२ पत्रुस 2:18 - जिरेल

¹⁸ च्‍यिला सासीन थेबेकी काम लै खित्‍च्‍येते बात सिराते छ्याःङ मोलोबो। खोपरोङ जे बादोङ छ्या स्‍येकान ईन सिराच्‍योक खाला आउदी छ्ये छ्ये बात खिओ। दाक्‍पोन खुशी खिन दि सा लुङबे मिओनगी खित्‍च्‍येते च्‍योक्‍ते खिता मेङच्‍या ङोचा लाङच्‍येते काम खिता ताङगीन भर्खर भर्खर परमेश्‍वरला विश्‍वास खिताला स्‍यूबाते मिओनला दिबेकी होथोक्‍ते काम खासीन छ्याःङ मेङगो साला लोक्‍ला गोमा खाबाते होथोक्‍ते कामराङ खित ज्‍युत्‍कीदुक।

२ पत्रुस 2:18 Iomraidhean Croise

शक्ति काम 2:40

बात खिन खिन पत्रुसकी थेबाला लोईन “पाप खाबेकी खित्‍सादु दि लुङबे मिओन गोःनामा परमेश्‍वर सजाय फाप्‍कीन सिन्‍दा ओत। थे सजायला माफाप्‍स्‍यीत सिन ओर्च्‍ये ङे बात ङेन्‍ला था ख्‍योकोनगीचेन ज्‍येन च्‍योकराङ खिन मादेत, पाप खिता थोङ,” सिन सासुङ।

शक्ति काम 8:9

थे सारदुराङ शिमोन सिराज्‍यीक मिङ ओतान। जादू तेन्‍गीन थेमे स्‍येबा खाबे काम खाईन थेकी थेरू सामरी गाङेला अचम्‍ब लाङा ओतान। थेचेन थे खोरोङताङ छ्येज्‍यीक शक्ति ओत सिराच्‍योक खाला आउदी छ्ये खिन ओतान।

रोमी 13:13

चुक सासीन ङुरूङगी गाङे ङोन्‍दु खिता ओङच्‍येते कामताङ बातकामा खिता फाप्‍क्‍यो। ज्‍येनताङ रूला भक्‍कुचूर सोला थुला मोज मज्‍जा खित्‍च्‍येते, छ्याङ रक्‍सीकी जिला ख्‍याम्‍च्‍येते थेमे रन्‍डीबाजीताङ होदि च्‍योक्‍ते खिता मेङच्‍येते ङोचा लाङच्‍येते काम खिता मेङगो। ज्‍येनताङ थोम्‍मु जीङगा खित्‍च्‍येते थेमे मिला डार खित्‍च्‍येतेङ खिता मेङगो।

एफिसी 4:17

थेमे प्रभु ख्रीष्‍टकी ङाला दोक सिरच्‍येते अधिकार बिन्‍दा ओतेकी ङा ख्‍योकोनला दि बाततेबा सिन ओत। च्‍यि सासीन ख्‍योकोनगीचेन परमेश्‍वरला छ्या मेस्‍येकान्‍ते मिओनगी च्‍योकराङ खिन देता मेङगो। परमेश्‍वरला छ्या मेस्‍येकान्‍ते मिओनचेन तिरी बात छ्याःङ विचार मिक्‍किकान्‍ते बुद्धि मेताते मि ईन।

२ थिस्‍सलोनिकी 2:4

परमेश्‍वर छ्येते शत्रुचेन होथे मिराङ ओङगो। था थेकी वाला चुक खिते सासीन गाङे भन्‍दा छ्येते थे खोरोङराङ ईन्‍दाच्‍योक खाला परमेश्‍वरला थेमे मिओनगी ल्‍हा लु सिन माने खिन वाबाते सुङलाङ थेमे छ्याःङलाङ माने खिता मेङगो सिन सिओ। दोस्‍यिककामा मेन, परमेश्‍वर मन्‍दिर नाङ स्‍यूला थेकी गाङेला थे खोरोङराङ परमेश्‍वर ईन साला थेरूराङ देत्‍क्‍यो।

याकूब 5:5

ख्‍योकोन स्‍यीम्‍बु स्‍यीम्‍बु सेइन थुङगीन किम्‍मु खाईन देत्‍ला दुक। दोक खाईन ख्‍योकोनगी था परमेश्‍वरगी मि गाङे न्‍याय खित्‍च्‍येते दिनगी लाईदु खेराङला पोस्‍ये खाईन ज्‍याक्‍ला दुक।

२ पत्रुस 1:4

थेकी जमान खाईन तेरग्‍यो साबाते आशी ङेत्‍नामेई ङुरूङगी खोपरोङ सेम मेलेबा ओतेकी दि सा लुङबे मिओनगी च्‍योक दाक्‍पोन सेमला लाबा लाबा मिक्‍किता खाला थेकी खिता च्‍योकराङ लेमु खिता थुप्‍क्‍यो।

२ पत्रुस 2:14

थेबाचेन थोङाते जति फेम्‍मे मित्ताङ ङ्यालाकामा छोल्‍ग्‍यो। थोक्‍ते काम खाला थेबा नोमुङ माडाओ। सेम ङि ओताते मिओनला खोपरोङ छ्य्‌वापा लै खित ज्‍युताला थेबा च्‍योक सिपालु ज्‍येन सुङ मेङगो। जहिलेङ सम्‍पत्ति लोभकामा खिन खापेकी चुक खाला सम्‍पत्ति ज्‍वा थुप्‍कीते सिन थेबेकी लेमु खाईन छ्या स्‍येबा ओङगो। थेबाला परमेश्‍वर सराप फाप्‍क्‍यो।

२ पत्रुस 2:2

थेबे बात ङेन्‍ला मि काल्‍बेईकी होथेबेकी खाबा च्‍योकराङ खिता ओङच्‍या मेङच्‍या आउदी ङोचा लाङच्‍येते काम खिओ। थेबेकी थोक खाबा थोङला ज्‍येनगी परमेश्‍वर बात लेमु मेन्‍दाक्‍वा सिन सिओ।

२ पत्रुस 2:20

ङुरूङला पापदुकी डेल्‍कान्‍ते प्रभु येशू ख्रीष्‍ट सु ईन्‍दे, चुक्‍ते ईन्‍दे सिन छ्या स्‍येकीन दि सा लुङबे मिओनगी खित्‍च्‍येते जेसुकै मेलेबाते काम खिता ताङगीन सिन्‍दाते मिओनगी लोक्‍ला गोमा खाबा च्‍योक्‍ते कामराङ खिताला स्‍यूला थोक खित्‍च्‍ये छ्य्‌वापेई ठालाराङ मुथुप्‍तुक सासीन थेबा गोमा भन्‍दाङ झन ज्‍यीबा लाङच्‍या मेलेबा डुइओ।

२ पत्रुस 2:7

थे सारओन थोक खाला नाश तोङे बेलाला सदोम सारदुराङ देता ओताते लोतलाचेन थेकी थेरूकी तेन्‍गीन जोए खाबा ओतान। लोत परमेश्‍वरगी खि साबा साबाच्‍योक खित्‍कान्‍ते मि ओतान। थे सारगी मिओनगी खिता मेङच्‍या आउदी मेलेबा मेलेबा ङोचा लाङच्‍या काम खाबा थोङजीन थेला आउदी मेलेबा लाबा ओतान।

२ पत्रुस 3:17

बात दोक दोक ईन्‍देकी ङिङज्‍येते आज्‍यो न्‍वावे, होदोक्‍ते मेन्‍दे बात लोप्‍कान्‍ते मिओन ओङगो सिन ख्‍योकोनला छ्याराङ ओतेकी ख्‍योकोन च्‍याङबो खाला देत। दोक माक्‍यासीन खिता मेङच्‍या ङोचा लाङच्‍येते काम खित्‍कान्‍ते मिओनगी लोप्‍च्‍येते मेन्‍दा मेन्‍दे बात ङेन्‍ला ख्‍योकोनगी खेराङगी ङेन्‍गीन ओताते सत्‍यते बात ङेन्‍दा तोङगो।

यहूदा 1:13

दोस्‍यिककामा मेन, थेबाचेन जेसुकै फोर मैलो उरला खुलाङकान्‍ते समुन्‍द्रे छाल च्‍योक्‍ते ईन। समुन्‍द्रे छालगी उरगीन खुलाकीन समुन्‍द्रे छेउदु बाम्‍बाते फोर मैलोतेबा गाङे थोङा च्‍योकराङ होथेबेकी खाबाते मेलेबाते कामतेबाङ गाङेकी थोङगो। थेबा ग्‍वाका नामनेकी ङील्‍ला तोरला डोच्‍येते कार्मे क्‍याक्‍पा च्‍योक्‍ते ईन। होथोक्‍ते मिओनला सधैँभरि सजाय तेराला परमेश्‍वरगी नरककुण्‍डमा आउदी मुन्‍दाकज्‍यीक ठाउँ ठीक खाईन ज्‍याक्‍पा ओत।

छ्या स्‍ये च्‍युताते बात 13:11

थेरूई तिरी ङे याङराङ से नाङदुकी ज्‍येनज्‍यीक जन्‍तुज्‍यीक थेन्‍गीन वाबा थोङसुङ। लुई रीउते च्‍योकराङ थेतेङ रोज्‍यो ङि ओतान। दोक ईन्‍सीनोङ थे डुगी च्‍योकराङ स्‍याँरा खाला बात खिन ओतान।