍योक मेसेता खाला छ्याःङ शंका मिक्‍किता खाला थेला विश्‍वास खिन देता लेमु ईन। दि सा ओङगो, थे सा मेङगो सिरच्‍येते नियम ङेन्‍ला सुङलाङ छ्याःङ फाइदा मेत।

१ पत्रुस 5:10

टिक्‍पी दिन ख्‍योकोनगी दोक्‍ते दुक्‍पा खपे खिता फाप्‍सीनोङ ख्रीष्‍टकी खाबाते कामगी खित्‍सादु खितासम्‍म दया खित्‍कान्‍ते परमेश्‍वरगी ख्‍योकोनला सधैँभरि लाईदु मान तेराला थे खोरोङ दोन्‍दु स्‍योक सिन काताङा ओत। थेकीराङ ख्‍योकोनला सेम सेता ओत्‍सादुई लोक्‍ला आँट तेरग्‍यो, जस्‍तो ओङजीनोङ मेलेबा खित्‍सादुई जोए खाला ज्‍य्‌वाक्‍यो थेमे ख्रीष्‍टला विश्‍वास खिन देताला शक्ति तेरग्‍यो।