२ कोरिन्‍थी 4:7 - जिरेल

⁷ परमेश्‍वरताङ चुक छ्येज्‍यीक शक्ति ओते सिन छ्या स्‍येच्‍येते दि गा लाङच्‍येते बात लोपाला ङ्योकोनताङ छ्याःङ शक्ति मेत। ङ्योकोननी छ्याक्‍ला फराक फुरूक डोच्‍येते सबी नोत च्‍योककामा ईन। थोगी ङ्योकोनगी खित्‍च्‍येते काम ङेराङ शक्तिकी मेन, परमेश्‍वरगी शक्ति बिन्‍देकी खिता थुप्‍च्‍येते दुका सिन मिओनगी छ्या स्‍येक्‍यो।

२ कोरिन्‍थी 4:7 Iomraidhean Croise

मत्ती 13:44

थोरूमोङ ज्‍येन बात च्‍यि सासीन पालोई मिज्‍यीगी स्‍यीङज्‍यीक्‍तु सुइँदेकी ब्‍वाकीन ज्‍याक्‍पाते सम्‍पत्ति थेप्‍तुक्‍लो। थोक ओङनामेई थेकी गा खिनकामा थे सम्‍पत्ति याङराङ थे स्‍यीङदुराङ ब्‍वादुक्‍लो। थेमे थेकी च्‍यि खाकालो सासीन थे खोरोङताङ ओताते जति जेसुकै च्‍वाकीन थे स्‍यीङ ङ्योदुक्‍लो। स्‍वर्गे राज्‍य सिरातेङ सुइँदेकी स्‍यीङज्‍यीक्‍तु ब्‍वाकीन ज्‍याक्‍पाते मिज्‍यीगी थेपाते सम्‍पत्ति च्‍योकराङ ईन।

मत्ती 13:52

थेमे थेकी “थोगी थानामेईचेन स्‍वर्गे राज्‍य सिराते च्‍यिन्‍दे, थे चुक्‍ते ईन्‍दे सिन लेमु खाईन छ्या स्‍येबाते धर्मे गुरूओन ओङगो। थेबाचेन खाम्‍बादु जेसुकै खटेन खित्‍कान्‍ते खाम्‍बे धनी च्‍योक्‍ते ईन। चुक खाला सासीन खाम्‍बे धनीकी गोमामेकी साकीन ज्‍याक्‍पाते थेमे भर्खर ज्‍याक्‍पाते सामानतेबा खाम्‍बे मिओनला गोजीन गोजीन जोतकी नाङदुकी थेन्‍दा च्‍योकराङ खाला थेबेकीङ खोपरोङगी गोमामेकी छ्या स्‍येबा ओताते थेमे थरिङोला खोबाते परमेश्‍वर बात ज्‍येनला लोपा थुप्‍क्‍यो,” सिन सिदुक।

यूहन्‍ना 16:33

ङे खित्‍सादु ख्‍योकोन सेम ढुक्‍क खाला देता थुप्‍स्‍यीत सिनराङ ङे दि बाततेबा साबाते ईन। दि सा लुङबे मिओनगी ख्‍योकोनला तेरासम्‍म दुक्‍पा तेरग्‍यो। थोक ईन्‍सीनोङ ख्‍योकोन हरेस मासा। दि सा लुङबादु ओताते जे ईन्‍सीनोङ, जो ईन्‍सीनोङ गाङेला ङे ग्‍याल्‍गीन सिन्‍दा ओत,” सिन सिदुक।

१ कोरिन्‍थी 1:28

परमेश्‍वरगीचेन ज्‍येनगी दिबाङ सु ईन्‍देरो, दिबा ङुरूङ छेतते मेन सिन साबाते मिओनलाराङ छाने खासुङ। दोक खाईन ज्‍येनगी दिबा छ्येते मि ईन सिन साबाते मिओनलाचेन थेकी छ्याःङ मेन्‍दाच्‍योक जोसुङ।

२ कोरिन्‍थी 10:10

ख्‍योकोन कोई कोईकी “पावलगी खालि थारीला गाल्‍नामेईकामा स्‍येदाङ खिन दोक खिताङ थोक खि सिन कोत्‍ला चिट्ठी टिइदुक। ङुरूङताङ ङ्योम्‍बु ओत्‍जीनचेन थेकी ङेन्‍गीन देत्‍की सिराच्‍योक खाला बादोङ खिता मुथुबो, थे चुकस्‍यिक ओते सिन ङुरूङला छ्या ओत,” सिन बात खिदुक्‍लो।

२ कोरिन्‍थी 13:4

ईन्‍दानी मिओनगी स्‍यिङगी थामला टाँए खाला सेत्‍जीन थे छ्याःङ खिता मुथुप्‍कान्‍ते च्‍योकराङ थोङा ओतान। थोक ईन्‍सीनोङ परमेश्‍वरगी थे खोरोङ शक्तिकी थेला सोम्‍बो लोक्‍पेकी थे सोम्‍बोराङ ओत। ख्रीष्‍टताङ जीउज्‍यीकराङ ओङाते मि ङ्योकोनलाङ मिओनगी छ्याःङ खिता मुथुप्‍कान्‍ते च्‍योकराङ थोङगो। ईन्‍सीनोङ ङ्योकोनगी ख्‍योकोन नाङ खित्‍च्‍येते गाङे काम ख्रीष्‍टताङ जीउज्‍यीकराङ ओङगीन परमेश्‍वर शक्ति छ्य्‌वापेकी खित्‍च्‍येते ईन।

२ कोरिन्‍थी 4:1

परमेश्‍वरगी ङ्योकोनला दया खाईन दि जमान बात लोप सिन जिम्‍मा बिन्‍दाते ईन्‍देकी ङ्योकोन सेम मेसेदो।

२ कोरिन्‍थी 5:1

थरिङोले ङुरूङ जीउ ङीमा ङि सुम देताला टाँए खाबाते पाल च्‍योक्‍तेकामा ईन। स्‍यिनामेकी ङुरूङ दाक रूल्‍ला डुइओ सिन ङुरूङला छ्या ओत। ईन्‍सीनोङ था तिरी परमेश्‍वरगी ङुरूङला नोमुङ स्‍यिला रूल्‍ला मोन्‍डोच्‍येते जीउ तेरग्‍यो। थे जीउचेन मिकी जोबाते खाम्‍बा च्‍योक मेन्‍देकी नोमुङ माराम्‍च्‍येते स्‍वर्गे खाम्‍बा च्‍योक्‍ते ईन।

२ कोरिन्‍थी 6:10

दोक दोक ओङला पीरताङ तापकी नाङ देता फाप्‍सीनोङ ङ्योकोन सधैँ छ्याःङ पीर मेताते मि च्‍योक खाला गा खिन देत्‍क्‍यो। थेमे ङेराङ लाला साकान्‍ते च्‍योक्‍तेन्‍दे ओत्‍सीनोङ ङ्योकोनगी खाबाते कामगी खित्‍सादु मिओनगी परमेश्‍वरगी तेरच्‍येते जति गाङे ङेत्‍क्‍यो। लोक्‍ला ङ्योकोन ङेराङते सिराते छ्याःङ मेताते कङ्गाली च्‍योकराङ ईन्‍सीनोङ परमेश्‍वरगी खित्‍सादु ङेत्ताङ जेसुकै ओत।

एफिसी 2:5

खिता मेङच्‍येते कामकामा खिन पाप खिन थे लाईदु स्‍याप छेतराङ गालाते ङुरूङला ख्रीष्‍टताङराङ सोम्‍बो लोगीन थेला बिन्‍दा च्‍योक्‍ते जुनी बिन्‍सुङ। थे खोरोङ दयेकी खित्‍सादुकामा परमेश्‍वरगी ख्‍योकोनला दोक खाईन पापकी सजायदुकी टाल्‍गीन बिन्‍दाते ईन सिन टोक माज्‍येत।

एफिसी 3:8

दि काम खिताला परमेश्‍वर सन्‍तान गाङे नाङ ङा सोईराङ मिक्‍किकान्‍ते मि ईन्‍सीनोङ परमेश्‍वरगी ङालाराङ दि काम खित्‍च्‍येते जिम्‍मा बिन्‍सुङ। ङे कामचेन ख्रीष्‍टकी ङुरूङ लाईदु खाबाते कामतेबा खोबा चाल्‍ला खोबा मुथुप्‍च्‍या चुक अचम्‍ब खाईन खाबाते ईन्‍दे सिन ज्‍येन ज्‍येन जातकी मिला लोप्‍च्‍येते

कलस्‍सी 1:27

ज्‍येन ज्‍येन जातकी मिला चुक अचम्‍ब खाला आशी बिन्‍ला लेमु खिते सिरच्‍येते बात थे खोरोङ सन्‍तानओनगी छ्या स्‍येबा फाप्‍क्‍यो सिन परमेश्‍वरगी थेबाला छ्या स्‍ये च्‍युत्‍कीन बिन्‍सुङ। परमेश्‍वरगी गोमा छ्या स्‍ये च्‍युता मेताते होथे बात च्‍यि ईन्‍दे सासीन ख्रीष्‍टचेन ख्‍योकोन ज्‍येन ज्‍येन जातकी मि सेमगी नाङ देत्‍क्‍यो। थे थोक खाईन ख्‍योकोन सेमगी नाङ देत्‍नामेई परमेश्‍वरगी तिरी ख्‍योकोनला मान बिन्‍ला थे खोरोङगी ज्‍वा चाला च्‍योकराङ लेमु जोइओ सिरच्‍येते बात पक्‍काराङ दुका सिन आश खाला गुला देता थुप्‍क्‍यो।

कलस्‍सी 2:12

चुक सासीन ख्‍योकोनला बप्‍तिस्‍मा तेरजीन ख्‍योकोन छ्युई नाङ नुप्‍जीन ख्रीष्‍टताङराङ स्‍यिइन थेत्ताङ दिबाते ईन। थेमे छ्युदुई थेन्‍जीन परमेश्‍वरगी ख्‍योकोनला ख्रीष्‍टताङराङ सोम्‍बो लोक्‍पाते ईन। ख्रीष्‍टला स्‍यिसादुकी सोम्‍बो लोक्‍कान्‍ते परमेश्‍वरताङ छ्येज्‍यीक शक्ति ओत सिन थेला विश्‍वास खाबेकी थेकी ख्‍योकोनला थोक खाबाते ईन।

कलस्‍सी 2:3

ख्रीष्‍टताङकामा परमेश्‍वर बुद्धि ओत थेमे गाङे बात थेकीकामा लेमु खाला छ्या स्‍येक्‍यो। परमेश्‍वरगी छ्या स्‍ये ज्‍युता चालाते गाङे बात थेकीकामा पूरो खाला छ्या स्‍ये ज्‍युता थुप्‍क्‍यो।

१ थिस्‍सलोनिकी 1:5

च्‍यिला सासीन ङ्योकोनगी लोप्‍च्‍येते गा लाङच्‍येते बातचेन मि बातकामा मेन्‍देकी थे बातकी छ्य्‌वापेई परमेश्‍वरगी ख्‍योकोन नाङ छ्ये छ्ये शक्ति काम खासुङ। थे बात पक्‍काराङ सत्‍यते ईन सिन परमेश्‍वर आत्‍मे छ्य्‌वापेई लेमु खाईन छ्या स्‍येबेकी ङ्योकोनगी थे बात ख्‍योकोनला लेमु खाईन लोपा थुपाते ईन। थेजीन ख्‍योकोनताङ देत्‍जीन ख्‍योकोनला लेमु ओङस्‍यीत सिन ङ्योकोनगी चुक चुक खाबा ओताने सिन ख्‍योकोनला गाङे छ्या ओतेकी ङ्योकोनगी छ्याःङ सिरा माफाप्‍तासीन।

१ थिस्‍सलोनिकी 4:4

ख्‍योकोनगी दाक्‍पोन फेम्‍मेताङ ङ्योम्‍बु देत्‍जीन दाक्‍पोनला खिता सेम लाबा लाबाच्‍योक माकेत। थेबे इज्‍जततेङ ख्‍याल ज्‍याक्‍ला काम खि।

२ तिमोथी 2:20

थेमे दि बादोङ विचार खि। च्‍यि सासीन छ्ये छ्ये मि खाम्‍बाला सेरताङ चाँदी स्‍यीकामा मेन, सबी स्‍यीताङ स्‍यिङगी नोततेबाङ ओङगो। सेरताङ चाँदी स्‍यीचेन साप साजीन थेमे भोज लै खित्‍जीन चले खिओ। तर स्‍यिङताङ सबी नोतचेन ज्‍येन कामगी लाईदु चले खिओ।