२ तिमोथी 1:9 - जिरेल

⁹ थेकीराङ ङुरूङला पापकी सजायदुकी टाल्‍गीन बिन्‍दा ओत। थेमे ङुरूङ सेम खुदुक गाल्‍ला मेलेबाते कामताङ बात सिराते छ्याःङ मिक्‍किस्‍यीत सिन थे खोरोङ दोन्‍दु स्‍योक सिन काताङा ओत। थेकी थोक खाबाते ङुरूङगी थेकी खि साबा साबाच्‍योक खाईन लेमु काम खाबेकी खित्‍सादु मेन, बरू थे खोरोङ दयेकी ङुरूङला थोक खिता चालेकी खित्‍सादुकामा ईन। येशू ख्रीष्‍ट छ्य्‌वापेकी ङुरूङ लाईदु दोक खिओ सिन थेकी दि सा नाम ज्‍वा भन्‍दा गोमाकाराङ टुङ्गो खाबा ओतान।

२ तिमोथी 1:9 Iomraidhean Croise

मत्ती 1:21

था थेकी फुज्‍युङज्‍यीक केइओ। खुई थे मिन येशू सिन स्‍योक। च्‍यिला सासीन थेकीराङ थे खोरोङ मिओनला थेबे पापदुकी डेल्‍ग्‍यो,” सिन बात खासुङ।

लूका 10:21

थे बेलालाराङ परमेश्‍वर आत्‍मे छ्य्‌वापेई आउदी गा खिन येशूकी “आबा, खो दि स्‍वर्गताङ पृथ्‍वीते मालिक ईन। ङा खुईते जय जय खिओ। च्‍यिला सासीन परमेश्‍वर राज्‍य बात खुई पढे माक्‍याबाते थेमे काल्‍बा बात छ्या मेस्‍येकान्‍ते मिओनला लेमु खाईन खो च्‍युत्‍सुङ। दि बातनी खुई आउदी बुद्धि ओतातेताङ काल्‍बेई पढे खाबाते छ्ये छ्ये मिलाङ खो च्‍युता मेतान। आबा खोल्‍ला दोक खिताराङ लेमु लासुङ। दोक खाईन खुई खिता चालाते च्‍योकराङ ओङसुङ,” सिन सासुङ।

यूहन्‍ना 17:24

आबा, खुई ङाला ङिङज्‍ये खित्‍च्‍येते ईन्‍देकी दि सा नाम ज्‍वा भन्‍दा गोमामेईराङ खुई ङाला छ्येज्‍यीक मान बिन्‍दा ओतान। था खुई ङे लाःक्‍तु जिम्‍मा बिन्‍दाते मि जतिङ ङा जहाँ देत्‍कीदुक, थेरूराङ देता ङेत्‍ला दिबाबरीकी ङा होथोक खाईन मान ङेत्‍कीन देताते थोङा ङेत्‍स्‍यीत सिरच्‍येते ङे सेम ओत।

यूहन्‍ना 17:9

थाल्‍लाचेन ङा दि सा लुङबे मि गाङे लाईदु मेन तर आबा खुई ङे लाःक्‍तु जिम्‍मा बिन्‍दाते मिओन लाईदु प्रार्थना खिओ। दिबाबरीचेन खुईतेराङ ईन।

यूहन्‍ना 6:37

आबेकी ङे जिम्‍माला तेरच्‍येते मि जति गाङे ङे छ्य्‌वापा लै खिओ। थोक खित्‍कान्‍ते सुङलाङ ङा ङे छ्य्‌वापा माङ सिन नोमुङ मिसिरो।

शक्ति काम 15:18

ङे गोमामेकीराङ दोक खिओ सिन साबाते बात साबा च्‍योकराङ खिओ,’ सिन साबा ओतान।

शक्ति काम 2:47

थोक खाला छ्वाला रूला थेबाचेन जहिलेङ परमेश्‍वरते जय जय खिन ओतान। ज्‍येन ज्‍येनगीङ थेबाला लेमु मि ईन सिन मान खिन ओतान। थेमे प्रभु येशूकी थे खोरोङ छ्य्‌वापा लै खित्‍कान्‍ते मिओनला पापदुकी टाल्‍ला थे खोरोङला विश्‍वास खित्‍कान्‍ते मिओन ङीमे ठाङमा फेल ज्‍युत्‍कीन ओतान।

रोमी 11:14

च्‍यिला सासीन ङे ज्‍येन ज्‍येन जातकी मि नाङ दि काम खित्‍जीन परमेश्‍वरगी थेबालाका लेमु खाबा थोङला ङेराङ जातकी मिओनला स्‍येदाङ लाङस्‍यीत। थोक ओङला थेबा दोक्‍पोई ङिकीकामा ईन्‍सीनोङ गा लाङच्‍येते बात ङेन्‍ला परमेश्‍वरगी तेरच्‍येते पापकी सजायदुकी थारस्‍यीत सिरच्‍येते ङेते सेम ओत।

रोमी 11:29

च्‍यिला सासीन परमेश्‍वरगी सुइँदाला आशी बिन्‍ला लेमु खिओ सिन छाने खानामेई खासुङ खासुङ थेकी थे बात नोमुङ खुदुक मोजोओ।

रोमी 16:25

थेमे परमेश्‍वरगीराङ ख्‍योकोनला शक्ति तेरच्‍येते ईन्‍देकी ख्‍योकोनगी येशू ख्रीष्‍टला विश्‍वास खिन देता थुप्‍क्‍यो। परमेश्‍वरगी खित्‍सादु दोक खिन देता थुप्‍क्‍यो सिन येशू ख्रीष्‍ट सु ईन्‍दे, चुक्‍ते ईन्‍दे सिन ङे लोप्‍कीन ओताते गा लाङच्‍येते बातला साबा ओत। दि जुग शुरू ओङा भन्‍दा गोमामेईराङ परमेश्‍वरगी सुङलाङ छ्या स्‍ये च्‍युता मेताते दि गा लाङच्‍येते बात

रोमी 3:20

च्‍यिला सासीन परमेश्‍वर नियमला खि साबाते ङेन्‍लानी सुङलाङ परमेश्‍वरगी दोषी मेन सिरराङ मिसिरो। परमेश्‍वर नियम तालाचेन खालि थे नियम माङेन्‍गीन दाक्‍पोनगी पाप खाबा ओताक्‍वा सिनकामा छ्या स्‍येक्‍यो।

रोमी 9:11

थेबा ङिबोकी लेमुताङ मेलेबा छ्याःङ काम माक्‍याबाला थेबा क्‍या भन्‍दा गोमाराङ परमेश्‍वरगी रिबेकाला “आज्‍योतेकीका न्‍वातेला मान खिता फाप्‍क्‍यो,” सिन साबा ओतान। परमेश्‍वरगी सुइँदाला थे खोरोङ दोन्‍दु स्‍योक सिन छाने खित्‍जीन मिकी खाबाते लेमुताङ मेलेबा काम ताला मेन, थे खोरोङला छाने खिता सेम लाबातेला छाने खिओ सिन तेन्‍दालाराङ थेकी थेबा ङिबो नाङ न्‍वातेला थोक खाईन छाने खाबा ओतान।

रोमी 9:24

थेकी थोक खिओ सिन टुङ्गो खाबाते मिओनचेन ङुरूङराङ ईन। थेकी ङुरूङला यहूदी नाङदुकीकामा मेन्‍देकी ज्‍येन ज्‍येन जातकी नाङदुकीङ थे खोरोङ दोन्‍दु स्‍योक सिन काताङा ओत।

१ कोरिन्‍थी 1:18

बात चुक सासीन ख्रीष्‍ट मिओनला पापकी सजायदुकी डेलाला स्‍यिङगी थामला टाँए खाईन स्‍याप्‍ते ईन सिरजीन तिरी नरककुण्‍डमा स्‍यूक्‍कान्‍ते मिओनगीचेन दि लेम्‍बे बात ईन सिन पत्ते मिक्‍किओ। दोक ईन्‍सीनोङ परमेश्‍वरगी पापकी सजायदुकी टालाते मि ङुरूङगीचेन ख्रीष्‍टकी खाबाते थे काम ताला परमेश्‍वर शक्ति चुक छ्ये ईन्‍दे सिन छ्या स्‍येबा थुप्‍क्‍यो।

एफिसी 1:11

परमेश्‍वरचेन गोमा थे खोरोङगी खिओ सिन टुङ्गो खाबाते गाङे काम खिता चाला च्‍योकराङ खाला खित्‍कान्‍ते ईन। थे दोक खित्‍कान्‍ते ईन्‍देकी थेकी ङ्योकोनला गोमामेईराङ ख्रीष्‍टकी छ्य्‌वापेकी छाने खिओ सिन साबा ओतेकी साबा च्‍योकराङ खाईन छाने खासुङ।

एफिसी 1:9

थेकी गोमा सुङलाङ छ्या स्‍ये च्‍युता मेताते थे खोरोङगी गोमामेईराङ खिता चालाते येशू ख्रीष्‍ट छ्य्‌वापेकी खिओ साबाते बात च्‍यि ईन्‍दे सिन था ङुरूङला छ्या स्‍ये च्‍युत्‍सुङ।

एफिसी 2:5

खिता मेङच्‍येते कामकामा खिन पाप खिन थे लाईदु स्‍याप छेतराङ गालाते ङुरूङला ख्रीष्‍टताङराङ सोम्‍बो लोगीन थेला बिन्‍दा च्‍योक्‍ते जुनी बिन्‍सुङ। थे खोरोङ दयेकी खित्‍सादुकामा परमेश्‍वरगी ख्‍योकोनला दोक खाईन पापकी सजायदुकी टाल्‍गीन बिन्‍दाते ईन सिन टोक माज्‍येत।

एफिसी 3:11

दोक दोकराङ खिओ सिन थेकी गोमा गोमामेकीराङ ठीक खाबा ओतान। ठीक खाबा ओता च्‍योकराङ खाईन थेकी ङुरूङ प्रभु येशू ख्रीष्‍ट छ्य्‌वापेकी थे कामतेबा खासुङ।

फिलिप्‍पी 3:14

दोक खाला ङा खालि ङाराङगी नाम इनाम ङेदोङा सिरच्‍ये छ्य्‌वापाकामा स्‍येत खिन देत्‍क्‍यो। ङे ङेत्‍च्‍येते इनामचेन स्‍वर्गने देता ङेत्‍च्‍येते ईन। येशू ख्रीष्‍टकी खाबाते कामगी खित्‍सादु परमेश्‍वरगी ङाला थेने देताला काताङाते ईन।

१ थिस्‍सलोनिकी 4:7

परमेश्‍वरगी होथोक्‍ते काम खित्‍स्‍यीत सिन मेन, ङुरूङ सेम खुदुक गाल्‍ला थोक्‍ते मेलेबाते काम सिराते छ्याःङ मिक्‍किस्‍यीत सिन ङुरूङला थे खोरोङ दोन्‍दु स्‍योक सिन काताङाते ईन।

१ तिमोथी 1:1

दि चिट्ठी टिक्‍कान्‍ते ङा पावल ईन। ङा येशू ख्रीष्‍टकी खटे खाबाते मि ईन। थेकी खटे खाबाते मिकी खिता फाप्‍च्‍येते काम खितालाचेन ङुरूङला पापदुकी डेल्‍कान्‍ते परमेश्‍वर थेमे था तिरी ग्‍युरला ओङगो सिन ङुरूङ आश खाईन गुकीन देता ओताते येशू ख्रीष्‍टकीराङ ङाला कोताते ईन।

२ तिमोथी 1:1

दि चिट्ठी टिक्‍कान्‍ते ङा पावल ईन। ङा येशू ख्रीष्‍टकी खटे खाबाते मि ईन। ङा थोक्‍ते मि ईन सिन परमेश्‍वरगी ङाला छाने खाबा ओत। ङे कामचेन परमेश्‍वरगी तेरग्‍यो साबाते नोमुङ मिसिन्‍च्‍येते जुनीचेन येशू ख्रीष्‍टकी खित्‍सादु ङेत्‍क्‍यो सिन ज्‍येनला लोप्‍च्‍येते ईन।

तीतस 1:2

ङे थेबे नाङ दि काम खित्‍जीन थेबेकी नोमुङ मिसिन्‍च्‍येते जुनी ङेत्‍क्‍यो सिरच्‍येते बात पक्‍काराङ ईन सिन आश खाला गुला देता थुप्‍क्‍यो। दोक खाला मिओनला नोमुङ मिसिन्‍च्‍येते जुनी तेरग्‍यो सिन परमेश्‍वरगी थाङबो जुगलाराङ साबा ओतान। थेकी नोमुङ ढाँर मिक्‍किओ।

हिब्रू 3:1

बात दोक दोक ईन्‍देकी आज्‍यो न्‍वावे, ख्‍योकोनचेन स्‍वर्गने देताला परमेश्‍वरगी थे खोरोङ दोन्‍दु स्‍योक सिन काताङाते मि ईन्‍देकी येशू चुक छ्ये ईन्‍दे सिरच्‍येते बातकीतेकामा ध्‍यान खिन देत। थेचेन परमेश्‍वरगीराङ खटे खाईन ताङाते थेमे गाङे भन्‍दा छ्येते पूजारी ईन। थे पक्‍काराङ होदोक छ्ये ईन सिन ङुरूङ थेला विश्‍वास खिओ।

१ पत्रुस 1:20

दि सा नाम ज्‍वा भन्‍दा गोमाकाराङ परमेश्‍वरगी थेला मिओनला पापदुकी डेलाला छाने खाबा ओतान। थेमे ख्‍योकोनला दोक खाला लेमु खिताला थे दि जुग सिन्‍दे खाला देमा वाबाते ईन।

१ पत्रुस 2:9

बात दोक ईन्‍सीनोङ ख्‍योकोनलाचेन परमेश्‍वरगी थे खोरोङ मि ईन सिन छाने खाबा ओत। ख्‍योकोनचेन परमेश्‍वर पूजारी ईन, थेचेन गेल्‍बो ईन। ख्‍योकोन परमेश्‍वरला माने खित्‍कान्‍ते मि ईन। ख्‍योकोन परमेश्‍वर मिराङ ईन। थेकी ख्‍योकोनला पापताङ लोभदुकी टाल्‍ला थे खोरोङ नाम्‍दाकला देताला थे खोरोङ दोन्‍दु स्‍योक सिन काताङा ओत। थेकी खाबाते अचम्‍ब अचम्‍बतेन्‍दे कामगी बात ख्‍योकोनगी ज्‍येनलाङ सिरस्‍यीत सिन थेकी ख्‍योकोनला दोक खाबाते ईन।

छ्या स्‍ये च्‍युताते बात 13:8

थेमे दि सा लुङबे मि गाङेकी थे जन्‍तुला मान खाला छ्ये जोइओ। खालि दि सा नाम ज्‍वा भन्‍दा गोमाराङ नोमुङ मिसिन्‍च्‍येते जुनी ङेत्‍कान्‍ते मिओन मिन टिबाते किताब नाङ खोपरोङ मिन ओताते मिओनगीकामा थे जन्‍तुला मान खाला छ्ये मोजोओ। थे मिन टिबाते किताबचेन लुई रीउते ईन।

छ्या स्‍ये च्‍युताते बात 17:8

खुई थोङाते दि जन्‍तु गोमा पालोई ओतान, थाल्‍ला मेत। थे था तिरी खापान खापान तीङ ओताते डालुममेकी थेन्‍ला ओङगो। तर थेन्‍गीन वानामेकी थे सजाय ङेत्‍ला नरककुण्‍डमा ड्वा फाप्‍क्‍यो। दि सा नाम ज्‍वा भन्‍दा गोमामेकीराङ नोमुङ मिसिन्‍च्‍येते जुनी ङेत्‍कान्‍ते मिओन मिन टिबा ओताते किताबला खोपरोङ मिन टिबा मेताते मिबरीचेन थे जन्‍तुला थोङजीन छक्‍क परे खिओ। च्‍यिला सासीन थे जन्‍तु गोमा ओतान, थाल्‍ला मेत थेमे था ङीमाई याङराङ थे दुरू ओङगो।