शक्ति काम 1:14 - जिरेल

¹⁴ थेबाताङ थेरू गोमा येशूताङ ख्‍याम्‍कान्‍ते फेम्‍मे मिओन, येशू आमा मरियम थेमे येशू न्‍वातेबाङ ओतान। थेबाबरी गाङेराङ ङ्योम्‍बुराङ परमेश्‍वरला प्रार्थना खिन देत्‍कीन ओतान।

शक्ति काम 1:14 Iomraidhean Croise

मत्ती 12:46

येशू थोक खाला मिओनताङ बात खिन ओते बेलालाराङ थेते आमातेताङ न्‍वातेबा थेला ठेताला थेरू ख्‍योल्‍सुङ। थेमे फिनामाराङ देत्‍कीन थेबेकी थेला फिनामा स्‍योक सि सिन कातोङ ताङसुङ।

मत्ती 21:22

ख्‍योकोनगी प्रार्थना खित्‍जीन परमेश्‍वरताङ नाङ खाबाते पक्‍काराङ ङेत्‍क्‍यो सिन छ्याःङ शंका माक्‍यासुङ सासीन जे नाङ खासीनोङ थे नाङ खाबाते ङेत्‍क्‍यो ङेत्‍क्‍यो,” सिन सिदुक।

मत्ती 27:55

थेरू फेम्‍मे मितेबाङ काल्‍बेई येशूला च्‍यि च्‍यि ओङच्‍या ईन्‍दाका सिन आदो थारीलाराङ देत्‍ला तेइन ओतान। थेबाचेन गालील अञ्‍चल नाङपेकीराङ येशूला गोच्‍येते मद्धत तेरगीन थेत्ताङराङ वाबा ओतान।

मर्कूस 15:40

थेरू फेम्‍मे मिओनोङ येशूला च्‍यि च्‍यि ओङच्‍या ईन्‍दाका सिन आदो थारीलाराङ देत्‍ला तेइन ओतान। थेबे नाङ मरियम मग्‍दलिनी, कान्‍छाते याकूबताङ योसे आमा मरियम थेमे सलोमी ओतान।

मर्कूस 16:1

सन्‍चारी छोमु काम खिता मेङच्‍येते बेला सिन्‍गीन नाम स्‍योनामेई मरियम मग्‍दलिनी, याकूब आमा मरियमताङ सलोमी येशू रोला कुताला आउदी स्‍यीम्‍बुई बास्‍ना चले खित्‍च्‍येते पाउडर ङ्योर गाल्‍सुङ।

लूका 11:13

ख्‍योकोन पापी मिकीनी खेराङ फिजाओनला जे तेरा फाप्‍च्‍येते ईन थेराङ तेरगीदुक सासीन स्‍वर्गने देत्‍कान्‍ते ख्‍योकोन आबा परमेश्‍वरगी झन च्‍यिला मेतेरतेरो? परमेश्‍वर आत्‍मा नाङ सिरकान्‍तेबाला थेकी गा खिन तेरग्‍यो,” सिन सिदुक।

लूका 18:1

थेमे चेलातेबेकी सेम मेसेता खाला परमेश्‍वरला प्रार्थना खिनराङ देत्‍स्‍यीत सिन येशूकी दोक सिन थेबाला कथा लाःपाला स्‍यूसुङ।

लूका 23:49

थेमे गालीलपेकी येशूताङ ङ्योम्‍बुराङ वाबाते फेम्‍मे मिओन थेमे ज्‍येनोङ थेला लेमु खाला ङो स्‍येकान्‍ते मिओनचेन थेला च्‍यि च्‍यि ओङच्‍या ईन्‍दाका सिन आदो थारीला देत्‍ला तेइन ओतान।

लूका 23:55

गालीलपेकी येशूताङ ङ्योम्‍बु वाबाते फेम्‍मे मिओनगीङ यूसुफताङ गाल्‍गीन येशू रो फुकदु ज्‍याक्‍पाते थोङा ओतान।

लूका 24:10

दि बातओनचेन मरियम मग्‍दलिनी, योअन्‍ना, याकूब आमा मरियम थेमे थेबाताङ ओताते ज्‍येन फेम्‍मे मि गाङेकी येशू ख्रीष्‍टकी खटे खाबाते चेलाओनला लाःपा ओतान।

लूका 24:33

थेमे थेबा ङिबो जराक जुरूक लाकीन नुपलाराङ थेरूकी यरूशलेमपा ग्‍युरगीन गाल्‍सुङ। थेरू लेप्‍जीन येशू चेला च्‍युच्‍यीक थेमे थेबाताङ ख्‍याम्‍कान्‍ते मि गाङेराङ खाम्‍बाज्‍यीक्‍तु जम्‍मा ओङगीन देता ओतान।

लूका 24:53

थेरू थेबाबरी परमेश्‍वर मन्‍दिरदु गाल्‍ला परमेश्‍वरते जय जय खिन देत्‍कीन ओतान।

लूका 8:20

थेमे मिज्‍यीगी थेला “ए गुरू, खुईते आमाताङ न्‍वाओन खोल्‍ला ठेता खित्‍च्‍या सिन फिनामा गुकीन देत्‍ला दुक,” सिन सिदुक।

शक्ति काम 2:1

पेन्‍तिकोस छोमुङ येशूला विश्‍वास खित्‍कान्‍तेबा गाङेराङ ठाउँज्‍यीकराङ रूकीन देता ओतान।

शक्ति काम 2:42

येशूला विश्‍वास खित्‍कान्‍तेबेकी येशू ख्रीष्‍टकी खटे खाबाते मिओनगी लापाते बातओन लेमु खाला ङेन्‍गीन ओतान। थेबा ङ्योम्‍बुराङ डिक्‍ला देत्‍च्‍येते, प्रभु भोज साच्‍येते थेमे परमेश्‍वरला प्रार्थना खित्‍च्‍येते खिन ओतान।

शक्ति काम 2:46

थेबा ङीमे ठाङमा परमेश्‍वर मन्‍दिरदु जम्‍मा ओङला ङ्योम्‍बुराङ परमेश्‍वरला प्रार्थना खिन ओतान। थेबेकी दोक्‍पोईकी ज्‍येनज्‍यीकला ईख इबी खुरगीन मेतान। बरू खाम्‍बा खाम्‍बाला रूला प्रभु भोज साच्‍येते थेमे गा खिन ङ्योम्‍बुराङ साप साच्‍येते खिन ओतान।

शक्ति काम 6:4

ङ्योकोन ङेराङचेन खालि प्रार्थना खित्‍च्‍येते थेमे परमेश्‍वर बात लोप्‍च्‍येते कामकामा खिओ,” सिन बात खासुङ।

रोमी 12:12

थेमे परमेश्‍वरगी ख्‍योकोनगी आश खाईन देता च्‍योकराङ खित्‍च्‍येते ईन्‍देकी ख्‍योकोन गा खिन गुला देत। ज्‍येनगी दुक्‍पा तेरजीन थेमे आपत् विपत् आइ परे खित्‍जीन सेम मेसेता खाला देत। परमेश्‍वरताङ प्रार्थना खिन देता नोमुङ मातोङ।

१ कोरिन्‍थी 14:13

बात दोक ईन्‍देकी दाक्‍पोनगी छ्या मास्‍येबाते खुदुक खुदुकते भाषाला बात खित्‍कान्‍ते मिकी थे खोरोङगी खाबाते थे बातकी अर्थ खोले खाला ज्‍येनला लाःपा थुप्‍च्‍येते शक्तिङ ङेत्‍स्‍यीत सिन परमेश्‍वरताङ प्रार्थना खि।

एफिसी 6:18

दोक दोक खित्‍जीन परमेश्‍वरताङ प्रार्थना खिनराङ देत। परमेश्‍वर आत्‍मे छ्य्‌वापेकी जहिलेङ थेत्ताङ प्रार्थना खिन देत्‍ला खेराङला च्‍यि च्‍यि गोकीका नाङ सि। थोक खाला प्रार्थना खित्‍जीन खेराङ परमेश्‍वरताङ बात खिन ओत सिन छ्या स्‍येबा खि। प्रार्थना खित्‍जीन परमेश्‍वर सन्‍तान गाङे लाईदु प्रार्थना खिताङ नोमुङ मातोङ।

कलस्‍सी 4:2

थेमे ख्‍योकोन गाङेकी परमेश्‍वरला प्रार्थना खिन देता नोमुङ मातोङ। प्रार्थना खित्‍जीन खेराङ परमेश्‍वरताङ बात खिन ओत सिन छ्या स्‍येबा खि, थेला धन्‍यवादोङ बिन।