शक्ति काम 15:4 - जिरेल

⁴ थेमे यरूशलेमपा लेप्‍कीन थेबेकी येशू ख्रीष्‍टकी खटे खाबाते मिओन, येशू ख्रीष्‍ट मिओन थेमे थेबाला ताकान्‍तेबाताङ ठेता खासुङ। यरूशलेमदु ओताते थेबा गाङेकी थोक खाईन वाबातेबा गाङेला लेमु खाईन खोपरोङताङ ज्‍याक्‍सुङ। थेमे पावलताङ बारनाबासबेकी ज्‍येन ज्‍येन जातकी मिला गा लाङच्‍येते बात लोप्‍जीन परमेश्‍वरगी खोपरोङला चुक चुक खित च्‍युत्‍सुङा सिन गाङे थेबाला लाःप्‍सुङ।

शक्ति काम 15:4 Iomraidhean Croise

मत्ती 10:40

थेमे ख्‍योकोनला लेमु खित्‍कान्‍ते मिकी ङालाराङ मान खाबाते ईन। ङाला मान खित्‍कान्‍तेकी ङाला दुरू तोङकान्‍तेलाङ मान खाबाते ईन।

शक्ति काम 11:30

थेमे थे पैसाबरी थेबेकी थेपा ओताते येशू ख्रीष्‍ट मिओनला ताकान्‍ते मिओन लाःक्‍तु बिन सिन बारनाबासताङ शावल लाःक्‍तु बिन्‍गीन ताङसुङ।

शक्ति काम 14:27

थेपा लेप्‍नामेकी येशू ख्रीष्‍ट मि गाङेला जम्‍मा खाईन थेबा ङिबोकी परमेश्‍वरगी खोपरोङला चुक चुक खित च्‍युत्‍सुङा थेमे ज्‍येन ज्‍येन जातकी मिलाङ थेकी चुक खाईन येशूला विश्‍वास खित्‍च्‍येते मौका बिन्‍सुङा सिन गाङे बात लाःप्‍सुङ।

शक्ति काम 15:12

थेकी थोक सानामेकी थेरू मि गाङेराङ खाराक्‍पा देत्‍सुङ। थेमे पावलताङ बारनाबासकी ज्‍येन ज्‍येन जातकी मिला गा लाङच्‍येते बात लोप्‍जीन परमेश्‍वरगी खोपरोङ ङिबोला चुक छ्ये छ्येताङ अचम्‍बतेन्‍दे काम खित च्‍युत्‍सुङा सिन लाःप्‍जीन थेरू थेबाबरी गाङेकी लेमु खाईन ङेन्‍सुङ।

शक्ति काम 15:2

थेबेकी ज्‍येन ज्‍येन जातकी मिकीङ खतकी चिनु ज्‍वापराङ फाप्‍क्‍यो सिरजीन पावलताङ बारनाबासकीचेन पापदुकी ठालाला थेबेकी थे चिनु ज्‍वाराङ माफाबो सिन थेबाताङ आदोराङ टेकाटेउरी खासुङ। थोक खाईन जति बात खासीनोङ थेबे नाङ बात माडिक्‍पेकी थेरू येशू ख्रीष्‍ट मिओनगी “लो था ङुरूङगी दोक खिइ। च्‍यि सासीन पावलताङ बारनाबास थेमे ङुरूङ नाङदुई कोई कोईला यरूशलेमपा तोङगी। थेबेकी थेपा गाल्‍ला येशू ख्रीष्‍टकी खटे खाबाते मिओन थेमे थेरू येशू ख्रीष्‍ट मिओनला ताकान्‍तेबाला ठेत्‍ला दि बात खित्‍स्‍यीत। थेमे थेबेकी चुक खि सिका थोकराङ खिताप,” सिन सल्‍लाह खासुङ।

शक्ति काम 15:22

याकूबकी थोक सानामेकी थेरू येशू ख्रीष्‍टकी खटे खाबाते मिओन, येशू ख्रीष्‍ट मिओनला ताकान्‍तेबा थेमे येशू ख्रीष्‍ट मि गाङेकी थे बात ङेन्‍गीन “लो था ङुरूङगी ङुरूङ नाङदुई कोई कोईला छाने खाला च्‍याला पावल थेमे बारनाबासताङराङ एन्‍टिओखियापा तोङगी,” सिन सल्‍लाह खासुङ। थेमे खोपरोङ नाङदुई बारसाबास सिराते यहूदाताङ सिलासला छाने खासुङ। थेबा ङिबोचेन थेरू खोपरोङ नाङ छ्येते मि ओतान।

शक्ति काम 15:3

सल्‍लाह खानामेकी थेबेकी पावलताङ बारनाबास थेमे खोपरोङ नाङदुई कोई कोईला यरूशलेमपा ताङसुङ। थेपा डोजीन थेबेकी फोनिसियाताङ सामरिये नाङला ओताते आज्‍यो न्‍वाओनला ज्‍येन ज्‍येन जातकी मिङ चुक खाईन प्रभु येशू छ्य्‌वापा लै खासुङा सिरच्‍येते गाङे बात लाःप्‍कीन गाल्‍सुङ। थे बात थोजीन थेबाङ आउदी खाईन गा खासुङ।

शक्ति काम 15:6

थेबेकी थोक सानामेकी येशू ख्रीष्‍टकी खटे खाबाते मिओन थेमे येशू ख्रीष्‍ट मिओनला ताकान्‍तेबा गाङेराङ रूकीन था दि बातला चुक खित्‍च्‍ये सिन छलफल खिताला स्‍यूसुङ।

शक्ति काम 16:4

थेरूई पावलबा सार सारला युगीन गाल्‍सुङ। थोक खाला युगीन डोजीन थेबेकी थे सार सारगी येशू ख्रीष्‍ट मिओनलाङ यरूशलेमदु ओताते येशू ख्रीष्‍टकी खटे खाबाते मिओन थेमे येशू ख्रीष्‍ट मिओनला ताकान्‍तेबेकी ताङाते चिट्ठी बात खाईन थेरू टिबाते बात ङेन सिन गाल्‍सुङ।

शक्ति काम 18:27

तिरी अपोल्‍लोसकी अखैये लुङबापा डोच्‍येते बात खित्‍जीन एफिससदु ओताते आज्‍यो न्‍वाओनगीङ थेला थेपा गाल्‍सीन लेमु ईन सिन साकीन च्‍याकीन अखैयादु ओताते येशू चेलाओनला थेला थेपा वानामेकी लेमु खि सिन चिट्ठीज्‍यीक टिकीन बिन्‍गीन ताङसुङ। थेपा लेप्‍नामेकी थेकी परमेश्‍वर दयेकी खित्‍सादु थेरू येशूला विश्‍वास खिताला स्‍यूबाते थेबा गाङेला आउदी मद्धत खासुङ।

शक्ति काम 21:17

यरूशलेमदु लेप्‍कीन थेरू आज्‍यो न्‍वाओनला ठेत्‍नामेई थेबेकी ङ्योकोनला आउदी लेमु खासुङ।

शक्ति काम 21:19

थेबा गाङेला ठेत्‍नामेई पावलगी थे खोरोङगी येशू बात लोप्‍जीन थे छ्य्‌वापेई परमेश्‍वरगी ज्‍येन ज्‍येन जातकी मिला चुक लेमु खासुङा सिन बातज्‍यीगोङ बाँकी मोज्‍योबा खाईन लाःप्‍सुङ।

रोमी 15:18

ङे लापाते बात ङेन्‍गीन ज्‍येन ज्‍येन जातकी मिकी परमेश्‍वरगी खि साबाते ङेन्‍दाला स्‍यूसुङ। ङाराङगी स्‍याप स्‍याप खाईन खाबाते कामगी खित्‍सादुका थेबेकी दोक खिताला स्‍यूबाते ईन सिनचेन ङा नोउ छ्ये मिक्‍किओ। च्‍यिला सासीन ङे थेबे नाङ खाबाते कामताङ बात गाङे ख्रीष्‍टकी शक्ति छ्य्‌वापेकी खाबाते ईन।

रोमी 15:7

थोगी था ङा ख्‍योकोन गाङेला च्‍यि सिते सासीन ख्रीष्‍टकी खेराङला लेमु खाबा च्‍योकराङ ख्‍योकोनगीङ खेराङ नाङ ङा दोक्‍तेताङ खो थोक्‍ते सिन मिसिरा खाला दोक्‍पोईकी ज्‍येनज्‍यीकला लेमु खि। दोक खित्‍च्‍येतेचेन परमेश्‍वरला मान खाबाते ईन।

१ कोरिन्‍थी 15:10

ङे थोक मेलेबा खाबा ईन्‍सीनोङ परमेश्‍वरगी ङाला दया खाईन ज्‍येनला येशू ख्रीष्‍ट बात लोप्‍कान्‍ते मि जोसुङ। परमेश्‍वरगी ङाला दया खाबाते थाराङ खेरो मागाल्‍सुङ। ङेचेन ङाराङ च्‍योकराङ येशू ख्रीष्‍टकी खटे खाबाते मि गाङेकी भन्‍दा दुक्‍पा खाईन खाईन ल्‍हाक्‍पा काम खाबा ओत। ईन्‍सीनोङ ङे खाबाते काम ङाराङ स्‍येतताङ बुद्धिकी खाबाते मेन। दि गाङे परमेश्‍वर दयेकी खित्‍सादु खिता थुपाते ईन।

२ कोरिन्‍थी 5:19

च्‍यि सासीन ख्रीष्‍टकी खाबाते कामगी खित्‍सादु परमेश्‍वरगी दि सा लुङबे मिओनला थेबेकी खाबाते मेलेबाते कामताङ बातकीते छ्याःङ हर हिसाब मिलिन्‍दा खाईन थे खोरोङताङ डिक्‍पा खित्‍च्‍येते काम खासुङ। थेमे मिओनला थे खोरोङताङ डिक ज्‍युत्‍क्‍यो सिरच्‍येते बात ज्‍येनला लोप्‍च्‍येते कामगी जिम्‍मा थेकी ङ्योकोनला बिन्‍सुङ।

२ कोरिन्‍थी 6:1

ङेराङ परमेश्‍वरताङ डिक्‍ला काम खित्‍कान ईन्‍देकी ङ्योकोन ख्‍योकोनला दोक सिनोङ सिओ। च्‍यि सासीन ख्रीष्‍टकी खित्‍सादु परमेश्‍वरगी खेराङला दया खाबाते थाराङ खेरो मोन्‍डोस्‍यीत सिन ओर्च्‍ये ख्‍योकोनगी थेला मन परे खित्‍च्‍येते काम खि।

कलस्‍सी 4:10

दुरू ङात्ताङराङ जेलदु ओताते अरिस्‍तार्खसते ख्‍योकोनला नमस्‍ते ओत्‍लो। थेमे बारनाबास न्‍वा फाप्‍च्‍येते मर्कूसतेङ नमस्‍ते ओत्‍लो। मर्कूसला च्‍यि सिसे थेमे थेला चुक खिता फाप्‍कीते सिन ङे ख्‍योकोनला गोमाकाराङ साकीन सिन्‍दा ओत। था थे ख्‍योकोन ओत्‍सापा वासीन थेला लेमु खि।

२ यूहन्‍ना 1:10

सुइँदेकी वाला ख्रीष्‍टकी लापाते भन्‍दा खइँदा ल्‍हाक्‍पा बात लोपा छोल्‍गीदुक सासीन थोक्‍ते मि जो ईन्‍सीनोङ थेला स्‍यासा मातेर, थेत्ताङ बातज्‍यीगोङ माकेत।