१ थिस्‍सलोनिकी 5:8 - जिरेल

⁸ ङुरूङचेन परमेश्‍वर नाम्‍दाकला देत्‍कान्‍ते मि ईन्‍देकी होस तोराते मि च्‍योक ओङा मेङगो। बरू च्‍याङबो खाला देत्‍ला प्रभु येशूला विश्‍वास खिन थेमे ज्‍येनला ङिङज्‍ये खिन देता फाप्‍क्‍यो। दोक खिन देत्‍च्‍येतेचेन लडाइँ बेलाला मिल्‍टेरीओनगी ठाङला खोन्‍च्‍येते च्‍याकी पाता खोन्‍दा च्‍योकराङ ईन। थेमे ङुरूङगी आश खाईन देता च्‍योकराङ था तिरी पापकी सजाय भोगे खिता माफाबो सिनोङ टोक ज्‍येता मेङगो। थोक खित्‍च्‍येतेचेन मिल्‍टेरीओनगी गोःला च्‍याकी टोप खोन्‍दा च्‍योकराङ ईन।

१ थिस्‍सलोनिकी 5:8 Iomraidhean Croise

१ कोरिन्‍थी 13:13

ज्‍येनतोक गाङे ङीमा लेनज्‍यीक छ्याःङ काम लै मिक्‍किच्‍या गाल्‍सीनोङ परमेश्‍वरला विश्‍वास खित्‍च्‍येते, थेकी ङुरूङला तेरग्‍यो साबाते ङेत्‍क्‍यो सिन खित्‍च्‍येते आश थेमे ज्‍येनला ङिङज्‍ये खित्‍च्‍येते दि बात सुमचेन नोमुङ छ्याःङ काम लै मिक्‍किच्‍या मोन्‍डोओ। दि बात सुमगी नाङदुङ छ्येते बातचेन ज्‍येनला ङिङज्‍ये खित्‍च्‍येतेराङ ईन।

२ कोरिन्‍थी 6:7

परमेश्‍वर बातला जे साला दुक ङ्योकोन थेकामा लोप्‍क्‍यो, ङेराङगी खित्‍च्‍येते काम ङ्योकोन परमेश्‍वर शक्ति छ्य्‌वापेकी खिओ। लडाइँला डोकान्‍ते मिते सामे लाक्‍पाला तरवार थेमे देब्रे लाक्‍पाला ढाल ओङगो। ङ्योकोन ढालताङ तरवारचेन परमेश्‍वरगी खि साबा साबाच्‍योक खाला ङेराङगी खिन ओताते कामराङ ईन।

गलाती 5:5

ङुरूङनी परमेश्‍वर नियम ङेन्‍देकी मेन्‍गीन येशू ख्रीष्‍टला विश्‍वास खाबेकीका परमेश्‍वरगी दाक्‍पोनला दोषी मेन सिन साबाते ईन सिन पत्ते खिओ। परमेश्‍वर आत्‍मा ङेता ओतेकी था तिरी परमेश्‍वरगी दाक्‍पोनला पक्‍काराङ दोषी मेन सिओ सिन ङुरूङ आश खाला गुलाराङ देत्‍क्‍यो।

एफिसी 6:11

थेमे शैतानताङ जीङाला परमेश्‍वरगी तेरच्‍येते हात हतियार जति गाङे खुरला खोन्‍ला देत। थोक खाईन देत्‍सीन खेराङला परमेश्‍वर छ्य्‌वापेई डेलाला शैतानगी जतिराङ च्‍याङबो खाईन काम खासीनोङ थेते छ्याःङ सीप लै मिक्‍किओ।

एफिसी 6:23

थेमे आबा परमेश्‍वरताङ प्रभु येशू ख्रीष्‍टकी आज्‍यो न्‍वाबा ख्‍योकोनला डिक ज्‍युत्‍कीनराङ देत्‍स्‍यीत, दोक्‍पोईकी ज्‍येनज्‍यीकला ङिङज्‍ये खिन देत ज्‍युत्‍स्‍यीत थेमे विश्‍वास खिनराङ देत ज्‍युत्‍स्‍यीत।

१ थिस्‍सलोनिकी 5:5

ख्‍योकोननी गाङेराङ परमेश्‍वर नाम्‍दाकला देत्‍कान्‍ते मि ईन। ख्‍योकोन मुन्‍दाकला खित्‍च्‍येते मेलेबा मेलेबा काम खित्‍कान्‍ते मि मेन्‍देकी नाम्‍दाकला लेमु काम खित्‍कान्‍ते मि ईन। ङुरूङचेन मेलेबा मेलेबा काम खिन मुन्‍दाकला देत्‍कान्‍ते मि मेन।

२ थिस्‍सलोनिकी 2:16

ङुरूङ आबा परमेश्‍वरगी ङुरूङला ङिङज्‍ये खाईन थे खोरोङ दयेकी जहिलेङ आँट तेरगीन देत्‍ला तिरी तेरग्‍यो सिन साबातेबा गाङे पक्‍काराङ ङेत्‍क्‍यो सिन आश खाला देत ज्‍युत्‍क्‍यो। दोक खित्‍कान्‍ते परमेश्‍वरताङ ङुरूङ प्रभु येशू ख्रीष्‍ट थे खोरोङगीराङ ख्‍योकोनला आँट बिन्‍ला ख्‍योकोनगी खिन ओताते लेमुते कामताङ बात गाङे खिनराङ देत ज्‍युत्‍स्‍यीत सिन ङ्योकोन प्रार्थना खिओ।

हिब्रू 6:19

दाक्‍पोनगी आश खाईन देताच्‍योक पक्‍काराङ ओङगो सिन छ्या ओतेकी दोक ओङगीता मेङता सिन ङुरूङ नोमुङ छ्याःङ ज्‍यीबा मिक्‍किता खाला देता थुप्‍क्‍यो। ङुरूङगी आश खाईन देता च्‍योकराङ खाला ङुरूङला परमेश्‍वर दोन्‍दु खेराला येशू गाङे भन्‍दा छ्येते पूजारी ओङगीन ङुरूङ भन्‍दा गोमाका पर्दे ल्‍हाकनापा परमेश्‍वर दोन्‍दु गाङे भन्‍दा छ्येते पूजारीकामा ड्वा ङेत्‍च्‍येते ठाउँदु गाल्‍गीन देता ओत। येशू मल्‍कीसेदेक च्‍योकराङ गाङे भन्‍दा छ्येते पूजारी ओङा ओत। थे सधैँभरि गाङे भन्‍दा छ्येते पूजारी ओङला देत्‍क्‍यो।

१ पत्रुस 1:13

परमेश्‍वरगी ख्‍योकोनला दोक लेमु खाबा ओतेकी था ख्‍योकोनगी थेकी खि साबाते काम खित्‍च्‍ये छ्य्‌वापाकामा स्‍येत खि। दाक्‍पोन सेम काबूला स्‍योक। थेमे येशू ख्रीष्‍ट ग्‍युरला ओङे छोमु परमेश्‍वरगी ख्‍योकोनला दया खाला पूरो खाला पापदुकी टाल्‍ला लेमु खिओ साबाते पक्‍काराङ खिओ सिन खेराङगी आश खाईन देता च्‍योकराङ ओङगो सिन टोक माज्‍येत।

१ पत्रुस 2:9

बात दोक ईन्‍सीनोङ ख्‍योकोनलाचेन परमेश्‍वरगी थे खोरोङ मि ईन सिन छाने खाबा ओत। ख्‍योकोनचेन परमेश्‍वर पूजारी ईन, थेचेन गेल्‍बो ईन। ख्‍योकोन परमेश्‍वरला माने खित्‍कान्‍ते मि ईन। ख्‍योकोन परमेश्‍वर मिराङ ईन। थेकी ख्‍योकोनला पापताङ लोभदुकी टाल्‍ला थे खोरोङ नाम्‍दाकला देताला थे खोरोङ दोन्‍दु स्‍योक सिन काताङा ओत। थेकी खाबाते अचम्‍ब अचम्‍बतेन्‍दे कामगी बात ख्‍योकोनगी ज्‍येनलाङ सिरस्‍यीत सिन थेकी ख्‍योकोनला दोक खाबाते ईन।

१ यूहन्‍ना 1:7

परमेश्‍वर नाम्‍दाकला देता ओता च्‍योकराङ खाला ङुरूङोङ थे नाम्‍दाकला देत्‍कीन लेमु काम खासीन ङुरूङ दाक्‍पोन नाङ ङ्योम्‍बुराङ डिक्‍ला देता थुप्‍क्‍यो। थेमे परमेश्‍वर फुज्‍युङ येशू थे खोरोङ ज्‍यान बिन्‍ला स्‍यिजीन थे जीउदुकी थेन्‍दाते ठागी खित्‍सादु ङुरूङ पाप गाङे माफ ओङगो।