१ थिस्‍सलोनिकी 1:5 - जिरेल

⁵ च्‍यिला सासीन ङ्योकोनगी लोप्‍च्‍येते गा लाङच्‍येते बातचेन मि बातकामा मेन्‍देकी थे बातकी छ्य्‌वापेई परमेश्‍वरगी ख्‍योकोन नाङ छ्ये छ्ये शक्ति काम खासुङ। थे बात पक्‍काराङ सत्‍यते ईन सिन परमेश्‍वर आत्‍मे छ्य्‌वापेई लेमु खाईन छ्या स्‍येबेकी ङ्योकोनगी थे बात ख्‍योकोनला लेमु खाईन लोपा थुपाते ईन। थेजीन ख्‍योकोनताङ देत्‍जीन ख्‍योकोनला लेमु ओङस्‍यीत सिन ङ्योकोनगी चुक चुक खाबा ओताने सिन ख्‍योकोनला गाङे छ्या ओतेकी ङ्योकोनगी छ्याःङ सिरा माफाप्‍तासीन।

१ थिस्‍सलोनिकी 1:5 Iomraidhean Croise

मर्कूस 16:20

थोक खाईन थे स्‍वर्गने गाल्‍नामेकी चेलातेबेकी गाङेपा गाल्‍गीन गा लाङच्‍येते बात मिओनला लोपाला स्‍यूसुङ। थोक खित्‍जीन प्रभु येशूकी थेबाला स्‍येतताङ बुद्धि बिन्‍सुङ। थेमे थेबेकी लापाते बात सत्‍यते ईन सिन मिओनगी छ्या स्‍येस्‍यीत सिन थेकी थेबाला अचम्‍बते कामओन खित च्‍युत्‍सुङ। आमेन।

लूका 1:1

परमेश्‍वरगी ङुरूङ नाङ चुक चुक काम खासुङा, च्‍यि च्‍यि ओङसुङा सिरच्‍येते बात मि काल्‍बेईकी टिबा ओत।

शक्ति काम 11:21

थोक खाला बात लोपाला प्रभु येशूकी थेबाला आउदी खाईन आशी बिन्‍सुङ। थेमे थेरू मि काल्‍बेईकी प्रभु येशूला विश्‍वास खाईन थे छ्य्‌वापा लै खासुङ।

शक्ति काम 16:14

थेबे नाङ परमेश्‍वरला माने खित्‍कान्‍ते लिडिया सिराज्‍यीगोङ ओताक्‍वा। थे थिआटीरा सिराते सारगी मि ओतान। थे मोर्मुते रंग ग्‍यापाते आउदी दामीते खोलाक बेपार खित्‍कान्‍ते मि ओतान। प्रभु येशूकी थे फेम्‍मे मिला पावलगी साबाते बातओन लेमु खाला ङेन्‍च्‍ये सेम बिन्‍देकी थेकी लेमु खाईन थे बात ङेन्‍सुङ।

शक्ति काम 2:33

थोक खाईन सोम्‍बो लोक्‍नामेकी परमेश्‍वरगी थेला छ्येज्‍यीक मान बिन्‍गीन थे खोरोङ सामे छ्य्‌वापा ज्‍याक्‍पा ओत। थे खोरोङगी मिओनला तेरग्‍यो साबाते परमेश्‍वर आत्‍मा तेरच्‍येते जिम्‍मा थेकी येशूला बिन्‍सुङ। आबातेकी जिम्‍मा बिन्‍दा च्‍योकराङ खाईन थेकी ङ्योकोनला परमेश्‍वर आत्‍मा बिन्‍सुङ। ख्‍योकोनगी थरिङ थोङातेताङ थोबाते बात ङ्योकोनगी परमेश्‍वर आत्‍मा ङेतेकी खित्‍सादुराङ ईन।

रोमी 1:16

गा लाङच्‍येते बात लोपाला ङाला सुङताङ छ्याःङ ङोचा मालाङदुक। च्‍यिला सासीन दि बातला परमेश्‍वरताङ चुक छ्येज्‍यीक शक्ति ओते सिरच्‍येते बात ओत। दि बात ङेन्‍ला येशूला विश्‍वास खित्‍कान्‍ते मिबरी गाङेला परमेश्‍वरगी पापदुकी डेल्‍ग्‍यो। दि पापदुकी डेल्‍च्‍येते काम परमेश्‍वरगी गोमा यहूदीओनला खासीनोङ ज्‍येन ज्‍येन जातकी मिलाङ खिओ।

रोमी 15:13

थे खोरोङगी साबाच्‍योक खिओ सिन आश खाला देत ज्‍युत्‍कान्‍ते परमेश्‍वरराङ ईन। थेला विश्‍वास खित्‍कान ईन्‍देकी थेकी ख्‍योकोन गाङेला आउदी खाला गा खिन थेमे डिक्‍ला थुन्‍ला देत ज्‍युत्‍स्‍यीत सिन ङा प्रार्थना खिओ। थेकी थोक खानामेईचेन परमेश्‍वर आत्‍मे शक्ति छ्य्‌वापेकी ख्‍योकोन था परमेश्‍वरगी ङुरूङला खिओ साबाच्‍योक खिओतराङ सिन छ्याःङ शंका मिक्‍किता खाला झन आश खाला गुला देता थुप्‍क्‍यो।

रोमी 2:16

ङे साबाते बातओन दोकराङ ईन सिन था तिरी न्‍याय खिते छोमु छ्या स्‍येक्‍यो। थे छोमु परमेश्‍वरगी मि गाङे सेमगी बात खाङ लेमु ईन्‍दे, खाङ मेलेबा ईन्‍दे सिन येशू ख्रीष्‍टला डेल च्‍युत्‍ला न्‍याय खित ज्‍युत्‍क्‍यो। था ङीमाई दोक ओङगो सिनचेन ङे लोप्‍कीन ओताते गा लाङच्‍येते बातला साबा ओत।

१ कोरिन्‍थी 1:24

जे ईन्‍सीनोङ परमेश्‍वरगी थे खोरोङ दोन्‍दु स्‍योक सिन काताङाते मिओनगीचेन यहूदी ईन्‍स्‍यीत, ग्रीक ईन्‍स्‍यीत गाङेकी ख्रीष्‍टला ताला परमेश्‍वरताङ चुक छ्येज्‍यीक शक्ति ओते थेमे थे चुक बुद्धि पुरे खाला काम खित्‍कान्‍ते ईन्‍दे सिन छ्या स्‍येक्‍यो।

१ कोरिन्‍थी 10:33

ङाचेन ङाराङ विचारकामा मिक्‍किता खाला मि गाङेराङ येशूला विश्‍वास खाला पापकी सजायदुकी थारस्‍यीत सिन थेबा गाङेला लेमु ओङच्‍येते कामकामा खिओ।

१ कोरिन्‍थी 3:16

ख्‍योकोन खेराङराङ परमेश्‍वर मन्‍दिर ईन थेमे परमेश्‍वर आत्‍मा ख्‍योकोन नाङ देत्‍क्‍यो सिन च्‍यि ख्‍योकोनला छ्या मेत?

१ कोरिन्‍थी 3:6

ङे ख्‍योकोन नाङ खाबाते कामचेन सुइँदेकी खइँदे बिरूवा जुच्‍येते च्‍योक ओतान। थेमे अपोल्‍लोस कामचेन थे बिरूवाला छ्यु लुच्‍येते च्‍योक ओतान। ङ्योकोनगी दोक खासीनोङ थे बिरूवाला छार ज्‍युत्‍कान्‍तेचेन परमेश्‍वरराङ ईन।

१ कोरिन्‍थी 4:20

परमेश्‍वर राज्‍यदु बातकामा खाला छ्याःङ काम लै मिक्‍किओ। परमेश्‍वर शक्ति छ्य्‌वापेई काम खाला तेन्‍दा फाप्‍क्‍यो।

१ कोरिन्‍थी 9:14

होदोकराङ खाला गा लाङच्‍येते बात लोप्‍कान्‍तेबेकीङ थे कामगी छ्य्‌वापेकीराङ खोपरोङ जीउ पाला खित्‍स्‍यीत सिन प्रभु येशूकी कोता ओत।

२ कोरिन्‍थी 3:6

थेकीराङ ङ्योकोनला थे खोरोङगी मिओनताङ तिरी खिओ सिन साबाते जमान बात ज्‍येनला लोप सिन जिम्‍मा बिन्‍सुङ। ङ्योकोनगी लोप्‍च्‍येते होदि जमान बातचेन थाङबो मोशे पालोला दोई पाटीला टिबाते परमेश्‍वर नियम च्‍योक्‍ते मेन, परमेश्‍वर आत्‍मे बात ईन। होथे दोई पाटीला टिबाते नियमला खि साबाच्‍योक मिक्‍किकान्‍ते मिओनचेन पापकी सजाय ङेत्‍ला स्‍यिइओ। परमेश्‍वर आत्‍मेकीचेन मिओनला नोमुङ मिसिन्‍च्‍येते जुनी तेरग्‍यो।

गलाती 2:2

परमेश्‍वरगीराङ ङाला थेने ग्‍युक सिन साबेकी ङे थेने गाल्‍गीन येशू ख्रीष्‍ट मिओनगी छ्येते मि ईन साबाते मिओनताङ ठेता खाबाप। थेबाताङकामा ठेत्‍कीन ङाराङगी ज्‍येन ज्‍येन जातकी मिला गा लाङच्‍येते बात लोप्‍जीन चुक चुक सिन लोप्‍कीते सिन ङे थेबाला गाङे साबाप। ङाराङगी लोप्‍कीन ओताते बातला खइँदा बात ठाल्‍दुक सिता ना खइँदा बात मायाङसुङ साला ङाराङगी दुक्‍पा खाईन खाईन खाबाते थेमे खिन ओताते काम थाराङ खेरोला मोन्‍डोस्‍यीत सिनराङ ङे थेबाताङ थोक खाईन बात खाबाप।

गलाती 5:5

ङुरूङनी परमेश्‍वर नियम ङेन्‍देकी मेन्‍गीन येशू ख्रीष्‍टला विश्‍वास खाबेकीका परमेश्‍वरगी दाक्‍पोनला दोषी मेन सिन साबाते ईन सिन पत्ते खिओ। परमेश्‍वर आत्‍मा ङेता ओतेकी था तिरी परमेश्‍वरगी दाक्‍पोनला पक्‍काराङ दोषी मेन सिओ सिन ङुरूङ आश खाला गुलाराङ देत्‍क्‍यो।

एफिसी 2:10

येशू ख्रीष्‍टकी खाबाते कामगी खित्‍सादु परमेश्‍वरगीराङ ङुरूङला लेमुते काम खिता थुप्‍स्‍यीत सिन साम्‍बाते जुनी बिन्‍गीन खुदुक जोबाते ईन। ङुरूङगी खिता फाप्‍च्‍येते लेमुते कामतेबा थेकी गोमाकाराङ ठीक खाईन ज्‍याक्‍पा ओतान।

एफिसी 3:20

ङुरूङ नाङ काम खिन ओताते छ्येज्‍यीक शक्ति छ्य्‌वापेई परमेश्‍वरगी ङुरूङगी थेला नाङ साबा भन्‍दाङ काल्‍बेई तेरग्‍यो। थेमे ङुरूङगी विचार खाबा भन्‍दा खापान खापान छ्ये काम खिता थुप्‍क्‍यो।

फिलिप्‍पी 2:13

परमेश्‍वरगीराङ खेराङ नाङ काम खित्‍च्‍येते ईन्‍देकी ख्‍योकोनला थेला मन परे खित्‍च्‍येते काम खिता सेम लाङगो। थेमे थेकीराङ ख्‍योकोनला थोक्‍ते काम खिताला शक्तिङ तेरग्‍यो। ख्‍योकोन थे खोरोङगी ज्‍वा चालाच्‍योक लेमु मि ओङस्‍यीत सिन थेकी होदोक खाला ख्‍योकोन नाङ काम खिओ।

फिलिप्‍पी 4:9

गा लाङच्‍येते बात लोप्‍जीन ङे खेराङला लापाते खेराङगी थोबाते बात ङेन्‍गीन देत। ङे चुक चुक खाबा ओताने ख्‍योकोनगीङ ङे च्‍योकराङ खि। थेमे सेमला ढुक्‍क लोङकान्‍ते परमेश्‍वर ख्‍योकोनताङ ङ्योम्‍बुराङ देत्‍क्‍यो।

कलस्‍सी 2:2

ख्‍योकोन थेमे होथेबा ज्‍येन गाङेकी आँट ङेत्‍ला दोक्‍पोईकी ज्‍येनज्‍यीकला ङिङज्‍ये खिन गाङेराङ सेमज्‍यीकराङ खाला डिक्‍ला देत्‍स्‍यीत थेमे परमेश्‍वरगी गोमा सुङलाङ छ्या स्‍ये च्‍युता मेताते बात च्‍यि ईन्‍दाका सिन ख्‍योकोन गाङेकी लेमु खाला छ्या स्‍येला पूरो खाला खोबा थुप्‍स्‍यीत सिनराङ ङा दोक दुक्‍पा खाला खाला काम खिन ओत। होथे बात लेमु खाला छ्या स्‍येच्‍या साबातेचेन ख्रीष्‍टला छ्या स्‍येच्‍येतेराङ ईन।

१ थिस्‍सलोनिकी 2:13

थेमे ङ्योकोन जहिलेङ दि बातकी लाईदुङ परमेश्‍वरला धन्‍यवाद सिओ। च्‍यि सासीन ङ्योकोनगी परमेश्‍वर बात लोप्‍जीन थे बात मिकी जोबाते मेन्‍दाक्‍वा, परमेश्‍वर बातराङ दुका सिन ख्‍योकोनगी ङेन्‍सुङ। ईन्‍दाबोङ थे बातचेन परमेश्‍वर बातराङ ईन। येशूला विश्‍वास खित्‍कान ख्‍योकोन नाङ परमेश्‍वरगी होथे बातकी छ्य्‌वापेईराङ काम खिन ओत।

२ थिस्‍सलोनिकी 2:14

ख्‍योकोनला थोक खिताला ङ्योकोनला गा लाङच्‍येते बात लोप च्‍युत्‍कीन परमेश्‍वरगी ख्‍योकोनला थे खोरोङ दोन्‍दु स्‍योक सिन काताङाते ईन। दोस्‍यिककामा मेन, ङुरूङ प्रभु येशू ख्रीष्‍टला मान बिन्‍गीन छ्ये जोबा च्‍योकराङ खाला परमेश्‍वरगी था ख्‍योकोनलाङ मान बिन्‍ला थे खोरोङगी ज्‍वा चाला च्‍योकराङ लेमु जोइओ।

२ तिमोथी 2:10

दोक ईन्‍देकी परमेश्‍वरगी थे खोरोङ मि सिन छाने खाबाते मिओनला लेमु ओङस्‍यीत सिनराङ ङा जस्‍तो दुक्‍पाङ भोगे खिओ। येशू ख्रीष्‍टकी थेबालाङ पूरो खाला पापदुकी डेल्‍स्‍यीत थेमे सधैँ परमेश्‍वरताङ स्‍वर्गने देता ङेत्‍स्‍यीत सिनराङ ङा दोक खिओ।

२ तिमोथी 2:8

थेमे गेल्‍बो दाऊद सन्‍तान नाङ केबाते येशू ख्रीष्‍टला सधैँ सम्‍झे खिन देत। परमेश्‍वरगी थेला स्‍यिसादुकी सोम्‍बो लोक्‍पा ओत। मिओनला ङे लोप्‍कीन ओताते गा लाङच्‍येते बादोङ दिराङ ईन।

हिब्रू 10:22

बात दोक दोक ईन्‍देकी छ्याःङ शंका मिक्‍किता खाला परमेश्‍वरला विश्‍वास खिन सेमदु पाप सिराते छ्याःङ मोज्‍योबा खाला ङुरूङ थे दोन्‍दु ड्वा फाप्‍क्‍यो। च्‍यिला सासीन येशू ख्रीष्‍टकी खाबाते कामगी खित्‍सादु ङुरूङ पाप गाङे माफ ओङेकी था ईन्‍सीन ङे पाप पूरो खाईन माफ ओङसुङ सिन ङुरूङ ढुक्‍क खाला देता थुप्‍च्‍या ओङा ओत। थेमे चङगेते छ्युईकी ठु खाईन चोके खाबाते मि ओङा ओत।

हिब्रू 6:11

स्‍यि स्‍यिसाकराङ ख्‍योकोन गाङेकी दोकराङ खिन देत्‍स्‍यीत सिरच्‍येते ङ्योकोन सेम ओत। दोक खिनराङ देत्‍सीन परमेश्‍वरगी खेराङला तेरग्‍यो सिन साबातेबा पक्‍काराङ ङेत्‍क्‍यो सिन ख्‍योकोनगी आश खाईन गुकीन देतातेबा गाङे ङेत्‍क्‍यो।

१ पत्रुस 1:12

परमेश्‍वरगी खोपरोङला सिर च्‍युताते होदि बातओन थेबा खोपरोङ लाईदु मेन्‍देकी ख्‍योकोन लाईदु ईन सिन परमेश्‍वरगी थेबाला छ्या स्‍ये च्‍युता ओतान। थेबेकी साबाते होथे बाततेबा थरिङोला गा लाङच्‍येते बात लोप्‍कान्‍ते मिओनगी ख्‍योकोनला लाप्‍कीन बिन्‍दा ओत। दि गा लाङच्‍येते बात परमेश्‍वरगी स्‍वर्गनेकी ताङाते परमेश्‍वर आत्‍मे छ्य्‌वापेई थेबेकी ख्‍योकोनला लाप्‍कीन बिन्‍दा ओत। होदि बातओन परमेश्‍वर दूतओनगीङ आउदी खाला छ्या स्‍येबा सेम खिओ।

१ पत्रुस 1:3

ङुरूङ प्रभु येशू ख्रीष्‍ट आबा परमेश्‍वरते जय जय खिइ। थेकी ङुरूङला आउदी ङिङज्‍ये खाईन लोक्‍ला केर ज्‍युताच्‍योक खाईन साम्‍बाते जुनी बिन्‍सुङ। थेकी येशू ख्रीष्‍टला स्‍यिसादुकी सोम्‍बो लोक्‍पा ओतेकी थेकी खिओ साबाच्‍योक पक्‍काराङ खिओ सिन ङुरूङ आश खाईन गुकीन देताते बात नोमुङ फरक परे मिक्‍किओ।

१ पत्रुस 5:3

ख्‍योकोन खेराङचेन थेबे मालिक ईन सिराच्‍योक खाला छ्ये खिता माछोल। थेबेकीङ खेराङगी च्‍योकराङ खिता लोप्‍स्‍यीत सिन लेमुते लुई गोठालेकी लुक लेमु खाईन ताबाच्‍योक खाला थेबाला लेमु खि।

२ पत्रुस 1:10

थोगी आज्‍यो न्‍वावे, परमेश्‍वरगी खेराङला छाने खाईन थे खोरोङ दोन्‍दु स्‍योक सिन काताङाते पक्‍काराङ ईन सिन छ्या स्‍येबाला ख्‍योकोनगी ङे थाल्‍लासाक साबाच्‍योक खिनराङ देत। दोक खिन देत्‍सीन ख्‍योकोनगी मेलेबा काम मिक्‍किओ।

२ पत्रुस 1:19

ङ्योकोनगी थोङातेताङ थोबाते होथे बात ताला परमेश्‍वर बात खित्‍कान्‍तेबेकी गोमाका साबा ओताते बाततेबा पक्‍काराङ ईन सिन सिरा थुप्‍क्‍यो। थेबेकी साबाते बातओन ङेन्‍गीन देत। दोक खासीन बत्ती पारनामेकी नाम्‍दाक ओङाच्‍योक खाला खेराङगी खोबा फाप्‍च्‍येते बाततेबा लेमु खाला खोबा थुप्‍क्‍यो। येशू ख्रीष्‍ट ग्‍युरगीन मावाथुप ख्‍योकोनगी दि बाततेबा ङेन्‍गीन देत। थेचेन ङोमु पाखाला स्‍यारच्‍येते कार्मा ईन।