१ थिस्‍सलोनिकी 2:13 - जिरेल

¹³ थेमे ङ्योकोन जहिलेङ दि बातकी लाईदुङ परमेश्‍वरला धन्‍यवाद सिओ। च्‍यि सासीन ङ्योकोनगी परमेश्‍वर बात लोप्‍जीन थे बात मिकी जोबाते मेन्‍दाक्‍वा, परमेश्‍वर बातराङ दुका सिन ख्‍योकोनगी ङेन्‍सुङ। ईन्‍दाबोङ थे बातचेन परमेश्‍वर बातराङ ईन। येशूला विश्‍वास खित्‍कान ख्‍योकोन नाङ परमेश्‍वरगी होथे बातकी छ्य्‌वापेईराङ काम खिन ओत।

१ थिस्‍सलोनिकी 2:13 Iomraidhean Croise

मत्ती 10:20

च्‍यिला सासीन खेराङगी मेन्‍दाला थेजीन ख्‍योकोन आबा परमेश्‍वर आत्‍मा थे खोरोङगीराङ ख्‍योकोन खानापेई बात खिओ।

मत्ती 10:40

थेमे ख्‍योकोनला लेमु खित्‍कान्‍ते मिकी ङालाराङ मान खाबाते ईन। ङाला मान खित्‍कान्‍तेकी ङाला दुरू तोङकान्‍तेलाङ मान खाबाते ईन।

लूका 11:28

थेकीचेन थे फेम्‍मे मिला “परमेश्‍वर बात ङेन्‍ला थेकी खि साबा साबा खित्‍कान्‍ते मिओन झन भाग्‍यमानी ईन,” सिन सिदुक।

लूका 5:1

थेमे ङीमाई येशू गनेसरेत सिराते समुन्‍द्रे छेउदु देत्‍ला परमेश्‍वर बात लोप्‍कीन ओतान। थेकी साबाते बात लेमु खाला ङेन्‍दाप सिन मिबरीचेन फुलरीङ फुलरीङ खिन थे दोन्‍दुराङ ड्वा छोल्‍गीन ओतान।

लूका 8:11

था ङे ख्‍योकोनला थे कथे अर्थ च्‍यि ईन्‍दे सिन लाःप्‍ला बिनगी। सोन साबातेचेन परमेश्‍वर बात ईन।

लूका 8:21

थेकी थोक सिरजीन येशूकी थेरू ओताते मि गाङेला “परमेश्‍वर बात ङेन्‍ला थेरू खि साबा साबाच्‍योक खित्‍कान्‍ते मिओनराङ ङेते आमाताङ न्‍वाओन ईन,” सिन सिदुक।

यूहन्‍ना 15:3

ङे ख्‍योकोनला लापाते बातकी खित्‍सादु ख्‍योकोन सेम लेमु गाल्‍गीन सिन्‍दा ओत।

यूहन्‍ना 17:17

सत्‍यते बात ङेन च्‍युत्‍ला दिबे सेम खुदुक जोला खुई दिबाला खोल्‍ला मन परे खित्‍च्‍येते कामताङ बातकामा खित छ्युत। सत्‍यते बातचेन खुई बातराङ ईन।

यूहन्‍ना 17:19

दिबेकीङ पूरो खाला ङे खाबाच्‍योक खिता थुप्‍स्‍यीत सिनराङ ङा खोल्‍ला मन परे खित्‍च्‍येते कामताङ बातकामा खिओ।

शक्ति काम 10:33

थोगी ङे छ्याःङ अलमल मिक्‍किता खाईन हजूर खोल्‍ला लिन ताङाते ईन। हजूर खो दिस्‍साक दुक्‍पा खाईन वाबा थोङजीन ङ्योकोनला गा लासुङ। दुरू ङ्योकोन गाङेराङ प्रभु परमेश्‍वर दोन्‍दु जम्‍मा ओङा ओत। प्रभु परमेश्‍वरगी हजूर खोल्‍ला च्‍यि बात खि साबा ओते था थे बात ङ्योकोनला लेमु खाला लाप्‍ला नाङ। खुई बात ङेन्‍दाला ङ्योकोन गाङेराङ जम्‍मा ओङाते ईन,” सिन सिदुक।

शक्ति काम 13:48

पावलताङ बारनाबासकी दोक सिरजीन ज्‍येन ज्‍येन जातकी मि आउदी खाईन गा खासुङ। थेमे प्रभु येशू बात चुक लेमु दुका सिन बात खिताला स्‍यूसुङ। दोक खाईन नोमुङ मिसिन्‍च्‍येते जुनी तेराला परमेश्‍वरगी छाने खाबाते मिओनगीचेन येशूला विश्‍वास खिताला स्‍यूसुङ।

शक्ति काम 16:14

थेबे नाङ परमेश्‍वरला माने खित्‍कान्‍ते लिडिया सिराज्‍यीगोङ ओताक्‍वा। थे थिआटीरा सिराते सारगी मि ओतान। थे मोर्मुते रंग ग्‍यापाते आउदी दामीते खोलाक बेपार खित्‍कान्‍ते मि ओतान। प्रभु येशूकी थे फेम्‍मे मिला पावलगी साबाते बातओन लेमु खाला ङेन्‍च्‍ये सेम बिन्‍देकी थेकी लेमु खाईन थे बात ङेन्‍सुङ।

शक्ति काम 17:11

थेरू यहूदीओनगीचेन थिस्‍सलोनिकादु ओतातेबेकी च्‍योक मेलेबा मिक्‍किता खाईन पावलगी लापाते येशू बात लेमु खाईन ङेन्‍सुङ। थेमे थेकी लापाते बात परमेश्‍वर बातला टिबाते बातताङ डिइकाना मिडिक्‍का सिन थेबेकी ङीमे ठाङमा परमेश्‍वर बात आउदी खाईन पढे खाईन तासुङ।

शक्ति काम 17:32

पावलगी परमेश्‍वरगी स्‍याप्‍ते मिला सोम्‍बो लोक्‍पा ओत सानामेई थेरू ओताते कोई कोई मिकी “दोक बादोङ चुक खाला ओङगीतेरो,” सिन थेला आउदी खाईन खिस्‍यी खासुङ। तर कोईकीचेन थेला “दि बात ङ्योकोनला था तिरीङ पालोई लाप्‍ला नाङ,” सिन सासुङ।

शक्ति काम 2:41

पत्रुस बात ङेन्‍कान्‍तेबाला पत्रुसबेकी छ्युला लुगीन बप्‍तिस्‍मा बिन्‍सुङ। थेबा मेन्‍दा हजार सुमजो ओतान। थोक खाईन थे छोमु थेबाङ येशूला विश्‍वास खित्‍कान्‍ते मिओनताङ थपे खासुङ।

शक्ति काम 8:14

थेमे यरूशलेमदु ओताते येशू ख्रीष्‍टकी खटे खाबाते मिओनगी सामरियादु ओताते मिओनगीङ परमेश्‍वर बात ङेन्‍दुक्‍लो सिरा थोसुङ। थोगी थेबेकी खोपरोङ नाङदुई पत्रुसताङ यूहन्‍नाला सामरियापा तार ताङसुङ।

रोमी 10:17

बात चुक ईन्‍दे सासीन सुइँदेकी ख्रीष्‍टकी बात लाप्‍कीन बिन्‍नामेई थे थोला मिओनगी येशू ख्रीष्‍टला विश्‍वास खित्‍च्‍येते ईन।

२ कोरिन्‍थी 3:18

प्रभु ख्रीष्‍टकी ङुरूङ सेम खुदुक जोकीन बिन्‍नामेकी ङुरूङगी सुङताङ छ्याःङ बात बोङा माफाबो। ङुरूङला ताला मिओनगी ख्रीष्‍टताङ चुक छ्येज्‍यीक शक्ति ओता ईन्‍दाका सिन छ्या स्‍येक्‍यो। थेकी ङुरूङला थे खोरोङ च्‍योकराङ लेमु जोइन गाल्‍नामेई ङुरूङ झन झन प्रभु ख्रीष्‍ट च्‍योकराङ लेमु डुइन डुइओ। ङुरूङला दोक खित्‍कान्‍ते प्रभु ख्रीष्‍ट ईन। थेत्ताङ परमेश्‍वर आत्‍मा दोक्‍पोईराङ ईन।

गलाती 4:14

थेजीन ङा थोक खाईन नाबा ओत्‍सीनोङ ख्‍योकोनगी ङाला छ्यि चुक मेलेबा खाईन नाला दुका सिराच्‍योक माक्‍यासुङ, ङिङमारोङ माक्‍यासुङ। बरू ख्‍योकोनगीनी खेराङ दोन्‍दु परमेश्‍वर दूत वाबा च्‍योकराङ खाईन ङाला लेमु खाबा ओतान। दूत छेतकामा मेन, येशू ख्रीष्‍ट थे खोरोङराङ ख्‍योकोन ओत्‍सादु वाबा छेत खाईन ङाला मान खाबा ओतान।

कलस्‍सी 1:6

ख्‍योकोनला दि बात लाप्‍कीन बिन्‍दा ओत। सा लुङबा खाङराङ दि बात फैले खिन डुइन ओत। थेमे दि बात ङेन्‍गीन झन झन मि काल्‍बेईकी लेमु काम खिन दुक। गा लाङच्‍येते बात थोबा छोमुमेई थेमे परमेश्‍वरगी दया खिओ सिन लेमु खाईन छ्या स्‍येनामेई ज्‍येन ज्‍येनगी च्‍योकराङ खाईन ख्‍योकोनगीङ लेमु काम खिताला स्‍यूबाते ईन।

हिब्रू 4:12

च्‍यिला सासीन परमेश्‍वर बातकी छ्य्‌वापेई मिओनगी जुनी ङेत्‍क्‍यो। दि बातकी छ्य्‌वापेकी परमेश्‍वरगी मि नाङ काम खिओ। ठाउँ ङिकारपा धार खाबाते आउदी नोम्‍बोते तरवारगी मिला रोपे खासीन दोन्‍नापेई ल्‍हाकनापासाकराङ फोत तोला थुप्‍क्‍यो थेमे रूबाताङ जोर्नीतेबा टाल्‍ला नाङदु ओताते काङ समेत देन्‍दा थुप्‍क्‍यो। होदोक्‍ते तरवार भन्‍दाङ परमेश्‍वर बातकी छ्य्‌वापेई परमेश्‍वरगी खित्‍च्‍येते काम खापान खापान छ्ये ईन। दि बातकी छ्य्‌वापेईराङ सुइँदेकी खाबाते कामताङ बात मिकी दाक्‍पोनगी खाबाते ईन्‍दाना परमेश्‍वर आत्‍मेकी खित च्‍युताते ईन्‍दे सिन डेला थुप्‍क्‍यो थेमे सुई च्‍यि विचार खिन दुका, मि सेमगी नाङ लेमु मेलेबा चुक दुका सिनोङ गाङे लेमु खाला डेला थुप्‍क्‍यो।

हिब्रू 4:2

मोशे पालो मिओनला च्‍योकराङ ङुरूङलाङ गा लाङच्‍येते बात लापा ओत। थे बात थोसीनोङ थेबाला थे नोमुङ माथोबा छेतराङ ओङसुङ। च्‍यिला सासीन थेबेकी परमेश्‍वरगी जमान खाबा च्‍योकराङ खाला खोपरोङला ढुक्‍क खाला देत ज्‍युत्‍क्‍यो सिन पत्ते माक्‍यासुङ।

याकूब 1:18

परमेश्‍वरगीराङ ङुरूङला सत्‍यते बात छ्या स्‍ये च्‍युत्‍कीन थे खोरोङ फुज्‍युङ फुमु जोसुङ। दोक खाईन थेकी थे खोरोङगी जोबाते गाङे नाङ ङुरूङलाचेन थेला चढे खाबाते साम्‍बाते बाली च्‍योक जोसुङ।

१ पत्रुस 1:23

परमेश्‍वरगी ख्‍योकोनला लोक्‍ला केर ज्‍युताच्‍योक खाईन साम्‍बाते जुनी बिन्‍दा ओत। दि काम थेकी थे खोरोङ बातकी छ्य्‌वापेई खाबाते ईन। पालोई स्‍यिला डोच्‍येते मि छ्य्‌वापेई फिजा केबाच्‍योक मेन्‍देकी नोमुङ फरक परे मिक्‍किच्‍येते थे खोरोङ बातकी छ्य्‌वापेई परमेश्‍वरगी ख्‍योकोनला दि साम्‍बाते जुनी बिन्‍दाते ईन। थे खोरोङ बातकी छ्य्‌वापेई परमेश्‍वरगी मि नाङ काम खिओ, परमेश्‍वर बातला जे साला दुक थे पक्‍काराङ ओङगो।

१ पत्रुस 1:25

तर प्रभु परमेश्‍वर बातचेन नोमुङ फरक परे मिक्‍किओ,” सिन साला दुक। ख्‍योकोनला लाप्‍कीन बिन्‍दाते गा लाङच्‍येते बादोङ होदि परमेश्‍वर बातराङ ईन।

१ पत्रुस 2:2

बरू बालकते फिजेकी याङ याङ नुमा थुङा सेम खाबाच्‍योक खाला ख्‍योकोनगीङ परमेश्‍वर बात ङेन्‍ला थेरू खि साबा साबा खित्‍च्‍ये छ्य्‌वापाकामा सेम खि। परमेश्‍वर बातचेन मि बात मेन्‍देकी गाङे सत्‍यते बात ईन। दि बात ङेन्‍ला थेरू खि साबा च्‍योकराङ खिन गाल्‍नामेई ख्‍योकोन मेलेबा काम खिता ताङला पाको डुइओ।

२ पत्रुस 3:2

परमेश्‍वर बात खित्‍कान्‍ते मिओनगी गोमाका साबाते बाततेबा थेमे ङुरूङला पापदुकी डेल्‍कान्‍ते प्रभु येशू ख्रीष्‍टकी खि साबाते थेकी खटे खाबाते मिओनगी खेराङला लाप्‍कीन बिन्‍दाते बातओन ख्‍योकोनगी नोमुङ टोक माज्‍येत।

१ यूहन्‍ना 3:3

तिरी पक्‍काराङ दोक ओङगो सिन आश खाला देत्‍कान्‍ते मिकीचेन ख्रीष्‍टकी च्‍योकराङ मेलेबा काम सिराते छ्याःङ मिक्‍किता खाला देत्‍क्‍यो।