२ कोरिन्‍थी 7:11 - जिरेल

¹¹ लो विचार खि, परमेश्‍वरगी ख्‍योकोन सेमला फोक्‍च्‍येते थे काम खानामेई ख्‍योकोनला थोई लेमु ओङसुङा। च्‍यि सासीन था ख्‍योकोनगी ङेत गोमा च्‍योक खितराङ मिक्‍किओ सिन खालि लेमु खित्‍च्‍ये छ्य्‌वापाकामा स्‍येत खिताला स्‍यूसुङ, खेराङगी ङाला गोमाबा च्‍यिला थोक मेलेबा खाताका, थोक खाबाते लेमु मेन्‍दाक्‍वा सिन छ्या स्‍येबाला स्‍यूसुङ, था ङे ख्‍योकोनला च्‍यि खिताना चुक सिताना सिन ज्‍यीबा खिताला स्‍यूसुङ, ख्‍योकोन था ङात्ताङ ठेताला आउदी सेम खिताला स्‍यूसुङ थेमे खेराङ नाङ मेलेबा खित्‍कान्‍ते मिला सजाय तेराला टुङ्गो खासुङ। दोक दोक खाईन ख्‍योकोनगी था खेराङ दोषी मेन सिन तेन्‍दाला स्‍यूसुङ।

२ कोरिन्‍थी 7:11 Iomraidhean Croise

मर्कूस 3:5

थेबा थोक खाईन छ्याःङ मिसिरा खाईन देता थोङजीन थेला स्‍येदाङ लासुङ। थेमे थेबाला रकस्‍यिक ताकीन देत्‍सुङ। थेला सेमला दुक्‍पाङ लासुङ। च्‍यिला सासीन दया माया सिराते थेबे सेमला छ्याःङ मेतान, परमेश्‍वर बात ङेन्‍च्‍ये सेमोङ मेतान। थेमे थेकी थे लाक्‍पा काम्‍बाते मिला “खुईते लाक्‍पा स्‍योङते,” सिन सिदुक। थे मिकीङ लाक्‍पा स्‍योङजीन लेमु खाला चले खिता थुप्‍च्‍या गाल्‍सुङ।

यूहन्‍ना 2:17

थेकी थोक खाबा थोङजीन थे चेलातेबाला परमेश्‍वर बातला दोक सिन टिबा ओताते बात ठेम्‍बा लासुङ। थेरूचेन “खोल्‍ला माने खित्‍च्‍येते खाम्‍बादु सुइँदेकी खइँदा मेलेबा काम खाबा थोङसीन ङाला स्‍येदाङगी मे बारगीदुक,” सिन टिबा ओत।

शक्ति काम 17:16

सिलासताङ तिमोथीला एथेन्‍सदु गुला देत्‍जीन पावलगी थेरू मन्‍दिरताङ ल्‍हे मूर्ति आउदी काल्‍बेई थोङसुङ। थोक थोङजीन थेरू मिओनगी परमेश्‍वरला माने मिक्‍किच्‍याक्‍वा सिन पावलला आउदी मेलेबा लासुङ।

रोमी 11:20

ईन्‍दानी ईन। तर दि बात टोक माज्‍येत। च्‍यि सासीन परमेश्‍वरगी खोपरोङला येशू ख्रीष्‍ट छ्य्‌वापेकी लेमु खिओ सिन पत्ते माक्‍याबेकी थेकी थेबाला थोक खाईन ताङाते ईन। थेमे ख्‍योकोनगीचेन थे बात पत्ते खाईन थेला विश्‍वास खिन देतेकी खित्‍सादुकामा थेबे साटोला थेकी ख्‍योकोनला थे खोरोङ मि ईन सिरच्‍येते ईन। थोगी छ्ये मिक्‍किता खाला बरू ख्‍योकोन ज्‍यीबाका खाला देत।

रोमी 14:18

होदोक दोकराङ खिन ख्रीष्‍टला माने खित्‍कान्‍ते मिओनताङचेन परमेश्‍वर खुशी ओङगो। दोक्‍ते मिओनला ज्‍येनगीङ लेमु मि ईन सिन सिओ।

रोमी 3:5

थोगी था ङुरूङगी परमेश्‍वरगी साबाते माङेन्‍गीन मेलेबा काम खासीनोङ थेकीचेन नोमुङ मेलेबा काम मिक्‍किच्‍याक्‍वा सिन झन लेमु खाला छ्या स्‍येकीदुक सासीन ङुरूङगी च्‍यि मेलेबा खाबाते ईन्‍देरो? ङुरूङगी मेलेबा काम खासुङ सिन थेकी ङुरूङला स्‍येदाङगी चूर गाल्‍गीन सजाय बिन्‍सीन दिनी दाक अन्‍याय खाबाते ओङसुङ याङ सिरच्‍येते बादोङ थेन्‍ग्‍यो। दिनी कोई कोई मिकी खित्‍च्‍येते बातकामा ईन।

१ कोरिन्‍थी 12:25

थोगी जीउज्‍यीगी लाक्‍पा, काम्‍बा च्‍योक्‍ते थोकओन नाङ ङा छ्येताङ खो टेक्‍टे थेमे दि लेमुताङ थे मेलेबा सिन मिडिक्‍च्‍येते ओङा मेङगो। थोक ओङा साटोला बरू थेबा गाङेकी थोजोराङ छ्ये टेक्‍टेते ईन सिन डिक्‍ला देता फाप्‍क्‍यो।

१ कोरिन्‍थी 5:13

येशू ख्रीष्‍ट मिओन मेन्‍दाते मि न्‍याय खित्‍कान्‍ते परमेश्‍वर ईन। परमेश्‍वर बातला “मेलेबा काम खित्‍कान्‍ते मिला खेराङ नाङदुकी तेन्‍ला थोङ,” सिन साबा ओत।

१ कोरिन्‍थी 5:2

थेकी थोक खाबा थोङजीन च्‍यि ख्‍योकोनला मेलेबा मालासुङ? ख्‍योकोनला पीर लाङा फाप्‍च्‍येते ईन। थेमे खेराङताङ साङ माकेत सिन थेला तेन्‍ला तोङानी खापा ईन खापा झन ख्‍योकोनचेन आउदी लेमुतेबा ईन्‍दाच्‍योक खाला छ्येका खिन दुक।

२ कोरिन्‍थी 13:7

ख्‍योकोनगी मेलेबा काम छ्याःङ मिक्‍किस्‍यीत सिन ङ्योकोन परमेश्‍वरला प्रार्थना खिओ। ख्‍योकोनगी लेमु काम खासीन मिओनगी ङेराङला येशू ख्रीष्‍टकी खटे खाबाते मि मेन सासीनोङ ङेल्‍ला छ्याःङ मेत। ङ्योकोन लाईदु छ्येते बात मिकी ङेराङला लेमु मि ईन सिरस्‍यीत सिरच्‍येते मेन, बरू ख्‍योकोनगी लेमु काम खित्‍स्‍यीत सिरच्‍येतेराङ ईन।

२ कोरिन्‍थी 2:6

थेमे ख्‍योकोन काल्‍बा च्‍योक्‍तेकी थेला जे सजाय बिन्‍ला दुक थोस्‍यिक ठीकराङ ईन, थे भन्‍दा ल्‍हाक्‍पा छ्याःङ खिता मेङगो।

२ कोरिन्‍थी 6:4

बरू ङेत परमेश्‍वर काम खित्‍कान ईन्‍देकी थोक्‍ते मिकी खिता फापा च्‍योकराङ खाला काम खिओ। च्‍यि सासीन जति दुक्‍पा ओङसीनोङ ङ्योकोन थोक्‍ते दुक्‍पा खपे खिन देत्‍क्‍यो। ज्‍येनगी दुक्‍पा तेरजीनोङ, आपत् विपत् आइ परे खित्‍जीनोङ थेमे पीर लाङजीनोङ ङ्योकोन सेम मेसेता खाला देत्‍क्‍यो।

२ कोरिन्‍थी 7:1

थोगी ङिङज्‍येते आज्‍यो न्‍वावे, परमेश्‍वरगी थोक थोक खिओ सिन साबाते ङुरूङ लाईदुङ ईन्‍देकी ङुरूङगी काम बात जे खित्‍जीनोङ थेला मन परे मिक्‍किच्‍येते छ्याःङ खिता मेङगो सिन ज्‍यीबा खिन थेला मान खिता फाप्‍क्‍यो। थेमे सेम खुदुक गालाते मि ईन्‍देकी ङुरूङगी लेमुते कामताङ बातकामा खिन देता फाप्‍क्‍यो।

२ कोरिन्‍थी 7:7

थे वाबेकीकामा मेन, थेकी खुलाबाते लोन थोनामेई ङ्योकोनला ढुक्‍क लासुङ। चुक सासीन ख्‍योकोनगी थेला लेमु खाबेकी थेकी आँट ङेत्‍सुङलो, ख्‍योकोनगी ङाला आउदी खाईन ठेता सेम खाला दुक्‍लो, खेराङगी ङाला गोमाबा थोक मेलेबा खाबाते लेमु मेन्‍दाक्‍वा सिन ख्‍योकोन थरिङोला बात खिदुक्‍लो थेमे ङा मेलेबा मि ईन सिन सिरकानला ख्‍योकोनगी पावल थोक्‍ते मिराङ मेन सिन ङे छ्य्‌वा खाला बात खिदुक्‍लो सिन तीतसकी ङ्योकोनला लाःप्‍सुङ। दि बातओन थोजीन ङाला झन आउदी गा लासुङ।

२ कोरिन्‍थी 7:9

दोक ईन्‍सीनोङ थानी ङाला आउदी गा लाबा ओत। ख्‍योकोनला थोक खाईन दुक्‍पा बिन्‍दान सिन गा लाबा ओत साबाते मेन। बरू ङे टिबाते थे बात खेराङ सेमला फोक्‍नामेई खेराङगी खाबाते काम लेमु मेन्‍दाक्‍वा सिन छ्या स्‍येकीन ख्‍योकोनगी लोक्‍ला लेमु काम खिताला स्‍यूबाते थोङगीनराङ ईन। परमेश्‍वरगीराङ ख्‍योकोनला थोक ओङ च्‍युत्‍कीन लोक्‍ला लेमु काम खित च्‍युतेकी ङे टिबाते थे चिट्ठीकी खित्‍सादु ख्‍योकोनला मेलेबा ओङातेचेन मेन।

२ कोरिन्‍थी 9:2

थे पैसा जम्‍मा खिताला ख्‍योकोनगी चुक आउदी सेम खाबा ओते सिन ङाला लेमुराङ खाला छ्या ओत। ख्‍योकोनगी थोक लेमु खिन ओताते बात खिन ङे म्‍यासिडोनियादु ओताते येशू ख्रीष्‍ट मिओनला अखैयादु ओताते ख्‍योकोनगी ननीङमेईराङ पैसा जम्‍मा खिताला स्‍यूबा ओतान सिन लाःपाप। दि बात थोनामेई आँट ङेत्‍कीन थेबा काल्‍बा च्‍योक्‍तेकी ख्‍योकोनगी खाबा च्‍योकराङ खिताला आउदी सेम खाबा ओत।

एफिसी 4:26

सुइँदाताङ स्‍येदाङ लासीन स्‍येदाङगी खित्‍सादु मेलेबा काम माकेत। सुङताङ स्‍येदाङ मोसोक्‍पा खाला थे छोमुराङ थे बात डिक्‍पा खाला टोक ज्‍येत।

एफिसी 5:11

मुन्‍दाकला देत्‍कान्‍ते मिओनगी खित्‍च्‍येते मिला ङ्ये ज्‍युत्‍च्‍येते मेलेबाताङ ङोचा लाङच्‍येते काम सिराते ख्‍योकोनगी खितराङ माकेत। बरू दोक्‍ते काम खित्‍कान्‍ते मिओनला थोक खिता लेमु मेन सिन लाप्‍ला बिन।

फिलिप्‍पी 2:12

ङिङज्‍येते आज्‍यो न्‍वावे, थातासाक ख्‍योकोनगी ङे लाःपा कोता च्‍योकराङ खिन वाबा ओत। ङा ङ्योम्‍बु ओत्‍जीन खाबा च्‍योकराङ खाला ङ्योम्‍बु मेदेत्‍जीनोङ ङे लाःपा कोताते झन लेमु खाला ङेन्‍गीन देत। चुक सासीन खेराङ पापदुकी टालाते मि ईन सिराला ख्‍योकोनगी काम बात जे खासीनोङ परमेश्‍वरला मन परे मिक्‍किच्‍येते छ्याःङ खिता मेङगो सिन ज्‍यीबा खिन थेला मान खाला लेमुते कामताङ बातकामा खिन देत।

१ थिस्‍सलोनिकी 4:6

थेमे ख्‍योकोन सुङगीङ येशूला विश्‍वास खित्‍कान्‍ते ज्‍येन मि फेम्‍मेताङ खिता मेङच्‍येते काम खाला थे ख्‍योबोला सोम्‍बोलाराङ सबी चावादु लुच्‍येते काम माकेत। होथोक्‍ते मेलेबाते काम जे खासीनोङ थोक खित्‍कान्‍तेबाला प्रभु येशूकी सजाय तेरग्‍यो। थोगी ख्‍योकोन च्‍याङबो खि सिन ङ्योकोनगी ख्‍योकोनला गोमाकाराङ लाःपा ओत।

१ तिमोथी 5:20

थेबेकी साबाते बात साँचो ईन्‍सीन थे गल्‍ती खित्‍कान्‍ते मिला थोक खिता मेङगो सिन ज्‍येनतेबा गाङे दोन्‍दु थोप। थोक खानामेकी थोक्‍ते काम खिता मेङच्‍याक्‍वा सिन ज्‍येनतेबा गाङे ज्‍यीबा खिओ।

२ तिमोथी 2:15

परमेश्‍वरगी खोरोङला लेमु खाला काम खित्‍कान्‍ते मि ईन सिरस्‍यीत सिन खुईचेन लेमु काम खित्‍च्‍ये छ्य्‌वापाकामा स्‍येत खि। थोक ओङला थे दोन्‍दु खोरोङगी छ्याःङ ङोचा खिता माफाप्‍स्‍यीत सिन सत्‍यते बात लोप्‍जीन खुई च्‍यि बात चुक खाला लोपा फाप्‍च्‍येते ईन्‍दे होथोकराङ खाला लोप।

तीतस 3:8

दि बात साँच्‍चीराङ ईन्‍दाते बात ईन। थोगी ङा खोल्‍ला च्‍यि सिते सासीन परमेश्‍वरला विश्‍वास खित्‍कान्‍ते थेरू मिओनगी लेमुते काम खित्‍च्‍ये छ्य्‌वापाकामा सेम लै खाला थोकराङ खित्‍स्‍यीत सिन थेबाला दि बात दोरे खाला खाला लाप्‍ला बिन। दि बात लेमु ईन्‍देकी मिओनगी ङेन्‍सुङ सासीन गाङेला लेमु ओङगो।

हिब्रू 4:1

परमेश्‍वरगी मिओनला थे खोरोङगी देत ज्‍युता चालाच्‍योक खाला ढुक्‍क खाला देत ज्‍युत्‍क्‍यो सिन जमान खाबाते बात थोरूमोङ खुदुक गाला मेत। थेकी साबा च्‍योकराङ खाला देता ङेत्‍सादुई खेराङ सुङ माठाल्‍स्‍यीत सिन ङुरूङ च्‍याङबो खाला देता फाप्‍क्‍यो।

याकूब 3:17

तर परमेश्‍वरगी बिन्‍दाते बुद्धि ङेता ओताते मिओनगीचेन काम बात जे खित्‍जीनोङ लेमुतेकामा खिओ, थेबा ज्‍येनताङ डिक्‍ला थुन्‍ला देता छोल्‍ग्‍यो, गाङेताङ खा छ्येत लेमु खिओ, दाक्‍पोन भन्‍दा छ्येकी साबाते ङेन्‍ग्‍यो, ज्‍येनला ङिङज्‍ये खाला लेमु लेमु काम खिओ, सुङलाङ काका पाका मिक्‍किओ थेमे सेमला मेलेबा विचार मोज्‍योओ।

१ पत्रुस 1:17

थेमे परमेश्‍वरताङ प्रार्थना खित्‍जीन ख्‍योकोन थेला आबा सिन सिओ। थेकी सुङलाङ काका पाका मिक्‍किता खाला सुई चुक खाला दुका थे ताला न्‍याय खिओ। थोगी खेराङ दुरू मि लुङबे मि च्‍योकराङ ईन सिन सम्‍झे खाला सोन्‍ला देत देतसाकराङ ख्‍योकोनगी परमेश्‍वरला मन परे मिक्‍किच्‍येते छ्याःङ खिता मेङगो सिन ज्‍यीबा खिन लेमु खिन देत।

१ पत्रुस 2:2

बरू बालकते फिजेकी याङ याङ नुमा थुङा सेम खाबाच्‍योक खाला ख्‍योकोनगीङ परमेश्‍वर बात ङेन्‍ला थेरू खि साबा साबा खित्‍च्‍ये छ्य्‌वापाकामा सेम खि। परमेश्‍वर बातचेन मि बात मेन्‍देकी गाङे सत्‍यते बात ईन। दि बात ङेन्‍ला थेरू खि साबा च्‍योकराङ खिन गाल्‍नामेई ख्‍योकोन मेलेबा काम खिता ताङला पाको डुइओ।

यहूदा 1:23

ज्‍येनलाचेन मे ऊरसादुकी टेप जुम्‍ला थेन्‍दाच्‍योक खाला नरककुण्‍डमा स्‍यूक्‍च्‍येते सजायदुकी थार छ्युत। ज्‍येनला दया खाला दोक्‍ते काम खित्‍जीन खेराङलाङ थेबे बानी मोलोप्‍स्‍यीत सिन ख्‍योकोन च्‍याङबो खि याङ। टेक्‍टेस्‍यिकराङ ईन्‍सीनोङ थेबेकी खित्‍च्‍येते च्‍योक्‍ते मेलेबा काम ख्‍योकोनगी छ्याःङ खिता माफाप्‍स्‍यीत सिन च्‍याङबो खाला देत।

छ्या स्‍ये च्‍युताते बात 3:19

ङाराङगी ङिङज्‍ये खाबाते मिओनला ङा थाप्‍क्‍यो थेमे लेमु काम खित्‍स्‍यीत सिन आबेकी फुज्‍युङला च्‍योक ङा थेबाला तालाङ लुक्‍यो। ख्‍योकोनगी खिन ओताते मेलेबाते काम खिता ताङला ङे कोता कोताच्‍योक खि।