२ थिस्‍सलोनिकी 2:13 - जिरेल

¹³ दोक ईन्‍सीनोङ आज्‍यो न्‍वावे, ख्‍योकोनलाचेन प्रभु येशू ख्रीष्‍टकी आउदी ङिङज्‍ये खाबा ओत। थेमे ङ्योकोन जहिलेङ ख्‍योकोन लाईदु परमेश्‍वरला धन्‍यवाद सिओ। परमेश्‍वर आत्‍मेकी खित्‍सादु ख्‍योकोन सेम खुदुक गालाते मि ओङला थेमे सत्‍यते बात ङेन्‍ला ख्‍योकोनगी पापकी सजाय भोगे खिता माफाप्‍स्‍यीत सिन परमेश्‍वरगी ख्‍योकोनला दि सा नाम ज्‍वा भन्‍दा गोमाकाराङ छाने खाबा ओतेकी ङ्योकोनगी थेला धन्‍यवाद सिरा फाप्‍च्‍येतेराङ ईन।

२ थिस्‍सलोनिकी 2:13 Iomraidhean Croise

लूका 1:75

थोक खानामेई ङुरूङगी जुनी खाङराङ थेकी खि साबा साबा ङेन्‍ला थेला मन परे खित्‍च्‍येते काम खिन देता थुप्‍क्‍यो सिन अब्राहामताङ बात खाबा ओतान।

यूहन्‍ना 1:1

दि सा नाम ज्‍वा भन्‍दा गोमाराङ थे बात सिराते ओतान। थे परमेश्‍वरताङ ङ्योम्‍बुराङ ओतान। थेमे थेचेन थे खोरोङराङ परमेश्‍वरोङ ईन।

यूहन्‍ना 14:6

थोक सिरजीन येशूकी “आबा ओत्‍साने डोच्‍येते लाम ङाराङ ईन। सत्‍यते परमेश्‍वरला छ्या स्‍ये ज्‍युत्‍कान्‍तेङ ङाराङ ईन। थेमे मिओनला नोमुङ मिसिन्‍च्‍येते जुनी तेरकान्‍तेङ ङाराङ ईन। ङे छ्य्‌वापेई मेन्‍दाला सुङ आबा ओत्‍साने ड्वा मुथुबो।

शक्ति काम 13:48

पावलताङ बारनाबासकी दोक सिरजीन ज्‍येन ज्‍येन जातकी मि आउदी खाईन गा खासुङ। थेमे प्रभु येशू बात चुक लेमु दुका सिन बात खिताला स्‍यूसुङ। दोक खाईन नोमुङ मिसिन्‍च्‍येते जुनी तेराला परमेश्‍वरगी छाने खाबाते मिओनगीचेन येशूला विश्‍वास खिताला स्‍यूसुङ।

शक्ति काम 15:9

थेबेकी येशूला विश्‍वास खाबेकी खित्‍सादु परमेश्‍वरगी थेबे पाप गाङे माफ बिन्‍गीन थेबे सेम लेमु जोसुङ। थोक खाईन थेकी ङुरूङ यहूदीताङ थेबाला दोक्‍पोईराङ सम्‍झे खाबा ओत।

रोमी 6:17

गोमा ख्‍योकोन पापकी योक्‍पो च्‍योकराङ ओता ईन्‍सीनोङ थाचेन ख्‍योकोनगी खेराङला लापाते परमेश्‍वर बात सत्‍यते दुका सिन लेमु खाईन ङेन्‍गीन थेरू खि साबा च्‍योकराङ खिताला स्‍यूसुङ। ख्‍योकोन दोक खुदुक गालाते बातकी लाईदु परमेश्‍वरला धन्‍यवाद तेरगी।

रोमी 8:33

थेमे परमेश्‍वरगी छाने खाबाते मिओनला था च्‍यि सुइँदेकी दोषी ईन सिरा ङेत्‍क्‍यो? सुङगीङ थेबाला दोषी ईन सिराराङ मेङेदो। च्‍यिला सासीन परमेश्‍वरगीराङ थेबाला दोषी मेन साबा ओत।

रोमी 9:11

थेबा ङिबोकी लेमुताङ मेलेबा छ्याःङ काम माक्‍याबाला थेबा क्‍या भन्‍दा गोमाराङ परमेश्‍वरगी रिबेकाला “आज्‍योतेकीका न्‍वातेला मान खिता फाप्‍क्‍यो,” सिन साबा ओतान। परमेश्‍वरगी सुइँदाला थे खोरोङ दोन्‍दु स्‍योक सिन छाने खित्‍जीन मिकी खाबाते लेमुताङ मेलेबा काम ताला मेन, थे खोरोङला छाने खिता सेम लाबातेला छाने खिओ सिन तेन्‍दालाराङ थेकी थेबा ङिबो नाङ न्‍वातेला थोक खाईन छाने खाबा ओतान।

१ कोरिन्‍थी 1:21

दोक खाईन आउदी बुद्धि पुरे खाला काम खित्‍कान्‍ते परमेश्‍वरगी दि सा लुङबे मिओनगी जति बुद्धि खिये खासीनोङ खोपरोङ बुद्धिकी थेला छ्या स्‍येबा मुथुबो सिन तेन्‍गीन बिन्‍दा ओत। मिओनगी लेम्‍बे बात ईन सिरच्‍येते ङ्योकोनगी लोप्‍च्‍येते बातराङ मिओनगी ङेन्‍स्‍यीत थेमे दि बात ङेन्‍ला येशूला विश्‍वास खित्‍कान्‍तेबाला पापकी सजायदुकी डेल्‍ग्‍यो सिन परमेश्‍वरगी टुङ्गो खाईन दोक खिताराङ थेला लेमु लासुङ।

गलाती 3:1

गलातिये मिवे, ख्‍योकोन च्‍यिला लेम्‍बे काम खिता छोल्‍गीते? ख्‍योकोनला सुई च्‍यि कुल्‍गीन लै खाईन दोक गाल्‍सुङा? येशू ख्रीष्‍टला स्‍यिङगी थामला टाँए खाईन सेताते बात ङे ख्‍योकोनला लेमु खाईन खोबा खाईन बिन्‍दा ओतान मेन?

एफिसी 2:8

ख्‍योकोनगी थेला विश्‍वास खानामेई थे खोरोङ दयेकीकामा परमेश्‍वरगी ख्‍योकोनला पापकी सजायदुकी टालाते ईन। ख्‍योकोनगी खइँदा लेमु काम खाबेकी खित्‍सादु मेन्‍गीन थे खोरोङगी दोक खिता चालेकीकामा थेकी ख्‍योकोनला पापकी सजायदुकी टालाते ईन।

कलस्‍सी 1:5

परमेश्‍वरगी था तिरी खेराङला स्‍वर्गने तेरग्‍यो सिन साबातेबा ङेत्‍क्‍यो सिन खेराङगी आश खाईन देताते पक्‍काराङ ङेत्‍क्‍यो सिन छ्या स्‍येबेकीराङ ख्‍योकोनगी थोक लेमु खिन ओताते ईन। परमेश्‍वरगी खेराङला तेरग्‍यो साबाते ङेत्‍क्‍यो सिनचेन ख्‍योकोनगी सत्‍यते बात थोनामेई छ्या स्‍येबा ओत। सत्‍यते बातचेन गा लाङच्‍येते बात ईन।

कलस्‍सी 3:12

परमेश्‍वरगी ख्‍योकोनला थे खोरोङ सन्‍तान सिन छाने खाईन ख्‍योकोन सेम खुदुक जोबा ओत, थेकी ख्‍योकोनला आउदी खाला ङिङज्‍ये खिओ। ख्‍योकोन बात दोक ईन्‍देकी ख्‍योकोनगी चुक चुक खिता फाप्‍कीते सासीन पीर फापा ओतातेबाला पीर माकेत सिन सिरा फाप्‍क्‍यो, ज्‍येनगी दुक्‍पाला ता फाप्‍क्‍यो, ङा ङाराङ ईन सिराच्‍योक खिता मेङगो, गाङेताङ खा छ्येत लेमु खिता फाप्‍क्‍यो, होत्ताराङ स्‍येदाङ खिता मेङगो,

१ थिस्‍सलोनिकी 1:4

आज्‍यो न्‍वावे, परमेश्‍वरगी ख्‍योकोनला ङिङज्‍ये खाईन थे खोरोङ मि ईन सिन छाने खाबाते ईन सिरच्‍येते बादोङ ङ्योकोनला छ्या ओत।

१ थिस्‍सलोनिकी 2:12

थेमे परमेश्‍वर मिओनगी चुक चुक खिता फाप्‍कीते सिन लाप्‍कीन थोक खिन देत सिन लोप्‍कीन देताप। ख्‍योकोन थे खोरोङ राज्‍यदु देता ङेत्‍स्‍यीत थेमे थे खोरोङ चुक छ्ये ईन्‍दाका सिन लेमु खाला छ्या स्‍येस्‍यीत सिन थे खोरोङ दोन्‍दु स्‍योक सिन कातोङकान्‍ते परमेश्‍वरराङ ईन।

१ थिस्‍सलोनिकी 4:7

परमेश्‍वरगी होथोक्‍ते काम खित्‍स्‍यीत सिन मेन, ङुरूङ सेम खुदुक गाल्‍ला थोक्‍ते मेलेबाते काम सिराते छ्याःङ मिक्‍किस्‍यीत सिन ङुरूङला थे खोरोङ दोन्‍दु स्‍योक सिन काताङाते ईन।

१ थिस्‍सलोनिकी 5:9

परमेश्‍वरगी ङुरूङला छाने खाबाते स्‍येदाङगी चूर गाल्‍ला सजाय तेराला मेन, ङुरूङ प्रभु येशू ख्रीष्‍टकी खाबाते कामगी खित्‍सादु पूरो खाला पापदुकी टाल्‍ला स्‍वर्गने देत ज्‍युताप सिन ईन।

२ थिस्‍सलोनिकी 1:3

आज्‍यो न्‍वावे, ख्‍योकोनगी प्रभु येशूला झन झन लेमु खाईन विश्‍वास खाबाते थेमे दाक्‍पोन नाङ दोक्‍पोईकी ज्‍येनज्‍यीकला झन ङिङज्‍ये खिन वाबा थोङजीन ङ्योकोन जहिलेङ ख्‍योकोन लाईदु परमेश्‍वरला धन्‍यवाद सिओ। ख्‍योकोनगी थोक लेमु खिन ओतेकी ङ्योकोनगी परमेश्‍वरला धन्‍यवाद सिरा फाप्‍च्‍येतेराङ ईन।

२ थिस्‍सलोनिकी 2:10

दोस्‍यिककामा मेन, दोक्‍ते ज्‍येनोङ मेलेबा मेलेबा काम खाला थेकी नरककुण्‍डमा स्‍यूक्‍कान्‍ते मिओनला मिकला छारो ग्‍याप्‍ला थे खोरोङ छ्य्‌वापा लै खित ज्‍युत्‍क्‍यो। थे मिओनगी सत्‍यते बात ङेन्‍दा सेम माक्‍याबेकीराङ थेबा नरककुण्‍डमा स्‍यूक्‍च्‍येते ईन। सत्‍यते बात ङेन्‍दा सेम खाबा ईन्‍सीनचेन परमेश्‍वरगी थेबाला पापदुकी डेल्‍च्‍या ओतान।

२ थिस्‍सलोनिकी 2:12

थोक खाला सत्‍यते बात माङेन्‍ला खालि परमेश्‍वरगी माकेत साबाते कामकामा खिता सेम खाला थोकराङ खित्‍कान गाङेला परमेश्‍वरगी थेबेकी ङेता फाप्‍च्‍येते सजाय तेरग्‍यो।

२ थिस्‍सलोनिकी 2:16

ङुरूङ आबा परमेश्‍वरगी ङुरूङला ङिङज्‍ये खाईन थे खोरोङ दयेकी जहिलेङ आँट तेरगीन देत्‍ला तिरी तेरग्‍यो सिन साबातेबा गाङे पक्‍काराङ ङेत्‍क्‍यो सिन आश खाला देत ज्‍युत्‍क्‍यो। दोक खित्‍कान्‍ते परमेश्‍वरताङ ङुरूङ प्रभु येशू ख्रीष्‍ट थे खोरोङगीराङ ख्‍योकोनला आँट बिन्‍ला ख्‍योकोनगी खिन ओताते लेमुते कामताङ बात गाङे खिनराङ देत ज्‍युत्‍स्‍यीत सिन ङ्योकोन प्रार्थना खिओ।

२ तिमोथी 1:9

थेकीराङ ङुरूङला पापकी सजायदुकी टाल्‍गीन बिन्‍दा ओत। थेमे ङुरूङ सेम खुदुक गाल्‍ला मेलेबाते कामताङ बात सिराते छ्याःङ मिक्‍किस्‍यीत सिन थे खोरोङ दोन्‍दु स्‍योक सिन काताङा ओत। थेकी थोक खाबाते ङुरूङगी थेकी खि साबा साबाच्‍योक खाईन लेमु काम खाबेकी खित्‍सादु मेन, बरू थे खोरोङ दयेकी ङुरूङला थोक खिता चालेकी खित्‍सादुकामा ईन। येशू ख्रीष्‍ट छ्य्‌वापेकी ङुरूङ लाईदु दोक खिओ सिन थेकी दि सा नाम ज्‍वा भन्‍दा गोमाकाराङ टुङ्गो खाबा ओतान।

२ तिमोथी 2:15

परमेश्‍वरगी खोरोङला लेमु खाला काम खित्‍कान्‍ते मि ईन सिरस्‍यीत सिन खुईचेन लेमु काम खित्‍च्‍ये छ्य्‌वापाकामा स्‍येत खि। थोक ओङला थे दोन्‍दु खोरोङगी छ्याःङ ङोचा खिता माफाप्‍स्‍यीत सिन सत्‍यते बात लोप्‍जीन खुई च्‍यि बात चुक खाला लोपा फाप्‍च्‍येते ईन्‍दे होथोकराङ खाला लोप।

२ तिमोथी 3:15

थेमे च्‍याक फिजामेईराङ खोरोङगी दि बात चुक खाईन ङेन्‍गीन वाबाते ईन्‍दे सिन टोक माज्‍येत। परमेश्‍वर बात ताला येशू ख्रीष्‍टला विश्‍वास खित्‍कान्‍ते मिओनला थेकी पापदुकी डेल्‍ग्‍यो सिन खुई लेमु खाला छ्या स्‍येक्‍यो।

हिब्रू 1:10

परमेश्‍वरगी थे खोरोङ फुज्‍युङ चुक्‍ते ईन्‍दे सिन साबाते बातलाराङ लोक्‍ला “प्रभु परमेश्‍वर, गाङे भन्‍दा गोमा खुईराङ दि सा लुङबा जोबाते ईन। नामताङ नामगी नाङला ओताते जति जोकान्‍तेङ खोराङ ईन।

याकूब 1:18

परमेश्‍वरगीराङ ङुरूङला सत्‍यते बात छ्या स्‍ये च्‍युत्‍कीन थे खोरोङ फुज्‍युङ फुमु जोसुङ। दोक खाईन थेकी थे खोरोङगी जोबाते गाङे नाङ ङुरूङलाचेन थेला चढे खाबाते साम्‍बाते बाली च्‍योक जोसुङ।

१ यूहन्‍ना 4:10

परमेश्‍वरगी ङुरूङला ङिङज्‍ये खाबाते सिराते च्‍यि ईन्‍दे सासीन ङुरूङगी थेला ङिङज्‍ये खाबाते मेन, थेकीका ङुरूङला ङिङज्‍ये खासुङ। चुक सासीन ङुरूङ पाप माफ तेरा थुप्‍स्‍यीत सिन ङुरूङगी खाबाते पापकी सजाय भोगे खाला स्‍याप्‍ला थेकी थे खोरोङ फुज्‍युङला देमा ताङाते ईन।

१ यूहन्‍ना 4:19

गोमा परमेश्‍वरगी ङुरूङला ङिङज्‍ये खासुङ। थोगी ङुरूङ दोक्‍पोईकी ज्‍येनज्‍यीकला ङिङज्‍ये खिओ।