२ तिमोथी 3:8 - जिरेल

⁸ होथोक्‍ते फेम्‍मे मिओनला लुला खोपरोङ छ्य्‌वापा लै खित ज्‍युत्‍कान्‍ते मिओनचेन यान्‍नेसताङ याम्‍ब्रेस च्‍योक्‍तेबा ईन। थाङबो होथेबा ङिबोकी मोशे बात माङेन्‍दा च्‍योकराङ होदिबेकीङ सत्‍यते बात मेङेनो। थेबा सेम लेमु ओताते मि मेन। थेबेकी खोपरोङ येशूला विश्‍वास खित्‍कान्‍ते मि ईन सासीनोङ परमेश्‍वरगी थेबा थोक्‍ते मि मेन सिओ।

२ तिमोथी 3:8 Iomraidhean Croise

शक्ति काम 15:24

बात च्‍यि सासीन ङ्योकोन नाङदुई कोई कोई मि ख्‍योकोन ओत्‍सादु गाल्‍गीन दोक खिता फाप्‍क्‍यो, थोक खिता फाप्‍क्‍यो सिन साकीन ख्‍योकोनला अलमल्‍ल लाङगीन आउदी खाईन दुक्‍पा बिन्‍दुक्‍लो सिन ङ्योकोनगी थोसुङ। थेबाला ङ्योकोनगी ताङाते मेन।

रोमी 1:28

दोस्‍यिककामा मेन, थेबेकी परमेश्‍वरगी साबाते च्‍यिला ङेन्‍च्‍येरो सिन थेला छ्याःङ वास्‍ता माक्‍याबेकी थेकी थेबाला खोपरोङ सेमला लाबा लाबा खिता मेङच्‍येते कामराङ खित्‍स्‍यीत सिन ताङसुङ।

रोमी 16:18

थोक्‍ते मिओनगीचेन प्रभु ख्रीष्‍टला माने खिते साटोला खालि साच्‍या थुङच्‍ये बातताङ खोपरोङला जे जे खिता सेम लाङगीदुक थे थेराङ खिओ। थेबेकीनी स्‍यीम्‍बु स्‍यीम्‍बु बात खाला खोलु खिन साधा सुधोते मिओनला डिकस्‍यिकला ङ्योल्‍च्‍येते कामकामा खिओ।

एफिसी 4:14

दोक ओङनामेकीचेन ङुरूङ पाको गाला मेताते मिकी च्‍योक मिक्‍किओ। पाको गाला मेताते मिकीचेन परमेश्‍वर बात ईन सिन सुइँदेकी मेन्‍दे बात लाप्‍सीन थे ङेन्‍ग्‍यो। लोक्‍ला ज्‍येनज्‍यीगी होथोक्‍ते ज्‍येनराङ बात लाप्‍सीन थेङ ङेन्‍ग्‍यो। होथोक्‍ते बात लोप्‍कान्‍ते मिओन ज्‍येनला छक्‍के खिताला आउदी च्‍याङबो ओङगो। थेबेकी चुक खाला ओङगीका पाको गाला मेताते मिओन मिकला छारो ग्‍याप्‍ला खोपरोङ लाःक्‍तु लिन्‍ग्‍यो।

१ तिमोथी 1:19

प्रभु येशू ख्रीष्‍टला विश्‍वास खिन ङेन्‍दाते बात ङेन्‍गीन देता मातोङ। थेमे थोरूमसाक खिन ओता च्‍योकराङ खाला दाक्‍पोनला ङे दोक खिता ठीक मेन सिराच्‍योक लाबाते काम छ्याःङ माकेत। कोई कोईकी होथोक मिक्‍किता खाईन प्रभु येशू ख्रीष्‍टला विश्‍वास खिता ताङेकी थेबाला छ्येज्‍यीक हानी ओङा ओत।

१ तिमोथी 4:2

ढाँर खित्‍कान्‍तेबेकी होथे ल्‍हन्‍डीक स्‍यिन्‍डीपकी जोबाते मेन्‍दा मेन्‍दे बात लेमु बात ईन सिन ज्‍येनला लोप्‍क्‍यो। थोक्‍ते मि सेमचेन स्‍यिङ दो च्‍योकराङ स्‍येन्‍दे गाला ओतेकी खोपरोङगी थोक मेलेबा बात लोप्‍जीनोङ छ्याःङ च्‍योक मालाङो।

१ तिमोथी 6:5

थेमे जहिलेङ थोम्‍मुकामा खिन देत्‍च्‍येते ओङगो। थेबे सेम मेलेबा ओतेकी सत्‍यते बात थेबाला छ्याःङ काम लै मिक्‍किओ। थेबेकी परमेश्‍वरला माने खित्‍च्‍येतेचेन सम्‍पत्ति ज्‍वा थुप्‍क्‍यो सिनकामा ईन।

२ तिमोथी 4:15

अलेक्‍जेन्‍डरगीचेन ङुरूङगी लोप्‍च्‍येते गा लाङच्‍येते बात ईनराङ मेन्‍दे बात ईन सिन आउदी खाईन विरोध खासुङ। थोगी खोरोङोङ थेत्ताङ च्‍याङबो खाला देत।

तीतस 1:10

थरिङोला थेपा थोक खाला ङेन्‍दा फाप्‍च्‍येते बातताङ मिडिक्‍च्‍येते बात लोप्‍कान्‍ते मि काल्‍बेई दुक। थेबेकी सुङगीङ बात मेङेन्‍दा खाला खालि छ्याःङ काम लै मिक्‍किच्‍येते बातओन लाप्‍ला येशूला विश्‍वास खित्‍कान्‍ते मिओनला छक्‍के खिओ। दोक खित्‍कान्‍तेबा काल्‍बा च्‍योक्‍ते जीउला खतकी चिनु जोकान्‍ते यहूदीराङ ईन।

तीतस 1:16

खोपरोङ होथोक्‍ते मि ईन्‍सीनोङ थेबेकीचेन परमेश्‍वर सु ईन्‍दे, चुक्‍ते ईन्‍दे सिन ङ्योकोनला लेमु खाला छ्या ओत सिन सिओ। थेबे काम ताला थेबा परमेश्‍वरला माने खित्‍कान्‍ते मि मेन सिन दाक छ्या स्‍येक्‍यो। थेबाला थोङजीन परमेश्‍वरला गा मालाङो, थेबेकी परमेश्‍वरगी साबाते ङेनराङ मेङेनो थेमे लेमु काम सिराते छ्याःङ खिताराङ मुथुबो।

२ पत्रुस 2:14

थेबाचेन थोङाते जति फेम्‍मे मित्ताङ ङ्यालाकामा छोल्‍ग्‍यो। थोक्‍ते काम खाला थेबा नोमुङ माडाओ। सेम ङि ओताते मिओनला खोपरोङ छ्य्‌वापा लै खित ज्‍युताला थेबा च्‍योक सिपालु ज्‍येन सुङ मेङगो। जहिलेङ सम्‍पत्ति लोभकामा खिन खापेकी चुक खाला सम्‍पत्ति ज्‍वा थुप्‍कीते सिन थेबेकी लेमु खाईन छ्या स्‍येबा ओङगो। थेबाला परमेश्‍वर सराप फाप्‍क्‍यो।

१ यूहन्‍ना 2:18

फिजावे, दि जुग सिन्‍दे बेला लेप्‍सुङ। दि जुग सिन्‍दे खाला ख्रीष्‍टला विरोध खित्‍कान्‍ते मि ओङगो सिन ख्‍योकोनगी थोबाराङ ओत। थरिङोला थोक्‍ते मि काल्‍बेई थेन्‍गीन सिन्‍दा ओत। थोगी ङुरूङगी दि जुग सिन्‍दे बेला लेपाक्‍वा सिन लेमु खाला छ्या स्‍येक्‍यो।

१ यूहन्‍ना 4:1

ङिङज्‍येते फिजावे, सुइँदेकी ङाला दि बात परमेश्‍वर आत्‍मेकी सिर च्‍युताते ईन सिन सिरजीनमेईराङ थोक्‍ते मि गाङे बात पत्ते माकेत। बरू थेबेकी साबाते बात परमेश्‍वर आत्‍मेकी सिर च्‍युताते ईन्‍दाकाना मेन्‍दाका सिन लेमु खाला छ्या स्‍येबा खि। च्‍यिला सासीन परमेश्‍वर बात खित्‍कान्‍ते मि ईन सिन मेन्‍दे बात लोप्‍कान्‍ते मिओन सा लुङबा खाङ ठाम्‍गीन सिन्‍दा ओत।

छ्या स्‍ये च्‍युताते बात 2:20

दोक ईन्‍सीनोङ ङे ख्‍योकोनला सिरा फाप्‍च्‍येते बातज्‍यीक ओत। चुक सासीन ख्‍योकोनगी जिजेबेलगी साबाते बात ङेन्‍गीदुक। थेकी थे मोरोङला परमेश्‍वर बात खित्‍कान्‍ते फेम्‍मे मि ईन साला ङे काम खित्‍कान ख्‍योकोनला मेन्‍दा मेन्‍दा बात लाप्‍ला रन्‍डीबाजी थेमे होदि च्‍योक्‍ते खिता मेङच्‍येते काम खित च्‍युत्‍ला थेमे ल्‍हाला पूजा खाबाते सार च्‍युत्‍ला लुइदुक।

छ्या स्‍ये च्‍युताते बात 2:6

बातज्‍यीकचेन ख्‍योकोनगी लेमु खाला दुक। निकोलाइटन सिराते पाटी मिओनगी खित्‍च्‍येते कामचेन ङाला च्‍योकराङ ख्‍योकोनलाङ बान्‍दा गा मालाङदुक।