१ पत्रुस 5:9 - जिरेल

⁹ शैतानगी जे सासीनोङ थे बात ङेनराङ माङेन, जति दुक्‍पा बिन्‍सीनोङ सेम मेसेता खाला देत थेमे येशू ख्रीष्‍टला विश्‍वास खिनराङ देत। दि सा लुङबा खाङ ओताते खेराङ आज्‍यो न्‍वाकीङ ख्‍योकोनगी च्‍योकराङ दुक्‍पा भोगे खिन देता ओत सिरच्‍येते बात टोक माज्‍येत।

१ पत्रुस 5:9 Iomraidhean Croise

लूका 22:32

तर ज्‍यीबा माकेत शिमोन। शैतानगी लुजीन खुई ङाला विश्‍वास खिता मोतोङस्‍यीत सिन ङे परमेश्‍वरला प्रार्थना खाबाप। था खोरोङ याङराङ ङे छ्य्‌वापा लै खानामेई दुरू खोरोङताङ ओताते आज्‍यो न्‍वाओनला ङाला विश्‍वास खिन देताला आँट बिन,” सिन सिदुक।

यूहन्‍ना 16:33

ङे खित्‍सादु ख्‍योकोन सेम ढुक्‍क खाला देता थुप्‍स्‍यीत सिनराङ ङे दि बाततेबा साबाते ईन। दि सा लुङबे मिओनगी ख्‍योकोनला तेरासम्‍म दुक्‍पा तेरग्‍यो। थोक ईन्‍सीनोङ ख्‍योकोन हरेस मासा। दि सा लुङबादु ओताते जे ईन्‍सीनोङ, जो ईन्‍सीनोङ गाङेला ङे ग्‍याल्‍गीन सिन्‍दा ओत,” सिन सिदुक।

शक्ति काम 14:22

थेपा ग्‍युरला डोजीन थेबेकी गोमा खोपरोङ गालाते होथे सार सारला ओताते येशू चेलाओनला “जस्‍तोराङ ओङसीनोङ प्रभु येशूला विश्‍वास खिन देता मातोङ। परमेश्‍वर राज्‍यने ड्वाप्‍ला ङुरूङगी दुरू याङ याङ दुक्‍पा ङेत्‍क्‍यो सिरच्‍येते बात टोक माज्‍येत,” सिन आँट तेरगीन गाल्‍सुङ।

१ कोरिन्‍थी 10:13

थेमे दुक्‍पेकी कि खइँदा कारणगी खित्‍सादु मिला खइँदा दोक खिइ खिइ सिराच्‍योक लाङच्‍येते ख्‍योकोनलाकामा ओङच्‍येते मेन। परमेश्‍वर थे खोरोङगी खिओ साबा च्‍योकराङ खित्‍कान्‍ते ईन्‍देकी होथोक खाला खेराङला खिइ खिइ सिराच्‍योक लाबाते माक्‍याबाला ओङराङ मेङगो सिराच्‍योक ओङे बेलाला थेकी ख्‍योकोनला पाप खित्‍सादुकी रोके खिओ। दोक्‍ते बेलाला थेकी ख्‍योकोनला पाप खिता माफाप्‍च्‍येते शक्ति बिन्‍ला थार ज्‍युत्‍क्‍यो।

एफिसी 4:27

थोक माक्‍यासीन शैतानगी ख्‍योकोनला ङ्ये ज्‍युत्‍च्‍येते मौका ङेत्‍क्‍यो। ख्‍योकोनगी थेला थोक खित्‍च्‍येते मौका मातेर।

एफिसी 6:16

दोस्‍यिककामा मेन, येशू ख्रीष्‍टला विश्‍वास खिन देता नोमुङ मातोङ। थेला विश्‍वास खिन देत्‍च्‍येतेचेन लाःक्‍तु ढाल खुराते ईन। ढाल खुरा ओत्‍नामेई ख्‍योकोनला मेलेबा खित्‍कान्‍ते शैतानगी टुप्‍पोदु मे पारगीन ग्‍यापाते दा गाङे रोके खाला थे मे सेता थुप्‍क्‍यो।

कलस्‍सी 2:5

ङा ख्‍योकोनताङ ङ्योम्‍बु मेत्‍सीनोङ ख्‍योकोनला चुक ओताका, च्‍यि खिन ओताका सिन आउदी खाला सम्‍झे खिओ। ख्‍योकोन डिगीन थुन्‍गीन देताते थेमे ख्रीष्‍टला विश्‍वास खिन देता ओताते बात सम्‍झे खित्‍जीनचेन ङाला गा लाङगीदुक।

१ तिमोथी 6:12

येशू ख्रीष्‍टला विश्‍वास खाईन ङेन्‍दाते बात ङेन्‍दा मोतोङा खाला जति दुक्‍पा ओङसीनोङ थे बातला साबा च्‍योकराङ खि। नोमुङ मिसिन्‍च्‍येते जुनी ङेत्‍स्‍यीत सिन परमेश्‍वरगी खोल्‍ला थे खोरोङ दोन्‍दु स्‍योक सिन काताङाते ईन मेन? थेजीन खुई मि काल्‍बेई ङोन्‍दु ङा प्रभु येशू ख्रीष्‍टला विश्‍वास खिओ सिनोङ साबा ओत। था थे नोमुङ मिसिन्‍च्‍येते जुनी खुई खोरोङ लाःक्‍तुकी स्‍योर माज्‍युत।

२ तिमोथी 3:12

ईन्‍दालाचेन येशू ख्रीष्‍टताङ जीउज्‍यीकराङ ओङगीन परमेश्‍वरला मन परे खित्‍च्‍येते काम खिता छोल्‍कान्‍ते मि गाङेला ज्‍येनगी दाक खेदापानी खिओ।

२ तिमोथी 4:7

दुक्‍पा किम्‍मु जस्‍तो ओङजीनोङ ङे ङाराङ काम लेमु खाईन खाबा ओत, बत्ते खित्‍कान्‍ते मि ख्‍योला फाप्‍सासाक लेपाच्‍योक खाईन ङेङ ङाराङगी खिता फाप्‍च्‍येते काम गाङे खाईन सिन्‍दा खाबा ओत। थेमे येशू ख्रीष्‍टला विश्‍वास खाईन ङेन्‍दाते बात ङे जुनी खाङ ङेन्‍गीनराङ देताप।

हिब्रू 11:33

थेबे नाङ कोईकी परमेश्‍वरगी खोपरोङला ग्‍याल ज्‍युत्‍क्‍यो सिन थेला विश्‍वास खाईन लडाइँ खाईन लुङबा लुङबाला ग्‍याला ओतान, न्‍याय निसाफ खित्‍कान्‍तेबेकी सुङलाङ काका पाका मिक्‍किता खाईन न्‍याय खाबा ओतान, परमेश्‍वरगी तेरग्‍यो साबातेबा ङेता ओतान। थेला विश्‍वास खाईन कोईचेन च्‍येनगी खादुकी समेत थारा ओतान।

हिब्रू 12:8

परमेश्‍वरगी थे खोरोङ फुज्‍युङ फुमु गाङेला ताला लुक्‍यो। थेकी ताला मालुक्‍सीन ख्‍योकोननी परमेश्‍वर फुज्‍युङ फुमु ईनराङ मेन, थाराङ सुइँदे फुज्‍यीमा खुरगीन केबाते फिजा च्‍योक्‍तेका ईन।

याकूब 4:7

थोक ईन्‍देकी था ख्‍योकोनगी परमेश्‍वर अधीनला देत्‍ला थेकी खि साबा च्‍योकराङ खि। शैतानगी जे सासीनोङ थे बात ङेनराङ माङेन। दोक खानामेई ख्‍योकोनला दुक्‍पा तेरा ताङला शैतान दाक छ्योङगो।

१ पत्रुस 1:6

ख्‍योकोन बात दोक ईन्‍देकी ख्‍योकोन आउदी गा खिन देता थुप्‍क्‍यो। ईन्‍दालाचेन थरिङोला ख्‍योकोनगी परी परीतेन्‍दे दुक्‍पा भोगे खिता फाप्‍क्‍यो। ईन्‍सीनोङ दोक्‍ते दुक्‍पा खालि टिक्‍पी दिनगी लाईदुकामा ओङच्‍येते ईन।

१ पत्रुस 2:21

होदोक खाला दुक्‍पा भोगे खितालाराङ परमेश्‍वरगी ख्‍योकोनला थे खोरोङ दोन्‍दु स्‍योक सिन काताङाते ईन। ख्रीष्‍टकी ख्‍योकोन लाईदु थोई दुक्‍पा भोगे खासुङा सिन ख्‍योकोनला छ्याराङ ओत। थोक खाईन थेकी दुक्‍पा ओङजीन चुक खिता फाप्‍कीते सिन तेन्‍गीन बिन्‍दा ओतेकी ख्‍योकोनगीङ थेकी च्‍योकराङ खि।

१ पत्रुस 3:14

खेराङगी दोक खाला लेमु काम खित्‍जीनोङ सुइँदेकी ख्‍योकोनला दुक्‍पा तेरगीदुक सासीन ख्‍योकोन भाग्‍यमानी ईन। थोक खाला दुक्‍पा तेरकान्‍तेबाताङ ख्‍योकोनगी छ्याःङ ज्‍यीबा माकेत, सुर्ताङ खिता माफाबो।

१ पत्रुस 4:13

दोक्‍ते दुक्‍पा भोगे खिता फाप्‍जीन ख्‍योकोन गाका खि। च्‍यिला सासीन दोक ओङजीन ख्‍योकोनगी ख्रीष्‍टकी चुक दुक्‍पा भोगे खाबा ओता ईन्‍दाका सिन टिक्‍पी टिक्‍पी छ्या स्‍येक्‍यो। थेमे ख्रीष्‍ट था छ्येज्‍यीक शक्ति ङेत्‍ला दुरू ग्‍युरला ओङे छोमु ख्‍योकोनोङ आउदी खाला गा खिता ङेत्‍क्‍यो।

छ्या स्‍ये च्‍युताते बात 1:9

ङा ख्‍योकोन आज्‍यो यूहन्‍नाङ ख्‍योकोन च्‍योकराङ येशूताङ जीउज्‍यीकराङ ओङाते मि ईन। थोगी ङेङ ख्‍योकोनगी च्‍योकराङ खाईन दुक्‍पा ङेता ओत। थेमे ङाङ परमेश्‍वर राज्‍यदु ख्‍योकोनताङ ङ्योम्‍बुराङ देता ङेत्‍क्‍यो। जस्‍तो दुक्‍पा ङेत्‍सीनोङ ङाङ ख्‍योकोन च्‍योकराङ खपे खाईन देता ओत। ज्‍येनला परमेश्‍वर बात लापेकी थेमे येशू ख्रीष्‍ट सु ईन्‍दे, थेकी च्‍यि खिते सिन लापेकी खित्‍सादु ङाला समुन्‍द्रे किल्‍दु ओताते पत्‍मोस लुङबापा उरगीन ताङा ओतान।

छ्या स्‍ये च्‍युताते बात 6:11

थेमे थेबा गाङेला खोन्‍दाला कार्मुते खोलाक रेरे तेरगीनकामा “खेराङ च्‍योकराङ परमेश्‍वर काम खित्‍कान्‍ते थोरूम सेता बाँकी ओताते खेराङ आज्‍यो न्‍वालाङ ख्‍योकोनला च्‍योकराङ खाईन सेत्‍कीन मासिनथुप टिक्‍पी दिन गुकीन खि,” सिन सिदुक।

छ्या स्‍ये च्‍युताते बात 7:14

ङे थेला “दिबा सु ईन्‍दे सिन हजूर खोल्‍लाराङ छ्या ओत,” सिन सिरजीन थेकी “दिबाचेन आउदी छ्ये छ्ये दुक्‍पा खपे खाईन वाबाते मि ईन। दिबेकी खोपरोङ खोलाक लुई रीउकी ठाकला टुकीन दोक कार्मु जोबाते ईन।