२ पत्रुस 3:11 - जिरेल

¹¹ था ङीमाई दोक खाला जेसुकै खतम डोच्‍येते ईन्‍देकी ख्‍योकोनगी चुक खिता फाप्‍कीते छ्या ओत? ख्‍योकोनगी काम बात जे खासीनोङ लेमुते थेमे परमेश्‍वरला मन परे खित्‍च्‍येतेकामा खिता फाप्‍क्‍यो।

२ पत्रुस 3:11 Iomraidhean Croise

मत्ती 8:27

थोक थोङगीन चेलातेबा छकदाङ परे खासुङ। थेमे “आबिई, दि मि चुक अचम्‍बज्‍यीक ईन्‍दाका। दिकी कोतातेनी ल्‍हाबाताङ समुन्‍द्रे छालगी समेदोङ ङेन्‍गीदुक,” सिन सासुङ।

रोमी 13:11

थेमे ज्‍येनोङ बात च्‍यि सासीन था गोमा च्‍योकराङ मेन सिन ख्‍योकोनगी विचार खि। काम खिता फाप्‍च्‍या ओत सिन ङिक गाल्‍सादुकी ङिक छेत्‍ला लाङाच्‍योक खाला था ख्‍योकोनगी झन लेमु खाला काम खि। च्‍यिला सासीन ङुरूङगी गोमा येशू ख्रीष्‍टला विश्‍वास खिताला स्‍यूक्‍पे बेलाला परमेश्‍वरगी ङुरूङला पूरो खाला पापदुकी टाल्‍ला स्‍वर्गने देताला खेरच्‍येते समय आदोराङ बाँकी ओतान। थेकी थोक खित्‍च्‍येते समय था काल्‍बा बाँकी मेत।

रोमी 13:12

था नुप गाल्‍गीन नाम लाङा खाबा ओत। थोगी ङुरूङगी ज्‍येनगी थाहा मेछ्येत्‍स्‍यीत सिन मुन्‍दाकला खित्‍च्‍येते च्‍योक्‍ते मेलेबाते काम खित्‍च्‍येते गाङे तोङा फाप्‍क्‍यो। बरू गाङे ङोन्‍दु ङीमे कार्बोलाराङ खिता ओङच्‍येते च्‍योक्‍ते काम खिताला परमेश्‍वरगी तेरच्‍येते हात हतियार चले खिता फाप्‍क्‍यो। दोकचेन ङुरूङगी परमेश्‍वर शक्ति छ्य्‌वापेकी लेमुते कामकामा खिता फाप्‍क्‍यो साबाते ईन।

२ कोरिन्‍थी 1:12

थेमे दि बात ङ्योकोन छ्याःङ ज्‍यीबा मिक्‍किता खाला सिरा थुप्‍क्‍यो। च्‍यि सासीन ज्‍येनगी दोन्‍दु ईन्‍स्‍यीत, ख्‍योकोन दोन्‍दु ईन्‍स्‍यीत जे खासीनोङ जहिलेङ ङ्योकोनगी सेमला पाप सिराते छ्याःङ मोज्‍योबा खाईन परमेश्‍वरगी खि साबा च्‍योकराङ खाईन लेमुते कामताङ साँचोते बातकामा खाबा ओत। ङेराङ स्‍येतताङ बुद्धिकी खित्‍सादु ङ्योकोनगी थोक खिता थुपाते मेन। परमेश्‍वर दयेकी खित्‍सादुराङ थोक खिता थुपाते ईन।

फिलिप्‍पी 1:27

था जे ओङसीनोङ ख्रीष्‍टते गा लाङच्‍येते बात ङेन्‍कान्‍ते मिओनगी चुक चुक खिता फाप्‍च्‍येते ईन्‍दे ख्‍योकोनगी होथोकराङ खि। च्‍यि सासीन ख्‍योकोन गाङेराङ सेमज्‍यीकराङ खाला डिक्‍ला देत। ज्‍येनगी जे सासीनोङ जति दुक्‍पा बिन्‍सीनोङ ख्‍योकोन गाङेराङ डिक्‍ला खेराङगी ङेन्‍दाते गा लाङच्‍येते बात ङेन्‍गीनराङ देत। ङा थेपा वासीन ख्‍योकोनगी थोक खिन ओताते ङाराङगीराङ थोङगो, मासुङ सासीनोङ ख्‍योकोनगी थोक खिन दुक्‍लो सिन ङे थोबा ङेत्‍स्‍यीत।

फिलिप्‍पी 3:20

ङुरूङचेन स्‍वर्गने देता ङेत्‍कान्‍ते मि ईन। ङुरूङला पापदुकी डेल्‍कान्‍ते प्रभु येशू ख्रीष्‍ट था नामराङ थेनेकी ग्‍युरला वाओङा सिन ङुरूङ गुकीन देता ओत।

१ थिस्‍सलोनिकी 1:5

च्‍यिला सासीन ङ्योकोनगी लोप्‍च्‍येते गा लाङच्‍येते बातचेन मि बातकामा मेन्‍देकी थे बातकी छ्य्‌वापेई परमेश्‍वरगी ख्‍योकोन नाङ छ्ये छ्ये शक्ति काम खासुङ। थे बात पक्‍काराङ सत्‍यते ईन सिन परमेश्‍वर आत्‍मे छ्य्‌वापेई लेमु खाईन छ्या स्‍येबेकी ङ्योकोनगी थे बात ख्‍योकोनला लेमु खाईन लोपा थुपाते ईन। थेजीन ख्‍योकोनताङ देत्‍जीन ख्‍योकोनला लेमु ओङस्‍यीत सिन ङ्योकोनगी चुक चुक खाबा ओताने सिन ख्‍योकोनला गाङे छ्या ओतेकी ङ्योकोनगी छ्याःङ सिरा माफाप्‍तासीन।

१ तिमोथी 3:16

परमेश्‍वरगी गोमा सुङलाङ छ्या स्‍ये च्‍युता मेताते थे खोरोङला चुक खाला माने खिता फाप्‍कीते सिरच्‍येते बात आउदी अचम्‍ब लाङच्‍याज्‍यीक दुक। दि बात मेन सिन सुङगीङ सिरा मुथुबो। दि बात च्‍यि ईन्‍दे सासीन ख्रीष्‍टचेन मि जुनी लाकीन पृथ्‍वीदु केसुङ। थे छ्याःङ गल्‍ती मेताते ईन सिन परमेश्‍वर आत्‍मेकी छ्या स्‍ये च्‍युता ओत। थेला परमेश्‍वर दूतओनगी थोङा ओत। जात जातकी मिला थे बात लाप्‍कीन बिन्‍दा ओत। सा लुङबा खाङ मिओनगी थेला विश्‍वास खाबा ओत। थेला परमेश्‍वरगी छ्येज्‍यीक मान बिन्‍गीन स्‍वर्गने खेरा ओत।

१ तिमोथी 4:12

खो थोरूमोङ स्‍याराराङ ओत्‍सीनोङ थोक खाला लोप्‍जीन कोत्‍जीन दि भर्खरगी फिजेकी साबाते बादोङ च्‍यि ङेन्‍च्‍ये, दिलाङ च्‍यि छ्या ओते सिन सिरच्‍येते लाम थेबा सुङलाङ मातेर। खो स्‍याराराङ दुक सिन हेपे मिक्‍किस्‍यीत सिन खोरोङगी खाबाते ताला येशू ख्रीष्‍टला विश्‍वास खित्‍कान्‍ते मिओनगी चुक चुक खिता फाप्‍च्‍या ईन्‍दाका सिन लोप्‍स्‍यीत सिन खुई दोक दोक खि। चुक सासीन खुई काम बात जे खासीनोङ लेमु खाला खि, ज्‍येनला ङिङज्‍ये खि, जे ओङसीनोङ येशू ख्रीष्‍टला विश्‍वास खिन देत, सेमला छ्याःङ पाप मोज्‍योबा खाला काम खि,

१ तिमोथी 6:11

तर खोचेन परमेश्‍वरगी खि साबाते काम खित्‍कान्‍ते मि ईन। थोगी खुई थोक्‍ते मेलेबा काम छ्याःङ माकेत। खुईचेन परमेश्‍वरगी खि साबा च्‍योकराङ खिन देत, थेला चुक खाला माने खिता फाप्‍च्‍येते ईन्‍दे थोकराङ खाला माने खि, येशू ख्रीष्‍टला विश्‍वास खिन देत। दोस्‍यिककामा मेन, ज्‍येनला ङिङज्‍ये खि, दुक्‍पा ओङसीनोङ खपे खिन देत थेमे गाङेताङ खा छ्येत लेमु खि। खुई होदोक दोक खित्‍च्‍ये छ्य्‌वापाकामा सेम लै खि।

१ तिमोथी 6:3

थेमे सुइँदेकी ङे लापाच्‍योक मेन्‍गीन खुदुकराङ बात लाप्‍ला ङुरूङ प्रभु येशू ख्रीष्‍ट सत्‍यते बातताङ मिडिक्‍च्‍येते बात लाप्‍सीन थेमे परमेश्‍वरला चुक खाला माने खिता फाप्‍कीते सिन लापा ओताच्‍योक खाईन मालाप्‍सुङ सासीन

१ तिमोथी 6:6

ईन्‍दानी परमेश्‍वरला माने खानामेई लेमु मेङच्‍येते मेन। थेला माने खित्‍जीन चुक खाला सम्‍पत्ति ज्‍वा थुबोङा सिराच्‍योक मिक्‍किता खाला आउदी गा खिन देता थुप्‍क्‍यो।

हिब्रू 13:5

थेमे ख्‍योकोनगी पैसे लोभ माकेत। खेराङताङ जति दुक थेलाराङ सन्‍तो खाला देत। च्‍यिला सासीन परमेश्‍वरगी “ङा ख्‍योकोनला सधैँ लेमु खाला तेइओ। नोमुङ ङा ख्‍योकोनला ताङला मोन्‍डोओ,” सिन साबा ओत।

याकूब 1:24

ऐनाला ता तासाककामा मिकी थे खोरोङ चुकस्‍यिक दुका सिन थोङगो। ऐना ताङगीन ख्‍याम्‍नामेकी थेकी थे खोरोङ चुकस्‍यिक ओताने सिन दाक टोक ज्‍येत्‍क्‍यो।

याकूब 3:13

थेमे च्‍यि ख्‍योकोन सुइँदाला खेराङ आउदी बुद्धि ओताते थेमे जे बादोङ लेमु खाला छ्या स्‍येकान्‍ते मि ईन सिराच्‍योक लाङगीदुक? खोपरोङ थोक्‍ते मि ईन सिरकानगी खोपरोङताङ पक्‍काराङ बुद्धि ओत सिरच्‍येते बात छ्ये मिक्‍किता खाला काम बात जे खित्‍जीनोङ लेमु खाला खिता फाप्‍क्‍यो।

१ पत्रुस 1:15

बरू सेमला पाप सिराते छ्याःङ मोज्‍योबा खाला काम बात जे खासीनोङ खेराङला थे खोरोङ दोन्‍दु स्‍योक सिन कातोङकान्‍ते परमेश्‍वरगी खाबा च्‍योकराङ खि। थे सेमला पाप सिराते छ्याःङ मेत।

१ पत्रुस 2:12

परमेश्‍वरला छ्या मेस्‍येकान्‍ते खेराङला मेलेबा मि ईन सिरकान्‍ते मिओन नाङराङ देता ओत्‍सीनोङ काम बात जे खित्‍जीनोङ ख्‍योकोनगी लेमुतेकामा खि। दोक खाईन ख्‍योकोनगी लेमुकामा खानामेई था परमेश्‍वरगी वाला मि गाङे न्‍याय खिते छोमु ख्‍योकोनला मेलेबा मि सिन सिरकान्‍ते होथे मिओनगी ख्‍योकोन थोक्‍ते मि मेन्‍दाक्‍वा सिन छ्या स्‍येला परमेश्‍वरते जय जय खिओ।

२ पत्रुस 1:3

दाक्‍पोनगी ङेताते साम्‍बाते जुनीला खिता फापाच्‍योक खिताला थेमे थेला माने खिताला खिता फाप्‍च्‍येते कामताङ बात खिताला गोच्‍येते जति गाङे परमेश्‍वरगी थे खोरोङताङ ओताते छ्येज्‍यीक शक्ति छ्य्‌वापेकी ङुरूङला बिन्‍दा ओत। थे सु ईन्‍दे, चुक्‍ते ईन्‍दे सिन थेला छ्या स्‍येबेकी खित्‍सादु थेकी ङुरूङला दोक खाईन गोच्‍येते जति बिन्‍दाते ईन। थे खोरोङताङ छ्येज्‍यीक शक्ति ओतेकी थेमे जे खित्‍जीनोङ लेमु खित्‍कान्‍ते ईन्‍देकी थेकी ङुरूङला थे खोरोङ दोन्‍दु स्‍योक सिन काताङा ओत।

२ पत्रुस 1:6

दिकामा मेन, दाक्‍पोन सेम काबूला स्‍योक, दुक्‍पा किम्‍मु जस्‍तो ओङजीनोङ सेम मेसेता खाला देत। दि लाक्‍तुङ ख्‍योकोनगी परमेश्‍वरला माने खिताला खिता फाप्‍च्‍येते कामताङ बात खि।

२ पत्रुस 3:10

चोर दि छोमुराङ ओङगो सिन सुङलाङ छ्या मेता च्‍योकराङ प्रभु येशू दि छोमु ग्‍युरला ओङगो सिनोङ सुङगीङ सिरा मुथुबो। थे ग्‍युरला ओङे छोमु नामचेन नामज्‍योक बु साच्‍याज्‍यीक ङोरो देन्‍गीन तोक तोरला डुइओ। दागार, ङीमाताङ कार्मातेबाङ मेकी छिक्‍ला सोला डुइओ। थोकराङ खाला दि सा लुङबाताङ दुरू ओताते जतिङ जेसुकै थाला डुइओ।

२ पत्रुस 3:12

परमेश्‍वरगी मि गाङे न्‍याय खित्‍च्‍येते थे दिन होत्ता ओङस्‍यीत सिन ख्‍योकोन होदोक खाला लेमु कामताङ बात खिन देत। थे छोमु नामचेन मेकी छिक्‍ला सोला डुइओ। थेमे दागार, ङीमाताङ कार्मातेबाङ मे रापकी खित्‍सादु बिले खाला खतम डुइओ।