२ कोरिन्‍थी 3:6 - जिरेल

⁶ थेकीराङ ङ्योकोनला थे खोरोङगी मिओनताङ तिरी खिओ सिन साबाते जमान बात ज्‍येनला लोप सिन जिम्‍मा बिन्‍सुङ। ङ्योकोनगी लोप्‍च्‍येते होदि जमान बातचेन थाङबो मोशे पालोला दोई पाटीला टिबाते परमेश्‍वर नियम च्‍योक्‍ते मेन, परमेश्‍वर आत्‍मे बात ईन। होथे दोई पाटीला टिबाते नियमला खि साबाच्‍योक मिक्‍किकान्‍ते मिओनचेन पापकी सजाय ङेत्‍ला स्‍यिइओ। परमेश्‍वर आत्‍मेकीचेन मिओनला नोमुङ मिसिन्‍च्‍येते जुनी तेरग्‍यो।

२ कोरिन्‍थी 3:6 Iomraidhean Croise

मत्ती 13:52

थेमे थेकी “थोगी थानामेईचेन स्‍वर्गे राज्‍य सिराते च्‍यिन्‍दे, थे चुक्‍ते ईन्‍दे सिन लेमु खाईन छ्या स्‍येबाते धर्मे गुरूओन ओङगो। थेबाचेन खाम्‍बादु जेसुकै खटेन खित्‍कान्‍ते खाम्‍बे धनी च्‍योक्‍ते ईन। चुक खाला सासीन खाम्‍बे धनीकी गोमामेकी साकीन ज्‍याक्‍पाते थेमे भर्खर ज्‍याक्‍पाते सामानतेबा खाम्‍बे मिओनला गोजीन गोजीन जोतकी नाङदुकी थेन्‍दा च्‍योकराङ खाला थेबेकीङ खोपरोङगी गोमामेकी छ्या स्‍येबा ओताते थेमे थरिङोला खोबाते परमेश्‍वर बात ज्‍येनला लोपा थुप्‍क्‍यो,” सिन सिदुक।

मत्ती 26:28

दिचेन ङे ठाक ईन। काल्‍बेई मिओनगी खाबाते पाप माफ ओङस्‍यीत सिन थेबे लाईदु स्‍यिजीन ङे जीउदुकी थेन्‍दाते ङे ठागी खित्‍सादु परमेश्‍वरगी मिओनताङ तिरी खिओ साबाते जमान पूरो खित्‍च्‍येते ईन।

मर्कूस 14:24

थे थुङा तेरगीन थेकी “दिचेन ङे ठाक ईन। मि काल्‍बेई लाईदु स्‍यिजीन ङे जीउदुकी थेन्‍दाते ठागी खित्‍सादु परमेश्‍वरगी मिओनताङ तिरी खिओ साबाते जमान पूरो खित्‍च्‍येते ईन।

लूका 22:20

थेमे साप सोनामेकी गोमा स्‍योबेन च्‍योकराङ खाईन अंगूर छ्याङ लुक्‍पाते कचौरा लाःक्‍तु लाकीन “दिचेन परमेश्‍वरगी मिओनताङ तिरी खिओ साबाते जमान ईन। ख्‍योकोन लाईदु स्‍यिजीन ङे जीउदुकी थेन्‍दाते ठागीराङ दि जमान पूरो खित्‍च्‍येते ईन।

यूहन्‍ना 5:21

च्‍यिला सासीन जस्‍तो खाला आबेकी स्‍याप्‍ते मिओनला सोम्‍बो लोक्‍ला नोमुङ मिसिन्‍च्‍येते जुनी तेरगीदुक, थोकराङ खाला थे फुज्‍युङगीङ थे खोरोङगी नोमुङ मिसिन्‍च्‍येते जुनी तेरा चालाते मिओनला थे जुनी तेरग्‍यो।

यूहन्‍ना 6:63

मिओनला नोमुङ मिसिन्‍च्‍येते जुनी तेरकान्‍ते परमेश्‍वर आत्‍मा ईन। मिकीचेन दोक खिताराङ मुथुबो। ङे ख्‍योकोनताङ खाबाते बाततेबा परमेश्‍वर आत्‍मेते थेमे नोमुङ मिसिन्‍च्‍येते जुनी बात ईन।

रोमी 1:5

जात जातकी मि गाङेकी थे खोरोङला विश्‍वास खाला थे खोरोङगी साबाते ङेन्‍स्‍यीत थेमे थे खोरोङ चुक छ्ये ईन्‍दे सिन छ्या स्‍येस्‍यीत सिन थेबाला गा लाङच्‍येते बात लोपाला परमेश्‍वरगीराङ दया खाईन ङ्योकोनला खटे खाबाते ईन।

रोमी 3:20

च्‍यिला सासीन परमेश्‍वर नियमला खि साबाते ङेन्‍लानी सुङलाङ परमेश्‍वरगी दोषी मेन सिरराङ मिसिरो। परमेश्‍वर नियम तालाचेन खालि थे नियम माङेन्‍गीन दाक्‍पोनगी पाप खाबा ओताक्‍वा सिनकामा छ्या स्‍येक्‍यो।

रोमी 4:15

च्‍यिला सासीन मिओन परमेश्‍वर नियम मेङेन्‍कान्‍ते ईन्‍देकी परमेश्‍वरगीनी थेबाला थे नियमला साबा च्‍योकराङ खाला स्‍येदाङगी चूर गाल्‍ला सजायका तेरग्‍यो। दोक खि, थोक माकेत सिरच्‍येते परमेश्‍वर नियम मेता ईन्‍सीनचेन गल्‍ती खासुङ सिन सुङलाङ सिरा ङेत्‍च्‍या मेतान।

रोमी 4:17

दि बात परमेश्‍वर बातला दोक सिन टिबा ओत। च्‍यि सासीन अब्राहाम थे खोरोङ दोन्‍दु ओत्‍जीन परमेश्‍वरगी थेला “खोचेन जात जातकी मि ज्‍युज्‍यु ओङगो,” सिन साबा ओतान। परमेश्‍वरगी स्‍याप्‍ते मिओनला सोम्‍बो लोइओ थेमे थोङला ओतराङ मेतातेङ थेकी ओङस्‍यीत सानामेई दाक ओङगो। होदोक खिता थुप्‍कान्‍ते परमेश्‍वरला अब्राहामगी विश्‍वास खाबाते ईन।

रोमी 7:6

तर थाचेन दोक खि, थोक माकेत, दोक माक्‍यासीन सजाय ङेत्‍ला स्‍यिइओ सिरच्‍येते परमेश्‍वर नियम लाईदु ङुरूङ स्‍याप छेतराङ ओङा ओतेकी था ङुरूङ थे नियम अधीनला मेत। परमेश्‍वरला माने खित्‍च्‍या सिन गोमाबा ङुरूङगी थे नियमला खि सिन टिबा च्‍योकराङ खिता चालाप। परमेश्‍वर आत्‍मा ङेता ओतेकी थानी ङुरूङगी परमेश्‍वरला चुक खाला माने खिता फाप्‍कीते होथोकराङ खाला माने खिता थुप्‍क्‍यो।

रोमी 8:2

परमेश्‍वर आत्‍मेकी ङाला पाप खित्‍च्‍येते बानीदुकी टाल्‍गीन ङे पाप खाबेकी स्‍या फाप्‍च्‍येते सजायदुकीङ जोए खाईन बिन्‍सुङ। थेमे ङा येशू ख्रीष्‍टताङ जीउज्‍यीकराङ ओङा ओतेकी थेकी ङाला नोमुङ मिसिन्‍च्‍येते जुनीङ बिन्‍दा ओत।

१ कोरिन्‍थी 11:25

थेमे साप सोनामेकी गोमा स्‍योबेन च्‍योकराङ खाईन अंगूर छ्याङ लुक्‍पाते कचौरा लाःक्‍तु लाकीन “दिचेन परमेश्‍वरगी मिओनताङ तिरी खिओ साबाते जमान ईन। ङे जीउदुकी थेन्‍दाते ठागीराङ दि जमान पूरो खित्‍च्‍येते ईन। ख्‍योकोन जुन जुन बेलाला दोक खाला थुङगीदुक, ङा ख्‍योकोन लाईदु स्‍याप्‍ते बात सम्‍झे खिताला थुङच्‍येते खि,” सिनोङ साबा ओतान।

१ कोरिन्‍थी 12:28

येशू ख्रीष्‍ट मिओन नाङ परमेश्‍वरगी छ्येदुकी शुरू खाईन टेक्‍टेसाक गाङेला दाक्‍पोन दाक्‍पोन जिम्‍मा बिन्‍दा ओत। थेबे नाङ गाङे भन्‍दा गोमाचेन येशू ख्रीष्‍टकी खटे खाबाते मिओन, थेबे तिरी परमेश्‍वर बात खित्‍कान्‍तेबा, थेरूकी परमेश्‍वर बात लोप्‍कान्‍तेबा फाप्‍क्‍यो। थोकराङ खाला अचम्‍ब अचम्‍बतेन्‍दे काम खित्‍कान्‍तेबा, नाबाते मिओनला ठाक्‍पा खित्‍च्‍येते शक्ति ङेता ओतातेबा, ज्‍येनला मद्धत खित्‍कान्‍तेबा, खाङ काम चुक खाला खिता फाप्‍कीते सिन छ्या स्‍येकान्‍तेबा थेमे खोपरोङगी छ्या मास्‍येबाते खुदुक खुदुकते भाषाला बात खित्‍कान्‍ते मिओन फाप्‍क्‍यो।

१ कोरिन्‍थी 15:45

परमेश्‍वर बातला चुक साला दुका सासीन “परमेश्‍वरगी गाङे भन्‍दा गोमा जोबाते मि आदमला नोउनामेई ङेपाक लुगीन बिन्‍सुङ। दोक खानामेई थे सोन्‍सुङ,” सिन टिला दुक। तिरी आदम सिन साबाते ख्रीष्‍टचेन नोमुङ मिसिन्‍च्‍येते जुनी तेरकान्‍ते आत्‍मा ईन।

१ कोरिन्‍थी 3:10

परमेश्‍वरगी ङाला दया खाईन थे खोरोङ काम खि साबा ओतेकी ङे खाम्‍बा ज्‍वाप्‍ला आउदी सिपालु ओताते मिकी च्‍योकराङ खाईन जग तिङाप। ज्‍येनगीचेन दि जगी लाक खाम्‍बा जोइन ओत। तर खाम्‍बा जोकान्‍ते मिकी थे खोरोङगी चुक खाला जोइन ओते सिन लेमु खाला छ्या स्‍येबा फाप्‍क्‍यो।

१ कोरिन्‍थी 3:5

अपोल्‍लोस सु ईन्‍देरो? थेमे पावलका च्‍यि ईन्‍दे? ङ्योकोन ङिबोनी खालि प्रभु परमेश्‍वर काम खित्‍कान्‍ते मिकामा ईन। थेकी ङेराङ दाक्‍पोन दाक्‍पोनला जिम्‍मा बिन्‍दा च्‍योकराङ खाईन ङ्योकोनगी लापाते बात ङेन्‍गीन ख्‍योकोनगी येशूला विश्‍वास खासुङ।

२ कोरिन्‍थी 11:23

थेबेकी खोपरोङ येशू ख्रीष्‍ट काम खित्‍कान्‍तेबा ईन खिदुक। ङाङ येशू ख्रीष्‍ट काम खित्‍कान्‍तेराङ ईन। ईन्‍दानी दोक्‍ते बात खित्‍च्‍येते लेम्‍बे बात च्‍योक्‍ते ईन सिन ङाला छ्या ओत। ईन्‍सीनोङ ङा च्‍यि सिते सासीन थेबेकी भन्‍दा ङे खापान खापान ल्‍हाक्‍पा काम खाबा ओत। ङा पालो थोई जेलदु देते सिन टुङ्गो मेत। मिओनगी ङाला दुबाते बात खाला छ्याःङ साँधी मेत। पालोताङ पालो ङा कालगी खादुकी थाराते ईन।

२ कोरिन्‍थी 3:14

थेजीन इस्राएलीओन छ्याःङ मोखोच्‍या गाला ओतान। थेबा थोरूमोङ थोकराङ ओतेकी मोशेकी टिबाते परमेश्‍वर नियम पढे खित्‍जीन थेबेकी छ्याःङ मोखोदुक। ख्रीष्‍टकी छ्य्‌वापेईकामा थे बात लेमु खाला खोबा थुप्‍क्‍यो।

२ कोरिन्‍थी 3:3

थेकी साबाच्‍योक खाईन ङ्योकोनगी ख्‍योकोन नाङ काम खाबेकी दि चिट्ठीचेन ख्रीष्‍ट थे खोरोङगीराङ टिबाते ईन सिन मि गाङेकी छ्या स्‍येला दुक। दि चिट्ठी मसीकी टिबाते मेन, दोई पाटीला टिबातेङ मेन। दिचेन सोम्‍बोते परमेश्‍वर आत्‍मेकी मि सेमगी नाङराङ टिबाते ईन।

२ कोरिन्‍थी 3:7

दोई पाटीला खोपे खाईन टिबाते होथे नियम पाटीओन परमेश्‍वरगी थे खोरोङला तेरजीन थेत्ताङ बात खाबेकी परमेश्‍वर झिलिमिली नाम्‍दाककी खित्‍सादु मोशे छ्येत आउदी खाला टल्‍के खित्‍च्‍या गाला ओतान। थेते थोक खाला टल्‍के खित्‍च्‍येते छ्येतकी टाक घटे खाला डुइन ओत्‍सीनोङ ज्‍यीबेकी इस्राएलीओनगी मोशे छ्येत ता थुप्‍कीन मेतान। थेरू साबा च्‍योकराङ माक्‍यासीन पापकी सजाय ङेत्‍ला स्‍यिइओ सिन टिबा ओताते थे नियम तेरजीननी परमेश्‍वरते थोक आउदी झिलिमिली मिओनगी थोङा थुपा ओतान सासीन

२ कोरिन्‍थी 3:9

परमेश्‍वर दोन्‍दु मि दोषी ईन सिन छ्या स्‍येच्‍येते नियम तेरजीननी परमेश्‍वरते चुक छ्येज्‍यीक शक्ति ओता ईन्‍दाका सिन थोङा ओतान सासीन थेकी मिओनला दोषी मेन सिन सानामेई थेत्ताङ चुक छ्येज्‍यीक शक्ति ओता ईन्‍दाका सिन झन लेमु खाला छ्या स्‍येक्‍यो।

गलाती 3:21

दोक ईन्‍सीन च्‍यि थे नियमचेन परमेश्‍वरगी आशी तेरग्‍यो सिन खाबाते जमान बातताङ बान्‍दा मिडिक्‍च्‍येते ईन ओना? मेन मेन, दोक पक्‍काराङ मेन। मिओनगी नोमुङ मिसिन्‍च्‍येते जुनी ङेत्‍स्‍यीत सिन परमेश्‍वरगी थे नियम बिन्‍दा मेतान। थोक ईन्‍दा ईन्‍सीन थे नियमला खि साबाते ङेन्‍कान्‍तेबाला थेकी दोषी मेन सिरच्‍या ओतान।

एफिसी 2:1

थेमे गोमाबा ख्‍योकोन खिता मेङच्‍येते कामकामा खिन पाप खिन ओतेकी परमेश्‍वर लाईदु स्‍याप छेतराङ गाला ओतान।

एफिसी 2:5

खिता मेङच्‍येते कामकामा खिन पाप खिन थे लाईदु स्‍याप छेतराङ गालाते ङुरूङला ख्रीष्‍टताङराङ सोम्‍बो लोगीन थेला बिन्‍दा च्‍योक्‍ते जुनी बिन्‍सुङ। थे खोरोङ दयेकी खित्‍सादुकामा परमेश्‍वरगी ख्‍योकोनला दोक खाईन पापकी सजायदुकी टाल्‍गीन बिन्‍दाते ईन सिन टोक माज्‍येत।

एफिसी 3:7

दि गा लाङच्‍येते बात लोप्‍च्‍येते काम ङा खिन ओत। परमेश्‍वरगी ङाला दया खाईन दि बात लोप सिन छाने खाईन दि काम खिताला थे खोरोङ शक्तिङ बिन्‍सुङ।

१ तिमोथी 4:6

दि बातओन खुई ज्‍येन आज्‍यो न्‍वालाङ लेमु खाला लाप्‍ला बिन। थोक खासीन खो येशू ख्रीष्‍टकी खि साबाते काम लेमु खाला खित्‍कान्‍ते मि ओङगो। येशू ख्रीष्‍टला विश्‍वास खित्‍जीन ङेन्‍दाते बात खुई झन लेमु खाला खोकीन डुइओ। थेमे थरिङसाक ङेन्‍गीन वाबाते सत्‍यते बाततेबा झन लेमु खाला ङेन्‍गीन देता थुप्‍क्‍यो।

२ तिमोथी 1:11

दि गा लाङच्‍येते बात ज्‍येनला लोप सिन परमेश्‍वरगी ङाला छाने खाबा ओतान। दोक खाईन ङा येशू ख्रीष्‍टकी खटे खाबाते मि ईन्‍देकी थेमे दि बात लोप्‍कान्‍ते मि ईन्‍देकी ङे दि काम खिता फाप्‍क्‍यो।

हिब्रू 12:24

येशू देत्‍सादुराङ ख्‍योकोन ख्‍योलाते ईन। थेकी खित्‍सादुराङ परमेश्‍वरगी मिओनताङ तिरी खिओ साबाते जमान पूरो ओङाते ईन। येशू स्‍यिजीन थे जीउदुकी थेन्‍दाते ठागी खित्‍सादु परमेश्‍वरगी मि पाप माफ तेरच्‍या खाबाते ईन। थोगी येशू स्‍याप्‍तेचेन हाबिल स्‍याप्‍ते च्‍योक मेन, दिनी खापान खापान छ्येते बात ईन।

हिब्रू 13:20

परमेश्‍वरगी खाबाते नोमुङ खुदुक मोन्‍डोच्‍येते जमान येशूकी थे खोरोङ ज्‍यान बिन्‍ला स्‍यिजीन थे जीउदुकी थेन्‍दाते ठागी खित्‍सादु पूरो खाबा ओत। येशूचेन लुक लेमु खाला ताकान्‍ते छ्येते लुई गोठाला च्‍योक्‍ते ईन। मि सेम ढुक्‍क लोङकान्‍ते परमेश्‍वरगी ङुरूङ प्रभु येशूला स्‍यिसादुकी सोम्‍बो लोक्‍पा ओत।

हिब्रू 7:22

थेकी ना क्‍याल्‍गीन येशूला पूजारी जोबा ओतेकी मोशे पालोला खाबाते जमान भन्‍दा तिरी खाबाते दि जमान छ्ये ईन सिन दाक छ्या स्‍येकीदुक। दि जमान पूरो खित ज्‍युत्‍कान्‍ते येशूराङ ईन।

हिब्रू 8:13

दोक खाईन परमेश्‍वरगी ज्‍येनज्‍यीक जमान खिओ सिन साकीन गोमे जमान छ्याःङ काम लै मिक्‍किच्‍या जोसुङ। ङिङबा गाल्‍गीन काम लै मिक्‍किच्‍या गालाते जे कुरोङ ङीमाई दाक तोरला डुइओ।

१ पत्रुस 3:18

मिओनला पापदुकी डेलाला ख्रीष्‍ट पापकी सजाय भोगे खाईन थे खोरोङ ज्‍यान बिन्‍गीन स्‍या ओतान। दोक खाईन छ्याःङ गल्‍ती मेताते ख्रीष्‍ट परमेश्‍वरगी माकेत साबा साबा खित्‍कान्‍ते मिओन लाईदु स्‍या ओतान। थे थोक खाईन बाजिई मि गाङे लाईदु स्‍यिइन सिन्‍दा ओतेकी था लोक्‍ला नोमुङ दोक खिता माफाबो। थे थोक खाईन स्‍याप्‍की खित्‍सादु ख्‍योकोन परमेश्‍वर दोन्‍दु ड्वा थुपा ओत। मिओनगी थेला सेता ओतान। ईन्‍सीनोङ परमेश्‍वरगी थेला थे खोरोङ आत्‍मे छ्य्‌वापेकी सोम्‍बो लोक्‍पा ओत।

१ यूहन्‍ना 1:1

ङ्योकोन दि बात गाङेला सिओ। च्‍यि सासीन दि सा नाम ज्‍वा भन्‍दा गोमामेईराङ थे बात सिराते ओतान। मिओनला जुनी तेरकान्‍तेचेन थेराङ ईन। थेकी साबाते बातओन ङ्योकोनगी ङेराङ नामज्‍योककीराङ थोबाते ईन। थेमे ङेराङ मिगीराङ थेला थोङाते ईन। थेत्ताङनी ङ्योकोन ङ्योम्‍बुराङ देतातेङ ईन।