२ कोरिन्‍थी 4:4 - जिरेल

⁴ येशूला विश्‍वास खाबा मेताते होदि मिओनगी ख्रीष्‍टताङ चुक छ्येज्‍यीक शक्ति ओते सिन छ्या स्‍येच्‍येते गा लाङच्‍येते बात छ्याःङ मोखोस्‍यीत सिन दि कलि जुगी गेल्‍बो शैतानगी थेबाला लेम्‍बा जोबा ओत। परमेश्‍वरताङ ख्रीष्‍टला छ्याःङ फरक मेत, परमेश्‍वर जस्‍तो ईन ख्रीष्‍टोङ थोजोराङ ईन।

२ कोरिन्‍थी 4:4 Iomraidhean Croise

मत्ती 13:22

लोक्‍ला चाङगी बुटे नाङला फाप्‍कीन केकीनोङ चाङगी बुटेकीराङ सोबाते सोन साबातेचेन थोरूमोङ ज्‍येन थरीज्‍यीक मिला साबाते ईन। थोक्‍ते मिओनगी स्‍वर्गे राज्‍य बातनी ङेन्‍ग्‍यो। ईन्‍सीनोङ साच्‍या थुङच्‍याताङ खोन्‍च्‍ये पीर थेमे सम्‍पत्ति लोभकी खित्‍सादु थेबेकी थोबाते बात दाक टोक ज्‍येत्‍ला छ्याःङ काम लै मिक्‍किओ।

यूहन्‍ना 1:14

थे बात सिरातेचेन मि जुनी लाकीन केकीन ङ्योकोनताङराङ देता ओतान। थोक खाला ङ्योम्‍बुराङ देत्‍जीन परमेश्‍वर आउदी खाला दया खित्‍कान्‍ते ईन, थे सत्‍यते ईन सिन थेकी ङ्योकोनला लेमु खाईन तेन्‍गीन बिन्‍दा ओतान। थेला आबातेकी देमा ताङा ओतान। थेते दोक्‍पोईकामा ओताते फुज्‍युङ ईन्‍देकी थेत्ताङ छ्येज्‍यीक शक्ति ओताते ङ्योकोनगी थोङा ङेत्‍सुङ।

यूहन्‍ना 1:18

परमेश्‍वर दोकस्‍यिकराङ दुक सिन सुङगीङ नोमुङ थोङा मेत। आबातेताङ ङ्योम्‍बुराङ देताते दोक्‍पोईकामा ओताते थे खोरोङ फुज्‍युङगीकामा परमेश्‍वर सु ईन्‍दे, चुक्‍ते ईन्‍दे सिन ङुरूङला छ्या स्‍ये च्‍युत्‍कीन बिन्‍दा ओत।

यूहन्‍ना 12:31

था परमेश्‍वरगी दि सा लुङबे मि न्‍याय खित्‍च्‍ये बेला लेप्‍सुङ। था थेकी दि सा लुङबे गेल्‍बो शैतान शक्ति ठ्वाला दुरूकी तेन्‍ला तोङगो।

यूहन्‍ना 12:35

थेरूई थेकी थेबाला “था टिक्‍पी दिनसाककामा स्‍वर्गे नाम्‍दाक ख्‍योकोनताङ देत्‍क्‍यो। थोगी ख्‍योकोन नाम्‍दाकला ख्‍योम। स्‍वर्गे नाम्‍दाक ख्‍योकोनताङ देत देतसाक ख्‍योकोन मुन्‍दाकला ख्‍याम्‍बा माफाबो। मुन्‍दाकला ख्‍याम्‍कान्‍ते मिला थे खोरोङ खापा डुइन ओते सिन छ्याःङ छ्या मेङगो।

यूहन्‍ना 12:40

चुक सासीन “प्रभु परमेश्‍वरगी थेबे मिक छ्याःङ मोथोङच्‍या जोला दुक। थेमे थेबे सेमोङ छ्याःङ छ्या मेस्‍येच्‍या जोकीन बिन्‍ला दुक। थोक ईन्‍देकीराङ थेबा परमेश्‍वरगी खाबाते काम थोङसीनोङ छ्याःङ खोबा मुथुप्‍च्‍या गाल्‍ला दुक थेमे परमेश्‍वर बात थोसीनोङ छ्याःङ छ्या मेस्‍येच्‍या गाल्‍ला दुक,” साकीन “थोगीराङ थेबा ङे छ्य्‌वापा लै मिक्‍किदुक। थोक खाबा ईन्‍सीन ङा थेबाला थेबे पापदुकी टाल्‍ला लेमु खित्‍च्‍या ओतान,” सिन प्रभु परमेश्‍वरगी साबाते बादोङ साबा ओतान।

यूहन्‍ना 12:45

थोकराङ खाला ङाला थोङकान्‍ते मिकीचेन ङाला दुरू तोङकान्‍तेलाङ थोङाते ईन।

यूहन्‍ना 14:30

था ङा काल्‍बासाक ख्‍योकोनताङ बात खिन देता मेङेदो। था दि सा लुङबे गेल्‍बो शैतान होत्ता ओङगीन ओत। थे ङा भन्‍दा छ्ये मेन। थेमे थेकी ङाला छ्याःङ खिता मुथुबो।

यूहन्‍ना 15:24

ङे थातासाक सुङगीङ खिता माथुपाते कामतेबा थेबे ङोन्‍लाराङ खाईन तेन्‍दाप। ङे थोक खाबाते छ्याःङ थोङा मेत्‍सीनचेन थेबेकी पाप खाबाते ईन सिन सिरा ओङच्‍या मेतान। तर थेबेकीनी ङे खाबाते काम गाङे थोङसीनोङ ङात्ताङ ङे आबा ङ्योकोन ङिकारला मिगी थोङसार्मु खिदुक।

यूहन्‍ना 16:11

थोकराङ खाला थेकी परमेश्‍वरगी ङीमाई गाङेते न्‍याय खिओ सिनोङ छ्या स्‍ये ज्‍युत्‍क्‍यो। च्‍यिला सासीन दि सा लुङबे गेल्‍बो शैतानला सजाय तेराला फैसला ओङगीन सिन्‍दा ओत।

यूहन्‍ना 8:12

येशूकी लोईन मिओनताङ बात खिन “दि सा लुङबे मिओनला नाम्‍दाक तेरकान्‍ते स्‍वर्गे नाम्‍दाक ङाराङ ईन। ङे बात ङेन्‍ला ङे साबाच्‍योक खित्‍कान्‍ते सुङ नोमुङ मुन्‍दाकला ख्‍याम्‍बा माफाबो। थेकीचेन ङे छ्य्‌वापेकी जुनी ङेत्‍च्‍येते नाम्‍दाक ङेत्‍क्‍यो,” सिन सिदुक।

शक्ति काम 26:18

थेबा पापताङ लोभदुकी ठाल्‍ला परमेश्‍वर नाम्‍दाकला देता ङेत्‍स्‍यीत, दोक खाला शैतान लाःक्‍तुकी ठोल्‍ला परमेश्‍वर छ्य्‌वापा लै खित्‍स्‍यीत सिन खुई थेबाला ङे बात छ्या स्‍येबा खाला तेरा फाप्‍क्‍यो। थेमे थेबेकी ङाला विश्‍वास खानामेई परमेश्‍वरगी थेबे पाप गाङे माफ तेरग्‍यो। थेमे परमेश्‍वरगी सेम खुदुक जोबाते मि ज्‍येनतेबेकी ङेत्‍च्‍येते जति गाङे थेबेकीङ ङेत्‍क्‍यो,’ सिन सिरा थोसुङ।

शक्ति काम 26:23

थेबेकीचेन ख्रीष्‍टकी विषयला बात खिन ख्रीष्‍टकी दुरू वाला आउदी दुक्‍पा भोगे खिता फाप्‍क्‍यो थेमे स्‍याङ फाप्‍क्‍यो। थेमे स्‍याप्‍तेबा गाङे नाङ थे गोमा सोम्‍बो लोक्‍ला था परमेश्‍वरगी मिओनला पापताङ दुक्‍पादुकी डेल्‍ग्‍यो सिन खोपरोङ यहूदी थेमे ज्‍येन ज्‍येन जातकी मि गाङेला छ्या स्‍ये ज्‍युत्‍क्‍यो सिन साबा ओतान,” सिन सिदुक।

१ कोरिन्‍थी 10:20

बात चुक ईन्‍दे सासीन परमेश्‍वरला छ्या मेस्‍येकान्‍ते मिओनगी परमेश्‍वरला पूजा खाबाते मेन। थेबेकीनी ल्‍हा ल्‍हन्‍डीकलाका पूजा खाबाते ईन। ख्‍योकोन ल्‍हा ल्‍हन्‍डीकताङ डिक्‍पाते ङाला बान्‍दा गा मालाङदुक।

२ कोरिन्‍थी 2:11

शैतानगी ङुरूङ नाङ खिता चालाते काम छ्याःङ खिता मेङेत्‍स्‍यीत सिनराङ ङुरूङगी दोक खाला माफ तेरा फाप्‍क्‍यो। थेकी चुक च्‍याङबो खाला काम खिते सिन ङुरूङला छ्याराङ ओत।

२ कोरिन्‍थी 2:12

ङा ख्रीष्‍टते गा लाङच्‍येते बात लोपाला त्रोआस सारदु लेप्‍नामेकी प्रभु ख्रीष्‍टकीराङ ङाला थेरूङ थे बात लोप्‍च्‍येते आउदी लेमुज्‍यीक मौका बिन्‍सुङ।

२ कोरिन्‍थी 3:11

च्‍यिला सासीन मि दोषी ईन सिन टिक्‍पी दिनगी लाईदुकामा बिन्‍दाते नियम तेरजीननी थेते थोक झिलिमिली नाम्‍दाककी खित्‍सादु परमेश्‍वरताङ छ्येज्‍यीक शक्ति ओताक्‍वा सिन छ्या स्‍येबा ओतान सासीन थेकी मिओन दोषी मेन सिन सिरच्‍येते जमान बात ताला थेत्ताङ चुक छ्येज्‍यीक शक्ति ओता ईन्‍दाका सिन झन लेमु खाला छ्या स्‍येक्‍यो। टिक्‍पी दिनगी लाईदुकामा बिन्‍दाते गोमे नियम च्‍योक मेन्‍देकी दि जमान बातचेन सधैँभरि लै खित्‍च्‍येते नियम च्‍योकराङ ईन।

२ कोरिन्‍थी 3:14

थेजीन इस्राएलीओन छ्याःङ मोखोच्‍या गाला ओतान। थेबा थोरूमोङ थोकराङ ओतेकी मोशेकी टिबाते परमेश्‍वर नियम पढे खित्‍जीन थेबेकी छ्याःङ मोखोदुक। ख्रीष्‍टकी छ्य्‌वापेईकामा थे बात लेमु खाला खोबा थुप्‍क्‍यो।

२ कोरिन्‍थी 3:18

प्रभु ख्रीष्‍टकी ङुरूङ सेम खुदुक जोकीन बिन्‍नामेकी ङुरूङगी सुङताङ छ्याःङ बात बोङा माफाबो। ङुरूङला ताला मिओनगी ख्रीष्‍टताङ चुक छ्येज्‍यीक शक्ति ओता ईन्‍दाका सिन छ्या स्‍येक्‍यो। थेकी ङुरूङला थे खोरोङ च्‍योकराङ लेमु जोइन गाल्‍नामेई ङुरूङ झन झन प्रभु ख्रीष्‍ट च्‍योकराङ लेमु डुइन डुइओ। ङुरूङला दोक खित्‍कान्‍ते प्रभु ख्रीष्‍ट ईन। थेत्ताङ परमेश्‍वर आत्‍मा दोक्‍पोईराङ ईन।

२ कोरिन्‍थी 4:6

परमेश्‍वरगी सा नाम जोजीन “मुन्‍दाकते ठाउँदु नाम्‍दाक ओङस्‍यीत,” सिन साबा ओतान। होथोक सिरकान्‍ते परमेश्‍वरगीराङ मुन्‍दाकते ठाउँदु नाम्‍दाक ओङ च्‍युताच्‍योक खाईन थे खोरोङ सु ईन्‍दे थेमे थेत्ताङ चुक छ्येज्‍यीक शक्ति ओते सिन ङुरूङला छ्या स्‍ये च्‍युत्‍सुङ। दि बात ङुरूङगी ख्रीष्‍टला ताकीन छ्या स्‍येबाते ईन।

गलाती 1:4

दि कलि जुग मिओनगी च्‍योक मेलेबा कामताङ बात खित्‍च्‍ये छ्य्‌वापेई ङुरूङ ठाल्‍स्‍यीत सिन प्रभु येशू ख्रीष्‍टचेन ङुरूङला पापदुकी डेलाला थे खोरोङ ज्‍यान बिन्‍गीन स्‍या ओतान। दि गाङे बात ङुरूङ आबा परमेश्‍वरगी खिता चाला च्‍योकराङ खाईन ओङा ओतान।

एफिसी 2:2

थेजीन ख्‍योकोन चालचलनताङ बानी बिवारा दि सा लुङबे मि ज्‍येनतेबेते च्‍योकराङ ओतान। ख्‍योकोनचेन दागार, ङीमा, कार्मा नामने ओताते जति गाङे थेमे ल्‍हा लुई गेल्‍बो शैतान अधीनला देत्‍ला थेकी खि साबा साबाच्‍योक खिन ओतान। परमेश्‍वरगी माकेत साबा साबा खित्‍कान्‍ते मिओनलाचेन थोरूमोङ शैतानगीराङ राज्‍य खिन ओत।

एफिसी 6:12

च्‍यि सासीन ङुरूङ जीङा फाप्‍च्‍येते मित्ताङ मेन। ङुरूङनी दि सा नाम खाङ ओताते ल्‍हा लु, ल्‍हन्‍डीक स्‍यिन्‍डीप थेमे होदिबा च्‍योकराङ शैतानताङ डिक्‍ला दि कलि जुगला राज्‍य खित्‍कान गाङेताङ जीङच्‍येते ईन।

फिलिप्‍पी 2:6

चुक सासीन परमेश्‍वर जस्‍तो ईन येशू ख्रीष्‍टोङ गोमामेईराङ होथोकराङ ओतान, छ्याःङ खुदुक मेतान। परमेश्‍वरला ताला छ्याःङ खुदुक मेत्‍सीनोङ थोक्‍ते हक तोङाला थेकी दुक्‍पा माने माक्‍यासुङ।

कलस्‍सी 1:15

परमेश्‍वर दोकस्‍यिकराङ दुक सिन मि मिगी थोङा माथुप्‍सीनोङ परमेश्‍वर फुज्‍युङला ताला परमेश्‍वरताङ थेला छ्याःङ फरक मेताक्‍वा सिन लेमु खाला छ्या स्‍येक्‍यो। परमेश्‍वरगी ओताते जति गाङे ज्‍वा भन्‍दा गोमामेई परमेश्‍वर फुज्‍युङ ओत्‍कीन ओतान।

कलस्‍सी 1:27

ज्‍येन ज्‍येन जातकी मिला चुक अचम्‍ब खाला आशी बिन्‍ला लेमु खिते सिरच्‍येते बात थे खोरोङ सन्‍तानओनगी छ्या स्‍येबा फाप्‍क्‍यो सिन परमेश्‍वरगी थेबाला छ्या स्‍ये च्‍युत्‍कीन बिन्‍सुङ। परमेश्‍वरगी गोमा छ्या स्‍ये च्‍युता मेताते होथे बात च्‍यि ईन्‍दे सासीन ख्रीष्‍टचेन ख्‍योकोन ज्‍येन ज्‍येन जातकी मि सेमगी नाङ देत्‍क्‍यो। थे थोक खाईन ख्‍योकोन सेमगी नाङ देत्‍नामेई परमेश्‍वरगी तिरी ख्‍योकोनला मान बिन्‍ला थे खोरोङगी ज्‍वा चाला च्‍योकराङ लेमु जोइओ सिरच्‍येते बात पक्‍काराङ दुका सिन आश खाला गुला देता थुप्‍क्‍यो।

१ तिमोथी 1:11

येशू ख्रीष्‍टला विश्‍वास खित्‍कान्‍ते मिओनगी ङेन्‍दा फाप्‍च्‍येते बातचेन गा लाङच्‍येते बातला साबा ओत। गा लाङच्‍येते बातचेन आउदी अचम्‍बते बात ईन। दि बातचेन जेसुकै ओत्‍कान्‍ते परमेश्‍वरगी मिओनला छ्या स्‍ये च्‍युता ओत। थेमे दि बात ज्‍येन मिओनला लोप सिन थेकी ङाला जिम्‍मा बिन्‍दा ओत।

तीतस 2:13

थेमे ङुरूङला पापदुकी डेल्‍कान्‍ते छ्येज्‍यीक शक्ति ओताते परमेश्‍वर येशू ख्रीष्‍ट था तिरी स्‍वर्गनेकी मिगी तापराङ मुथुप्‍च्‍या झिलिमिली नाम्‍दाकला देत्‍ला देमा ग्‍युरला ओङगो सिन ङुरूङ आश खाला गुला देत्‍क्‍यो। दिराङ ङुरूङ लाईदु आउदी गा लाङच्‍येते बात ईन।

हिब्रू 1:3

परमेश्‍वर फुज्‍युङला ताला परमेश्‍वरताङ चुक छ्येज्‍यीक शक्ति ओता ईन्‍दा सिन छ्या स्‍येक्‍यो। परमेश्‍वरताङ थेला छ्याःङ फरक मेत, परमेश्‍वर जस्‍तो दुक थेङ उस्‍तोराङ ओत। दि सा नाम थेमे सा नाम खाङ ओताते जति गाङेला तेइन दि दोक ओङस्‍यीत, थे थोक ओङस्‍यीत साला ओताते जति गाङे चुक चुक ओङा फाप्‍च्‍येते ईन्‍दे थोकराङ ओङ ज्‍युत्‍कान्‍ते थेराङ ईन। मि पापदुकी ठाल्‍च्‍येते लाम जोकीन थे स्‍वर्गने छ्येज्‍यीक शक्ति ओताते परमेश्‍वर सामे छ्य्‌वापा देता ओत।

हिब्रू 6:4

थेमे दि बात टोक माज्‍येत। च्‍यि सासीन परमेश्‍वर सु ईन्‍दे, चुक्‍ते ईन्‍दे सिन छ्या स्‍येबा ओताते, परमेश्‍वरगी खोपरोङला ताला जेसुकै लेमु ओङ ज्‍युत्‍क्‍यो सिरच्‍येते बात खोबा ओताते, परमेश्‍वर आत्‍मा ङेता ओताते,

२ पत्रुस 1:19

ङ्योकोनगी थोङातेताङ थोबाते होथे बात ताला परमेश्‍वर बात खित्‍कान्‍तेबेकी गोमाका साबा ओताते बाततेबा पक्‍काराङ ईन सिन सिरा थुप्‍क्‍यो। थेबेकी साबाते बातओन ङेन्‍गीन देत। दोक खासीन बत्ती पारनामेकी नाम्‍दाक ओङाच्‍योक खाला खेराङगी खोबा फाप्‍च्‍येते बाततेबा लेमु खाला खोबा थुप्‍क्‍यो। येशू ख्रीष्‍ट ग्‍युरगीन मावाथुप ख्‍योकोनगी दि बाततेबा ङेन्‍गीन देत। थेचेन ङोमु पाखाला स्‍यारच्‍येते कार्मा ईन।

१ यूहन्‍ना 2:11

दाक्‍पोन आज्‍यो न्‍वाला मिगी थोङसार्मु खित्‍कान्‍ते मिकीचेन थे खोरोङगी च्‍यि खिन ओते, खापा डुइन ओते सिन छ्याःङ छ्या मेस्‍येओ। मुन्‍दाकला देत्‍कीन मेलेबा काम खिन ओतेकी खित्‍सादु थे अन्‍ध च्‍योकराङ गाला ओङगो।

१ यूहन्‍ना 2:8

ईन्‍सीनोङ ङा ख्‍योकोनला थेकी खि सिन कोताते ज्‍येन बातज्‍यीक टिगीन ओत। दोक चुक खाला खित्‍च्‍ये सिन थे खोरोङगी तेन्‍गीन बिन्‍दा ओतान। थेमे ख्‍योकोनगीङ थोकराङ खिन दुक। च्‍यिला सासीन मुन्‍दाक तोरला डुइन ओत। थेमे स्‍वर्गे नाम्‍दाक दुरू वाकीन सिन्‍दा ओत।

१ यूहन्‍ना 5:19

दि सा लुङबा गाङे मिला मेलेबा खित्‍कान्‍ते शैतान अधीनला ओत। ईन्‍सीनोङ ङुरूङचेन परमेश्‍वर फुज्‍युङ फुमु ईन सिन ङुरूङला लेमु खाला छ्या ओत।