१ थिस्‍सलोनिकी 4:13 - जिरेल

¹³ थेमे आज्‍यो न्‍वावे, ज्‍येन बात च्‍यि सासीन ख्‍योकोन नाङ स्‍यिइन सिन्‍दाते मिओनला था तिरी च्‍यि ओङगीते सिन ख्‍योकोनगी लेमु खाला छ्या स्‍येस्‍यीत सिन ङ्योकोन दि बात खिन ओत। थेबाला चुक ओङगीते सिन छ्या स्‍येनामेकी ख्‍योकोनगीचेन स्‍वर्गने ड्वा ङेत्‍कीता मेङेत्‍ता सिन छ्याःङ आश मेताते मिओनगी खोपरोङते स्‍यिइन सिन्‍दाते मिओन लाईदु पीर खाबाच्‍योक खाला पीर खिता माफाबो।

१ थिस्‍सलोनिकी 4:13 Iomraidhean Croise

मत्ती 27:52

थोकराङ खाईन फुकतेबाङ खाकीन गोमाबा स्‍यिइन थेङला ज्‍याक्‍पाते परमेश्‍वर सन्‍तान काल्‍बेईला परमेश्‍वरगी सोम्‍बो लोक च्‍युत्‍सुङ।

यूहन्‍ना 11:24

थोक सिरजीन मार्थेकी “ईन स्‍याप्‍ते मिओन सोम्‍बो लोक्‍जीन था तिरी थेङ सोम्‍बो लोइओ सिन ङाला छ्या ओत,” सिन सिदुक।

शक्ति काम 13:36

गेल्‍बो दाऊदकीचेन थे खोरोङ पालो मिओनला परमेश्‍वरगी थे खोरोङला खित च्‍युता च्‍योकराङ खाला राज्‍य खिन ओतान। उमेर छाङनामेकी थे स्‍यिसुङ। थेमे थेला थे खोरोङ पुर्खाओन दिसे खादुराङ दिसुङ। थेमे थे दाक रूल्‍गीनोङ गाल्‍सुङ।

शक्ति काम 7:60

थेमे खोबुकला देत्‍कीन गाङेकी थोच्‍या खाईन “ए प्रभु, दिबेकी दोक मेलेबा पाप खासीनोङ दिबाला माफ बिन,” सिन सिदुक। थोस्‍यिक साकीन च्‍याकीन थे दाक स्‍यिसुङ। स्‍तिफनसलानी सेताराङ फाप्‍च्‍या ओतान सिन शावलोङ आउदी खाईन गा खाबा ओतान।

शक्ति काम 8:2

स्‍तिफनस रोचेन परमेश्‍वरला माने खित्‍कान्‍ते मिओनगी खेरगीन दिबा ओतान। थेमे थेबा आउदी खाईन पीर खाबा ओतान।

रोमी 1:13

आज्‍यो न्‍वावे, पालोताङ पालो ङा ख्‍योकोन ओत्‍सापा ओङा चालाप। ङे ढाँर खाबाते मेन। तर जति खासीनोङ थोरूमसाक ङा थेपा ओङा माथुप्‍सुङ। ज्‍येन ठाउँकी ज्‍येन ज्‍येन जातकी मि नाङ च्‍योकराङ खाला थेपाङ गा लाङच्‍येते बात लोपा ङेत्‍सीन मिओनगी येशूला विश्‍वास खित्‍च्‍या ओतान सिन ङा ख्‍योकोन ओत्‍सापा ओङा चालाते ईन।

१ कोरिन्‍थी 10:1

आज्‍यो न्‍वावे, ङुरूङ ज्‍युज्‍यु पुर्खाला परमेश्‍वरगी मिश्रदुकी तेन्‍ला खुलाङजीन थेबा ख्‍याम्‍बा फाप्‍च्‍येते लाम तेन्‍दाला थेबे गोमा गोमा मुक्‍पा ताङा ओतान। थेमे थेबा गाङेला छ्याःङ मेलेबा ओङ मुज्‍युता खाईन समुन्‍द्र तेन्‍गीन खुलाबा ओतान। दि बात ख्‍योकोनगी टोक माज्‍येत।

१ कोरिन्‍थी 12:1

आज्‍यो न्‍वावे, परमेश्‍वर आत्‍मेकी मिओनला तेरच्‍येते सीपताङ शक्ति बात च्‍यि ईन्‍दे, चुक्‍ते ईन्‍दे सिन ख्‍योकोनगी लेमु खाला खोस्‍यीत सिन ङा दि बात सिन ओत।

१ कोरिन्‍थी 15:6

थेबालाकामा मेन्‍देकी थेकी थे खोरोङला विश्‍वास खित्‍कान्‍ते मि काल्‍बेईला बाजिईला ठेता ओतान। थेबा मेरा सय ङा भन्‍दाङ ल्‍हाक्‍पा ओतान। थेबा कोई स्‍यिइन सिन्‍सीनोङ काल्‍बा च्‍योकचेन थोरूमसाकोङ सोम्‍बोराङ ओत।

२ कोरिन्‍थी 1:8

आज्‍यो न्‍वावे, थाचेन ङा ख्‍योकोनला एशिये अञ्‍चलदु ओत्‍जीन ङ्योकोनगी चुकस्‍यिक दुक्‍पा भोगे खिता फापा ओताने सिन सिरामीन। थेरू ङ्योकोनगी नोमुङ टोक ज्‍येता मुथुप्‍च्‍याज्‍यीक खपेराङ खिता मुथुप्‍च्‍याई दुक्‍पा भोगे खिता फापा ओतान। था सोन्‍दा थुबोङ सिरच्‍येतेनी ङ्योकोनते सेमगी छेउलाङ मेतान।

एफिसी 2:12

ख्‍योकोनगी टोक ज्‍येता मेङच्‍येते बात च्‍यि सासीन ख्‍योकोन गोमा ख्रीष्‍टकी छ्य्‌वापेई छ्याःङ मेङेत्‍कान्‍ते मि ओतान, परमेश्‍वरगी छाने खाबाते इस्राएली नाङ फाप्‍कीन मेतान थेमे परमेश्‍वरगी जमान खाईन थेबाला तेरग्‍यो साबातेबा ङेत्‍च्‍येते ख्‍योकोनते छ्याःङ हक मेतान। दोस्‍यिककामा मेन, तिरी जुनीला लेमु ओङच्‍येते ख्‍योकोनते छ्याःङ आश मेतान थेमे परमेश्‍वरला छ्या मास्‍येकीन दि सा लुङबादु खेराङला लेमु खित्‍कान्‍ते सुङ मेताच्‍योक खाईन देता ओतान।

एफिसी 2:3

ईन्‍दाका गोमाबा ङुरूङ गाङेराङ ज्‍येन च्‍योकराङ दाक्‍पोन खुशीला ख्‍याम्‍गीन दाक्‍पोनला च्‍यि च्‍यि खिता सेम लाङगीका थोकराङ खिन खिता मेङच्‍येते कामताङ बात खिन ओतान। थोक खाबेकी ङुरूङगीङ होथेबा ज्‍येनगी च्‍योकराङ खाला परमेश्‍वरगी स्‍येदाङगी चूर गाल्‍ला तेरच्‍येते सजाय ङेता फाप्‍च्‍या ओतान।

१ थिस्‍सलोनिकी 4:14

येशू स्‍याप्‍तेताङ सोम्‍बो लोक्‍पाते बात पक्‍काराङ ईन्‍देकी थेला विश्‍वास खिन खिन स्‍याप्‍ते मिओनलाङ परमेश्‍वरगी था तिरी सोम्‍बो लोक्‍ला येशूताङराङ थे खोरोङ दोन्‍दु देताला खेरग्‍यो सिरच्‍येते बात ङुरूङ पत्ते खिओ।

१ थिस्‍सलोनिकी 4:15

दोक ओङगो सिरच्‍येते बातला प्रभु येशू थे खोरोङगीराङ साबाते बात ङ्योकोन ख्‍योकोनला सिओ। च्‍यि सासीन थे ग्‍युरला ओङे छोमु थेला विश्‍वास खित्‍कान्‍ते गोमाका स्‍यिइन सिन्‍दाते मिओनगी माठेतथुप ङुरूङ थे छोमुसाक सोन्‍गीन देतातेबा सुङगीङ थेला मेठेदो।

१ थिस्‍सलोनिकी 5:10

था तिरी ङुरूङ थेत्ताङ नोमुङ माठाला खाला देता ङेत्‍स्‍यीत सिनराङ प्रभु येशू ख्रीष्‍ट ङुरूङगी ङेता फाप्‍च्‍येते पापकी सजाय थे खोरोङगीराङ भोगे खाईन स्‍याप्‍ते ईन। थोगी थे ग्‍युरला ओङकेसाकला ङुरूङ स्‍यिसीनोङ सोन्‍गीनराङ देता ओत्‍सीनोङ थेत्ताङराङ देता ङेत्‍क्‍यो।

१ थिस्‍सलोनिकी 5:6

थोगी ङुरूङगी होथे ज्‍येनगी खिन ओताच्‍योक खिता मेङगो। ङिगी जाप्‍ते मि च्‍योक गाला ओतेकी थेबेकीचेन तिरी बात छ्याःङ विचार मिक्‍किओ। ङुरूङचेन तिरी बातकी विचार खाला च्‍याङबो खाला देता फाप्‍क्‍यो, छ्याङ रक्‍सी थुकीन होस तोराते मिकी खिताच्‍योक खिता मेङगो।

२ पत्रुस 3:4

“थे याङराङ दुरू ग्‍युरला ओङगो साबाते बात खै खापा तोरसुङा? ज्‍युज्‍यु पुर्खा गाङे स्‍यिइन गाल्‍सुङ। ईन्‍सीनोङ दि सा लुङबा जोजीनमेई ओता च्‍योकराङ जेसुकै थोककी थोकराङ दुक,” सिन सिओ।

२ पत्रुस 3:8

ङिङज्‍येते आज्‍यो न्‍वावे, दि बादोङ ख्‍योकोनगी टोक माज्‍येत। च्‍यि सासीन प्रभु परमेश्‍वर लाईदुनी ङीमाई सिराताङ लो हजारज्‍यीक सिरा दोक्‍पोईराङ ईन, छ्याःङ खुदुक मेन।