२ पत्रुस 3:16 - जिरेल

¹⁶ प्रभु येशू ग्‍युरला ओङच्‍येते बात थेकी थे खोरोङ चिट्ठी गाङेला टिबा ओत। ईन्‍दानी थेकी टिबाते कोई कोई बातकी अर्थ खोबाला आउदी दुक्‍पाङ ओत। थोगीराङ परमेश्‍वर बात लेमु खाईन छ्या स्‍येबा मेताते सेम ङि ओताते मिओनगी थे चिट्ठी बाततेबा खोपरोङ अर्थ लै खाला लोप्‍कीदुक। थेबेकीचेन परमेश्‍वर बातला साबाते ज्‍येन बादोङ होदोकराङ खाला लोप्‍क्‍यो। दोक खाबेकी थेबे गोःनामा परमेश्‍वर सजाय फाप्‍क्‍यो।

२ पत्रुस 3:16 Iomraidhean Croise

मत्ती 15:3

थोक सिरजीन थेकीङ “ख्‍योकोनचेन याङ च्‍यिला खेराङ रीतिथिति माने खिताला परमेश्‍वर नियमओन मेङेन्‍ते?

मत्ती 15:6

दोक खाला ख्‍योकोनगी मिओनला दाक्‍पोन आबा आमाला बुढेसकालला मातासीनोङ ओङगो सिराच्‍योक खिदुक। खेराङगी जोबाते रीतिथिति माने खित्‍सादु ख्‍योकोनगी होदोक खाईन परमेश्‍वर नियम ङेन्‍दा ताङला दुक।

मत्ती 22:29

थेबेकी थोक सिरजीन येशूकी “ख्‍योकोनगी मि स्‍यिनामेई तिरी सोम्‍बो मोलोगो सिन सिओ। दि बात ईनराङ मेन। परमेश्‍वर बात पढे खित्‍जीन थेरू च्‍यि साबाते ईन्‍दे सिन ख्‍योकोनगी खोबा ईन्‍सीन थेमे परमेश्‍वरताङ जेङ खिता थुप्‍च्‍येते शक्ति ओत सिन छ्या स्‍येबा ओता ईन्‍सीन मि तिरी सोम्‍बो मोलोगो सिन सिरच्‍या मेतान।

फिलिप्‍पी 3:19

थोक्‍ते मिओननी तिरी सजाय ङेत्‍ला नरककुण्‍डमा स्‍यूक्‍पा फाप्‍क्‍यो। थेबेकीचेन खालि साच्‍या थुङच्‍ये बातताङ खोपरोङला जे खिता सेम लाङगीदुक थेराङ खिदुक। थोक मेलेबा काम खासीनोङ छ्याःङ ङोचा मिक्‍किता खाला खोपरोङगी आउदी लेमु काम खाबाप सिरा च्‍योकका खिदुक। थेबेकी खालि दि जुनीला च्‍यि च्‍यि गोच्‍या दुका थेतेकामा विचार खिदुक।

हिब्रू 5:11

ङुरूङते गाङे भन्‍दा छ्येते पूजारी विषयला ख्‍योकोनला सिरा फाप्‍च्‍येते दोक्‍ते बात थोरूमोङ काल्‍बेई ओत। ईन्‍सीनोङ ख्‍योकोन खोले खोलेकामा खोकान ईन्‍देकी दोक्‍ते बात पालोईला सिराराङ मुथुबो।

याकूब 1:8

थोक्‍ते मिचेन सेम ङि ओताते मि ईन्‍देकी थेकी जे खित्‍जीनोङ नोमुङ ङा दिराङ खितामीन सिन सिरा मुथुबो।

१ पत्रुस 1:1

दि चिट्ठी टिक्‍कान्‍ते ङा पत्रुस ईन। ङा येशू ख्रीष्‍टकी खटे खाबाते मि ईन। ङा दि चिट्ठी पोन्‍टस, गलातिया, कापाडोसिया, एशिया थेमे बिथिनिये नाङला मि लुङबे मि च्‍योकराङ ओङगीन लुङबा लुङबाला गाल्‍गीन देता ओताते मिओनला टिगीन ओत। ख्‍योकोन परमेश्‍वरगी छाने खाबाते मि ईन।

१ पत्रुस 2:8

परमेश्‍वर बातलाराङ “थे दोला मि काल्‍बेई नार्दोक देइओ। ठाःक छेतज्‍यीक ओताते थे दोला मि काल्‍बेई ठोके खाला रिल्‍ग्‍यो,” सिनोङ टिला दुक। परमेश्‍वर बातला नामज्‍योक मेसेत्‍कान्‍ते मिओनराङ थोक खाला रिल्‍ग्‍यो। थोक्‍ते मिओनला होदोक ओङ ज्‍युत्‍क्‍यो सिन परमेश्‍वरगी गोमाका साबा ओतान।

२ पत्रुस 2:1

गोमा इस्राएलीओन नाङ परमेश्‍वर बात खित्‍कान्‍ते मि ईन सिन मेन्‍दे बात लोप्‍कान्‍ते मिओन ओता च्‍योकराङ ख्‍योकोन नाङचेन परमेश्‍वर बात लोप्‍कान्‍ते मि ईन सिन मेन्‍दे बात लोप्‍कान्‍ते मिओन ओङगो। थेबेकी ख्‍योकोनला ङ्ये ज्‍युताला परमेश्‍वर बातताङ डिकराङ मिडिक्‍च्‍येते बात लोप्‍क्‍यो। थेबेकीनी खोपरोङ पापकी मोल च्‍याल्‍ला खोपरोङला पापदुकी डेल्‍कान्‍ते छ्येज्‍यीक शक्ति ओताते प्रभु येशूला मानेराङ मिक्‍किओ। दोक दोक खानामेई थेबे गोःनामा परमेश्‍वर सजाय फाप्‍क्‍यो।

२ पत्रुस 2:14

थेबाचेन थोङाते जति फेम्‍मे मित्ताङ ङ्यालाकामा छोल्‍ग्‍यो। थोक्‍ते काम खाला थेबा नोमुङ माडाओ। सेम ङि ओताते मिओनला खोपरोङ छ्य्‌वापा लै खित ज्‍युताला थेबा च्‍योक सिपालु ज्‍येन सुङ मेङगो। जहिलेङ सम्‍पत्ति लोभकामा खिन खापेकी चुक खाला सम्‍पत्ति ज्‍वा थुप्‍कीते सिन थेबेकी लेमु खाईन छ्या स्‍येबा ओङगो। थेबाला परमेश्‍वर सराप फाप्‍क्‍यो।

२ पत्रुस 3:14

थोगी ङिङज्‍येते आज्‍यो न्‍वावे, था तिरी दोक दोक ओङगो सिन खेराङ गुकीन देता ओतेकी ख्‍योकोन छ्याःङ गल्‍ती मेताते, सुङगीङ दिबेकी दोक दोक गल्‍ती खाबा ओत सिरा मुथुप्‍च्‍या थेमे परमेश्‍वरताङ डिक्‍ला देत्‍कान्‍ते मि ओङा थुप्‍स्‍यीत सिन ख्‍योकोनगी काम बात जे खित्‍जीनोङ लेमु खित्‍च्‍ये छ्य्‌वापाकामा स्‍येत खि।

२ पत्रुस 3:2

परमेश्‍वर बात खित्‍कान्‍ते मिओनगी गोमाका साबाते बाततेबा थेमे ङुरूङला पापदुकी डेल्‍कान्‍ते प्रभु येशू ख्रीष्‍टकी खि साबाते थेकी खटे खाबाते मिओनगी खेराङला लाप्‍कीन बिन्‍दाते बातओन ख्‍योकोनगी नोमुङ टोक माज्‍येत।

यहूदा 1:4

ङे च्‍यिला थे बात ङेन्‍दा तोङा मेङगो साबाते ईन्‍दे सासीन कोई कोई मि खाराक्‍पा ख्‍योकोन नाङ स्‍यूकीन सिन्‍दा ओत। थेबाचेन परमेश्‍वरगी माकेत साबा साबाते काम खित्‍कान्‍ते मि ईन। थेबेकी ङुरूङ परमेश्‍वरगी मिला दया खाला पापदुकी डेल्‍च्‍येते बातला चुक खिका सासीन परमेश्‍वरगी दाक्‍पोनला दया खाईन पापदुकी टाला ओतेकी था ङुरूङगी जे खासीनोङ ओङगो सिन रन्‍डीबाजी थेमे होदि च्‍योक्‍ते खिता मेङच्‍येते काम खिदुक। थेमे ङुरूङ मालिक येशू ख्रीष्‍टलाङ माने मिक्‍किदुक। गाङेपा गाङेला राज्‍य खित्‍कान्‍ते थेकामा ईन। होथोक्‍ते मिओनगी चुकस्‍यिक सजाय ङेत्‍कीते सिन परमेश्‍वर बातला गोमाका टिबा ओत।