२ पत्रुस 3:15 - जिरेल

¹⁵ मिओन पापकी सजायदुकी थारस्‍यीत सिनकामा प्रभु परमेश्‍वर थोरूमसाक सजाय मेतेरा खाईन गुकीन देताते ईन। परमेश्‍वरगी छ्या स्‍ये च्‍युत्‍कीन बिन्‍दा ओतेकी ङुरूङ ङिङज्‍येते आज्‍यो पावलगीङ परमेश्‍वर च्‍यिला गुकीन देताते ईन्‍दे सिन बात खित्‍जीन ख्‍योकोनला दि बातराङ टिबा ओत।

२ पत्रुस 3:15 Iomraidhean Croise

लूका 21:15

च्‍यिला सासीन थेजीन ङा ङाराङराङ ख्‍योकोनला चुक सिन बात खित्‍च्‍ये सिन बुद्धि तेरग्‍यो। थोक ओङनामेकी ख्‍योकोन विरोध खित्‍कान्‍तेबा सुङगीङ ख्‍योकोन बातला मेन सिरा मुथुबो, ख्‍योकोन बात साँचो मेन सिन थेबेकी छ्याःङ कारण तेरा मुथुबो।

शक्ति काम 15:25

दि बात थोनामेकी ङ्योकोन गाङेकी डिगीन दुरू ङेराङ नाङदुई कोई कोईला छाने खाला पावल थेमे बारनाबासताङराङ ख्‍योकोन ओत्‍सापा तोङगी सिन सल्‍लाह खाबाप। पावलताङ बारनाबासला ङ्योकोन आउदी ङिङज्‍ये खिओ।

शक्ति काम 7:10

थेकी आउदी दुक्‍पा ङेत्‍सीनोङ परमेश्‍वरगी थेला लेमु खाईन ताकीन याङ याङ थे दुक्‍पादुकी टाल्‍गीन बिन्‍दा ओतान। परमेश्‍वरगी थेला आउदी बुद्धि बिन्‍दा ओतान। थोगी तिरी मिश्रे गेल्‍बो फारो दोन्‍दु क्‍याल्‍नामेकी थेकी थेला आउदी बुद्धि ओताज्‍यीक थोङगीन थे खोरोङ लुङबे छ्येते मि जोकीन लुङबा खाङ गाङेपा ताच्‍येते अधिकार बिन्‍दा ओतान। थेमे थे खोरोङ दरवारदु जेसुकै ताच्‍येते जिम्‍माङ थेलाराङ बिन्‍दा ओतान।

शक्ति काम 9:17

थेमे हननिया थे खोरोङला ग्‍युक साबाते मि खाम्‍बापा गाल्‍गीन शावलला ठेता खासुङ। थेमे थेकी थे लाक्‍तु लाक्‍पा ज्‍यागीन थेला “भाइ शावल, देपा ओङजीन खोरोङगी लामनापा ठेताते प्रभु येशूकीराङ था खुई मिगी थोङा थुप्‍स्‍यीत थेमे परमेश्‍वर आत्‍मा ङेत्‍ला खो परमेश्‍वर आत्‍मेकी खाङाते मि ओङस्‍यीत सिन ङाला दुरू ताङाते ईन,” सिन सासुङ।

रोमी 2:4

ख्‍योकोनलाचेन खेराङ लेमु मि ईन्‍गीनका परमेश्‍वरगी आउदी दया खाला लेमु खिन ओताते ईन सिराच्‍योक लाङगीतासीन। तर बात दोक मेन। ख्‍योकोनगी खेराङ पापी दुका सिन छ्या स्‍येला थे खोरोङ छ्य्‌वापा लै खित्‍स्‍यीत सिनका परमेश्‍वरगी थरिङसाक छ्याःङ मिक्‍किता खाईन देताते ईन सिन ख्‍योकोनगी छ्या स्‍येबा खि।

१ कोरिन्‍थी 12:8

चुक सासीन परमेश्‍वर आत्‍मेकी कोईला परमेश्‍वर बातकी अर्थ खोले खित्‍च्‍येते बुद्धि बिन्‍दा ओङगो सासीन थेकीराङ कोईला परमेश्‍वरगी चुक खाला काम खिते सिन छ्या स्‍ये च्‍युताते बात लोप्‍च्‍येते शक्ति बिन्‍दा ओङगो।

१ कोरिन्‍थी 2:13

थोगी ङ्योकोनगी लोप्‍च्‍येते बातचेन सुइँदा मिकी ङ्योकोनला लाप्‍कीन बिन्‍दाते बात मेन, परमेश्‍वर आत्‍मेकी लाप्‍कीन बिन्‍दाते बात ईन। दोक खाला ङ्योकोन परमेश्‍वर आत्‍मा ङेता ओताते मिओनला परमेश्‍वर आत्‍मेकी लोप साबाते सत्‍यते बात लोप्‍क्‍यो।

१ कोरिन्‍थी 3:10

परमेश्‍वरगी ङाला दया खाईन थे खोरोङ काम खि साबा ओतेकी ङे खाम्‍बा ज्‍वाप्‍ला आउदी सिपालु ओताते मिकी च्‍योकराङ खाईन जग तिङाप। ज्‍येनगीचेन दि जगी लाक खाम्‍बा जोइन ओत। तर खाम्‍बा जोकान्‍ते मिकी थे खोरोङगी चुक खाला जोइन ओते सिन लेमु खाला छ्या स्‍येबा फाप्‍क्‍यो।

एफिसी 3:3

च्‍यि सासीन गोमा सुङलाङ छ्या स्‍ये च्‍युता मेताते बात च्‍यि ईन्‍दे सिन परमेश्‍वर थे खोरोङगीराङ ङाला छ्या स्‍ये च्‍युत्‍कीन बिन्‍सुङ। थे बात च्‍यि ईन्‍दे सिन ङे थुम्‍मी खाईन दि चिट्ठीला आनाङ भर्खर टिकीन सिन्‍दा ओत।

१ तिमोथी 1:16

ङा थोक्‍ते मि ईन्‍सीनोङ पापीओनला थे खोरोङगी चुक खिते सिरच्‍येते बात गाङेकी छ्या स्‍येस्‍यीत सिन येशू ख्रीष्‍टकी ङा च्‍योक्‍ते मिलाङ स्‍येदाङ सिराते बान्‍दा मिक्‍किता खाईन दया खासुङ। ङे तिरी थे खोरोङला विश्‍वास खाला नोमुङ मिसिन्‍च्‍येते जुनी ङेत्‍कान्‍ते मिओनगीङ थेकी थेबा खोपरोङला ङाला खाबा च्‍योकराङ स्‍येदाङ खिता साटोला दया खिओ सिन छ्या स्‍येस्‍यीत सिन थेकी ङाला थोक खाबा ओतान।

याकूब 1:5

थेमे ख्‍योकोन सुइँदाला च्‍यि खित्‍च्‍ये, चुक खित्‍च्‍ये सिन छ्या मेते बेलाला चुक खित्‍च्‍ये सिन बुद्धि नाङ सिन परमेश्‍वरताङ प्रार्थना खि। दोक खानामेई मिओनला लेमु खित्‍कान्‍ते ईन्‍देकी थेकी छ्याःङ दुक्‍स्‍यी मिक्‍किता खाला खेराङला गोबाते बुद्धि तेरग्‍यो।

याकूब 3:17

तर परमेश्‍वरगी बिन्‍दाते बुद्धि ङेता ओताते मिओनगीचेन काम बात जे खित्‍जीनोङ लेमुतेकामा खिओ, थेबा ज्‍येनताङ डिक्‍ला थुन्‍ला देता छोल्‍ग्‍यो, गाङेताङ खा छ्येत लेमु खिओ, दाक्‍पोन भन्‍दा छ्येकी साबाते ङेन्‍ग्‍यो, ज्‍येनला ङिङज्‍ये खाला लेमु लेमु काम खिओ, सुङलाङ काका पाका मिक्‍किओ थेमे सेमला मेलेबा विचार मोज्‍योओ।

१ पत्रुस 3:20

होथे मिओनगीचेन थाङबो अटेरी खाईन परमेश्‍वर बातला नामज्‍योकराङ सेता मेतान। थेजीन नूहेकी पानीजहाज जोला सिन सिनसाकराङ परमेश्‍वरचेन ना थेबेकी थे खोरोङ बात ङेन्‍गीता सिन गुकीनराङ देता ओतान। थेजीन थे पानीजहाज नाङ स्‍यूकीन मि टिक्‍पीस्‍यिक, खालि मेरा गेतकामा थे छ्युई भलदुई सोन्‍दा ओतान।

२ पत्रुस 3:2

परमेश्‍वर बात खित्‍कान्‍ते मिओनगी गोमाका साबाते बाततेबा थेमे ङुरूङला पापदुकी डेल्‍कान्‍ते प्रभु येशू ख्रीष्‍टकी खि साबाते थेकी खटे खाबाते मिओनगी खेराङला लाप्‍कीन बिन्‍दाते बातओन ख्‍योकोनगी नोमुङ टोक माज्‍येत।

२ पत्रुस 3:9

मि कोई कोईकी परमेश्‍वरगी खिओ साबाते बात थेकी खोले खोलेकामा खिओ सिन विचार खिदुक। तर बात दोक मेन। मि सुङ नरककुण्‍डमा स्‍यूक्‍पा माफाप्‍स्‍यीत, बरू थेबा गाङेकी खोपरोङ पापी दुका सिन छ्या स्‍येला थे खोरोङ छ्य्‌वापा लै खित्‍स्‍यीत सिनकामा सजाय मेतेरा खाईन थे गुकीन देताते ईन।