२ तिमोथी 2:25 - जिरेल

²⁵ थेकीचेन थे खोरोङगी लोप्‍च्‍येते बातताङ मिडिक्‍च्‍येते बात खित्‍कान्‍ते मिओनताङ खा छ्येत लेमुकीराङ थेबेकी चुक्‍ते बात लोपा फाप्‍च्‍येते ईन्‍दे सिन लाप्‍ला तेरा फाप्‍क्‍यो। परमेश्‍वरगी थेबाला खोपरोङगी चुक मेलेबा खाबा ओता ईन्‍दाका सिन छ्या स्‍येच्‍येते मौका तेरगीतासीन सिन थेमे थेबेकी सत्‍यते बात च्‍यि ईन्‍दाका सिन लेमु खाला छ्या स्‍येकीतासीन सिन थेबाला होदोक खाला लाप्‍ला तेरा फाप्‍क्‍यो।

२ तिमोथी 2:25 Iomraidhean Croise

मत्ती 11:29

ङा ख्‍योकोनताङ स्‍येदाङ मिक्‍किओ, दुक्‍पाङ मेतेरो। लाङ दुल्‍जीन लाबाते लाङताङ गारला मोबाच्‍योक खाला ख्‍योकोनोङ ङे साबाते ङेन्‍ला ङे खाबाच्‍योक खि। थोक खासीन ख्‍योकोन छ्याःङ पीर मिक्‍किता खाला देता ङेत्‍क्‍यो।

मत्ती 21:32

च्‍यिला सासीन यूहन्‍नेकीचेन परमेश्‍वरगी खि साबाच्‍योक खित्‍च्‍या सिराते च्‍यि ईन्‍दे सिन ख्‍योकोनला लापा ओतान। ईन्‍सीनोङ ख्‍योकोनगी थे बातला नामज्‍योकराङ मासेत्‍सुङ। तर कर लिन्‍कान्‍ते मिओन थेमे रन्‍डीओनगीचेन थे बात ङेन्‍सुङ। थेबेकी थोक खाबाते छ्या स्‍येनामेकीङ ख्‍योकोनगी खेराङ पापी दुका सिन छ्या स्‍येला परमेश्‍वर छ्य्‌वापा लै खित्‍च्‍येते माक्‍यासुङ, यूहन्‍ने बात मेङेन्‍दाराङ खाईन देत्‍सुङ।

मर्कूस 1:15

थेकी थेबाला “मिवे, थाचेन बेला लेप्‍कीन सिन्‍सुङ। था परमेश्‍वर राज्‍य दुरू ओङा खाबा ओत। थोगी ख्‍योकोनगी खेराङ पापी दुका सिन छ्या स्‍येला परमेश्‍वर छ्य्‌वापा लै खि। थेमे गा लाङच्‍येते बात ङेन,” सिन लाप्‍सुङ।

यूहन्‍ना 5:34

ङे ङा सु ईन्‍दे, चुक्‍ते ईन्‍दे सिन सिरकान्‍ते सुइँदा मि ओङाराङ फाप्‍क्‍यो सिन साबाते मेन। बरू ख्‍योकोनगी पापकी सजाय मेङेत्‍स्‍यीत सिन दि बाततेबा साबाते ईन।

शक्ति काम 11:18

थेकी दि गाङे बात सानामेकी गोमा थेला ङारकान्‍ते मि गाङेराङ खाराक्‍पा देत्‍सुङ। थेमे थेबेकी परमेश्‍वरते जय जय खिनकामा “दि चुक अचम्‍बे बात ईन्‍दाका। थानी परमेश्‍वरगी ङुरूङगी च्‍योकराङ खाला ज्‍येन ज्‍येन जातकी मिकीङ नोमुङ मिसिन्‍च्‍येते जुनी ङेत्‍स्‍यीत सिन थेबाला खोपरोङ पापी दुका सिन छ्या स्‍येला परमेश्‍वर छ्य्‌वापा लै खित्‍च्‍ये मौका तेराला स्‍यूदुक,” सिन बात खासुङ।

शक्ति काम 2:38

ठिजीन पत्रुसकी “था ख्‍योकोन गाङेकी खेराङ पापी दुका सिन छ्या स्‍येला परमेश्‍वर छ्य्‌वापा लै खि। थेमे येशू ख्रीष्‍ट मिनगी छ्य्‌वापेई बप्‍तिस्‍मा लोङ। थेमे परमेश्‍वरगी ख्‍योकोन पापतेबा माफ तेरग्‍यो। थेमे ख्‍योकोनगी परमेश्‍वर आत्‍मा ङेत्‍क्‍यो।

शक्ति काम 20:21

यहूदी ईन्‍स्‍यीत, ग्रीक ईन्‍स्‍यीत ङे गाङेला ओर्च्‍ये ख्‍योकोनगी खेराङ पापी दुका सिन छ्या स्‍येला परमेश्‍वर छ्य्‌वापा लै खि थेमे प्रभु येशूला विश्‍वास खि सिन साबा ओत। ङे दोक दोक खाबा ओतान सिन ख्‍योकोन गाङेला छ्याराङ ओत।

शक्ति काम 5:21

थेमे थेबाङ ङारो च्‍योक्‍ते ङोमुका मन्‍दिरपा गाल्‍गीन थे दूतकी साबा च्‍योकराङ खाईन मिओनला लोपाला स्‍यूसुङ। थेमे गाङे भन्‍दा छ्येते पूजारीताङ थे र्‍वाओनगी छ्ये छ्ये पूजारी, धर्मे गुरूओन थेमे ज्‍येनोङ छ्ये छ्ये मि गाङेला काताङसुङ। दोक खाईन थेबेकी इस्राएलीओन छ्ये छ्ये मि गाङेला जम्‍मा खासुङ। थेमे थेबेकी येशू ख्रीष्‍टकी खटे खाबाते मिओनला खोपरोङ दोन्‍दु खोरच्‍योक सिन पुलिसओनला जेलदु ताङसुङ।

शक्ति काम 5:31

थेमे थेकी थेला गाङेला राज्‍य खित्‍कान्‍ते गेल्‍बो जोबा ओत। मिओनला पापदुकी डेल्‍कान्‍तेङ थेराङ ईन सिन छ्येज्‍यीक मान बिन्‍गीन थेला थे खोरोङ सामे छ्य्‌वापा ज्‍याक्‍पा ओत। ङुरूङ इस्राएलीओन दाक्‍पोन पापी दुका सिन छ्या स्‍येला परमेश्‍वर छ्य्‌वापा लै खित्‍स्‍यीत थेमे ङुरूङगी खाबाते पाप माफ ओङस्‍यीत सिनराङ परमेश्‍वरगी येशूला थोक थोक खाबाते ईन।

शक्ति काम 8:22

खुई दोक मेलेबा विचार खाबेकी प्रभु परमेश्‍वरला प्रार्थना खाला माफ नाङ खि। थोक खासीन ना थेकी खुई पाप माफ तेरगीता।

गलाती 6:1

आज्‍यो न्‍वावे, ख्‍योकोन नाङ सुइँदेकी गल्‍ती खासीन परमेश्‍वर आत्‍मेकी खि साबाच्‍योक खित्‍कान ख्‍योकोनगीचेन खेराङगीङ दाक गल्‍ती खिता थुप्‍क्‍यो सिन टोक मेज्‍येता खाला थेकी थोक खाबाते लेमु मेन, थानामेकी थोक माकेत सिन खा छ्येत लेमुकीराङ सम्‍झे खाला बिन।

१ तिमोथी 2:4

मि सुङगीङ पापकी सजाय भोगे खिता माफाप्‍स्‍यीत थेमे गाङेकी सत्‍यते बात छ्या स्‍येला ङेन्‍स्‍यीत सिरच्‍येते परमेश्‍वर सेम ओत।

१ तिमोथी 6:11

तर खोचेन परमेश्‍वरगी खि साबाते काम खित्‍कान्‍ते मि ईन। थोगी खुई थोक्‍ते मेलेबा काम छ्याःङ माकेत। खुईचेन परमेश्‍वरगी खि साबा च्‍योकराङ खिन देत, थेला चुक खाला माने खिता फाप्‍च्‍येते ईन्‍दे थोकराङ खाला माने खि, येशू ख्रीष्‍टला विश्‍वास खिन देत। दोस्‍यिककामा मेन, ज्‍येनला ङिङज्‍ये खि, दुक्‍पा ओङसीनोङ खपे खिन देत थेमे गाङेताङ खा छ्येत लेमु खि। खुई होदोक दोक खित्‍च्‍ये छ्य्‌वापाकामा सेम लै खि।

२ तिमोथी 3:7

थेबेकी ज्‍येनगी लापाते बात जहिलेङ छ्या स्‍येबा छोल्‍ग्‍यो। थोक ईन्‍सीनोङ सत्‍यते बात च्‍यि ईन्‍दे सिन नोमुङ छ्या स्‍येबा मुथुबो।

तीतस 1:1

दि चिट्ठी टिक्‍कान्‍ते ङा पावल ईन। ङा परमेश्‍वर काम खित्‍कान्‍ते मि ईन। थेमे ङा येशू ख्रीष्‍टकी खटे खाबाते मिङ ईन। परमेश्‍वरगी थे खोरोङ मि सिन छाने खाबाते मिओनगी झन लेमु खाला थेला विश्‍वास खिता थुप्‍स्‍यीत थेमे सत्‍यते बात लेमु खाला छ्या स्‍येला झन थेला लेमु खाला माने खिता थुप्‍स्‍यीत सिन थेबाला लाप्‍ला कोत्‍ला तेरच्‍येते जिम्‍मा ङाला बिन्‍दा ओत।

तीतस 3:2

थेबेकी मेन्‍दे बातला सुङलाङ दोष लै खिता मेङगो, गाङेताङ डिक्‍ला थुन्‍ला देता फाप्‍क्‍यो, सुङताङ स्‍येदाङ मिक्‍किता खाला गाङेताङ खा छ्येत लेमु खिता फाप्‍क्‍यो सिन सि।

याकूब 1:17

च्‍यि सासीन लेमुते सिराते जेसुकै ङुरूङला स्‍वर्गने देत्‍कान्‍ते आबा परमेश्‍वरगी तेरग्‍यो। मेलेबाते सिराते थेकी ङुरूङला छ्याःङ मेतेरो। दागार, ङीमाताङ कार्मा जोकान्‍ते थेराङ ईन। दागार ङीमा स्‍याराताङ गाबाच्‍योक खाला थे नोमुङ खुदुक मोन्‍डोओ।

१ पत्रुस 3:15

बरू येशू ख्रीष्‍टराङ खेराङ मालिक ईन सिन टोक माज्‍येत, थेला मान खि। थेमे परमेश्‍वरगी तिरी तेरग्‍यो साबातेबा ङेत्‍क्‍यो सिन खेराङगी आश खाबाते पक्‍काराङ ङेत्‍क्‍यो सिन ख्‍योकोन चुक खाला सिते सिन ठिकान गाङेला ख्‍योकोनगी जहिलेङ लाःप्‍ला बिन। थेबे सेमला फोक्‍च्‍येते बात छ्याःङ मिक्‍किता खाला थोक्‍ते मिओनताङ ख्‍योकोनगी खा छ्येत लेमु खाला बात खि।

१ यूहन्‍ना 5:16

थेमे ख्‍योकोन सुइँदेकी खेराङ आज्‍यो न्‍वा सुइँदेकी पाप खिता थोङसीन थेमे थे पाप खाबेकी थे स्‍यिला नरककुण्‍डमा स्‍यूक्‍पा फाप्‍च्‍या मेत्‍सीन ख्‍योकोन थोक खिता थोङकानगी परमेश्‍वरगी थेला थारच्‍येते लाम तेरस्‍यीत सिन प्रार्थना खि। दोक खाईन प्रार्थना खानामेई परमेश्‍वरगी थेला नोमुङ मिसिन्‍च्‍येते जुनी मेतेरो सिन मिसिरो। ङे थोक्‍ते मि लाईदु प्रार्थना खि साबातेचेन खालि पाप खाबेकी खित्‍सादु स्‍यिला नरककुण्‍डमा स्‍यूक्‍पा माफाप्‍कान्‍ते मि लाईदुकामा ईन। पाप खाबेकी स्‍यिला नरककुण्‍डमा स्‍यूक्‍पा फाप्‍कान्‍ते मि लाईदु थोक खि सिनचेन ङे साबाते मेन। च्‍यिला सासीन दोक्‍ते पापोङ ओङगो, थे पाप खित्‍कान्‍ते मिचेन स्‍यिला नरककुण्‍डमा स्‍यूइओ।