१ तिमोथी 1:4 - जिरेल

⁴ थेमे थेबाला छ्याःङ काम लै मिक्‍किच्‍येते कथा थेमे थाङबो थाङबोमे वंशावली बात खाला दिन तोङच्‍येते माकेत सि। थोक्‍ते बात खित्‍जीन खालि टेकाटेउरीकामा स्‍योरग्‍यो, नोमुङ डिक्‍च्‍येते बात मेङगो। थोक्‍ते बात खित्‍कान्‍ते मिओनगीचेन परमेश्‍वरगी मिओन नाङ खिता चालाते काम मिक्‍किओ। येशू ख्रीष्‍टला लेमु खाला विश्‍वास खालाकामा परमेश्‍वरगी खिता चालाते काम खिता थुप्‍क्‍यो।

१ तिमोथी 1:4 Iomraidhean Croise

२ कोरिन्‍थी 1:12

थेमे दि बात ङ्योकोन छ्याःङ ज्‍यीबा मिक्‍किता खाला सिरा थुप्‍क्‍यो। च्‍यि सासीन ज्‍येनगी दोन्‍दु ईन्‍स्‍यीत, ख्‍योकोन दोन्‍दु ईन्‍स्‍यीत जे खासीनोङ जहिलेङ ङ्योकोनगी सेमला पाप सिराते छ्याःङ मोज्‍योबा खाईन परमेश्‍वरगी खि साबा च्‍योकराङ खाईन लेमुते कामताङ साँचोते बातकामा खाबा ओत। ङेराङ स्‍येतताङ बुद्धिकी खित्‍सादु ङ्योकोनगी थोक खिता थुपाते मेन। परमेश्‍वर दयेकी खित्‍सादुराङ थोक खिता थुपाते ईन।

एफिसी 3:2

परमेश्‍वर थे खोरोङ दयेकी खाबाते कामगी बात ख्‍योकोन ज्‍येन ज्‍येन जातकी मिला लोप्‍च्‍येते जिम्‍मा ङाला बिन्‍दाते ईन सिन ख्‍योकोनगी थोबाराङ ओतासीन।

१ तिमोथी 3:16

परमेश्‍वरगी गोमा सुङलाङ छ्या स्‍ये च्‍युता मेताते थे खोरोङला चुक खाला माने खिता फाप्‍कीते सिरच्‍येते बात आउदी अचम्‍ब लाङच्‍याज्‍यीक दुक। दि बात मेन सिन सुङगीङ सिरा मुथुबो। दि बात च्‍यि ईन्‍दे सासीन ख्रीष्‍टचेन मि जुनी लाकीन पृथ्‍वीदु केसुङ। थे छ्याःङ गल्‍ती मेताते ईन सिन परमेश्‍वर आत्‍मेकी छ्या स्‍ये च्‍युता ओत। थेला परमेश्‍वर दूतओनगी थोङा ओत। जात जातकी मिला थे बात लाप्‍कीन बिन्‍दा ओत। सा लुङबा खाङ मिओनगी थेला विश्‍वास खाबा ओत। थेला परमेश्‍वरगी छ्येज्‍यीक मान बिन्‍गीन स्‍वर्गने खेरा ओत।

१ तिमोथी 4:7

थेपा कोई कोई मिकी लोप्‍कीन ओताते कामराङ लै मिक्‍किच्‍येते कथाला खुई नामज्‍योक मासेत, ज्‍येनलाङ ङेन माज्‍युत। थेबेकी लोप्‍च्‍येते बातनी सत्‍यते बातताङ डिकराङ मिडिक्‍च्‍येते थेमे थाङनेते फेम्‍मे मि बात च्‍योक्‍ते ईन। थोगी खुई परमेश्‍वरला चुक खाला माने खिन ओते थे छ्य्‌वापा स्‍येत लै खाला झन थोक खिनराङ देत।

१ तिमोथी 6:11

तर खोचेन परमेश्‍वरगी खि साबाते काम खित्‍कान्‍ते मि ईन। थोगी खुई थोक्‍ते मेलेबा काम छ्याःङ माकेत। खुईचेन परमेश्‍वरगी खि साबा च्‍योकराङ खिन देत, थेला चुक खाला माने खिता फाप्‍च्‍येते ईन्‍दे थोकराङ खाला माने खि, येशू ख्रीष्‍टला विश्‍वास खिन देत। दोस्‍यिककामा मेन, ज्‍येनला ङिङज्‍ये खि, दुक्‍पा ओङसीनोङ खपे खिन देत थेमे गाङेताङ खा छ्येत लेमु खि। खुई होदोक दोक खित्‍च्‍ये छ्य्‌वापाकामा सेम लै खि।

१ तिमोथी 6:20

लो तिमोथी, परमेश्‍वरगी खोरोङला जिम्‍मा बिन्‍दाते काम खि साबा च्‍योकराङ खाला खिन देत। परमेश्‍वर बातताङ डिकराङ मिडिक्‍च्‍येते कामराङ लै मिक्‍किच्‍येते बातला नामज्‍योक मासेत। च्‍यि बात चुक ईन्‍दे सिन लेमु खाईन छ्या स्‍येबा ओताच्‍योक खाला सत्‍यते बात ईन सिन मेन्‍दे बात लोप्‍कान्‍ते मि बात नोमुङ माङेन।

२ तिमोथी 2:14

दि बातओन थेरू गाङेला याङ याङ सिनराङ देत। टेकाटेउरी स्‍योरच्‍येते बात माकेत सिन खुई थेबाला प्रभु परमेश्‍वर ङोन्‍दु कोत। टेकाटेउरी खाला छ्याःङ लेमु मेङगो। येशूला विश्‍वास खित्‍कान्‍ते ज्‍येनतेबे दोन्‍दु दोक्‍ते बात खित्‍जीन थेबेकी थेबाला ङ्ये ज्‍युत्‍क्‍यो।

२ तिमोथी 2:22

थोगी खुईचेन स्‍यारातेबाला खिता सेम लाङच्‍येते दाक्‍पोन सेमला लाबा लाबाच्‍योक खित्‍च्‍येते मेलेबा काम सिराते नोमुङ माकेत। परमेश्‍वरगी खि साबा च्‍योकराङ खि, येशूला विश्‍वास खिन देत, ज्‍येनला ङिङज्‍ये खि थेमे ज्‍येनतेबाताङ डिक्‍ला थुन्‍ला देत। येशू ख्रीष्‍टला प्रभु सिन सिरकान्‍ते सेमला छ्याःङ पाप मेताते मिओनताङ खुई होदोककामा खिन देत।

२ तिमोथी 2:23

थेमे छ्याःङ काम लै मिक्‍किच्‍येतेताङ ईनराङ मेन्‍दाते बात खासीन खालि थोम्‍मु जीङगाकामा स्‍योरग्‍यो सिन खोल्‍ला छ्याराङ ओतेकी होदोक्‍ते बात खित्‍कान्‍ते मिओनताङ खुई थोक्‍ते बात छ्याःङ माकेत।

२ तिमोथी 4:4

थोक खाला थेबेकी सत्‍यते बात ङेन्‍दा ताङला छ्याःङ काम लै मिक्‍किच्‍येते कथाओनका लेमु खाला ङेन्‍ग्‍यो।

तीतस 1:1

दि चिट्ठी टिक्‍कान्‍ते ङा पावल ईन। ङा परमेश्‍वर काम खित्‍कान्‍ते मि ईन। थेमे ङा येशू ख्रीष्‍टकी खटे खाबाते मिङ ईन। परमेश्‍वरगी थे खोरोङ मि सिन छाने खाबाते मिओनगी झन लेमु खाला थेला विश्‍वास खिता थुप्‍स्‍यीत थेमे सत्‍यते बात लेमु खाला छ्या स्‍येला झन थेला लेमु खाला माने खिता थुप्‍स्‍यीत सिन थेबाला लाप्‍ला कोत्‍ला तेरच्‍येते जिम्‍मा ङाला बिन्‍दा ओत।

तीतस 1:14

थोक खाला थेबेकी थे यहूदीओनगी जोला लोप्‍च्‍येते छ्याःङ काम लै मिक्‍किच्‍येते बातताङ कथाओनला नामज्‍योक मेसेत्‍स्‍यीत थेमे सत्‍यते बात मेङेन्‍कान्‍ते मिओनगी ङेन्‍दा फाप्‍क्‍यो सिन साबाते रीतिथिति माने खिता तोङस्‍यीत सिन होथोक खि।

तीतस 3:9

तर बात खाला नोमुङ डिक्‍पा मुथुप्‍च्‍येते छ्याःङ काम लै मिक्‍किच्‍येते थाङबो थाङबोमे वंशावली बातओन खित्‍च्‍येते थेमे परमेश्‍वर नियम बात खाला टेकाटेउरी खिन थोम्‍मु खित्‍च्‍येतेचेन नोमुङ माकेत। थोक्‍ते बात खाला डिक्‍च्‍येतेताङ सुइँदाला लेमु ओङच्‍येते सिराते नोमुङ छ्याःङ मेङगो।

हिब्रू 13:9

बात दोक ईन्‍देकी परमेश्‍वर बात ईन सिन थे बातताङ डिकराङ मिडिक्‍च्‍येते खुदुक खुदुकते बात ङेन्‍ला छक्‍के माकेत। परमेश्‍वरगी दया खाबा ओतेकी खित्‍सादु होथोक्‍ते बातला नामज्‍योक मेसेता खाला छ्याःङ शंका मिक्‍किता खाला थेला विश्‍वास खिन देता लेमु ईन। दि सा ओङगो, थे सा मेङगो सिरच्‍येते नियम ङेन्‍ला सुङलाङ छ्याःङ फाइदा मेत।

२ पत्रुस 1:16

ङुरूङ प्रभु येशू ख्रीष्‍ट चुक छ्येज्‍यीक शक्ति ङेत्‍ला दुरू ग्‍युरला ओङगीते सिन ख्‍योकोनला लोप्‍जीन ङ्योकोनगी थाराङ ङेराङगी जोबाते बात लापाते मेन। थे चुक छ्ये ईन्‍दे सिननी ङ्योकोनगी ङेराङ मिगीराङ थोङाते ईन।