२ तिमोथी 3:16 - जिरेल

¹⁶ परमेश्‍वर बातला टिबाते बात मिओनगी खोपरोङ बुद्धिकी टिबाते मेन्‍देकी गाङे परमेश्‍वरगी मिओनला थे खोरोङ आत्‍मे छ्य्‌वापेकी टिक च्‍युताते ईन। थेमे परमेश्‍वर बात चुकला काम लै खिते सासीन सत्‍यते बात च्‍यि ईन्‍दे सिन लोपाला, दाक्‍पोनगी चुक खाबाते गल्‍ती खाबाते ईन्‍दाका सिन छ्या स्‍येला च्‍याला चुक खिता फाप्‍च्‍या ईन्‍दाका सिन लोपाला थेमे परमेश्‍वरगी खि साबा साबा च्‍योकराङ खित्‍च्‍येते लोपाला काम लै खिओ।

२ तिमोथी 3:16 Iomraidhean Croise

मत्ती 13:52

थेमे थेकी “थोगी थानामेईचेन स्‍वर्गे राज्‍य सिराते च्‍यिन्‍दे, थे चुक्‍ते ईन्‍दे सिन लेमु खाईन छ्या स्‍येबाते धर्मे गुरूओन ओङगो। थेबाचेन खाम्‍बादु जेसुकै खटेन खित्‍कान्‍ते खाम्‍बे धनी च्‍योक्‍ते ईन। चुक खाला सासीन खाम्‍बे धनीकी गोमामेकी साकीन ज्‍याक्‍पाते थेमे भर्खर ज्‍याक्‍पाते सामानतेबा खाम्‍बे मिओनला गोजीन गोजीन जोतकी नाङदुकी थेन्‍दा च्‍योकराङ खाला थेबेकीङ खोपरोङगी गोमामेकी छ्या स्‍येबा ओताते थेमे थरिङोला खोबाते परमेश्‍वर बात ज्‍येनला लोपा थुप्‍क्‍यो,” सिन सिदुक।

मत्ती 21:42

थेबेकी थोक सानामेई येशूकी “च्‍यि ख्‍योकोनगी परमेश्‍वर बातला दोक सिन टिबाते बात पढे खासीनोङ खोबा मेत? थेरूचेन चुक सिन टिबा ओते सासीन ‘जुन दोला कर्मीओनगी कामराङ लै मिक्‍किओ सिन क्‍युरा ओतान, थे दोराङ आउदी काम लै खित्‍च्‍या थे मेताला छ्याःङ खिता मुथुप्‍च्‍या ओङसुङ। प्रभु परमेश्‍वरगीराङ थे दोला दोक जोबाते ईन। थेकी थोक अचम्‍ब काम खाबाते ङ्योकोनगी थोङा ओत,’ सिन टिबा ओत।

मत्ती 22:43

थेरूई थेकी “थोक ईन्‍सीन ख्रीष्‍टकी विषयला बात खित्‍जीन चुक खाईन गेल्‍बो दाऊदकी परमेश्‍वर आत्‍मे छ्य्‌वापेई गोमाकाराङ थेला प्रभु सिन साबा ओताने, ओना?

मत्ती 26:54

ङे थोक खासीन च्‍यि ङाला दोक दोकराङ ओङा फाप्‍क्‍यो सिन परमेश्‍वर बातला टिबाते बात साबा च्‍योकराङ ओङगोतरो?” सिन सिदुक।

मत्ती 26:56

परमेश्‍वर बात खित्‍कान्‍तेबेकी टिबाते बात साबाच्‍योक ओङालाराङ दि गाङे दोक दोकराङ ओङाते ईन,” सिन सिदुक। थेकी दि बात साकीन सिन्‍नामेई चेलातेबाचेन गाङे थेला ताङगीन छ्य्‌वासुङ।

मर्कूस 12:24

थेबेकी थोक सिरजीन येशूकी “ख्‍योकोनगी मि स्‍यिनामेई तिरी सोम्‍बो मोलोगो सिन सिओ। दि बात ईनराङ मेन। परमेश्‍वर बात पढे खित्‍जीन थेरू च्‍यि साबाते ईन्‍दे सिन ख्‍योकोनगी खोबा ईन्‍सीन थेमे परमेश्‍वरताङ जेङ खिता थुप्‍च्‍येते शक्ति ओत सिन छ्या स्‍येबा ओता ईन्‍सीन मि तिरी सोम्‍बो मोलोगो सिन सिरच्‍या मेतान।

मर्कूस 12:36

च्‍यिला सासीन ख्रीष्‍टकी विषयला बात खित्‍जीन परमेश्‍वर आत्‍मे छ्य्‌वापेई गेल्‍बो दाऊद खोरोङगीराङ दोक सिन टिबा ओत। चुक सासीन ‘प्रभु परमेश्‍वरगी ङे प्रभुला ङे खुई शत्रुओनला ग्‍याल्‍गीन खुई तिङबे ओक्‍तु माज्‍याकथुप खो दुरू स्‍योक, ङे सामे छ्य्‌वापा देत,’ सिन साबाते बात टिबा ओत।

यूहन्‍ना 10:35

परमेश्‍वर बातला टिबाते बात फरकराङ परे मिक्‍किओ। मिओनताङ बात खित्‍जीन परमेश्‍वरगी थेबाला ‘परमेश्‍वर फुज्‍युङ फुमु ईन,’ सिन साबा ओतान।

यूहन्‍ना 3:20

मेलेबा काम खित्‍कान्‍ते मि सुङलाङ नाम्‍दाक मनराङ परे मिक्‍किओ। नाम्‍दाकला थेन्‍सीन खोपरोङ मेलेबाते काम ज्‍येनगी छ्या स्‍येकीता सिन ज्‍यीबेकी थोक्‍ते मिलाचेन नाम्‍दाक गाराङ मालाङो।

शक्ति काम 1:16

“आज्‍यो न्‍वावे, येशूला पक्रे खित ओङकान्‍ते मिओनला थे खाङ ईन्‍दे सिन तेन्‍ला तेरकान्‍ते यहूदाला चुक ओङगीते सिन परमेश्‍वर आत्‍मेकी गेल्‍बो दाऊदला थाङबोका सिर च्‍युता ओतान। परमेश्‍वर बातला साबाते थे बात साबा च्‍योकराङ ओङा फाप्‍सुङ।

शक्ति काम 18:25

प्रभु येशू बात ङेन्‍ला थे छ्य्‌वापा लै खित्‍च्‍या सिराते च्‍यि ईन्‍दे सिनोङ थेला लाप्‍कीन बिन्‍दा ओतान। थेमे दि बात गाङेकी छ्या स्‍येबाराङ फाप्‍क्‍यो सिराच्‍योक खाला थेकी ज्‍येनलाङ लोप्‍कीन ओतान। थे बातओन थेकी ठीक ठीक खाला लोप्‍कीन ओतान। ईन्‍सीनोङ यूहन्‍नेकी मिओनला छ्युला लुगीन बप्‍तिस्‍मा बिन्‍दाते बातओन बाई येशू बात गाङेचेन थेला लेमु खाला छ्या मेतान। अपोल्‍लोसकी एफिससदु यहूदीओनते मिटिङ खित्‍च्‍येते खाम्‍बादु

शक्ति काम 20:20

ख्‍योकोनला लेमु ओङे लाईदु ख्‍योकोन गाङेराङ जम्‍मा ओङसादु थेमे खाम्‍बा खाम्‍बाला समेदोङ गाल्‍गीन लोपा फाप्‍च्‍येते बात दोक्‍पोईओङ बाँकी मोज्‍योबा खाईन ङे गाङे लेमु खाईन लाप्‍कीन बिन्‍दा ओत।

शक्ति काम 20:27

परमेश्‍वरगी मिओनला पापदुकी डेलाला च्‍यि खाबा ओते थेमे थेबाला चुक खिते सिरच्‍येते बातबरी छ्याःङ बाँकी मोज्‍योबा खाईन ङे ख्‍योकोनला गाङे साकीन बिन्‍दा ओत।

शक्ति काम 28:25

थोक ओङगीन थेबे नाङ बात माडिक्‍सुङ। थेमे थेरूई थेबा लाकीन ड्वाप्‍ला स्‍यूसुङ। थेबा गाल मागाल्‍लाराङ थोरूमोङ बात खिन पावलगी थेबाला “थाङबो ख्‍योकोन ज्‍युज्‍यु पुर्खाला परमेश्‍वर आत्‍मेकी परमेश्‍वर बात खित्‍कान्‍ते यशैयाला सिर च्‍युताते बात ख्‍योकोनलाङ डिगीदुक। परमेश्‍वरगी साबाते बात थेला दोक सिन सिर च्‍युता ओतान।

रोमी 15:4

परमेश्‍वर बातला गोमाबा टिबा ओताते गाङे बात ङुरूङगी खइँदा लोप्‍स्‍यीत सिन टिबाते ईन। थे बात ताजीन ङुरूङगी ज्‍येनतेबे ख्‍याल ज्‍य्‌वाजीन दुक्‍पा ओङसीनोङ चुक खाला सेम मेसेता खाला काम खिन देता फाप्‍च्‍या ईन्‍दाका सिन छ्या स्‍येक्‍यो। थेमे परमेश्‍वरगी खिओ साबाच्‍योक पक्‍काराङ खिओ सिन आश खाला गुलाराङ देता थुप्‍क्‍यो।

रोमी 2:20

थेमे लेमु मेलेबा च्‍यि ईन्‍दे सिन छ्याःङ डेला मुथुप्‍कान्‍ते मिओनला चुक चुक खिता फाप्‍कीते सिन लाप्‍ला तेरकान्‍ते थेमे परमेश्‍वर बात लेमु खाला छ्या मेताते मिओनला थे बात लोप्‍कान्‍तेङ खेराङराङ ईन खिदुक। च्‍यिला सासीन परमेश्‍वर नियम ङेता ओतेकी खेराङगी परमेश्‍वर सु ईन्‍दे, चुक्‍ते ईन्‍दे थेमे थेकी मिओनला च्‍यि च्‍यि खि साबा ओते सिरच्‍येते सत्‍यते बात लेमु खाईन छ्या स्‍येबा ओत खिदुक।

रोमी 3:2

थोक सिरकानला ङा च्‍यि सिते सासीन यहूदी ओङाला काल्‍बेई फाइदा ओत। गाङे भन्‍दा गोमानी परमेश्‍वरगी थेबाताङ बात खाईन थेबाला थे खोरोङ बात बिन्‍दा ओत।

रोमी 4:23

परमेश्‍वरगी अब्राहामला चुक खाईन दोषी मेन साबा ओताने सिन परमेश्‍वर बातला टिबाते बात खालि अब्राहाम लाईदुकामा साबाते मेन।

१ कोरिन्‍थी 12:7

परमेश्‍वर आत्‍मेकी मिला तेरच्‍येते सीपताङ शक्ति दाक्‍पोन लाईदु चले खिताला बिन्‍दाते मेन। खोपरोङ नाङ गाङेला लेमु ओङाला चले खित्‍स्‍यीत सिन बिन्‍दाते ईन।

गलाती 3:8

ज्‍येन ज्‍येन जातकी मिलाङ तिरी थेबेकी थे खोरोङला विश्‍वास खितेकी खित्‍सादु परमेश्‍वरगी थेबाला दोषी मेन सिओ सिन गोमाकाराङ परमेश्‍वर बातला टिबा ओतान। दोक ओङगो सिरच्‍येते गा लाङच्‍येते बात खाईन परमेश्‍वरगी अब्राहामला “खुई छ्य्‌वापेकीराङ लुङबा लुङबे मिकी आशी ङेत्‍क्‍यो,” सिन साबा ओतान।

२ तिमोथी 2:25

थेकीचेन थे खोरोङगी लोप्‍च्‍येते बातताङ मिडिक्‍च्‍येते बात खित्‍कान्‍ते मिओनताङ खा छ्येत लेमुकीराङ थेबेकी चुक्‍ते बात लोपा फाप्‍च्‍येते ईन्‍दे सिन लाप्‍ला तेरा फाप्‍क्‍यो। परमेश्‍वरगी थेबाला खोपरोङगी चुक मेलेबा खाबा ओता ईन्‍दाका सिन छ्या स्‍येच्‍येते मौका तेरगीतासीन सिन थेमे थेबेकी सत्‍यते बात च्‍यि ईन्‍दाका सिन लेमु खाला छ्या स्‍येकीतासीन सिन थेबाला होदोक खाला लाप्‍ला तेरा फाप्‍क्‍यो।

२ तिमोथी 4:2

खुई चुक खिता फाप्‍कीते सासीन मिओनला परमेश्‍वर बात लोप्‍कीनराङ देत, मिओनगी ङेन्‍सीनोङ माङेन्‍सीनोङ जुन बेलालाङ थे बात लोपा मातोङ थेमे गल्‍ती खित्‍कानला थोक खाबाते लेमु मेन साला थोक खिता थोङ सिन सि। चुक खिता लेमु ईन्‍दे सिन गाङेला लाप्‍ला बिन। थानी दिबाला थोई लोप्‍च्‍ये सिराच्‍योक माकेत, सुङताङ स्‍येदाङ मिक्‍किता खाला खा छ्येत लेमु खिन दोक खाला लोप्‍कीनराङ देत।

हिब्रू 11:1

परमेश्‍वरला विश्‍वास खित्‍च्‍या सिरातेचेन थेकी तेरग्‍यो साबाते जति गाङे ङेत्‍क्‍यो सिन आश खाईन गुकीन देताते पक्‍काराङ ङेत्‍क्‍यो थेमे खइँदा दोकस्‍यिकराङ ओताक्‍वा सिन दाक्‍पोनगी नोमुङ थोङा मेत्‍सीनोङ परमेश्‍वरगी साबा ओता च्‍योकराङ ओत सिन पत्ते खित्‍च्‍येते ईन।

हिब्रू 3:7

थोक ईन्‍देकी परमेश्‍वर आत्‍मेकी दोक दोक सिन साबाते बात ङुरूङगी ङेन्‍दा फाप्‍क्‍यो। थेकी चुक साला दुका सासीन “थरिङ परमेश्‍वरगी खेराङला च्‍यि सिका थे थोनामेई

हिब्रू 4:12

च्‍यिला सासीन परमेश्‍वर बातकी छ्य्‌वापेई मिओनगी जुनी ङेत्‍क्‍यो। दि बातकी छ्य्‌वापेकी परमेश्‍वरगी मि नाङ काम खिओ। ठाउँ ङिकारपा धार खाबाते आउदी नोम्‍बोते तरवारगी मिला रोपे खासीन दोन्‍नापेई ल्‍हाकनापासाकराङ फोत तोला थुप्‍क्‍यो थेमे रूबाताङ जोर्नीतेबा टाल्‍ला नाङदु ओताते काङ समेत देन्‍दा थुप्‍क्‍यो। होदोक्‍ते तरवार भन्‍दाङ परमेश्‍वर बातकी छ्य्‌वापेई परमेश्‍वरगी खित्‍च्‍येते काम खापान खापान छ्ये ईन। दि बातकी छ्य्‌वापेईराङ सुइँदेकी खाबाते कामताङ बात मिकी दाक्‍पोनगी खाबाते ईन्‍दाना परमेश्‍वर आत्‍मेकी खित च्‍युताते ईन्‍दे सिन डेला थुप्‍क्‍यो थेमे सुई च्‍यि विचार खिन दुका, मि सेमगी नाङ लेमु मेलेबा चुक दुका सिनोङ गाङे लेमु खाला डेला थुप्‍क्‍यो।