२ तिमोथी 3:2 - जिरेल

² थेजीन मिओनगी खालि दाक्‍पोन विचारकामा खिओ, गाङेराङ पैसे लोभलाकामा स्‍यूइओ। थेबेकी ङा ङाराङ ईन सिन धाक लै खिओ थेमे छ्ये खिओ। थेजीन मिओनगी मेन्‍दे बातला ज्‍येनला दोष लै खिओ, आबा आमेकी लाःपा कोताते मेङेनो, खोपरोङला लेमु खित्‍कानला लेमु खासुङ सिराच्‍योक मिक्‍किओ थेमे परमेश्‍वरला मन परे मिक्‍किच्‍येते कामकामा खिओ।

२ तिमोथी 3:2 Iomraidhean Croise

मत्ती 15:6

दोक खाला ख्‍योकोनगी मिओनला दाक्‍पोन आबा आमाला बुढेसकालला मातासीनोङ ओङगो सिराच्‍योक खिदुक। खेराङगी जोबाते रीतिथिति माने खित्‍सादु ख्‍योकोनगी होदोक खाईन परमेश्‍वर नियम ङेन्‍दा ताङला दुक।

लूका 12:15

थेमे थेकी थेरू ओताते मि गाङेला “ख्‍योकोन च्‍याङबो खि। ख्‍योकोनगी लोभ सिराते छ्याःङलाङ माकेत। सम्‍पत्ति थुप्रो ओत्‍जीनमेईराङ मिकी लेमु खाला जुनीकाल्‍बा क्‍योङा थुप्‍च्‍येते मेन,” सिन सासुङ।

लूका 16:14

फरिसी पाटी मिओन सम्‍पत्ति लोभ खिन ओतान। थोगी येशूकी चेलातेबाला साबाते सम्‍पत्ति बात थोकीन थेबेकी दिकी चुक मेङच्‍याई बात खासुङा सिन सिराला स्‍यूसुङ।

लूका 6:35

ख्‍योकोनगीचेन खेराङ शत्रुओनलाङ ङिङज्‍ये खि, थेबाला लेमु खि। सुइँदाला खइँदा किन्‍जीन किम्‍बाराङ लिन्‍दाप सिन मातेर। ङे खि साबा च्‍योकराङ खासीन गाङे भन्‍दा छ्येते परमेश्‍वरगी ख्‍योकोनला तिरी छ्येज्‍यीक मान तेरग्‍यो। थेमे ख्‍योकोनला थे फुज्‍युङ फुमु ईन सिरा सोई खिओ। च्‍यिला सासीन परमेश्‍वरगी बैगुनीताङ मेलेबा काम खित्‍कान्‍ते मिओनलाङ ङिङज्‍ये खिओ।

शक्ति काम 5:36

गोमा गोमा ओङाते बादोङ ख्‍योकोनगी ठेम्‍बा खि। च्‍यि सासीन गोमा बाजिई थूदास सिरातेकी ङा ङाराङ ईन सिराच्‍योक खाईन मिओनला थे खोरोङ छ्य्‌वापा लै खित च्‍युता ओतान। झन्‍दै मेन्‍दा सय स्‍यीजो मि थेत्ताङ डिगीन ख्‍याम्‍बा ओतान। तर तिरी थेला सेत्‍नामेकी थेत्ताङ ख्‍याम्‍कान्‍ते मिओन जहाँसुकै छरपुट्ट गाल्‍गीन थाराङ तोरगीन गाला ओतान।

रोमी 11:18

दोक ईन्‍सीनोङ ख्‍योकोन छ्ये खिन थे दुम्‍गीन क्‍युराते हाँगाओन साबाते इस्राएलीओनला हेला माकेत। ख्‍योकोन छ्येराङ खिओ सासीन दि बात टोक माज्‍येत। च्‍यि सासीन ख्‍योकोननी हाँगा च्‍योक्‍तेकामा ईन। हाँगेकी खित्‍सादु चाप्रेन रोम्‍बो ओङच्‍येते मेन, चाप्रेनगी खित्‍सादुका हाँगाओन रोम्‍बो ओङच्‍येते ईन।

२ कोरिन्‍थी 5:15

मि गाङे लाईदु थे स्‍याप्‍ते ईन्‍देकी नोमुङ मिसिन्‍च्‍येते जुनी ङेताते मिओनगी था दाक्‍पोन खुशी खिता मेङगो। बरू थे थोक खाईन खोपरोङ लाईदु स्‍या ओतान थेमे परमेश्‍वरगी थेला सोम्‍बो लोक्‍पा ओतान सिन टोक मेज्‍येता खाला थेला मन परे खित्‍च्‍येते काम खिता फाप्‍क्‍यो।

फिलिप्‍पी 2:21

ज्‍येनतेबाचेन येशू ख्रीष्‍ट काम खिताला मेन, खालि खोपरोङला फाइदा ओङच्‍ये छ्य्‌वापाकामा तेइदुक।

कलस्‍सी 3:5

थोगी था ख्‍योकोनगी दाक्‍पोन खुशी खिन दाक्‍पोनला च्‍यि च्‍यि खिता सेम लाङगीका थोकराङ खिन देता थोङ। च्‍यि सासीन रन्‍डीबाजी थेमे होदि च्‍योक्‍ते खिता मेङच्‍येते ङोचा लाङच्‍येते काम माकेत, होदोक्‍ते काम माक्‍याबाला ओङराङ मेङगो सिराच्‍योक माकेत, लोभ माकेत, लोभ खित्‍च्‍येतेनी परमेश्‍वर लाईदु ल्‍हा लु माने खाबा छेतराङ मेलेबा ईन।

२ थिस्‍सलोनिकी 2:4

परमेश्‍वर छ्येते शत्रुचेन होथे मिराङ ओङगो। था थेकी वाला चुक खिते सासीन गाङे भन्‍दा छ्येते थे खोरोङराङ ईन्‍दाच्‍योक खाला परमेश्‍वरला थेमे मिओनगी ल्‍हा लु सिन माने खिन वाबाते सुङलाङ थेमे छ्याःङलाङ माने खिता मेङगो सिन सिओ। दोस्‍यिककामा मेन, परमेश्‍वर मन्‍दिर नाङ स्‍यूला थेकी गाङेला थे खोरोङराङ परमेश्‍वर ईन साला थेरूराङ देत्‍क्‍यो।

१ तिमोथी 1:20

थेबे नाङ हाइमेनियसताङ अलेक्‍जेन्‍डरोङ फाप्‍क्‍यो। प्रभु येशू ख्रीष्‍टला विरोध खिता मेङच्‍याक्‍वा सिन छ्या स्‍येस्‍यीत सिन ङे थेबा ङिकारला शैतान लाःक्‍तु सोम्‍पे खाबा ओत।

१ तिमोथी 1:9

परमेश्‍वर नियमचेन थे नियमला खि साबा साबाच्‍योक खित्‍कान्‍ते मिओन लाईदु जोबाते मेन सिनोङ ङुरूङला छ्या ओत। थे नियम चुक्‍ते मिओन लाईदु जोबाते ईन्‍दे सासीन नियम कानून मेङेन्‍कान्‍तेताङ मनपरी खाला ख्‍याम्‍कान्‍ते मिओन, परमेश्‍वरला मान मिक्‍किकान्‍तेताङ पापीओन, परमेश्‍वरला मन परे मिक्‍किच्‍येते काम खित्‍कानताङ परमेश्‍वर ओतराङ मेत सिन थे विरोध खित्‍कान्‍ते मिओन लाईदु जोबाते ईन। थोक्‍ते मिओन लाईदुकामा मेन, दाक्‍पोन आबा आमाला थेमे ज्‍येन मिओनला सेत्‍कान्‍ते मिओन,

१ तिमोथी 3:3

थे छ्याङ रक्‍सी काल्‍बा मुथुङकानज्‍यीक, मिला लाःक मोतोङकानज्‍यीक, गाङेताङ खा छ्येत लेमु खित्‍कानज्‍यीक, थोम्‍मु जीङगा मिक्‍किकानज्‍यीक थेमे पैसे लोभ मिक्‍किकानज्‍यीक ओङा फाप्‍क्‍यो।

१ तिमोथी 6:10

च्‍यिला सासीन पैसे लोभकी खित्‍सादुराङ मिकी जेसुकै मेलेबा काम खित्‍च्‍येते ईन। पैसे लोभला स्‍यूकीन कोई कोईकी येशू ख्रीष्‍टला विश्‍वास खाईन ङेन्‍दाते बात ङेन्‍दा ताङला दुक। थोक खाबेकी खित्‍सादु थेबा हत्तेरिका ङे च्‍यिला थोक खाताका सिराच्‍योक गाल्‍गीन थेबे सेम पीरताङ तापकी छोला दुक।

१ तिमोथी 6:4

थोक्‍ते मिओनगी गाङे बात छ्या ओताच्‍योक खाईन छ्ये खासीनोङ थेबेकीनी च्‍यि बात चुक ईन्‍दे सिन छ्याःङ खोबा मेङगो। थेबेकीचेन टेकाटेउरी स्‍योरच्‍येते छ्याःङ काम लै मिक्‍किच्‍येते बातकामा देन्‍दा चाल्‍ला होथोक्‍ते बातकामा छोल्‍गीन ख्‍याम्‍ग्‍यो। थोक्‍ते बात खित्‍जीन खालि स्‍येदाङ लाङच्‍येते, डिक्‍ला थुन्‍ला देता मुथुप्‍च्‍येते, मि मोत्‍च्‍येते, शंका खाला ईनराङ मेन्‍दे दोष लै खित्‍च्‍येते

२ तिमोथी 3:4

थेबाला नोमुङ भर परे खिता मुथुबो, थेबेकी उत्तोउलोते कामकामा खिओ, थेबाचेन खोपरोङ छेत सुङ मेन सिराच्‍योक खाला साला मिक मिक्‍किता खाला ख्‍याम्‍ग्‍यो। परमेश्‍वरला मन परे खित्‍च्‍येते काम खिता साटोला थेबाला दाक्‍पोन खुशीला ख्‍याम्‍जीन गा लाङगो।

याकूब 2:8

थेमे परमेश्‍वर बातला “ख्‍योकोनगी दाक्‍पोन ज्‍यानला माया खिता च्‍योकराङ खाला ज्‍येनलाङ ङिङज्‍ये खि,” सिन साबा ओत। परमेश्‍वर राज्‍यदु ङेन्‍दा फाप्‍च्‍येते दि नियमला साबाच्‍योक खाईन कामोङ खासीन ख्‍योकोनगी लेमुराङ खाबाते ईन।

याकूब 4:16

ख्‍योकोन ङा दोक खितामीन, थोक खितामीन सिन छ्ये खिन बात खिदुक। थोक खाला छ्ये खित्‍च्‍येते लेमु मेन।

याकूब 4:6

परमेश्‍वरलाकामा माने खित्‍कान्‍ते मिओनला परमेश्‍वरगी झन झन दया खिओ। दोक खिओ सिन परमेश्‍वर बातला “ङा ङाराङ ईन सिराच्‍योक खित्‍कान्‍ते मिला परमेश्‍वरगी मनराङ परे मिक्‍किओ। छ्ये मिक्‍किकान्‍ते मिलाचेन थेकी दया खिओ,” सिन साबा ओत।

१ पत्रुस 5:5

थेमे स्‍याराते मिओनलाङ ङा च्‍यि सिते सासीन ख्‍योकोनगी दाक्‍पोन भन्‍दा छ्येकी लाःपा कोताते ङेन। थेमे दि बातचेन ङा ख्‍योकोन गाङेला सिओ। च्‍यि सासीन ख्‍योकोन सुङगीङ ङा ङाराङ ईन सिराच्‍योक मिक्‍किता खाला बरू दोक्‍पोईकी ज्‍येनज्‍यीकला मान खि। परमेश्‍वर बातलाङ “ङा ङाराङ ईन सिराच्‍योक खित्‍कान्‍ते मिला परमेश्‍वरगी मनराङ परे मिक्‍किओ। छ्ये मिक्‍किकान्‍ते मिलाचेन थेकी दया खिओ,” सिन साबा ओत।

२ पत्रुस 2:10

खास खालाचेन खोपरोङ सेम मेलेबा ओत्‍कीन दाक्‍पोन खुशी खिन खिता मेङच्‍या आउदी मेलेबा मेलेबा काम खित्‍कान्‍ते थेमे परमेश्‍वरताङ ज्‍येन सुङगीङ अधीनला मेदेत्‍कान्‍तेबाला चुक खाला सजाय तेरा फाप्‍कीते सिन थेला लेमु खाला छ्या ओत। परमेश्‍वर बातताङ मिडिक्‍च्‍येते बात लोप्‍कान्‍ते होथे मिओनगी सुङताङ ज्‍यीबा ख्‍यारा मिक्‍किता खाला ङा ङाराङ ईन सिराच्‍योक खिओ। थेबेकीनी पाप खित्‍कान्‍ते परमेश्‍वर दूतओनलाङ छ्याःङ ज्‍यीबा मिक्‍किता खाला विरोध खिओ।

२ पत्रुस 2:12

परमेश्‍वर बातताङ मिडिक्‍च्‍येते बात लोप्‍कान्‍ते मिओनगीचेन खोपरोङगी माखोबाते बात गाङे ठट्टाला पुरग्‍यो। थेबा सो साकान्‍ते पशु च्‍योकराङ ईन। सेता सेम लाङजीन पशुतेबा ग्‍याङ सेताच्‍योक खाला होथेबालाङ परमेश्‍वरगी सजाय बिन्‍ला नरककुण्‍डमा लुक्‍यो।

२ पत्रुस 2:18

च्‍यिला सासीन थेबेकी काम लै खित्‍च्‍येते बात सिराते छ्याःङ मोलोबो। खोपरोङ जे बादोङ छ्या स्‍येकान ईन सिराच्‍योक खाला आउदी छ्ये छ्ये बात खिओ। दाक्‍पोन खुशी खिन दि सा लुङबे मिओनगी खित्‍च्‍येते च्‍योक्‍ते खिता मेङच्‍या ङोचा लाङच्‍येते काम खिता ताङगीन भर्खर भर्खर परमेश्‍वरला विश्‍वास खिताला स्‍यूबाते मिओनला दिबेकी होथोक्‍ते काम खासीन छ्याःङ मेङगो साला लोक्‍ला गोमा खाबाते होथोक्‍ते कामराङ खित ज्‍युत्‍कीदुक।

२ पत्रुस 2:3

पैसे लोभकी खित्‍सादु थेबेकी ख्‍योकोनला मेन्‍दा मेन्‍दे बात जोला लाप्‍ला ठगे खिओ। दोक खित्‍कान्‍तेबाला परमेश्‍वरगी सजाय बिन्‍ला नरककुण्‍डमा लुक्‍यो सिन गोमाका साबा ओत। थेकी दि बात टोक ज्‍येता मेत। था थेकी होत्ताराङ थेबाला सजाय तेरग्‍यो।

यहूदा 1:16

ख्‍योकोन नाङ स्‍यूबाते होथे मिओन नोमुङ खुशी मेङा खाला दि काम लेमु मायाङसुङ, थे थोक ओङसुङ सिन जुन बातलाङ खालि गनगनकामा खिन देत्‍क्‍यो। थेबे सेम मेलेबा ओतेकी खोपरोङला जे खिता सेम लाङगीदुक थेराङ खिओ। थेबेकी खोपरोङ जे बादोङ छ्या स्‍येकान ईन सिराच्‍योक खाला बात खिओ। थेमे खोपरोङ फाइदा ताला खो आउदी लेमु मि ईन, दोक दोक खित्‍कान्‍ते ईन सिन मिला तेक्‍ला बात खिओ।

छ्या स्‍ये च्‍युताते बात 13:1

थेरूई थे डुक समुन्‍द्रे छेउदु गाल्‍गीन लाकीन देत्‍सुङ। थेमे दि तिरी ङे समुन्‍द्रे नाङदुकी जन्‍तुज्‍यीक थेन्‍गीन वाबा थोङसुङ। थेते रोज्‍यो च्‍युताम्‍बाताङ गोः दुईन ओतान। थे जन्‍तुकी रोज्‍यो रेरेला श्रीपेज रेरे खोन्‍दा ओतान। थे गोःओनलाचेन गोः रेरेला परमेश्‍वर विरोध खित्‍च्‍येते मिन टिबा ओतान।

छ्या स्‍ये च्‍युताते बात 16:11

खोपरोङला कुमुकताङ मा थेन्‍साला आउदी सुक खाबेकी खित्‍सादु दुक्‍पा ङेत्‍कीन थेबेकी स्‍वर्गने देत्‍कान्‍ते परमेश्‍वरला मोता खासुङ। ईन्‍सीनोङ खोपरोङगी खिन ओताते मेलेबा काम खिता थेबेकी ताङराङ माताङसुङ।

छ्या स्‍ये च्‍युताते बात 16:21

थेमे घट्टे लाकोर छेतराङ जोदातेताङ ज्‍यीबा लाङच्‍येतेन्‍दे सरे नामनेकी मिओन लाकनामा ङीम्‍बाला स्‍यूसुङ। थोक ज्‍यीबा लाङच्‍येतेन्‍दे सरे ग्‍यापेकी खित्‍सादु मिओनगी परमेश्‍वरला मोता खिताला स्‍यूसुङ। साँच्‍चीराङ थे सरे आउदी ज्‍यीबा लाङच्‍येतेन्‍दे ओतान।

छ्या स्‍ये च्‍युताते बात 16:9

ङीमे रापकी थोक खाईन छिक्‍पेकी खित्‍सादु होदि दुक्‍पातेबा ओङ ज्‍युत्‍कान्‍ते परमेश्‍वर ईन सिन थे मिन तेन्‍गीन मिओनगी थेला मोता खासुङ। तर खोपरोङगी खिन ओताते मेलेबा काम खिता ताङला परमेश्‍वर छ्य्‌वापा लै खाला थेला छ्ये जोच्‍येते कामचेन थेबेकी माक्‍यासुङ।