२ कोरिन्‍थी 3:18 - जिरेल

¹⁸ प्रभु ख्रीष्‍टकी ङुरूङ सेम खुदुक जोकीन बिन्‍नामेकी ङुरूङगी सुङताङ छ्याःङ बात बोङा माफाबो। ङुरूङला ताला मिओनगी ख्रीष्‍टताङ चुक छ्येज्‍यीक शक्ति ओता ईन्‍दाका सिन छ्या स्‍येक्‍यो। थेकी ङुरूङला थे खोरोङ च्‍योकराङ लेमु जोइन गाल्‍नामेई ङुरूङ झन झन प्रभु ख्रीष्‍ट च्‍योकराङ लेमु डुइन डुइओ। ङुरूङला दोक खित्‍कान्‍ते प्रभु ख्रीष्‍ट ईन। थेत्ताङ परमेश्‍वर आत्‍मा दोक्‍पोईराङ ईन।

२ कोरिन्‍थी 3:18 Iomraidhean Croise

यूहन्‍ना 1:14

थे बात सिरातेचेन मि जुनी लाकीन केकीन ङ्योकोनताङराङ देता ओतान। थोक खाला ङ्योम्‍बुराङ देत्‍जीन परमेश्‍वर आउदी खाला दया खित्‍कान्‍ते ईन, थे सत्‍यते ईन सिन थेकी ङ्योकोनला लेमु खाईन तेन्‍गीन बिन्‍दा ओतान। थेला आबातेकी देमा ताङा ओतान। थेते दोक्‍पोईकामा ओताते फुज्‍युङ ईन्‍देकी थेत्ताङ छ्येज्‍यीक शक्ति ओताते ङ्योकोनगी थोङा ङेत्‍सुङ।

यूहन्‍ना 12:41

येशूताङ चुक छ्येज्‍यीक शक्ति ओता ईन्‍दाका सिन थोङा ओतेकीराङ यशैयेकी थे विषयला थाङबोका थोक सिन साबा ओतान।

यूहन्‍ना 17:22

आबा खोत्ताङ ङा दोक्‍पोईराङ ईन्‍दा च्‍योकराङ खाला दिबाङ सेमज्‍यीकराङ खाला डिक्‍ला देत्‍स्‍यीत सिन आबा खुई ङाला छ्येज्‍यीक मान बिन्‍दा च्‍योकराङ खाईन ङेङ दिबाला मान बिन्‍दा ओत।

यूहन्‍ना 17:24

आबा, खुई ङाला ङिङज्‍ये खित्‍च्‍येते ईन्‍देकी दि सा नाम ज्‍वा भन्‍दा गोमामेईराङ खुई ङाला छ्येज्‍यीक मान बिन्‍दा ओतान। था खुई ङे लाःक्‍तु जिम्‍मा बिन्‍दाते मि जतिङ ङा जहाँ देत्‍कीदुक, थेरूराङ देता ङेत्‍ला दिबाबरीकी ङा होथोक खाईन मान ङेत्‍कीन देताते थोङा ङेत्‍स्‍यीत सिरच्‍येते ङे सेम ओत।

रोमी 12:2

था ख्‍योकोनगी परमेश्‍वरला माने मिक्‍किकान्‍ते दि सा लुङबे मिओनते च्‍योक्‍ते चालचलनताङ बानी बिवारा गाङे थोङ। खेराङ सेम परमेश्‍वरला खुदुक जोला नाङ साला ख्‍योकोन सेम लेमु ओताते मि ओङा फाप्‍क्‍यो। दोक ओङनामेई परमेश्‍वरगी खेराङला च्‍यि च्‍यि खि सिरच्‍या ईन्‍दाका सिन ख्‍योकोनगी लेमु खाला छ्या स्‍येबा थुप्‍क्‍यो। दोक खाला ख्‍योकोनगी परमेश्‍वरला मन परे खित्‍च्‍येतेताङ लेमुते काम च्‍यि ईन्‍दाका सिन डेला थुप्‍क्‍यो।

रोमी 13:14

खेराङला जे जे खिता सेम लाङगीदुक थे थेराङ माकेत। दाक्‍पोन खुशीला ख्‍याम्‍बा लेमु मेन साला बरू ख्‍योकोनगी जे खासीनोङ प्रभु येशू ख्रीष्‍टकी खित ज्‍युता चाला च्‍योक्‍तेकामा खि।

रोमी 8:29

च्‍यि सासीन थेकी थेबाला थे खोरोङ फुज्‍युङ च्‍योकराङ लेमु ज्‍वाप सिन गोमामेई छाने खाबा ओतान। थे खोरोङ फुज्‍युङचेन छ्येते फुज्‍युङ च्‍योकराङ ओङला थेते न्‍वातेबा काल्‍बेई ओङस्‍यीत सिन परमेश्‍वरगी होथेबाला थोक खाईन छाने खाबा ओतान।

रोमी 8:4

दोक ओङा ओतेकी थाचेन ङुरूङगी परमेश्‍वर नियमला खि साबातेताङ माकेत साबाते गाङे साबा च्‍योकराङ खिता थुप्‍क्‍यो। था ङुरूङ गोमाबा च्‍योकराङ दाक्‍पोन खुशीला माख्‍यामो। बरू परमेश्‍वर आत्‍मेकी चुक खित ज्‍युता छोल्‍गीका थोकराङ खिओ।

रोमी 8:7

दाक्‍पोन खुशीला ख्‍याम्‍कान्‍ते मिचेन परमेश्‍वर विरोध खित्‍कान्‍ते ईन। थोक्‍तेबेकी परमेश्‍वर नियम मेङेनो। थेबेकी थेरू खि साबाच्‍योक खिताराङ मुथुबो।

१ कोरिन्‍थी 13:12

परमेश्‍वर दोकस्‍यिकराङ दुक सिन थरिङोलाचेन ङुरूङगी टिक्‍पी टिक्‍पीकामा थोङच्‍येते ऐनाला थोङाच्‍योक खाला थोङगो। था तिरीचेन थे दोकस्‍यिक ओताक्‍वा सिन थेला ठामासोमुला मिगी दोन्‍दुराङ थोङगो। परमेश्‍वर सु ईन्‍दे, थेकी चुक खाला काम खिते सिरच्‍येते बात थरिङोला ङे टिक्‍पी टिक्‍पीकामा छ्या स्‍येबा ओत। थेकी ङाला दि मि दोक्‍ते ईन सिन छ्या स्‍येबाच्‍योक खाला था तिरीचेन परमेश्‍वर दोक्‍ते दुका, थेकी दोकराङ खाला काम खित्‍च्‍याक्‍वा सिन ङे गाङे लेमु खाला छ्या स्‍येक्‍यो।

१ कोरिन्‍थी 15:49

थोक ईन्‍देकी ङुरूङ गाङेते थरिङोले जीउचेन आदम जीउ च्‍योक्‍तेराङ ईन। थरिङोले जीउ ओता च्‍योकराङ था तिरीचेन ङुरूङगी ख्रीष्‍टते च्‍योक्‍ते जीउ ङेत्‍क्‍यो।

२ कोरिन्‍थी 3:17

प्रभु ख्रीष्‍टताङ परमेश्‍वर आत्‍मा दोक्‍पोईराङ ईन। सुइँदा मि सेमगी नाङ प्रभु ख्रीष्‍टकी आत्‍मा ओत्‍नामेकी थे मि गोमाका परमेश्‍वरगी मिओनला बिन्‍दाते नियम अधीनला देता माफाबो।

२ कोरिन्‍थी 4:4

येशूला विश्‍वास खाबा मेताते होदि मिओनगी ख्रीष्‍टताङ चुक छ्येज्‍यीक शक्ति ओते सिन छ्या स्‍येच्‍येते गा लाङच्‍येते बात छ्याःङ मोखोस्‍यीत सिन दि कलि जुगी गेल्‍बो शैतानगी थेबाला लेम्‍बा जोबा ओत। परमेश्‍वरताङ ख्रीष्‍टला छ्याःङ फरक मेत, परमेश्‍वर जस्‍तो ईन ख्रीष्‍टोङ थोजोराङ ईन।

२ कोरिन्‍थी 4:6

परमेश्‍वरगी सा नाम जोजीन “मुन्‍दाकते ठाउँदु नाम्‍दाक ओङस्‍यीत,” सिन साबा ओतान। होथोक सिरकान्‍ते परमेश्‍वरगीराङ मुन्‍दाकते ठाउँदु नाम्‍दाक ओङ च्‍युताच्‍योक खाईन थे खोरोङ सु ईन्‍दे थेमे थेत्ताङ चुक छ्येज्‍यीक शक्ति ओते सिन ङुरूङला छ्या स्‍ये च्‍युत्‍सुङ। दि बात ङुरूङगी ख्रीष्‍टला ताकीन छ्या स्‍येबाते ईन।

२ कोरिन्‍थी 5:17

च्‍यिला सासीन ख्रीष्‍टताङ जीउज्‍यीकराङ ओङाते मिचेन साम्‍बाते जुनी ङेताते मि ईन। थोगी गोमे बात तोरगीन था थे मिकी गोमा च्‍योक दाक्‍पोन खुशी मिक्‍किता खाला परमेश्‍वरगी खि साबा साबाच्‍योक खिओ।

गलाती 6:15

च्‍यिला सासीन खतकी चिनु जोला फाइदा ओङच्‍येतेताङ थे चिनु माजोला घटी ओङच्‍येते बात छ्याःङ मेत। साम्‍बाते जुनी ङेत्‍कीन थोक्‍ते मिकी खित्‍च्‍येते च्‍योक्‍ते काम खिकाना मिक्‍किका सिरच्‍येते बातकामा छ्येते बात ईन।

कलस्‍सी 3:10

खेराङ बानी खुदुक गाल्‍गीन लेमु कामताङ बात खिताला स्‍यूबा ओत। परमेश्‍वरगीराङ ख्‍योकोन बानी दोक लेमु जोबाते ईन। थे खोरोङ चुक्‍ते ईन्‍दाका सिन झन लेमु खाला छ्या स्‍येस्‍यीत थेमे थे खोरोङ च्‍योकराङ लेमु डुइन डोरस्‍यीत सिन परमेश्‍वरगी ख्‍योकोन बानी झन झन लेमु जोइन ओत।

१ तिमोथी 1:11

येशू ख्रीष्‍टला विश्‍वास खित्‍कान्‍ते मिओनगी ङेन्‍दा फाप्‍च्‍येते बातचेन गा लाङच्‍येते बातला साबा ओत। गा लाङच्‍येते बातचेन आउदी अचम्‍बते बात ईन। दि बातचेन जेसुकै ओत्‍कान्‍ते परमेश्‍वरगी मिओनला छ्या स्‍ये च्‍युता ओत। थेमे दि बात ज्‍येन मिओनला लोप सिन थेकी ङाला जिम्‍मा बिन्‍दा ओत।

तीतस 3:5

ङुरूङला पापकी सजायदुकी टाल्‍सुङ। थेकी थोक खाबाते ङुरूङगी थेकी खि साबा साबाच्‍योक खाबेकी खित्‍सादु मेन। ङुरूङला आउदी खाला ङिङज्‍ये खितेकी खित्‍सादुकामा थेकी थोक खाबाते ईन। थेकी ङुरूङला ठु खाईन चोके खाबाच्‍योक खाईन परमेश्‍वर आत्‍मे छ्य्‌वापेकी लोईन केर च्‍युताच्‍योक खाईन साम्‍बाते जुनी बिन्‍गीन खुदुक जोसुङ।

याकूब 1:23

थे बात ङेन्‍ला थेरू खि साबाच्‍योक मिक्‍किकान्‍ते मिकीचेन ऐनाला छ्येत ताबाच्‍योक खाबातेकामा ईन।

१ यूहन्‍ना 3:2

ङिङज्‍येते फिजावे, था ङुरूङ परमेश्‍वर फुज्‍युङ फुमु ओङगीन सिन्‍दा ओत। था तिरी ङुरूङ चुक ओङोङा सिरच्‍येते बात थोरूमसाक ङुरूङला छ्या मेत। दि बातज्‍यीकचेन ङुरूङला लेमु खाला छ्या ओत। च्‍यि सासीन येशू ख्रीष्‍ट ग्‍युरला ओङे छोमु ङुरूङोङ थे च्‍योकराङ ओङगो। च्‍यिला सासीन थे जस्‍तो दुक उस्‍तोराङ ङुरूङगी थेला थोङा ङेत्‍क्‍यो।