१ थिस्‍सलोनिकी 2:5 - जिरेल

⁵ ख्‍योकोनताङ ओत्‍जीनोङ ङ्योकोनगी खोलु सिराते बान्‍दा माक्‍या। थोकराङ खाईन सेमदुचेन ख्‍योकोनगी खइँदा तेरगीता सिन लोभ खाईनोङ थे बात मालाप। दि बात ख्‍योकोनला सिरा माफाप्‍तासीन। ङ्योकोनगी साबाते बात ढाँर खाबाते मेन सिन परमेश्‍वरला छ्या ओत।

१ थिस्‍सलोनिकी 2:5 Iomraidhean Croise

मत्ती 22:16

ठो खाईन थेबेकी खोपरोङ मिओनताङ कोई कोई हेरोद गेल्‍बो पाटी मिओनला येशूताङ बात खित ताङसुङ। थेमे थे मिओनगी येशू ओत्‍सादु लेप्‍कीन “गुरू, मिओनला खुई साँचोते बातकामा खिओ सिन ङ्योकोनला छ्या ओत। परमेश्‍वर बात लोप्‍जीन खो छ्ये छ्ये मि सुङताङ ज्‍यीबा मिक्‍किओ। परमेश्‍वरगी च्‍यि च्‍यि खि साबा ओते सिन छ्ये टेक्‍टे मेडेला खाला खुई गाङेला लेमु खाला लोप्‍क्‍यो।

मत्ती 23:13

धर्मे गुरूओनताङ फरिसी पाटी मिवे, ख्‍योकोन चुक्‍तेन्‍दे ईन्‍दाका। था ख्‍योकोनला आउदी मेलेबा ओङगो। च्‍यिला सासीन चुक खाला स्‍वर्गे राज्‍यने स्‍यूक्‍पा थुप्‍कीते सिन ख्‍योकोनगी मिओनला लोपराङ मोलोप्‍तुक। थोक ईन्‍देकी मिओन थेने स्‍यूक्‍पाराङ मुथुप्‍तुक। दोक खाला खेराङनी थेने स्‍यूक्‍पा माङेत्‍सुङ माङेत्‍सुङ थेने स्‍यूक्‍पा सेम खित्‍कान्‍तेबालाङ ख्‍योकोनगी स्‍यूकराङ मुज्‍युत्‍तुक।

शक्ति काम 20:33

ज्‍येन बात च्‍यि सासीन ख्‍योकोनताङ ङ्योम्‍बु देत्‍जीन ङे सुङगीङ सेर नोरताङ खोलाक लोभ माक्‍या, सुङलाङ छ्याःङ नाङ मासा।

रोमी 1:9

ङे ख्‍योकोनला थोई सम्‍झे खाला जहिलेङ ख्‍योकोन लाईदु प्रार्थना खिका सिरच्‍येते बात परमेश्‍वरलाराङ छ्या ओत। थे फुज्‍युङते गा लाङच्‍येते बात ङाराङ स्‍येतकी थुपासम्‍म ज्‍येनला लाप्‍ला ङा परमेश्‍वरला माने खिओ।

रोमी 16:18

थोक्‍ते मिओनगीचेन प्रभु ख्रीष्‍टला माने खिते साटोला खालि साच्‍या थुङच्‍ये बातताङ खोपरोङला जे जे खिता सेम लाङगीदुक थे थेराङ खिओ। थेबेकीनी स्‍यीम्‍बु स्‍यीम्‍बु बात खाला खोलु खिन साधा सुधोते मिओनला डिकस्‍यिकला ङ्योल्‍च्‍येते कामकामा खिओ।

रोमी 9:1

थेमे येशू ख्रीष्‍टताङ जीउज्‍यीकराङ ओङाते मि ईन्‍देकी ङा ईन्‍दाते बातकामा खिओ। ङे खिन ओताते दि बात ढाँर खाबाते मेन सिन ङाराङ सेमगी नाङ ओताते परमेश्‍वर आत्‍मेकीङ ङाला छ्या स्‍ये च्‍युता ओत।

२ कोरिन्‍थी 12:17

च्‍यि ङे ख्‍योकोन ओत्‍सापा ताङाते मिओनला ख्‍योकोनताङ दि दि नाङ खाला खोरच्‍योक साकीन ख्‍योकोन सुइँदाताङ खइँदा नाङ खाबा ओतान?

२ कोरिन्‍थी 2:17

ईन्‍सीनोङ मि काल्‍बेईकी खोपरोङ फाइदे लाईदु खाबाच्‍योक खाला ङ्योकोननी ङेराङ फाइदे लाईदु परमेश्‍वर बात मोलोबो। बरू ख्रीष्‍टताङ जीउज्‍यीकराङ ओङा ओतेकी परमेश्‍वर दोन्‍दुराङ दि काम खिन ओत सिराच्‍योक खाला सेमदु छ्याःङ पापताङ लोभ मोज्‍योबा खाला ङ्योकोनचेन परमेश्‍वरगी ङेराङला जिम्‍मा बिन्‍दाते काम खिओ।

२ कोरिन्‍थी 4:2

ङ्योकोन ईप्‍ला छ्याक्‍ला ज्‍येनला ठगे खित्‍च्‍येते च्‍योक्‍ते ङोचा लाङच्‍येते काम मिक्‍किओ, मिला छक्‍के खिताला ईनराङ मेन्‍दे बात मोलोबो, ङ्योकोननी परमेश्‍वर बात खुदुक जोला लोप्‍च्‍येतेङ मिक्‍किओ। परमेश्‍वर दोन्‍दुराङ काम खाबाच्‍योक खाला ङ्योकोननी सत्‍यते बातला जे साला दुक थेकामा लोप्‍क्‍यो। थोक ईन्‍देकी ङ्योकोनगी सत्‍यते बातकामा लापा ओत सिन मि गाङेकी सिरा थुप्‍क्‍यो।

२ कोरिन्‍थी 7:2

थेमे ख्‍योकोनगीङ ङ्योकोनला ङिङज्‍ये खि। ङ्योकोनगी ख्‍योकोन सुङलाङ छ्याःङ मेलेबा खाबा मेत, मेन्‍दे बात लाप्‍कीन ख्‍योकोन सुङलाङ छक्‍के खाबा मेत थेमे सुङताङ छ्याःङज्‍यीक खाङज्‍यीक लाकीन ठगेङ खाबा मेत।

गलाती 1:20

ङे दि गाङे ईन्‍दाते बातकामा टिगीन ओत सिन परमेश्‍वरलाराङ छ्या ओत।

१ थिस्‍सलोनिकी 2:10

येशूला विश्‍वास खित्‍कान ख्‍योकोन गाङेताङ ङ्योम्‍बु ओते बेलाला ङ्योकोनगी मेलेबाते काम सिराते छ्याःङ माक्‍या। चुक खित्‍जीन ख्‍योकोनला लेमु ओङगीका थोककामा खाबाप। ङ्योकोनगी दि दि गल्‍ती खासुङ सिन सुङगीङ सिरा मुथुबो। ङ्योकोनगी साबाते दि बात ढाँर खाबाते मेन सिन परमेश्‍वरला थेमे ख्‍योकोनला छ्या ओत।

१ तिमोथी 3:3

थे छ्याङ रक्‍सी काल्‍बा मुथुङकानज्‍यीक, मिला लाःक मोतोङकानज्‍यीक, गाङेताङ खा छ्येत लेमु खित्‍कानज्‍यीक, थोम्‍मु जीङगा मिक्‍किकानज्‍यीक थेमे पैसे लोभ मिक्‍किकानज्‍यीक ओङा फाप्‍क्‍यो।

१ तिमोथी 3:8

थेमे येशू ख्रीष्‍ट मिओनला ताकान्‍ते छ्येते मिओन कामला मद्धत तेरकान्‍ते मिओनोङ लेमु बानी ओताते मि ओङा फाप्‍क्‍यो। थेबाचेन च्‍येला ङि खित्‍कान्‍ते थेमे छ्याङ रक्‍सीकी जिकान्‍ते मि ओङा मेङगो। थेबा सम्‍पत्ति ज्‍वाप सिन पैसे लोभला स्‍यूक्‍कान्‍तेन्‍दे ओङा मेङगो।

तीतस 1:7

दोक खाला येशू ख्रीष्‍ट मिओनला ताकान्‍ते छ्येते मिकीचेन परमेश्‍वरगी खि साबाते काम खित्‍च्‍येते ईन्‍देकी सुङगीङ दिकी दि दि गल्‍ती खाबा ओत सिन साबा मेताज्‍यीक ओङा फाप्‍क्‍यो। थोक्‍ते मि दाक्‍पोन बातलाकामा जिद्धी मिक्‍किकानज्‍यीक, होत्ता स्‍येदाङ मिक्‍किकानज्‍यीक, छ्याङ रक्‍सी काल्‍बा मुथुङकानज्‍यीक, मिला लाःक मोतोङकानज्‍यीक थेमे सम्‍पत्ति ज्‍वाप सिन पैसे लोभला मुस्‍यूक्‍कानज्‍यीक ओङा फाप्‍क्‍यो।

१ पत्रुस 5:2

चुक सासीन लुई गोठालेकी लुक ताप च्‍योकराङ खाला लेमु खाला तो सिन परमेश्‍वरगी खेराङ जिम्‍माला बिन्‍दाते परमेश्‍वर मिओनला लेमु खाला तो। परमेश्‍वरगी ङाला दोक खि साबेकी ङे दोक खिता करराङ लै खासुङ सिराच्‍योक माकेत, बरू गा खिन दाक्‍पोन राजी खुशीकी दि काम खाबाते ईन सिराच्‍योक खाला थेबाला लेमु खाला तो। थेमे दि काम खित्‍जीन पैसा थोई ङेत्‍कीका सिन पैसे लोभ खाला मेन्‍देकी दि काम खिता आउदी सेम ओताच्‍योक खाला काम खि।

२ पत्रुस 2:18

च्‍यिला सासीन थेबेकी काम लै खित्‍च्‍येते बात सिराते छ्याःङ मोलोबो। खोपरोङ जे बादोङ छ्या स्‍येकान ईन सिराच्‍योक खाला आउदी छ्ये छ्ये बात खिओ। दाक्‍पोन खुशी खिन दि सा लुङबे मिओनगी खित्‍च्‍येते च्‍योक्‍ते खिता मेङच्‍या ङोचा लाङच्‍येते काम खिता ताङगीन भर्खर भर्खर परमेश्‍वरला विश्‍वास खिताला स्‍यूबाते मिओनला दिबेकी होथोक्‍ते काम खासीन छ्याःङ मेङगो साला लोक्‍ला गोमा खाबाते होथोक्‍ते कामराङ खित ज्‍युत्‍कीदुक।

२ पत्रुस 2:3

पैसे लोभकी खित्‍सादु थेबेकी ख्‍योकोनला मेन्‍दा मेन्‍दे बात जोला लाप्‍ला ठगे खिओ। दोक खित्‍कान्‍तेबाला परमेश्‍वरगी सजाय बिन्‍ला नरककुण्‍डमा लुक्‍यो सिन गोमाका साबा ओत। थेकी दि बात टोक ज्‍येता मेत। था थेकी होत्ताराङ थेबाला सजाय तेरग्‍यो।

यहूदा 1:11

था थेबाला आउदी मेलेबा ओङगो। च्‍यिला सासीन थेबेकी कयिनगी खाबा च्‍योकराङ खिदुक। पैसे लोभ खाईन बालामगी खाबा च्‍योकराङ मेलेबा काम खिदुक। थेमे कोरहेकी च्‍योक खाला छ्ये छ्ये मि विरोध खिदुक। दोक खाबेकी थेबाङ कोरह च्‍योकराङ सजाय ङेत्‍ला स्‍यिइओ।