१ तिमोथी 1:9 - जिरेल9 परमेश्वर नियमचेन थे नियमला खि साबा साबाच्योक खित्कान्ते मिओन लाईदु जोबाते मेन सिनोङ ङुरूङला छ्या ओत। थे नियम चुक्ते मिओन लाईदु जोबाते ईन्दे सासीन नियम कानून मेङेन्कान्तेताङ मनपरी खाला ख्याम्कान्ते मिओन, परमेश्वरला मान मिक्किकान्तेताङ पापीओन, परमेश्वरला मन परे मिक्किच्येते काम खित्कानताङ परमेश्वर ओतराङ मेत सिन थे विरोध खित्कान्ते मिओन लाईदु जोबाते ईन। थोक्ते मिओन लाईदुकामा मेन, दाक्पोन आबा आमाला थेमे ज्येन मिओनला सेत्कान्ते मिओन, Faic an caibideil |
१ तिमोथी 1:9
45 Iomraidhean Croise
थेमे याङराङ परमेश्वरगी दि सा लुङबा अब्राहामताङ थे सन्तानओनते ओङगो सिन थेत्ताङ जमान खाबा ओतान। अब्राहामगी थे खोरोङ नियम ङेन्सुङ सिन परमेश्वरगी थेत्ताङ जमान खाबा मेतान। थेकी थे खोरोङताङ जमान खाबा च्योकराङ खिओ सिन अब्राहामगी थेला विश्वास खाबेकी परमेश्वरगी थेला दोषी मेन सानामेकी दि जमान खाबा ओतान।
थोक ईन्सीन परमेश्वरगी मिओनला च्यिला थे खोरोङ नियम बिन्सुङा सिनोङ बात थेन्ग्यो मेन? नियम ओत्सीनोङ थेरू खिता मेङगो साबा साबाराङ खाला झन झन पाप खित्च्याक्वा सिन मिओनगी छ्या स्येस्यीत सिनराङ परमेश्वरगी थे नियम बिन्दा ओतान। दोक खाईन मिओन झन पाप खित्कान गाल्सीनोङ थेबे पाप माफ तेराला परमेश्वरगी थेबाला झन आउदी दया खाबाते ईन।
थोक ईन्सीन परमेश्वरगी थे खोरोङ नियम च्यिला बिन्ताका ओना सिरच्येते बादोङ थेन्ग्यो। थे नियमचेन पाप खित्च्या सिराते च्यि ईन्दे थेमे चुक खिता मेङते सिन छ्या स्येस्यीत सिन टिक्पी दिनगी लाईदुकामा बिन्दा ओतान। थे खोरोङगी आशी तेरग्यो सिन अब्राहामताङ जमान खाबाते अब्राहाम सन्तान ओङ ओङसाकलाकामा सिन थे नियम बिन्दा ओतान। यहूदीओनला ङेन सि सिन थे नियमचेन परमेश्वरगी थे खोरोङ दूतओन लाःकनापेकी मिज्यीकला बिन्दा ओतान।
थेमे मि जाला लोभ खिओ। दोस्यिककामा मेन, थे छ्याङ रक्सीकी जिला ख्याम्ग्यो, ज्येनताङ रूला भक्कुचूर सोला थुला मोज मज्जा खिओ थेमे होदोक्ते ज्येन ज्येन कामोङ खिओ। होदोक दोक खिन देत्कान्ते मि सुङ तिरी परमेश्वर राज्यने स्यूक्पा मेङेदो सिन ङे ख्योकोनला गोमाकाङ लेमु खाईन साबा ओत, लोक्ला थरिङोङ थोकराङ सिओ।
थेपा कोई कोई मिकी लोप्कीन ओताते कामराङ लै मिक्किच्येते कथाला खुई नामज्योक मासेत, ज्येनलाङ ङेन माज्युत। थेबेकी लोप्च्येते बातनी सत्यते बातताङ डिकराङ मिडिक्च्येते थेमे थाङनेते फेम्मे मि बात च्योक्ते ईन। थोगी खुई परमेश्वरला चुक खाला माने खिन ओते थे छ्य्वापा स्येत लै खाला झन थोक खिनराङ देत।
थेजीन मिओनगी खालि दाक्पोन विचारकामा खिओ, गाङेराङ पैसे लोभलाकामा स्यूइओ। थेबेकी ङा ङाराङ ईन सिन धाक लै खिओ थेमे छ्ये खिओ। थेजीन मिओनगी मेन्दे बातला ज्येनला दोष लै खिओ, आबा आमेकी लाःपा कोताते मेङेनो, खोपरोङला लेमु खित्कानला लेमु खासुङ सिराच्योक मिक्किओ थेमे परमेश्वरला मन परे मिक्किच्येते कामकामा खिओ।
थरिङोला थेपा थोक खाला ङेन्दा फाप्च्येते बातताङ मिडिक्च्येते बात लोप्कान्ते मि काल्बेई दुक। थेबेकी सुङगीङ बात मेङेन्दा खाला खालि छ्याःङ काम लै मिक्किच्येते बातओन लाप्ला येशूला विश्वास खित्कान्ते मिओनला छक्के खिओ। दोक खित्कान्तेबा काल्बा च्योक्ते जीउला खतकी चिनु जोकान्ते यहूदीराङ ईन।
खोपरोङ होथोक्ते मि ईन्सीनोङ थेबेकीचेन परमेश्वर सु ईन्दे, चुक्ते ईन्दे सिन ङ्योकोनला लेमु खाला छ्या ओत सिन सिओ। थेबे काम ताला थेबा परमेश्वरला माने खित्कान्ते मि मेन सिन दाक छ्या स्येक्यो। थेबाला थोङजीन परमेश्वरला गा मालाङो, थेबेकी परमेश्वरगी साबाते ङेनराङ मेङेनो थेमे लेमु काम सिराते छ्याःङ खिताराङ मुथुबो।
येशू ख्रीष्ट मिओनला ताकान्ते मिचेन सुङगीङ दिकी दि दि गल्ती खाबा ओत सिन साबा मेताज्यीक ओङा फाप्क्यो। थेते फेम्मेज्यीककामा ओङा फाप्क्यो। थे फुज्युङ फुमुतेबाङ येशूला विश्वास खित्कान ओङा फाप्क्यो। थे फिजाओन बानी बिवारा थोङला सुङगीङ थेबाला मनपरी खिन ख्याम्कान्ते थेमे आबा आमेकी लाःपा कोताते मेङेन्कान्ते ईन सिन सिरा मुथुप्च्येतेन्दे ओङा फाप्क्यो।
गोमाबा ङुरूङोङ सो साकान पशु च्योकराङ ओतान। ङुरूङगी परमेश्वरगी साबाते खाङोङ बात माङेन, ङुरूङ ङ्येकीन गाला ओतान। थेजीन ङुरूङ दोक माक्याबाला ओङराङ मेङगो सिराच्योक खाला दाक्पोन सेमला लाबा लाबा खिता ओङच्या मेङच्या कामओन खिन ओतान। ङुरूङ जहिलेङ मेलेबाकामा खिन थेमे ज्येनला डार खिन ओतान। दोक खाला ङुरूङ गाङे नाङ दोक्पोईकी ज्येनज्यीकला मिगी थोङसार्मु खित्च्येतेकामा खिन ओतान।
थोगी थे दो साबाते येशू ख्रीष्टला विश्वास खित्कान्तेबा ख्योकोन लाईदु थे आउदी काम लै खित्च्येते दो ईन। ईन्सीनोङ थेला विश्वास मिक्किकान्तेबे लाईदु थे चुक्ते ईन्दे सिन परमेश्वर बातला “जुन दोला कर्मीओनगी कामराङ लै मिक्किओ सिन क्युरा ओतान, थे दोराङ आउदी काम लै खित्च्या थे मेताला छ्याःङ खिता मुथुप्च्या ओङसुङ,” सिन टिला दुक।
तर ङे मि ईन सिरा ज्यीबा खित्कान्तेबा, ङाला विश्वास मिक्किकान्तेबा, मेलेबा मेलेबा काम खित्कान्तेबा, मि सेत्कान्तेबा, रन्डीबाजी थेमे होदि च्योक्ते खिता मेङच्येते काम खित्कान्तेबा, स्युत्च्या फुत्च्याताङ मन्तर तन्तर खित्कान्तेबा, ल्हा लुला माने खित्कान्तेबा थेमे ढाँर खित्कान्तेबाचेन गाङेराङ गन्धकताङ मे बाराते ज्यीबा लाङच्याज्यीक मे धुनीमा स्यूक्पा फाप्क्यो। था तिरी ज्यीबा लाङच्याज्यीक मे धुनीमा स्यूक्च्येते सिरातेचेन होदिराङ ईन,” सिन सिदुक।
थे सारगी फिनामाचेन फेत्कान्ते कि च्योकराङ मेलेबा खित्कान्ते मिओन, स्युत्च्या फुत्च्याताङ मन्तर तन्तर खित्कान्ते मिओन, रन्डीबाजी थेमे होदि च्योक्ते खिता मेङच्येते काम खित्कान्ते मिओन, मि सेत्कान्तेबा, ल्हा लुला माने खित्कान्तेबा थेमे ढाँर खिताला छ्याःङ च्योक मिक्किकान्ते मिओनकामा देत्क्यो।
Sanasan