२ थिस्‍सलोनिकी 3:2 - जिरेल

² थेमे परमेश्‍वरगी खि साबाते ङेनराङ मेङेन्‍कान्‍ते मेलेबा मेलेबा काम खित्‍कान्‍ते मिओन लाःक्‍तुई ङ्योकोनला जोए खि सिन प्रार्थना खि। मि गाङेकीचेन प्रभु येशू बात मेङेनो सिन ख्‍योकोनला छ्याराङ ओत।

२ थिस्‍सलोनिकी 3:2 Iomraidhean Croise

मत्ती 17:17

थोक सिरजीन थेकी “था समय मि ख्‍योकोन परमेश्‍वरला विश्‍वास खितराङ मिक्‍किकान थेमे थे बात ङेनराङ मेङेन्‍कान्‍ते ईन। परमेश्‍वरताङ छ्येज्‍यीक शक्ति ओत सिरच्‍येते बात था ख्‍योकोनगी नामचेन खोच्‍ये? थेमे था थोईसाक ङा दोक्‍ते काम खिन ख्‍योकोनताङराङ देत्‍च्‍ये?” सिन साकीन च्‍याकीन “खुई फुज्‍युङला दुरू ङा ओत्‍सादु खोरच्‍योक,” सिन सिदुक।

मत्ती 23:23

ख्‍योकोन चुक्‍तेन्‍दे ईन्‍दाका। था ख्‍योकोनला आउदी मेलेबा ओङगो। ख्‍योकोनचेन परमेश्‍वरगी साबाते लेमु खाला ङेन्‍च्‍या सिन बाबरी, सूप थेमे ज्‍येनतोक मसालेते समेदोङ बो च्‍युताम्‍बेते बोज्‍यीक टाल्‍ला परमेश्‍वरला चढे खिदुक। तर परमेश्‍वर नियमला साबाते छ्ये छ्ये बातचेन ख्‍योकोनगी ङेनराङ मेङेन्‍दुक। च्‍यि सासीन ज्‍येनला लेमु खिता ठाउँदु ख्‍योकोनगी थेबाला ठगेका खिदुक। ख्‍योकोनगी ज्‍येनला ङिङज्‍येङ मिक्‍किदुक थेमे खेराङगी खिओ साबा च्‍योगोङ मिक्‍किदुक। थोगी ख्‍योकोनगी ज्‍येनला लेमु खि। थेबाला ङिङज्‍ये खि। थेमे खेराङगी खिओ साबा च्‍योगोङ खि। बो च्‍युताम्‍बेते बोज्‍यीक परमेश्‍वर लाईदु डेल्‍च्‍येतेङ मातोङ।

लूका 18:8

दि बात ङेन। परमेश्‍वरगीनी थेबाला दुक्‍पा तेरकान्‍तेबे लाःक्‍तुकी होत्ताराङ टाल्‍ला तेरग्‍यो। थोक ईन्‍सीनोङ परमेश्‍वर ओत्‍सादुई वाबाते मि ङा पृथ्‍वीमा ग्‍युरला ओङ ओङसाकराङ परमेश्‍वरगी प्रार्थना ङेन्‍ला दुक्‍पादुकी डेल्‍ग्‍यो सिन थेला विश्‍वास खिनराङ देत्‍कान्‍तेबा मेरा थोईजो ओङोङा? दि बात ख्‍योकोनगी सेमगी नाङ गुने खि,” सिन सिदुक।

शक्ति काम 13:45

थोक काल्‍बेई मि थेरू वाबा थोङगीन थानी मि गाङे पावलताङ बारनाबास छ्य्‌वापाका लै खिताला स्‍यूसुङ सिन यहूदीओनला खोक्‍पो खाईन स्‍येदाङ लासुङ। थेमे थेबेकी थेरू ओताते मिओनला पावलगी खाबाते बात ईनराङ मेन्‍दे बात ईन सिन आउदी खाईन थे विरोध खिताला स्‍यूसुङ।

शक्ति काम 13:50

थोक ओङजीन यहूदीओनगीचेन पावलताङ बारनाबासला लेमु मि मेन सिन थे सारगी छ्ये छ्ये मि थेमे थेरू परमेश्‍वरला माने खित्‍कान्‍ते छ्युक्‍पु छ्युक्‍पुते फेम्‍मे मिला लुकीन खोपरोङ लाःक्‍तु लासुङ। थोक खाईन थेबाबरी गाङेराङ डिगीन पावलताङ बारनाबासला दुक्‍पा बिन्‍गीन थेरूकी उरगीन ताङसुङ।

शक्ति काम 14:2

तर थे बात मेङेन्‍कान्‍ते यहूदीओनगीचेन येशूला विश्‍वास खित्‍कान्‍ते मिओन लेमु मि मेन सिन मेन्‍दा मेन्‍दे बात साकीन थेबाला मेलेबा खिताला ज्‍येन ज्‍येन जातकी मिला उल्‍के खासुङ।

शक्ति काम 17:5

थोक खाईन मि काल्‍बेई थेबे छ्य्‌वापा लै खाबा थोङगीन ज्‍येन यहूदीओनचेन थेबा ङिबोताङ आउदी खाईन स्‍येदाङ खासुङ। थोगी थेबेकी थे सारगी नाङले कोई कोई मेलेबाते मि रूकीन होहल्‍ला खिताला स्‍यूसुङ। थेमे थेबा ङिबोला जुम्‍ला गाङे मि दोन्‍दु खेरा फाप्‍क्‍यो सिन यासोन सिराते मि खाम्‍बापा गाल्‍सुङ।

शक्ति काम 25:27

च्‍यिला सासीन जेलदु ज्‍याक्‍पाते मिला दिकी दोक दोक गल्‍ती खाबाते ईन सिन खइँदा बात मिटिक्‍पा खाला रोमी गेल्‍बो दोन्‍दु तोङाचेन ङाला अप्‍ठेरोराङ ओङसुङ,” सिन सिदुक।

शक्ति काम 28:24

थे मिओन नाङ कोई कोईकी पावलगी साबाते बात सत्‍यतेराङ दुका सिन लेमु खाईन ङेन्‍सुङ। कोईकीचेन दिङ चुक खाला ईन्‍दे बात ओङगीते सिन पत्तेराङ माक्‍यासुङ।

रोमी 10:16

थोक खाईन इस्राएलीओनगी थे बात थोबा ओता ईन्‍सीनोङ थोकान्‍तेबा गाङेकी थे गा लाङच्‍येते बातला नामज्‍योकराङ मासेत्‍सुङ। थेबेकी थोक खासुङ सिन यशैयेकी “ए प्रभु परमेश्‍वर, ङ्योकोनगी साबाते बात गाङेकी थोसीनोङ सुई नामज्‍योक सेत्‍सुङारो?” साबाते बातताङराङ डिइओ।

रोमी 15:31

ख्‍योकोनगी चुक सिन प्रार्थना खिसे सासीन ङा यरूशलेमपा डोजीन थेपा यहूदिये अञ्‍चलदु ओताते येशू ख्रीष्‍टला विश्‍वास मिक्‍किकान्‍ते यहूदीओनगी ङाला मेलेबा खिता मुथुप्‍स्‍यीत थेमे ज्‍येन ज्‍येन जातकी मिकी जम्‍मा खाबाते ङे यरूशलेमदु परमेश्‍वर सन्‍तानओनला खेरच्‍येते थे पैसा थेबेकी गा खिन लिन्‍स्‍यीत सिन प्रार्थना खि।

१ कोरिन्‍थी 15:32

मिकी साबा च्‍योकराङ स्‍याप्‍ते मिओन सोम्‍बो मोलोक्‍च्‍या ईन्‍सीनका ङा एफिससदु ङाराङ ज्‍यानगी मायाङ मारे खाला थोक खाला च्‍येन थोमताङ जीङच्‍या मेतान। स्‍यिनामेई सोम्‍बो लोक्‍च्‍येते बात छ्याःङ मेत्‍सीनका ज्‍येनगी च्‍योकराङ “लो स्‍योक ङुरूङ स्‍यीम्‍बु स्‍यीम्‍बु सेइ, थुङगी। च्‍यिला सासीन ङारो दाक स्‍याङ थुप्‍क्‍यो,” सिन सिइ ओना।

१ थिस्‍सलोनिकी 2:18

थेपा ड्वा ङेत्‍कीता सिन ङ्योकोनगी याङ याङराङ मौका ताबाप। ङा पावल ङाराङराङ थेपा ड्वाप सिन बाजिताङ बाजि ठीक खित्‍जीनोङ ओङा माथुप्‍सुङ। शैतानगी ङ्योकोनला थेपा डोरराङ माच्‍युत्‍सुङ।

२ तिमोथी 4:17

दोक दोक ओङजीनोङ प्रभु येशू ख्रीष्‍टचेन ङात्ताङ ङ्योम्‍बुराङ देत्‍कीन थेकी ङाला शक्ति बिन्‍सुङ। थोगी ङे ज्‍येन ज्‍येन जातकी मि गाङेकी थोस्‍यीत सिन गा लाङच्‍येते बात लेमु खाईन लाप्‍कीन बिन्‍दाप। दोस्‍यिककामा मेन, थेकी ङाला सिंहे खादुकीङ जोए खासुङ।