२ कोरिन्‍थी 10:1 - जिरेल

¹ थेमे ज्‍येन बात कोई कोईकी ङा ख्‍योकोन दोन्‍दु ओत्‍जीनचेन बात खितालाङ ज्‍यीबा खिन ओतान, थारीला गाल्‍नामेईचेन ङाराङ ईन सिराच्‍योक खाला बात खित्‍च्‍याक्‍वा सिन ङे बात खिदुक्‍लो। था ङा पावल ख्रीष्‍टकी खाबा च्‍योकराङ ङाराङ ईन सिराच्‍योक मिक्‍किता खाला थेमे स्‍येदाङ मिक्‍किता खाला ख्‍योकोनताङ बात खितामीन।

२ कोरिन्‍थी 10:1 Iomraidhean Croise

मत्ती 11:29

ङा ख्‍योकोनताङ स्‍येदाङ मिक्‍किओ, दुक्‍पाङ मेतेरो। लाङ दुल्‍जीन लाबाते लाङताङ गारला मोबाच्‍योक खाला ख्‍योकोनोङ ङे साबाते ङेन्‍ला ङे खाबाच्‍योक खि। थोक खासीन ख्‍योकोन छ्याःङ पीर मिक्‍किता खाला देता ङेत्‍क्‍यो।

मत्ती 21:5

“सियोन सारगी मिओनला दि बात सि। चुक सासीन ख्‍योकोन गेल्‍बोचेन गेल्‍बो च्‍योक छ्ये मिक्‍किता खाला गधे लाक्‍तु जेला थेपा ओङगीन ओत। थे गधे कीउकी लाक्‍तुङ जेला ख्‍याम्‍ग्‍यो,” सिन साबा ओतान।

शक्ति काम 8:32

थेकी पढे खिन ओताते परमेश्‍वर बातलाचेन दोक सिन टिबा ओतान। चुक सासीन “सेताला टीबाते लुक सेत्‍सापा खेरजीन सरासर गालाच्‍योक खाईन सेत खेरजीन थेङ खाराक्‍पाराङ गाल्‍सुङ। थेमे फाल ठेक्‍पाला ठाकीन रिलाते लुई रीउकी छ्याःङ खिता मुथुपा च्‍योकराङ खाईन दुक्‍पा तेरजीन गाङे दुक्‍पा भोगे खाईन थेकीङ खानामा ङोरोज्‍यीगोङ मातेन्‍सुङ।

रोमी 10:20

परमेश्‍वरगी साबाते बात खिन यशैयेकीङ ज्‍यीबाराङ मिक्‍किता खाईन “ङा चुक्‍ते ईन्‍दे सिन छ्याराङ स्‍येबा मोछोल्‍कान्‍ते मिओनगी ङाला छ्या स्‍येसुङ। थेमे ङे खोजीराङ मिक्‍किकान्‍ते मिओनला ङे ङाराङ चुक्‍ते परमेश्‍वर ईन्‍दे सिन छ्या स्‍ये च्‍युत्‍कीन बिन्‍दा ओत,” सिन साबा ओत।

रोमी 12:1

थेमे था आज्‍यो न्‍वावे, परमेश्‍वरगी ङुरूङला थोक आउदी खाईन ङिङज्‍ये खाबा ओतेकी ङा ख्‍योकोनला दोक खि सिन सिओ। ओर्च्‍ये ख्‍योकोनगी खेराङ जीउ परमेश्‍वरतेराङ ईन सिन साला थेकी साबा साबा च्‍योकराङ खिओ सिन थेलाराङ सोम्‍पे खि। थेला मन परे खित्‍च्‍येते भोग बिन्‍दाच्‍योक ओङस्‍यीत सिन ख्‍योकोनगी होदोक खाला खेराङ जीउ थेला सोम्‍पे खि। थे खोरोङगी साबाच्‍योक खाला थेला माने खित्‍च्‍येतेङ होदोकराङ खाला ईन।

रोमी 15:15

ईन्‍सीनोङ ख्‍योकोनगी छ्या स्‍येबा ओताते बात टोक मेज्‍येता खाला झन लेमु खाला छ्या स्‍येस्‍यीत सिन ङे दि चिट्ठीला कोई कोई बात छ्याःङ ज्‍यीबा मिक्‍किता खाईन टिबा ओत। परमेश्‍वरगी ङाला दया खाईन थे खोरोङ काम खि साबा ओतेकी ङे ख्‍योकोनला दोक खाईन टिबाते ईन।

१ कोरिन्‍थी 2:3

थेजीन ङा चुक खाला थे बातओन लेमु खाला लोपा थुप्‍कीका सिन थेतेकामा सुर्ता खिन ज्‍यीबा खिन देताप।

१ कोरिन्‍थी 4:10

ख्रीष्‍टकी मि ईन्‍देकी ङ्योकोनचेन छ्याःङ मेस्‍येकान्‍ते लेम्‍बाते मि च्‍योक ओङा ओत। तर ख्रीष्‍टकी खित्‍सादु ख्‍योकोननी आउदी च्‍याङबो गाल्‍दुक। थेमे ङ्योकोन छ्याःङ खिता मुथुप्‍कान्‍ते मि ईन। ख्‍योकोनचेन जेङ खिता थुप्‍कान्‍ते ईन। थोकराङ खाला मिओनगी ङ्योकोनला दिबाङ सु ईन्‍देरो सिराच्‍योक खिदुक। ख्‍योकोनलाचेन गाङेकी मान खिओ।

१ कोरिन्‍थी 4:21

लो था ख्‍योकोन च्‍यि सिते? ङाला थेपा फेर्का खुरला स्‍योक सिताना ङिङज्‍ये खाला लेमु खिताला स्‍योगे?

२ कोरिन्‍थी 10:10

ख्‍योकोन कोई कोईकी “पावलगी खालि थारीला गाल्‍नामेईकामा स्‍येदाङ खिन दोक खिताङ थोक खि सिन कोत्‍ला चिट्ठी टिइदुक। ङुरूङताङ ङ्योम्‍बु ओत्‍जीनचेन थेकी ङेन्‍गीन देत्‍की सिराच्‍योक खाला बादोङ खिता मुथुबो, थे चुकस्‍यिक ओते सिन ङुरूङला छ्या ओत,” सिन बात खिदुक्‍लो।

२ कोरिन्‍थी 10:2

च्‍यि सासीन थोक सिन बात खित्‍कान्‍ते मिओनला था ङा थेपा वाला ङाला खजो स्‍येदाङ लाङच्‍या ईन्‍दाका सिन ङे तेन्‍दा माफाप्‍स्‍यीत। ङ्योकोनोङ ज्‍येन च्‍योकराङ दाक्‍पोन खुशीला ख्‍याम्‍कान्‍ते मि ईन सिन सिरकान्‍ते थोक्‍ते मिओनताङ चुक खाला बात खिता फाप्‍कीते सिन ङाला छ्या ओत।

२ कोरिन्‍थी 10:7

ख्‍योकोनचेन खालि मि चुकस्‍यिक दुका थेकामा तेइदुक। थे सेमगी नाङ चुक ओताना सिरच्‍येते बात छ्याःङ विचार मिक्‍किदुक। सुइँदेकी ङानी ख्रीष्‍टकी मि ईन खिदुक सासीन थेकी ङ्योकोनोङ होथोक्‍ते मिराङ ईन सिन लेमु खाला खोबा फाप्‍क्‍यो।

२ कोरिन्‍थी 11:21

होथेबेकी खाबाते च्‍योक्‍ते कामचेन ङे खिता माथुप्‍सुङ। थोक खिता माथुपेकी ङाला ङोचा लाङगीदुक। सुइँदेकी ङा दोक्‍ते मि ईन, ङे दोक खिता थुप्‍क्‍यो सिन छ्ये खिदुक सासीन ङाङ छ्याःङ बुद्धि मेताते लेम्‍बाते मि च्‍योक खाला होथेबेकी च्‍योक खाला बात खिता थुप्‍क्‍यो।

२ कोरिन्‍थी 11:30

ङा दोक्‍ते मि ईन, ङे दोक खिता थुप्‍क्‍यो सिन ङे छ्ये खित्‍च्‍येते बात छ्याःङ मेत। ङाराङ छ्ये खिता फाप्‍सीन ङानी ङाराङ चुक छ्याःङ खिता मुथुप्‍कान्‍ते ईन्‍दे सिरच्‍येते बातकामा खिओ।

२ कोरिन्‍थी 12:5

थे मिकी स्‍वर्गने च्‍यि च्‍यि थोङसुङा, चुक्‍तेन्‍दे बात थोसुङा सिन बात खिन छ्ये खिता थुप्‍क्‍यो। तर ङा ङाराङगी थोङातेताङ थोबाते थोक्‍ते बात खाला छ्ये मिक्‍किओ। ङाराङ छ्ये खिता फाप्‍सीन ङानी ङाराङ चुक छ्याःङ खिता मुथुप्‍कान्‍ते ईन्‍दे सिरच्‍येते बातकामा खिओ।

२ कोरिन्‍थी 3:12

बात दोक दोक ईन्‍देकी ङ्योकोन ङेराङगी लोप्‍च्‍येते बात छ्याःङ ज्‍यीबा मिक्‍किता खाला खिओ।

२ कोरिन्‍थी 5:20

थोगी ङेराङला जिम्‍मा बिन्‍दाते काम खिताला ङ्योकोन ख्रीष्‍टकी ताङाते मि ईन। मिओनला परमेश्‍वरताङ डिक्‍च्‍येते सेम खि सिन बात खित्‍कान्‍ते ङ्योकोन ईन्‍सीनोङ परमेश्‍वर थे खोरोङगीराङ ङ्योकोन छ्य्‌वापेकी मि गाङेताङ दि बात खित्‍च्‍येते ईन। ख्रीष्‍टकी छ्य्‌वापेई ङ्योकोन ख्‍योकोनला परमेश्‍वरताङ डिक्‍च्‍येते सेम खि सिन सिओ।

२ कोरिन्‍थी 6:1

ङेराङ परमेश्‍वरताङ डिक्‍ला काम खित्‍कान ईन्‍देकी ङ्योकोन ख्‍योकोनला दोक सिनोङ सिओ। च्‍यि सासीन ख्रीष्‍टकी खित्‍सादु परमेश्‍वरगी खेराङला दया खाबाते थाराङ खेरो मोन्‍डोस्‍यीत सिन ओर्च्‍ये ख्‍योकोनगी थेला मन परे खित्‍च्‍येते काम खि।

२ कोरिन्‍थी 7:4

ख्‍योकोनताङ ङा ङाराङ सेमगी बादोङ खिता थुप्‍क्‍यो। ख्‍योकोन लेमु काम खित्‍कान्‍ते मि ईन सिन सम्‍झे खित्‍जीन ङाला गा लाङगीदुक। ङेराङगी जस्‍तो दुक्‍पा ङेत्‍सीनोङ ङानी गाकी फिरगीन देत्‍क्‍यो।

गलाती 4:13

चुक सासीन ङाराङ नाबा ओतेकी खित्‍सादु ङे गोमे पालोला ख्‍योकोन ओत्‍सापा वाकीन गा लाङच्‍येते बात लाप्‍कीन बिन्‍दा ओतान सिन ख्‍योकोनगी टोक ज्‍येता मेतासीन।

गलाती 5:2

दि बात लेमु खाला नामज्‍योक सेत्‍ला ङेन। ङा पावल ख्‍योकोनला च्‍यि सिते सासीन ख्‍योकोनगी थे नियमला साबाते ङेन्‍गीन जीउला खतकी चिनु जोसुङ सासीन ख्रीष्‍टकी खाबाते काम ख्‍योकोन लाईदु छ्याःङ काम लै मिक्‍किओ।

एफिसी 3:1

परमेश्‍वरगी ख्‍योकोनला होदोक लेमु खाबा ओतेकी ङा पावल ख्‍योकोन लाईदु परमेश्‍वरला प्रार्थना खिओ। येशू ख्रीष्‍टकी खि साबाते काम खाबेकी ङाला जेलदु ज्‍याक्‍पा ओत। ख्‍योकोन ज्‍येन ज्‍येन जातकी मिला लेमु ओङस्‍यीत सिन ङा दोक खाला दुक्‍पा भोगे खिओ।

एफिसी 4:1

बात दोक दोक ईन्‍देकी ङा ख्‍योकोनला दोक खि सिन सिओ। प्रभु येशू ख्रीष्‍टकी खि साबाते काम खाबेकी ङाला जेलदु ज्‍याक्‍पा ओत। ङा ख्‍योकोनला चुक खि सिते सासीन ओर्च्‍ये, परमेश्‍वरगी खेराङला थे खोरोङ दोन्‍दु स्‍योक सिन कातोङजीन ख्‍योकोनगी चुक चुक खिता फाप्‍क्‍यो सिन साबा ओताने थोक थोकराङ खि।

फिलिप्‍पी 4:5

ख्‍योकोन मि गाङेताङ खा छ्येत लेमु खित्‍कान्‍ते मि ईन सिन गाङेकी छ्या स्‍येस्‍यीत। प्रभु येशू ग्‍युरला ओङच्‍ये बेला लेपा खासुङ सिन टोक माज्‍येत।

कलस्‍सी 1:23

थोगी था ख्‍योकोनगी येशूला विश्‍वास खाईन ङेन्‍दाते बात ङेन्‍दा नोमुङ तोङा मेङगो, थे बातला खि साबा च्‍योकराङ खिन देता फाप्‍क्‍यो थेमे होथे गा लाङच्‍येते बात थोनामेई तिरी खेराङगी परमेश्‍वरगी तेरग्‍यो साबाते जति ङेत्‍क्‍यो सिन आश खाईन गुकीन देताते बातला ज्‍येनगी जे सासीनोङ छ्याःङ शंका मिक्‍किता खाला देत। होथे बात ख्‍योकोनलाकामा मेन, सा लुङबा खाङगी मिला लाप्‍कीन बिन्‍दा ओत। थेमे ङा पावललाचेन मिओनला होथे बात लोप्‍च्‍येते जिम्‍मा बिन्‍दा ओत।

२ थिस्‍सलोनिकी 3:17

था ख्‍योकोनला ङेते नमस्‍ते ओत सिनचेन ङा पावल ङाराङ लाक्‍पेकीराङ टिगीन ओत। दि चिट्ठी ङेराङ ताङाते ईन सिन छ्या स्‍येस्‍यीत सिन ङाराङगी ताङाते जुन चिट्ठीलाङ सिन्‍दे खालाचेन होदोकराङ खाला ङा ङाराङ लाक्‍पेकीराङ टिइओ।

फिलेमोन 1:19

खुईते दिला खइँदा लिन्‍दा फाप्‍च्‍या ओत्‍सीन ङाराङ ज्‍येल्‍ग्‍यो सिन ङा पावल ङाराङराङ टिगीन ओत। ङे खित्‍सादुराङ खुई प्रभु येशूला विश्‍वास खाबाते ईन्‍देकी ङे खोल्‍ला थोई गुन खाबा ओते सिन ङा छ्याःङ मिसिरो।

फिलेमोन 1:9

बरू परमेश्‍वर सन्‍तान गाङेला खुई ङिङज्‍ये खिओ सिन ङाला छ्या ओतेकी खुई चुक खासीन लेमु ईन्‍दे सिन ङा खोल्‍ला बातज्‍यीक खितामीन। खोल्‍ला दि बात खित्‍कान्‍ते ङा पावल था चुक गान्‍दा गाल्‍गीन सिन्‍दा ओते सिन थेमे येशू ख्रीष्‍टकी खि साबाते काम खितेकी थरिङोला जेलदु देता फापाते ईन सिन खोल्‍ला छ्याराङ ओत।

१ पत्रुस 2:11

ङिङज्‍येते आज्‍यो न्‍वावे, ख्‍योकोन दुरू टिक्‍पी दिनकामा देत्‍च्‍येते ईन्‍देकी मि लुङबे मि च्‍योकराङ ईन। थोगी ओर्च्‍ये, ख्‍योकोन ङे दोक्‍ते कामताङ बात खिता मेङगो सिन छ्या ओत्‍कीन ओत्‍कीनोङ ङे दोक माक्‍याबाला ओङराङ मेङगो सिराच्‍योक खाला खेराङ सेमला लाबा लाबा खित्‍च्‍येते नोमुङ छ्याःङ माकेत।

छ्या स्‍ये च्‍युताते बात 1:9

ङा ख्‍योकोन आज्‍यो यूहन्‍नाङ ख्‍योकोन च्‍योकराङ येशूताङ जीउज्‍यीकराङ ओङाते मि ईन। थोगी ङेङ ख्‍योकोनगी च्‍योकराङ खाईन दुक्‍पा ङेता ओत। थेमे ङाङ परमेश्‍वर राज्‍यदु ख्‍योकोनताङ ङ्योम्‍बुराङ देता ङेत्‍क्‍यो। जस्‍तो दुक्‍पा ङेत्‍सीनोङ ङाङ ख्‍योकोन च्‍योकराङ खपे खाईन देता ओत। ज्‍येनला परमेश्‍वर बात लापेकी थेमे येशू ख्रीष्‍ट सु ईन्‍दे, थेकी च्‍यि खिते सिन लापेकी खित्‍सादु ङाला समुन्‍द्रे किल्‍दु ओताते पत्‍मोस लुङबापा उरगीन ताङा ओतान।